Tawúratɩ na Injiila dɛ́ɛ fɔɔlɩ́nɩ MAATÉWU 15

1 Bɩlɛ́ bʊwɔ́rɔ́ nɛ́, ngɛ Faríízi‑dɩnáa na Mará wɩlɩɖáa waalɩɩná Yerusalɛ́m bɔkɔ́nɩ Yeésu‑jɔ́, ngɛ bɔɔbɔ́ɔ́zɩ yɩ sɩsɩ: 2 «Ngbaalá gɛ nyɛ́dɛ́ɛ wanbaaráa tónvúu caajáanáa‑dɛ́ɛ taáɖɛ? Káma badánzam banʊ́ʊ́zɩ naanɩ́ beɖi kíɖíím.» 3 Yeésu woobúsi wɛ sɩsɩ: «Mɩ́nyɔ́ɔ́ ní, we‑rɔ gɛ mɩ́nÿɩsɩnáa Ɩsɔ́ɔ‑dɛ́ɛ Mará mɩ́dɛ́ɛ taáɖɛ‑rɔ? 4 Káma Ɩsɔ́ɔ wɔɔdɔ́ sɩsɩ ɖɔɔzɩ ngɔɔ na njaa, ngɛ wɔɔdɔ́tɔ́ḿ sɩsɩ weení waalá ɩgɔɔ yáá ɩjaa láálɩ nɛ́ mɔɔ́na bakʊ yɩ. 5 Amá mɩ́nyɔ́ɔ́ mɩ́ndɔ́m sɩsɩ: "A naárʊ wɔɔdɔ́ ɩgɔɔ yáá ɩjaa sɩsɩ: wenbí máázɩ́ɩ sɩ malá nya kʊjɔɔwʊ na bɩsɩná nya nɛ́, mɔ́ɔ́gbɔ́ɔ bɩ malá Ɩsɔ́ɔ sarɔ́ɔ, 6 bidokúti bɩbɔ́ɔ́zɩ bʊdʊ́ʊ ɩɖɔ́ɔ́zɩ ɩjaa". Bɩlɛ́ gɛ mɩ́ɩ́dɛ́ɛ caajáanáa‑dɛ́ɛ taáɖɛ‑rɔ mɩ́njɔɔlɩ́ Ɩsɔ́ɔ‑dɛ́ɛ tɔ́m. 7 Munáávikíwá, anɖébi Esáya wɛná toovonúm waavʊ́ńdɔ́ḿ mɩ́rɔ́ sɩsɩ:

8 "Na ntɔɔ́nɩ gɛ zamɔ́ɔ kɩna kɩ́nÿaanáa máyɩ́ɖɛ,

amá kiwenbiré cɔɔ́ɔ na ma bolíni,

9 Faala gɛ bánlám sɩsɩ bɛ́nzɛɛ́ ma

káma wentí bánwɩlɩ́ɩ nɛ́ kɛ́ɛ ɩráa‑dɛ́ɛ Mará gɛ.''»

10 Ngɛ Yeésu waayáa zamɔ́ɔ ɩtɔ́ kɩ sɩsɩ: «Iwélesi ɩnɩ́ɩ kazɔ́ɔ. 11 Bɩdɛkɛ́ɛ wenbí bɩ́nzʊʊ́ ɩrʊ́ nɔɔ́‑daá nɛ́ wénÿelíi kʊ ɩvɛ́yɩ́ ɖacɩrɩ‑cɩrɩ, amá wenbí bɩ́nlɩɩ́ ɩnɔɔ́‑daá nɛ́ gɛ.» 12 Ngɛ Yeésu‑dɛ́ɛ wanbaaráa woogóduu ɩjɔ́ bɔtɔ́ yɩ sɩsɩ: «Nyáádɩ́lɩ́ sɩsɩ wentí nyááŋmátɩ nɛ́ tɩɩgʊ́sɩ Faaríízí‑dɩnáa laakáárɩ?» 13 Ngɛ woobúsi wɛ sɩsɩ: «Tɩɩwʊ́ wenkí rɩ́ŋa majaa weení ɩwɛ ɩsɔ́ɔ́dáá nɛ́ toɖúu kɩ nɛ́, bɛ́ngbɛzɩ́ɩ kɩ. 14 Iyéle wɛ, njɛma wéngeti kʊ njɛma. Ngʊ bɩlɛ́ gɛ a njɛm wéngeti kʊ njɛm, bɛlɛ́ɛ́nɩ́ bánzálɩɩ́ bɔɔwʊ́‑daá.»

