27
1 Kiivé tɛ́ɛrɛ́ nɛ́, Ɩsɔ́ɔ sarásɩ lanɖáa kʊ́bɔnáa na tɛ́ɛ́dɩ‑daá kʊ́bɔnáa‑kʊ́bɔnáa wɔɔjɔ́ɔ bacáa lomaazɛ́ na bakʊ Yeésu. 2 Ngɛ bɔɔvɔ́kɩ yɩ nibé boboná yɩ becéle laadɔ́ɔ‑dɛ́ɛ nɩ́báadɛɛrʊ́ Piláátɩ.
3 Yudásɩ weení waayá Yeésu nɛ́, waana sɩsɩ baazɩ́ɩ́zɩ sɩsɩ bángʊ́ʊ Yeésu nɛ́, waalá mányɩ lé ɩkpɔ́ɔ liideé gbɔɔ́ ákóosaaláa iboná icéle Ɩsɔ́ɔ sarásɩ lanɖáa kʊ́bɔnáa na tɛ́ɛ́dɩ‑daá kʊ́bɔnáa‑kʊ́bɔnáa 4 sɩsɩ: «Máálá alaháácɩ́ mayá ɩrʊ́ weení ɩdalá nabʊ́rʊ nɛ́.» Amá bɛlɛ́ boobúsi yɩ sɩsɩ: «Wentí waananá ɖáa. Nyɔ́jɔ́ nbɩlɛ́.» 5 Ngɛ Yudásɩ wooboná liideé ɩlɔ Ɩsɔ́ɔ‑dɛ́ɛ ɖaána‑daá. Ngɛ wɛɛɖɛ́ɛ ɩɖʊ́ ɩdɩ nibiiré ɩsɩ́. 6 Ɩsɔ́ɔ sarásɩ lanɖáa kʊ́bɔnáa wɔɔgbɔ́ɔ liideé bɔtɔ́ sɩsɩ: «Bɩdafa nɩ́bááwʊ sɩsɩ ɖɩdʊ liideé ana Ɩsɔ́ɔ‑dɛ́ɛ ɖaána‑daá kʊjɔ́ɔ́nɩ wɔ́rɔ́ káma ɩrʊ́‑dɛ́ɛ azimá liideé gɛ agɛ́ɛ.» 7 Baalaná ɖamá sááwʊ́ra bɩtɛ́ nɛ́, ngɛ bɔɔgbɔ́ɔ liideé amʊ́ bamʊ cʊ́ʊ maarʊ́‑dɛ́ɛ fɔɔ́ bénbím ɩgɔma. 8 Bʊrɔɔzɩ́ gɛ hálɩ na sinje bánÿaá fɔɔ́ kɛḿ sɩsɩ azimá‑dɛ́ɛ fɔɔ́. 9 Bɩlɛ́ gɛ wentí anɖébiYeremíya waaŋmátɩ sɩsɩ: «bɔɔgbɔ́ɔ liideé gbɔɔ́ ákóosaaláa nŋɩ́náa Israyɛ́ɛ́lɩ bíya waamáázɩ sɩ bɛ́fɛ́rɛ ɩrɔ nɛ́, 10 bamʊ cʊ́ʊ maarʊ́‑dɛ́ɛ fɔɔ́ ńŋɩnáa Ɖádʊ́ʊ waavʊ́ńzɩɩzɩ ma nɛ́» woogóódi.
