1 Yeésu wɛɛdɛ́ tɔ́mwá tɩna tɩrɩ́ŋa wɩlɩ́ɩ nɛ́, ngɛ wɔɔdɔ́ ɩwanbaaráa sɩsɩ: 2 «Mɩ́nyɩ sɩsɩ bɩɩga wɛ́ náálɛ na beɖi fɛlɛ nɖɛ́ɛ‑dɛ́ɛ jíngáárɩ́. Bángbáa Ɩrʊ́ Biyaalʊ́ becéle na baká yɩ ɖɛ́nɩ abɛlɩ́ akɔ́ɔ‑rɔ.» 3 Ngɛ Ɩsɔ́ɔ sarásɩ lanɖáa kʊ́bɔnáa na tɛ́ɛ́dɩ‑daá kʊ́bɔnáa‑kʊ́bɔnáa woodúúzi ɖamá Kayífu, Ɩsɔ́ɔ sarásɩ lanɖʊ́ kʊ́bɔnɩ́‑dɛ́ɛ ɖaána‑daá. 4 Baaŋmátɩ banɩ́ɩ ɖamá sɩsɩ bakpa Yeésu súmúú‑daá bɩka bakʊ yɩ. 5 Amá sɩsɩ: «Bɩ́kalá jíńgáárɩ́ lɔwʊ́rɛ na bʊkɔ́kɔ́nɩ bitulúsi zamɔ́ɔ.»

6 Yeésu wɛ Betáániya tɛ́ɛ́dɩ‑daá Sɩmɔ́ɔ́nɩ cɛnɩŋa‑dɛ́ɛ ɖaána‑daá nɛ́, 7 ngɛ alʊ́ naárʊ woogóduu ɩjɔ́ ɩ́gána kpárábá kazɔ́ɔ ngɩ kɩdaá na liideé bɔnɛ́ tulaarɩ́. Ngɛ waabɩ́rɩ tulaarɩ́ Yeésu kʊjʊʊ́‑daá sáátɩ wenkí ɩlɛ́ ɩwɛ wénɖíi kíɖíím nɛ́. 8 Wanbaaráa waana bɩlɛ́ nɛ́, ngɛ bɛɛyɛ́ɛ baaná. Ngɛ sɩsɩ: «Wé‑rɔ gɛ wɔɔvɔrɔ́sɩ tulaarɩ́ bɩlɛ́? 9 Bayaabɩ́ɩ́zɩ bayá kɩ liide‑bɔnɛ́, bɔkpɔ́ɔ kiliideé bafa kadanbʊrʊ́sɩ.» 10 Yeésu waanɩ́ɩ bɩlɛ́ nɛ́, ngɛ sɩsɩ: «Wé‑rɔ gɛ mɩ́nlám alʊ́ ɩmʊ́ nɔwɔ́ya? Kazɔ́ɔ ńbɩ gɛ waalá ma. 11 Káma báa sáátɩ wenkí mɩ́na kadanbʊrʊ́sɩ gɛ, amá bɩdɛkɛ́ɛ báa sáátɩ wenkí gɛ sɩ iyuú mɔ́ɔ́ mɩ́jɔ́. 12 Waabɩrɩná ma tulaarɩ́ nɛ́, mɛ́dɛ́ɛ bím gɛ waajám ɩkpɩ́ɩ́rɩ bɩlɛ́. 13 Ménveerím mɩ́ɩ toovonúm sɩsɩ báa lé gɛ sɩ befééri laabáárʊ kíféngi ɖúúlínya rɩ́ŋa‑daá, bánŋmatɩ́ wenbí waalá nɛ́ bɔtɔɔzɩná ɩrɔ.»