15 Ńna gɛ Pétro sɩsɩ: «lɩzɩ́ ɖáa tɔ́m nyɛ́ɛ́gɛ́ɛ́zɩ tɩ ɖɔ́ nɛ́ tigutoluú.» 16 Ngɛ Yeésu sɩsɩ: «A bɩlɛ́ mɩ́nyɔ́ɔ́ ɖʊɖɔ mɩ́vɛ́yɩ́na tɩlɩ́ɩ ɖʊɖɔ? 17 Mɩ́ɩ́sɩ sɩsɩ wenbí rɩ́ŋa bɩ́nzʊʊ́ nɔɔ́‑daá nɛ́, bíndím lóódi‑daá gɛ na bɩlɩ́ɩ bɩɖɛ́ɛ ɖɩyáásʊ́‑daá? 18 Amá wenbí bɩ́nlɩɩ́ ɩrʊ́ nɔɔ́‑daá nɛ́ wánlɩɩná wenbiré‑daá gɛ. Ngɛ bɩlɛ́ binÿelíi kʊ gɛ ɩrʊ́ fɛ́yɩ́ ɖacɩrɩ‑cɩrɩ. 19 Bɩlɛ́ nɛ́ wenbiré‑daá gɛ lomaazɛ́ tɩtɛ ńná wánlɩɩnáa: bɛɛ ɩráa kʊ́ʊ, ɩrʊ́ ɩlɩ́ɩ ɩwaalʊ́ yáa ɩɖɛɛlʊ́ wɔ́rɔ́, wásángarɩ́tɩ, ŋmɩɩlɩ́m, seríya tɩtɛ ńgɩ, na ɩráa tʊ́ʊ́dɩ. 20 Wenbí bínÿelíi ɩrʊ́ fɛ́yɩ́ ɖacɩrɩ‑cɩrɩ nɛ́ nbɩlɛ́. Amá ɩrʊ́ iɖi kíɖíím ɩdasám ɩnʊ́ʊ́zɩ ténÿelí ɩdánlaḿ ɖacɩrɩ‑cɩrɩ.»

21 Yeésu waalɩ́ɩ ńna nɛ́, ngɛ wɛɛɖɛ́ɛ Tííri na Sidɔ́ɔ́nɩ fáráńdɩ́. 22 Ngɛ Kanáánɩ alʊ́ naárʊ ɩwɛ fáráńdɩ́ kɩḿ kɩdaá nɛ́ wɔɔgɔ́nɩ ɩjɔ́ wóngoó sɩsɩ: «Nɩɩ mágʊnyɔḿ Kʊ́bɔnɩ́, Ɖáwʊ́ɖa Biyaalʊ́. Zííni ɩbaná kɩ́njaarɩ́ mɛ́dɛ́ɛ aléeré.» 23 Amá Yeésu tobúsi yɩ báa tɔ́m‑bú. Ɩwanbaaráa woogódúu ɩjɔ́ nɛ́, ngɛ bɛlɛ́ bɔɔdɔ́ yɩ sɩsɩ: «Ɖɔɔ yɩ, káma ivóo ɖáa wánjaarɩ́ ɖáa na agogo.» 24 Ngɛ Yeésu woobúsi sɩsɩ: «Israyɛ́ɛ́lɩ fééni tɩɩdɛlɛ́m nɛ́ tiriké tɩrɔ gɛ beegédiri ma.» 25 Amá alʊ́ ceení wɔɔgɔ́nɩ isóm waazá‑daá ɩfɩ́nɩ yɩ sɩsɩ: "Ɖádʊ́ʊ, lɛɛ ma" 26 Ngɛ Yeésu woobúsi yɩ sɩsɩ: «Bɩvɛ́yɩ́ kazɔ́ɔ sɩsɩ bɔkpɔ́ɔ bíya‑dɛ́ɛ kííɖíím bɔlɔ fáá‑bíya.» 27 Ngɛ alʊ́ sɩsɩ: «Toovonúm gɛ, amá fáá‑bíya wánjalaazɩ́ cʊ́kɔ wenkí kɩ́nlɩɩ́ sɩdɩnáa‑dɛ́ɛ tébíri‑rɔ bɩ́nzalɩ́ɩ nɛ́ sínɖíi.» 28 Ńna gɛ Yeésu woobúsi alʊ́ ɩmʊ́ sɩsɩ: «Ɖɔ́gɔ́ɔ nyɛ́dɛ́ɛ toovonúm fáa wɔɔɖɔ́ɔ. Ɩsɔ́ɔ ɩ́fá nya wenbí nyɔ́ɔ́zɔ́ɔ́lɩ nɛ́.» Sáátɩ kɩḿ nɔ́ɔ́ ɖʊɖɔ gɛ ɩdɛ́ɛ aléeré waawáa.