11 Booboná Yeésu laadɔ́ɔ‑dɛ́ɛ nɩ́báadɛɛrʊ́‑jɔ́ sɩ bafʊʊná yɩ, ngɛ ɩlɛ́ wɔɔbɔ́ɔ́zɩ yɩ sɩsɩ: «Nyɔ́ɔ́ gɛ Yahúúɖúwá‑dɛ́ɛ wúro?» Ngɛ Yeésu woobúsi yɩ sɩsɩ: «Nyɔ́ɔ́dɔ ná.» 12 Ngɛ Ɩsɔ́ɔ sarásɩ lanɖáa kʊ́bɔnáa na tɛ́ɛ́dɩ‑daá kʊ́bɔnáa‑kʊ́bɔnáa woobuuná yɩ tɔ́mwá ɖabata, amá idobúsi wɛ natɩ́rɩ. 13 Ńna gɛ Piláátɩ wɔɔdɔ́ yɩ sɩsɩ: «Ńdánnɩɩ wentí rɩ́ŋa bónbuunáa nya nɛ́?» 14 Amá Yeésu tobúsi yɩ natɩ́rɩ wenti rɩ́ŋa waaŋmátɩ yɩ nɛ́ tɩrɔ hálɩ bɩbá bɩlá laadɔ́ɔ‑dɛ́ɛ nɩ́báadɛɛrʊ́ Piláátɩ bítí.
15 Fɛlɛ nɖɛ́ɛ jíngáárɩ́ báa wenkí laadɔ́ɔ‑dɛ́ɛ nɩ́báadɛɛrʊ́ wɛ́ndɛ́rɛ́jɛ́m sáráka‑dʊ́ʊ kʊ́ɖʊḿ weení zamɔ́ɔ wɔɔzɔ́ɔ́lɩ sɩsɩ ɩ́cɛ nɛ́. 16 Bɩdɛ́ɛ sáátɩ nɛ́, sáráka‑dʊ́ʊ kʊ́bɔnɩ́ naárʊ wɛ sáráka‑daá, bánÿaá yɩ sɩsɩ Barabáásɩ. 17 Bɩnáá Piláátɩ wɔɔbɔ́ɔ́zɩ zamɔ́ɔ kiduuzée ńnaamʊ́ nɛ́ sɩsɩ: «Weení gɛ mɩ́zɔɔlɛ́ɛ sɩsɩ mɛ́jɛ? Barabáásɩ yáá Yeésu weení bánÿaá yɩ sɩsɩ Lɛɛrʊ́ nɛ́?» 18 Káma Piláátɩ nyɩ bɩlɛ́ sɩsɩ sʊ́ʊ́zɩ weeyelená bakpa Yeésu becéle yɩ. 19 Sáátɩ wenkí Piláátɩ cɔɔ́ɔ tɔ́m yaavʊʊɖɛ́ ńna nɛ́ gɛ ɩɖɛɛlʊ́ weegédíri befééri yɩ sɩsɩ: «Nkaɖʊ nyɔ́nɔ́ɔ́ ɩrʊ́ ɖéyí‑ɖéyi‑dʊ́ʊ ceení‑dɛ́ɛ tɔ́m‑daá. Káma nuvoowú kɩna mááná wahála ɖabata mɛ́dɛ́ɛ ɖoozire‑daá ɩrɔɔzɩ́.» 20 Ɩsɔ́ɔ sarásɩ lanɖáa kʊ́bɔnáa na tɛ́ɛ́dɩ‑daá kʊ́bɔnáa‑kʊ́bɔnáa waadásɩ zamɔ́ɔ sɩsɩ kɩ́bɔɔzɩ Barabáásɩ‑dɛ́ɛ cɛ́m bɩka bakʊ Yeésu. 21 Laadɔ́ɔ‑dɛ́ɛ nɩ́baadɛɛrʊ́ waadásɩ ɩbɔ́ɔ́zɩ wɛ sɩsɩ: «Bɛlɛ́ɛ́nɩ badaá, weení gɛ mɩ́zɔɔlɛ́ɛ sɩsɩ mɛ́jɛ» Ngɛ boobúsi yɩ sɩsɩ: «Barabáásɩ.» 