14 «Ńna gɛ ɩwanbaaráa fuú na nɔwɔ́lɛ‑daá kʊ́ɖʊḿ weení bánÿaá yɩ sɩsɩ Yudásɩ Isikariyóo nɛ́, wɛɛɖɛ́ɛ Ɩsɔ́ɔ sarásɩ lanɖáa kʊ́bɔnáa‑jɔ́ 15 ɩtɔ́ wɛ sɩsɩ: «We gɛ mɩ́nváa ma a bɩgɛ́ɛ máágbá Yeésu mejéle mɩ́ɩ?» Ngɛ bɛlɛ́ beejéle yɩ liideé gbɔɔ́ ákóosaaláa. 16 Bɩdɩ́ŋa‑rɔ gɛ waazʊ́ʊ nɩ́báánɩ na ɩkpa Yeésu icéle wɛ.

17 Kpɔ́nɔ́ badaɖʊ kɩ faadɩ́nɩ nɛ́‑dɛ́ɛ jíńgáárɩ́ wɩ́rɛ kaɖaa ńɖɛ gɛ wanbaaráa wɔɔgɔ́nɩ bɔbɔ́ɔ́zɩ Yeésu sɩsɩ: «Le gɛ nyɔ́zɔɔlɛ́ɛ sɩsɩ ɖɩ́kpɩɩrɩ nya fɛlɛ nɖɛ́ɛ‑dɛ́ɛ jíńgáárɩ́ kíɖíím?» 18 Ngɛ woobúsi wɛ sɩsɩ: «Ibó tɛ́ɛ́dɩ‑daá ŋmáánɩ‑jɔ́ ɩtɔ́ yɩ sɩsɩ kʊ́bɔnɩ́ sɩsɩ: Mɛ́dɛ́ɛ alʊwáátɩ waajʊ́ʊ, nyɛ́dɛ́ɛ gɛ mána mɛ́dɛ́ɛ́ wanbaaráa sɩ ɖiɖi fɛlɛ nɖɛ́ɛ‑dɛ́ɛ jíńgáárɩ.» 19 Ngɛ wanbaaráa waalá wenbí nɔ́ɔ́ Yeésu waaŋmátɩ wɛ nɛ́ bakpɩ́ɩ́rɩ fɛlɛ nɖɛ́ɛ‑dɛ́ɛ jíńgáárɩ́.

20 Kɩɩɖáánɩ nɛ́, ngɛ Yeésu na ɩwanbaaráa fuú na nɔwɔ́lɛ bɔɔjɔ́ɔ sɩ beɖi kíɖíím. 21 Bɔwɛ bénɖíi nɛ́, ngɛ Yeésu sɩsɩ: «Ménveerím mɩ́ɩ toovonúm sɩsɩ mɩ́dáá kʊ́ɖʊḿ wánÿám ma.» 22 Wanbaaráa waazʊ́ʊ kaanɩŋá, ngɛ bɔ́nbɔɔzɩ́ yɩ kʊ́ɖʊḿ‑kʊ́ɖʊḿ bángáa ɖamá sɩsɩ: «Ɖádʊ́ʊ, mɔ́ɔ́ yáá wé?» 23 Ngɛ woobúsi wɛ sɩsɩ: «Mána weení wánÿám ma nɛ́ ɖénɖíi nɩnyɔɔ́ kʊ́ɖʊmɔ́ɔ‑daá.» 24 Ɩrʊ́ Biyaalʊ́ wɛ́nɖɛɛ́ ńŋɩnáa baaŋmáa Ɩsɔ́ɔ‑dɛ́ɛ tɔ́m tákarɩɖá‑daá ɩrɔ nɛ́, amá nbusú na weení sɩ ɩyá yɩ nɛ́. A bátálʊ́rʊ bʊdʊ́ʊ, bɩyaalá sóńcí.» 25 Ńna gɛ Yudásɩ, weení wánÿám yɩ nɛ́, wɔɔbɔ́ɔ́zɩ sɩsɩ: «Mɔ́ɔ́ gɛ bɩgɛ́ɛ yáá wé kʊ́bɔnɩ́?» Ngɛ Yeésu woobúsi yɩ sɩsɩ: «Nyɔ́ɔ́dɔ́ ná.»