29 Bɩlɛ́ bʊwɔ́rɔ́ nɛ́, ngɛ Yeésu waalɩ́ɩ ńna ɩɖɛ́ɛ Galilée lɩɩrɛ́ kʊ́bɔńɖɛ‑jɔ́. Ngɛ waagba bʊ́ʊ‑daá ití ɩcɔ́ɔ. 30 Ngɛ zamɔ́ɔ kʊ́bɔńgɩ wɔɔgɔ́nɩ ɩjɔ́ kɩ́gána nʊvɔ́‑dɩnáa na njɛma na wenbá biilí wɛ nɛ́, na komóómúsi na kʊdɔndɩnáa nɛbɛ́rɛ ɖʊɖɔ. Ngɛ bɔɔgɔná wɛ basɩɩ́ Yeésu nʊvɔ́‑jɔ́. Ngɛ Yeésu waawáázɩ wɛ. 31 Bɩɩlá zamɔ́ɔ mááɖé kɩɩna komóómúsi wánŋmatɩ́ nɛ́, na biilí wɛ nɛ́ baawáa nɛ́, na nʊvɔ́‑dɩnáa wánnʊŋɛ́ bazɩɩzɛ́ɛ nɛ́, na njɛma wánnáa nɛ́. Ngɛ kɩɩɖɔ́ɔ́zɩ Israyɛ́ɛ́lɩ‑dɛ́ɛ Ɩsɔ́ɔ.

32 Ngɛ Yeésu waayáa ɩwanbaaráa ɩtɔ́ wɛ sɩsɩ: «Zamɔ́ɔ kɩna kɩjɔɔ́ɔ ma kʊnyɔḿ, káma wɛ́ náádóózo nbɩlɛ́ kɩwɛ mɔ́jɔ́ nɛ́, ngʊ́ kɩvɛ́yɩ́na nabʊ́rʊ sɩ kiɖi. Mádánjaa mɔndɔ́ kɩ sɩsɩ kíkpe bɩka kideɖi nabʊ́rʊ, na kɩ́kɔ́kɔ́nɩ kɩwɩ́ɩ nɩ́bááwʊ‑daá.» 33 Ngɛ wanbaaráa wɔɔbɔ́ɔ́zɩ yɩ sɩsɩ: «Lé gɛ ɖónÿuúna kpɔ́nɔ́wá faɖáma kɩna kadaá bɩtála zamɔ́ɔ ńŋɩnáa kɩna kiɖi kɩfɔ́ɔ.» 34 Ngɛ Yeésu wɔɔbɔ́ɔ́zɩ wɛ sɩsɩ: «Kpɔ́nɔ́wá nŋɩ́nɩ́ gɛ mɩ́wɛná.» Ngɛ boobúsi yɩ sɩsɩ: «Tɩrɔ lʊbɛ na tiiná yááwá cʊ́kɔ ɖɔ́.» 35 Ngɛ waava wɛ́ɖɛ sɩsɩ zamɔ́ɔ ɩcɔ́ɔ adɛ. 36 Ngɛ wɔɔgbɔ́ɔ Kpɔ́nɔ́wá lʊbɛ tɩḿ na tiiná amʊ́. Waazá Ɩsɔ́ɔ bɩtɛ́ nɛ́, ngɛ wɛɛbɛlɩ́ tɩ ɩkpɔ́ɔ icéle ɩwanbaaráa batára zamɔ́ɔ. 37 Barɩ́ŋa bɔɔdɔ́ɔ bɔfɔ́ɔ. Fɔɔlásɩ sɩɩga wanbaaráa wɔɔdɔ́ɔ́zɩ nɛ́ woozu ɖɔkɩ́nɩ lʊbɛ. 38 Abaaláa mííli nɔɔnáázá weeɖi ná kíɖíím bɩḿ, ngʊ́ badakála aláa na bíya. 39 Yeésu weeyéle zamɔ́ɔ ɩya ɖamá wɔ́rɔ́ nɛ́, ngɛ waagba kpɩ́ɩ́rʊʊ́‑daá ɩɖɛ́ɛ Magadánɩ farándɩ́‑daá.