22 Bɩnáá Piláátɩ wɔɔbɔ́ɔ́zɩ wɛ sɩsɩ: «Nɛ́ we gɛ málaná Yeésu weení bánÿaá yɩ sɩsɩ Lɛɛrʊ́ nɛ́?» Barɩ́ŋa boobúsi yɩ sɩsɩ: «Báka yɩ ɖɛ́nɩ abɛlɩ́ akɔ́ɔ‑rɔ.» 23 Ngɛ waadásɩ ɩbɔ́ɔ́zɩ wɛ sɩsɩ: «Taalɩ́ wenkí gɛ waalá?» Amá bɛlɛ́ baabá gɛ babamáa kóódi bɩ́njaarɩ́a sɩsɩ: «Báka yɩ ɖɛ́nɩ abɛlɩ́ akɔ́ɔ‑rɔ.» 24 Piláátɩ waana sɩsɩ waawɩ́ɩ wɛ bɩka bɩbamáa bʊ́ʊ kpáa nɛ́, ngɛ waajɩrɩ́ lɩ́m ɩsám ɩnʊ́ʊ́zɩ zamɔ́ɔ ɩzá‑daá ɩtɔ́ sɩsɩ: «Mánʊ́ʊ́nɩ fɛ́yɩ́ ɩrʊ́ ceení‑dɛ́ɛ sɩ́m tɔ́m‑daá. Mɩ́jɔ́ nbɩlɛ́.» 25 Ngɛ zamɔ́ɔ rɩ́ŋa woobúsi yɩ sɩsɩ: «Ɩdɛ́ɛ sɩ́m‑dɛ́ɛ nɩgbamʊʊ́ narɩ́ɩ íti ɖána ɖébíya‑ɖɔ́rɔ́.» 26 Ńna gɛ Piláátɩ wɛɛjɛ́ wɛ Barabáásɩ. Bɩɩga Yeésu ɩlɛ́ nɛ́, weeyéle bosúti yɩ agbáázá bɩtɛ́ nɛ́, ngɛ wɔɔgbɔ́ɔ yɩ icéle wɛ sɩsɩ bóbóná yɩ baká ɖɛ́nɩ abɛlɩ́ akɔ́ɔ‑rɔ.
27 Ngɛ laadɔ́ɔ‑dɛ́ɛ nɩ́baadɛɛrʊ́ Piláátɩ‑dɛ́ɛ sɔ́ɔ́jawá wooboná Yeésu ɩdɛ́ɛ kowuro‑ɖugoré‑daá; botúúzi sɔ́ɔ́jawá baaganáa rɩ́ŋa balára bamɩlɩná yɩ. 28 Baalɩzɩ́ yɩ ɩgbɩná izóóna nɛ́, bosúu yɩ tóko kɩ́sɛɛmʊ́ʊ. 29 Ngɛ baalʊ́ʊ wɩláázɩ sɩjɔɔ́ɔ sɔwá‑sɔwá nɛ́ nyazɩ kowuro‑vulɔ́ɔ bofu ɩgʊjʊʊ́; bacáa ɖɩgɛrɛ́ baɖʊ ɩnʊ́ʊ́nɩ kíɖíiwú‑daá. Ngɛ boozóm waazá‑daá bánmʊŋɛ́ yɩ bɔ́ndɔ́m sɩsɩ: «Ɖɛ́ɛ́zɛ́ɛ nya yahúúɖúwá‑dɛ́ɛ wúro.» 30 Bɔ́ndɔnáa yɩ ndɔɔlɩmá bɩka bɔ́ngbɔwʊ́ʊ ɖɩgɛrɛ́ bánmám ɩgʊjʊʊ́‑daá. 31 Baamʊ́m yɩ bɩtɛ́ nɛ́, ngɛ baalɩzɩ́ yɩ tóko boozúu yɩ nɛ́, babɩsɩná ɩdɛ́ɛ‑ndɩ bosúu yɩ. Ngɛ bɛɛɖɛɛná yɩ sɩ bakága ɖɛ́nɩ abɛlɩ́ akɔ́ɔ‑rɔ.