26 Bɔwɛ bénɖíi kíɖíím nɛ́, Yeésu wɔɔgbɔ́ɔ kpɔ́nɔ́, waazá Ɩsɔ́ɔ kʊrɔ bɩtɛ́ nɛ́, ngɛ wɛɛbɛlɩ́ kɩ icéle ɩwanbaaráa ɩtɔ́ sɩsɩ: «Ɩmʊ ɩtɔ́ɔ, mɔ́dɔ́nʊʊ́ nbɩlɛ́.» 27 Bɩlɛ́ bʊwɔ́rɔ́ nɛ́, ngɛ wɔɔgbɔ́ɔ viínyi bíya‑dɛ́ɛ sʊlʊ́m na kagbɔ́ɔ, waazá Ɩsɔ́ɔ kɔrɔ bɩtɛ́ nɛ́, ngɛ weejéle kɛ ɩwanbaaráa ɩtɔ́ wɛ sɩsɩ: «Mɩ́rɩ́ŋa ɩnyɔ́ɔ, 28 káma mɛ́dɛ́ɛ azimá nbɩlɛ́, bɩnáa keɖiyá azimá bɩɩbɩ́rɩ ɩráa tutúúma‑rɔ na bɛcɛ́ wɛ bɛdɛ́ɛ alaháácɩ́wá nɛ́. 29 Ménveerím mɩ́ɩ sɩsɩ mɔ́dɔ́ndɔnyɔɔ viínyi bíya‑dɛ́ɛ sʊlʊ́m bɩḿ hálɩ wɩ́rɛ wenɖé sɩ mɔdɔ́kɔ́nyɔɔ sʊlʊ́m kɩ́fábɩ mána mɩ́ɩ majaa‑dɛ́ɛ kowúrɔ́ɔ‑daá nɛ́.» 30 Beedée jíńgáárɩ́ yéndiwá basá Ɩsɔ́ɔ bɩtɛ́ nɛ́, ngɛ baalɩ́ɩ bɛɖɛ́ɛ olivíyée tɩ́ɩ́nɩ bʊ́ʊ‑daá.

31 Ńna gɛ Yeésu wɔɔdɔ́ wɛ sɩsɩ: «Nuvoowú kɩna kɩdɩtɩŋa, mínzée iyéle ma, káma baaŋmáa Ɩsɔ́ɔ‑dɛ́ɛ tɔ́m tákarɩɖá‑daá sɩsɩ: «Mángʊ́ʊ ketirú na fééni ɩya ɖamá fuúre‑daá.» 32 Amá a méévé malɩ́ɩ ɩsɩɖáa‑daá, mɛ́ndɛ́ɛ mɩ́ɩ nɩ́bááwʊ mobó Galilée laadɔ́ɔ‑daá.» 33 Ńna gɛ Pétro sɩsɩ: «Báa barɩ́ŋa bénzée beyéle nya, mɔ́ɔ́ médénzée kɛtɛngɛrɛ meyéle nya.» 34 Ńna gɛ Yeésu wɔɔdɔ́ yɩ sɩsɩ: «Ménveerím nya toovonúm sɩsɩ nuvoowú kɩna kɩdɩtɩndɩŋa, naanɩ́ na kalɩbáawʊ́ ɩbɔ́ɔ nɛ́, nyɔ́njɔɔlɩ́ bʊrɔ nabúdóozo sɩsɩ nyáásɩ ma.» 35 Ńna gɛ Pétro wɔɔdɔ́ yɩ sɩsɩ: «Báa bɩ́nbɔɔzɩ́ sɩsɩ mána nya ɖɩsɩ́, mɔ́dɔ́ndɔḿ sɩsɩ máásɩ nya.» Ngɛ wanbaaráa baaganáa rɩ́ŋa ɖʊɖɔ wɔɔdɔ́ bɩlɛ́.