32 Baalɩ́ɩ bɛ́nɖɛɛ́ nɛ́, bɛɛgɛ́tɩ abaalʊ́ naárʊ ɩgɛ́ɛ Sirɛ́ɛ́nɩ tɛ́ɛ́dɩ‑daá ńnɩ́. Bánÿaá yɩ sɩsɩ Sɩmɔ́ɔnɩ. Ngɛ baagba yɩ dóóle ɩsʊ́ʊ Yeésu‑dɛ́ɛ ɖɛ́nɩ abɛlɩ́ akɔ́ɔ. 33 Baadála ɖɩdáarɛ wenɖé bánÿaá‑ɖɛ sɩsɩ Gɔlɩgóóta nɛ́, Gɔlɩgóóta kutoluú gɛ sɩsɩ kʊjʊʊ́ bɔɔrɔɔ́ ɖɩdáárɛ, 34 ngɛ baava yɩ viínyi bíya‑dɛ́ɛ sʊlʊ́m baajaná faadɩ́nɩ nyɛ́nɩ‑ńdɩ nɛ́ sɩsɩ ɩ́nyɔɔ. Waaɖɩ́m nɛ́, idetísi ɩnyɔ́ɔ.
35 Baagá yɩ ɖɛ́nɩ abɛlɩ́ akɔ́‑rɔ bɩtɛ́ nɛ́, ngɛ bɔɔdɔ tɛ́tɛ́ ɩgbɩná‑rɔ batára yɛ ɖamá. 36 Ngɛ beedí bɔcɔ́ɔ ńna bénveríi ɩrɔ. 37 Ngɛ baaŋmáa kpálɩfɔ́ɔ‑rɔ bosúsi ɩgʊjʊʊ́‑rɔ wenbí‑rɔ baagʊ yɩ nɛ́ sɩsɩ: «Ceení gɛ Yeésu yahúúɖúwá‑dɛ́ɛ wúro.» 38 Ngɛ baagá ɩráa‑gʊ́ʊ́ráa nɔwɔ́lɛ batasɩná yɩ. Kʊ́ɖʊḿ igíɖíiwú‑rɔ, waaganáa ɩnɩbɩɩwʊ́‑rɔ. 39 Nɩ́báá‑ɖɛɛráa wándʊ́ʊ́ɖɩ yɩ, bánmʊŋɛ́ yɩ, 40 bɩka bɔ́ndɔ́m sɩsɩ: «Nyɔ́ɔ́ weení nyɔ́nÿɔ́m Ɩsɔ́ɔ‑dɛ́ɛ ɖaána nbɩ́sɩ nma kɛ wɛ náádoozo nɛ́, nyádɩ́tɩŋa lɛɛ nyádɩ a nyɛ́gɛ́ɛ Ɩsɔ́ɔ Biyaalʊ́, bɩka ngédi ɖɛ́nɩ abɛlɩ́ akɔ́ɔ‑rɔ.» 41 Bɩlɛ́ ɖʊɖɔ gɛ Mará wɩlɩɖáa na tɛ́ɛ́dɩ‑daá kʊ́bɔnáa‑kʊ́bɔnáa na Ɩsɔ́ɔ sarásɩ lanɖáa kʊ́bɔ́náa wánmʊŋɛ́ yɩ bɔ́ndɔ́m yɩ sɩsɩ: 42 «Wɛɛlɛ́ɛ baaganáa, amá ɩdánbɩ́ɩ́zɩ ɩlɛ́ɛ ɩdɩ. A ɩgɛ́ɛ Israyɛ́ɛ́lɩ wúro, íkédi lɛlɛɛɖɔ́ ɖɛ́nɩ abɛlɩ́ akɔ́ɔ‑rɔ na ɖɩfa yɩ toovonúm! 43 Ɩsɔ́ɔ gɛ waava toovonúm nɛ́, Ɩsɔ́ɔ ɩ́kɔ́nɩ ɩlɛ́ɛ yɩ lɛlɛɛɖɔ́ a ɩzɔɔlɛ́ɛ yɩ, káma wɔɔdɔ́ sɩsɩ: "mɛ́gɛ́ɛ Ɩsɔ́ɔ Biyaalʊ́ gɛ."» 44 Bɩlɛ́ nɔ́ɔ́ gɛ bɩkpɛdɩ́na ɩráa‑gʊ́ʊráa wenbá baagá ɩ́na wɛ ɖɛ́nɩ abɛlɩ́ akɔ́ɔ‑rɔ nɛ́ bándʊ́ʊ́dɩ yɩ.
45 Kpɔɔ ɩdaawʊ́ kéréfu fuú na natɩ́lɛ nbó ɖaanɩ́ŋa kéréfu natúdoozo, bɩɩlá temeenuú laadɔ́ɔ rɩ́ŋa‑rɔ. 46 Ɖaanɩ́ŋa kéréfu natúdoozo bɩlɛ́ gɛ Yeésu woogóo bɩcáárɩ sɩsɩ: «Elíi, Elíi, lemá sabaktaní», bugutoluú sɩsɩ: «Mɛ́dɛ́ɛ Ɩsɔ́ɔ́, mɛ́dɛ́ɛ Ɩsɔ́ɔ, ngbaalá gɛ nyɛ́ɛ́jɛ́ ma ndálɩ.» 47 Wenbá bɔwɛ ńna gɛ baanɩ́ɩ nɛ́, badaá nɛbɛ́rɛ sɩsɩ: «Elíya gɛ wánÿaá.» 48 Ngɛ badaá naárʊ waajáŋ ise ɩkɔ́gbɔ́ɔ kɩcɛ́ ilíi viínyi bíya‑dɛ́ɛ sʊlʊ́m nyɩ́gáázɩ ńbɩ‑daá ɩkpɔ́ɔ isúu ɖɩgɛrɛ nɔɔ́‑daá ɩkpáázɩ Yeésu nɔɔ́‑jɔ́ sɩsɩ ɩ́nyɔɔ. 49 Baaganáa sɩsɩ: "«Ɩzɩ́m ɖɩbɛ́ɛ sɩsɩ Elíya wɔ́ngɔnɩ́ ɩlɛ́ɛ yɩ?»
50 Amá Yeésu woodókoo bɩcáárɩ, ngɛ iweezuú waalɩ́ɩ. 51 Ngɛ Ɩsɔ́ɔ‑dɛ́ɛ ɖaána‑daá láámílé waadára nabʊ́lɛ kɔgbɔɔ ɩsɔ́ɔ‑daá ngɔ́nɩ adɛ; Adɛ weezéle, bɩ́tángbalɩ́nɩ ɩfɛ́ɛ, 52 bɔɔláánɩ ifulú bɩka Ɩsɔ́ɔ‑dɛ́ɛ ɩráá ɖabata bánzɩ́m nɛ́ ifé. 53 Yeésu weevé ɩlɩ́ɩ bɔɔláánɩ‑daá nɛ́, bɛlɛ́ ɖʊɖɔ baalɩ́ɩ, ngɛ baazʊ́ʊ Yesusalɛ́m Ɩsɔ́ɔ‑dɛ́ɛ tɛ́ɛ́dɩ‑daá balɩzɩ́ badɩ bawɩ́lɩ ɩráa ɖabata. 54 Róóma sɔ́ɔ́ja kʊ́bɔnɩ́ na sɔɔjawá baaganáa bénveríi Yeésu nɛ́, baana adɛ weezéle na wenbí rɩ́ŋa bɩɩlá nɛ́, ngɛ nɩndáárɛ kʊ́bɔńɖɛ waazʊ́ʊ wɛ bɔtɔ́ sɩsɩ: «Toovonúm, ɩrʊ́ ceení kɛ́ɛ́na Ɩsɔ́ɔ Biyaalʊ́.»