36 Bána Yeésu boobó bɩlɛ́ hálɩ batála ɖɩdáarɛ bánÿaá ɖɛ sɩsɩ Gɛtɩsemaanée nɛ́ ɖɩdaá. Ńna gɛ Yeésu wɔɔdɔ́ ɩwanbaaráa sɩsɩ: «Ɩjɔ́ɔ cé, na mobó lí magázʊ́lʊ Ɩsɔ́ɔ.» 37 Ngɛ wɛɛgbɛdɩ́na Pétro na Zebedée biyaalɩnáa lɛ́ɛ́nɩ́. Bɩdɛ́ɛ sáátɩ gɛ waazʊ́ʊ kaanɩŋá bɩka ɩlaakáarɩ kʊráa. 38 Ńna gɛ wɔɔdɔ́ wɛ sɩsɩ: «Málaakáarɩ waazʊ́ʊ kaanɩŋá páá hálɩ bínÿelíi mazɩ́. Ɩjɔ́ɔ ce ɩcɔɔná mɩ́ɩ́zá mána mɩ́ɩ.» 39 Ngɛ woodorí ɩdɩ ɩlɩ́ɩ bolíni cʊ́kɔ, ngɛ waabá ɩgʊjʊʊ́ adɛ ɩsʊ́lʊ sɩsɩ: «Majaa, a bɩ́nlám, laná ma bolíni na wahála kagbɔ́ɔ kana. Amá bɩdɛkɛ́ɛ wenbí mɔ́zɔɔlɛ́ɛ nɛ́ ɩ́láná, wenbí nyɔ́zɔɔlɛ́ɛ nɛ́ ɩ́láná.» 40 Yeésu wɔɔlɔ́ɔ ɩkábɩsɩ ɩwanbaaráa toozóóní‑jɔ́ nɛ́, ngɛ wɔɔmɔɔná wɛ bónɖóm. Ngɛ wɔɔdɔ́ Pétro sɩsɩ: «A bɩlɛ́ mɩ́dábɩ́ɩ́zɩ ɩcɔɔná mɩ́ɩ́zá báa alʊwáátɩ cʊ́kɔ mána mɩ́ɩ́? 41 Ɩjɔɔná mɩ́ɩ́zá bɩka ɩsʊ́lʊ Ɩsɔ́ɔ na ɩ́kasála sitááni‑dɛ́ɛ kɔdɔ́sɩ‑daá. Ɩrʊ́ wɛná sɔɔlɩ́m sɩ ɩlá, amá tɔnʊʊ́ tafɩ́ya.» 42 Ngɛ woodorí ɩdɩ ɩlɩ́ɩ bolíni cʊ́kɔ sɩ́ɩ́lɛ‑dɛ́ɛ ɩsʊ́lʊ sɩsɩ: «Majaa, a ńdánlaná ma bolíni na wahála kagbɔ́ɔ kana, ngɛ bɩ́nbɔɔzɩ́ sɩsɩ mɔnyɔ́ɔ kɛ gɛ, nyɛ́dɛ́ɛ sɔɔlɩ́m ɩ́láná.» 43 Waadákabɩsɩ ɩwanbaaráa‑jɔ́ nɛ́, wɔɔdɔ́mɔɔná wɛ bónɖóm, káma ɖóm caarɛ́ɛ wɛ. 44 Ngɛ Yeésu weeyéle wɛ itorí ɩdɩ ɩlɩ́ɩ bolíni cʊ́kɔ ɖʊɖɔ ɩsʊ́lʊ toozo‑dɛ́ɛ na tɔ́m‑bíya kʊ́ɖʊmáa bɛḿ. 45 Ngɛ waagábɩsɩ wanbaaráa‑jɔ́ ɩtɔ́ wɛ sɩsɩ: «mɩ́bámáa ɖóm mɩ́nvɛɛzɩ́! Alʊwáátɩ wenkí sɩ bakpa Ɩrʊ́ Biyaalʊ́ bayaná alaháácɩ́ lanɖáa nɛ́ waajʊ́ʊ. 46 Ɩgʊrʊ́! Ɖɩ́ɖɛ́ɛ! Ɩbɛ́ɛ, weení wánÿám ma nɛ́ waadála.»