55 Aláa ɖabata wɛ ńna bagazɩ́ŋɛ́ɛ bolíni bɛgɛbɛɛ́na; Ɖoo Galilée laadɔ́ɔ‑daá gɛ boogóvú Yeésu bángalám yɩ bɔwʊtá. 56 Badaá, bɛɛ Marɩyáma Magɩdaláa alʊ́, Marɩyáma Yaakúbu na Isífu bɔgɔɔ na Zebedée biyaalɩnáa ɩgɔɔ bɔwɛ ńna.
57 Ɖaaɩ́ŋa waalá nɛ́, ɖɔ́ɔ́lɛ‑dʊ́ʊ bánÿaá yɩ sɩsɩ Ísífu ɩgɛ́ɛ Arimatée tɛ́ɛ́dɩ‑daá ńnɩ́ bɩka ɩgɛ́ɛ Yeésu‑dɛ́ɛ wanbaarʊ́ ɖʊɖɔ nɛ́, waadála. 58 Ɩrʊ́ ɩmʊ́ woobó ɩmɔɔná Piláátɩ ɩbɔ́ɔ́zɩ yɩ Yeésu tɔnʊʊ́. Ngɛ Piláátɩ waava nɩ́bááwʊ sɩsɩ bécéle yɩ kɩ. 59 Ísífu wɔɔgbɔ́ɔ kɩ nɛ́, ngɛ woogoodiná kɩ kásáŋá. 60 Ngɛ wɔɔgbɔ́ɔ kɩ ɩɖʊ bɔlááwʊ kɩ́falʊʊ́ waabáa kɩ ɩdɩ bɩ́tángbalʊʊ́‑daá nɛ́ kɩdaá; ngɛ weebiláázɩ bʊ́ʊ́rɛ kʊ́bɔńɖɛ ɩtɔ bɔɔlááwʊ nɔɔ́. Bɩlɛ́ bʊwɔ́rɔ́ nɛ́, ngɛ wɛɛɖɛ́ɛ. 61 Bɩdɛ́ɛ sáátɩ kɩḿ, Marɩyáma Magɩdaláa alʊ́ na Marɩyáma lííni bɔwɛ ńna, bɔjɔɔ́ɔ bɔlááwʊ ɩzá‑daá.
62 Kíívé nɛ́, bángbɩɩrɩ́ fɛɛzɩrɛ wɩ́rɛ kifé nɛ́ nbɩlɛ́, ngɛ Ɩsɔ́ɔ sarásɩ lanɖáa kʊ́bɔnáa na Faríízí‑dɩnáa booyóózi bobó Piláátɩ‑jɔ́. 63 Ngɛ bɔɔdɔ́ yɩ sɩsɩ: «Kʊ́bɔnɩ́, ɖɔ́ɔ́dɔ́ɔ́zɩ sɩsɩ bʊbɔtʊ́ʊ ceení wɔɔdɔ́ ɩ́na waazá nɛ́ sɩsɩ: "Wɛ́ náádoozo wɩ́rɛ ménvém." 64 Bɩlɛ́ nɛ́, fa nɩ́bááwʊ sɩsɩ béfére bɔɔlááwʊ hálɩ wɛ́ náádoozo na ɩwanbaaráa ɩ́kɔ́kɔnɩ baŋmɩ́ɩ́lɩ yɩ bɩka bɔtɔ́ zamɔ́ɔ sɩsɩ: "Weevé ɩlɩ́ɩ ɩsɩɖáa‑daá". Bʊbɔ́tɩ kegbiirinɔ́ɔ ńdɩ tɩna tɩ́ngɩlɩ́ɩ kaɖaa ńdɩ."» 65 Ngɛ Piláátɩ weevééri wɛ sɩsɩ: «Ɩbɛ́ɛ fereɖaá. Iboná wɛ befére bɔlááwʊ nŋɩ́náa mɩ́zɔɔlɛ́ɛ nɛ́.» 66 Ngɛ boobó sɩ befére bɔlááwʊ. Baaɖáázɩ kɩnɔɔ́‑rɔ bʊ́ʊ́rɛ kʊ́bɔńɖɛ‑rɔ na a naárʊ weedekiná ɖɛ, batɩlɩ́.