47 Babamáa ŋmatɩrɛ gɛ Yudásɩ, wanbaaráa fuú na nɔwɔ́lɛ‑daá kʊ́ɖʊḿ waadála ɩ́gána ɩráa fuúre bágána tókobíwá na ɖáázɩ. Ɩsɔ́ɔ sarásɩ lanɖáa kʊ́bɔnáa na tɛ́ɛ́dɩ‑daá kʊ́bɔnáa‑kʊ́bɔnáa weegédíríná wɛ. 48 Yudásɩ, weení wánÿám yɩ nɛ́, waavʊ́ńgéveeri wɛ sɩsɩ: «Weení sɩ megbíríki yɩ mɛzɛ́ɛ yɩ nɛ́, Yeésu nbɩlɛ́. Ɩgba yɩ.» 49 Ńna‑ńna gɛ waanʊ́m ɩkɛ́ɖɛɛ Yeésu‑jɔ́ ɩtɔ́ yɩ sɩsɩ: «Mɛ́ɛ́zɛ́ɛ nya kʊ́bɔnɩ́.» Ngɛ weegbíríki Yeésu. 50 Ngɛ Yeésu wɔɔdɔ́ yɩ sɩsɩ: «Mɔɖɔndɩ, la wenbí nyɔ́ɔ́gɔ́nɩ lám nɛ́.» Ńna gɛ baaganáa woogóduu bakpa Yeésu. 51 Bɩnáa Yeésu na wenbá nɛ́ badaá kʊ́ɖʊḿ wɛɛgbɛ́ɛ ɩdɛ́ɛ tókobí ɩcɛ́sɩ Ɩsɔ́ɔ sarásɩ lanɖʊ́ kʊ́bɔnɩ́‑dɛ́ɛ bɔwʊtá‑dʊ́ʊ, ngɛ bɩɩjɛ́ ɩlɛ́ ɩnɩgbamʊʊ́. 52 Ngɛ Yeésu wɔɔdɔ́ yɩ sɩsɩ: «Bɩsɩná nyɛ́dɛ́ɛ tókobí nɖʊ kɩɖɩdáarɛ, káma wenbá rɩ́ŋa bónÿooná tókobí nɛ́, tókobí gɛ sɩ basɩná. 53 Nyánmaazɩ́ sɩsɩ mádánbɩ́ɩ́zɩ mavɩ́nɩ majaa ikéjéle ma malááyɩ́kawá yooráa tutúúma fuwé fuú na náálɛ na bʊwɔ́rɔ́? 54 Bɩ́nlám nŋɩ́nɩ́ na wentí Ɩsɔ́ɔ‑dɛ́ɛ tɔ́m waaŋmátɩ sɩsɩ bɩmɔɔ́na bɩlá bɩlɛ́» nɛ́ ikóódi?» 55 Alʊwáátɩ kɩḿ gɛ Yeésu wɔɔdɔ́ zamɔ́ɔ sɩsɩ: «Mɩ́ɩ́gálɩ́ɩ ɩkɔ́nɩ sɩ ɩkpa ma na tókobíwá na ɖáázɩ nyazɩ mɛ́gɛ́ɛ ɩráa‑gʊ́ʊrʊ́? Báa wɩ́rɛ wenɖé, mɔ́jɔ́ɔ Ɩsɔ́ɔ‑dɛ́ɛ ɖaána‑daá gɛ mánwɩlɩ́ɩ ɩráa Ɩsɔ́ɔ‑dɛ́ɛ tɔ́m, mɩ́dákpá ma. 56 Amá bɩlɛ́ bɩrɩ́ŋa bɩɩlá gɛ na wentí anɖébiwá waaŋmáa nɛ́ ikóódi. Ngɛ Yeésu‑dɛ́ɛ wanbaaráa waaya ɖamá bese beyéle yɩ.

57 Wenbá baagba Yeésu nɛ́, bɛɖɛɛná yɩ Ɩsɔ́ɔ sarásɩ lanɖʊ́ kʊ́bɔnɩ́ kayíífu weení Mará wɩlɩɖáa na tɛ́ɛdɩ‑daá kʊ́bɔnáa‑kʊ́bɔnáa tuuzée ɩdɛ́ɛ nɛ́‑jɔ́. 58 Pétro ɩlɛ́ woovu Yeésu ɩjɔɔ́na yɩ bolíni hálɩ sarásɩ lanɖʊ́ kʊ́bɔnɩ́‑dɛ́ɛ ɖaána‑daá ɩsʊ́ʊ ɩcɔ́ɔ ɩ́na ɩlɛ́ ɩdɛ́ɛ bɔwʊtá dɩnáa sɩ ɩna nŋɩ́nɩ́ sɩ bɩtɛná nɛ́. 59 Ɩsɔ́ɔ sarásɩ lanɖáa kʊ́bɔnáa na yahúúɖúwá‑dɛ́ɛ tɔm‑vʊʊráa kʊ́bɔnáa baaganáa wánjáádɩ sɩ bobuuná Yeésu tɔ́m na bakʊ yɩ; 60 Bodoyuú kúbúunátɩ na bɩrɩ́ŋa ɩráá ɖabata waalɩzɩ́ seríya bʊbɔ́tɩ ńgɩ nɛ́. Kegbiirinɔ́ɔ gɛ ɩráa nɔwɔ́lɛ wɔɔgɔ́nɩ 61 bɔtɔ́ sɩsɩ: «Ɩrʊ́ ceení wɔɔdɔ́ sɩsɩ: "Mánbɩɩzɩ́ mɔyɔ́ Ɩsɔ́ɔ‑dɛ́ɛ ɖaána na mabɩ́sɩ mama kɛ wɛ náádoozo."» 62 Ńna gɛ Ɩsɔ́ɔ sarásɩ lanɖʊ́ kʊ́bɔnɩ́ waagʊrʊ́ ɩtɔ́ yɩ sɩsɩ: «Nyɛ́vɛ́yɩ́na natɩ́rɩ sɩ nbúsi wentí ɩráa bana bónbuunáa nya nɛ́?» 63 Amá Yeésu sumáa gɛ. Bɩnáa Ɩsɔ́ɔ sarásɩ lanɖʊ́ kʊ́bɔnɩ́ sɩsɩ: «Na Ɩsɔ́ɔ weezuú‑dʊ́ʊ‑dɛ́ɛ yɩ́ɖɛ‑daá mɔ́nbɔɔzɩ́ nya sɩsɩ nvééri‑ɖáa a nyɔ́ɔ́ gɛ Lɛɛrʊ́, Ɩsɔ́ɔ Biyaalʊ́.» 64 Yeésu woobúsi yɩ sɩsɩ: «Nyɔ́ɔ́dɔ́ ná. Biriké wentí sɩ mevééri mɩ́ɩ́ nɛ́ gɛ sɩsɩ sɩɩná lɛlɛɛɖɔ́, mɩ́náa Ɩrʊ́ Biyaalʊ́ ɩjɔɔ́ Ɩsɔ́ɔ yíko‑dʊ́ʊ‑dɛ́ɛ nʊ́ʊ́nɩ kíɖíiwú‑rɔ. Mɩ́ndanáa yɩ wángalɩɩnáa ɩsɔ́ɔ́dáá wéngedím ŋmɩ́ndɩ‑rɔ.» 65 Ńna gɛ Ɩsɔ́ɔ sarásɩ lanɖʊ́ kʊ́bɔnɩ́ wɛɛlɛrɩ́ igúzúúdia26.65 Bɩdɛ́ɛ sáátɩ, Israyɛ́ɛ́lɩ bíya wɛ́nlɛrɩ́ bogúsúúdi gɛ a bɩgɛ́ɛ sɩsɩ nabʊ́rʊ waalá bʊjɔɔ́ káálɛ nyazɩ: nbusú, wenbiré gʊsɩrɛ́, lííya, kʊdɔḿ yáá batʊ́ʊ Ɩsɔ́ɔ bɩlɛ́. ɩtɔ́ sɩsɩ: «Wɛɛgbɛɛná Ɩsɔ́ɔ. Bidokúti bɩbɔ́ɔ́zɩ seríya‑dʊ́ʊ ɖʊɖɔ. Mɩ́ɩ́nɩ́ɩ waaŋmátɩ ɩkpɛɛná Ɩsɔ́ɔ nɛ́. 66 Mɩ́nmaazɩ́ sɩsɩ wé?» Ngɛ boobúsí sɩsɩ: «Ɩmɔɔ́na bakʊ yɩ.» 67 Ngɛ bɔɔdɔ ndɔɔlɩmá waazá‑daá, bamá yɩ cɔɖɩ́wá, nɛbɛ́rɛ ɩcɛ́ yɩ kadáázɩ 68 bɩka bɔ́ndɔ́m sɩsɩ: «Lɛɛrʊ́, tɩrɩkɩ, weení waamaná nya?»

69 Bɩdɛ́ɛ sáátɩ, Pétro cɔɔ́ asʊ tɔ́ɔ‑rɔɔzɩ́. Ngɛ alʊ́ bɔwʊtá‑dʊ́ʊ woogóduu ɩjɔ́ ɩtɔ́ yɩ sɩsɩ: «Nyɔ́ɔ́ ɖʊɖɔ nyágána Yeésu Galilée ńnɩ́ gɛ. 70 Amá wɔɔjɔ́ɔ́lɩ ɩráa rɩ́ŋa ɩzá‑daá ɩtɔ́ sɩsɩ: «Máásɩ wentí nyɔ́ndɔ́m nɛ́.» 71 Sáátɩ wenkí wɛ́nɖɛɛ́ ɖɔɔ́ wɔnɔɔ́ nɛ́, kɩ́falʊ́ waana yɩ ifééri wenbá bɔwɛ ńna nɛ́ sɩsɩ: «Ceení kána Yeésu nazarɛ́ɛtɩ ńnɩ́ gɛ.» 72 Waadásɩ ɩcɔ́ɔ́lɩ iɖuuná sɩsɩ: «Máásɩ ɩrʊ́ ceení.» 73 Bɩɩdásɩ cʊ́kɔ nɛ́, wenbá bavʊnwɛ ńna nɛ́, boogódúu bɔtɔ́ Pétro sɩsɩ: «Toovonúm gɛ, nyɔ́ɔ́ ɖʊɖɔ nyɛ́gɛ́ɛ ɩdɛ́ɛ ɩrʊ́ gɛ, nyɛ́dɛ́ɛ ŋmatɩrɛ wánwɩlɩ́ɩ bɩlɛ́.» 74 Ńna gɛ waaŋmatɩ́ sɩsɩ: «Ɩsɔ́ɔ ɩ́fɔ mánɩgbamʊʊ́ a ɖé bʊbɔ́tɩ gɛ mɛ́nbɛlɩ́ɩ. Máásɩ ɩrʊ́ ceení.» Ngɛ kalɩbááwʊ waajáŋ kɩbɔ́ɔ. 75 Ngɛ Pétro wɔɔdɔ́ɔ́zɩ tɔ́m Yeésu wɔɔdɔ́ yɩ sɩsɩ: «Naaní na kalɩnbááwʊ́ ɩbɔ́ɔ nɛ́, nyɔ́njɔɔlɩ́ bʊrɔ nabúdoozo sɩsɩ nyáásɩ ma» nɛ́. Ngɛ waalɩ́ɩ ɩbá iwíi.