1 వారమ్‌దిఙ్‌ మొదొహి రోజు కోడిఃజామ్‌నె, బోదెకు అవి తయార్‌ కితి వాసనం నూనెఙ్‌ అస్తెనె దూకిదు సొహె. 2-3 అవిక్‌ అబ్బె వాతిఙ్, దూకి మూక్తి పెరిపణుకు గూర్‌బాతి మహిక సుడ్ఃతె. అవిక్‌ లొఇ డుగితిఙ్‌ యేసు పీనుగు తోర్‌ఏతాద్. 4 దిన్ని వందిఙ్‌ బమ్మ ఆజి నిహి మహివలె, మిరిస్నివజ తెలాని సొక్కెఙ్‌ తొడ్ఃగితి రిఎర్‌ మొగవారు వన్కా డగ్రు నిహర్. 5 అవిక్‌ నండొ తియెల్‌ ఆజి ముణుకుఙ్‌ ఊర్‌జి మాడిఃస్తె. 6 అయావలె అయా మొగవారు వన్కాఙ్, “ఎందనిఙ్‌ మీరు బత్కితి మన్నివన్నిఙ్‌ సాతివరిబాన్‌ రెబాజిన్‌దెర్‌? వాండ్రు ఇబ్బె సిలెన్. నిఙిత మనాన్. మీ వెట గలిలయదు మహివలె వాండ్రు ఇనిక వెహ్తాన్‌‌ ఇజి ఎత్తు కిదు. 7 ఇనిక వెహ్తాన్‌‌ ఇహిఙ, ‘లోకుమరిసి సెఇవరి కీదు ఒపజెపె ఆదెఙ్‌వెలె. సిలువాదు పొకె ఆజి, వాండ్రు సాజి మూండ్రి రోస్కాఙ్‌ నిఙ్‌నాన్‌లె’, ఇజి”, ఇజి వెహ్తార్‌. 8 అయావలె అవిక్‌ యేసువెహ్తి మాట ఒడ్ఃబితె.

9 దూకిదాన్‌ మహ్తెనె, అబె సుడ్ఃతికెఙ్‌ విజు పదకొండు మణిసి సిసూరిఙ్‌ని మహి వరిఙ్‌ విజెరిఙ్‌ వెహ్తె*24:9 యా పన్నుపెర్నికార్‌ యూదురి దేసమ్‌దిఙ్‌ బాదకిజిని రోమ ప్రబుత్వం వందిఙ్‌ పణికినికార్‌ విరు యూదురిఙ్‌ పడ్ఃఇకార్‌ అకాదె ఆఏండ వీరు నండొ పన్ను లొసి యూదురిఙ్‌ బాద కినార్‌. ఆహె అనయమ్‌దాన్‌బా వారు ఆస్తి గణిస్నానార్‌. వారు యూదురి రూలుఙ్‌ లొఙిఏర్‌ అందెఙె యూదురు వరిఙ్‌ పాపం కినికార్‌ ఇజి వెహ్నార్. . 10 అవిక్‌ ఎయెక్‌ ఇహిఙ, మగ్దలెనె మరి, యోసన, యాకోబుఙ్‌ అయిసి ఆతి మరియ, వన్కావరివెట మహి మరి సెగొండెక్‌ బోదెక్‌ ఇవిక్‌నె జర్గితికెఙ్‌ అపొస్తుడురిఙ్‌ వెహ్తికెఙ్†24:10 యాక యూదురి ఉండ్రి మాట దిన్ని అర్‌దం ఇనిక ఇహిఙ తప్పకిఇతి నఙి వారు సిక్ససితిఙ నండొ సెఇవరిఙ్‌ దేవుణు ఎస్సొ సిక్స సీనాన్‌ ఇజి.. 11 గాని వారు బోదెక్‌ వెహ్తి మాటెఙ్‌ నమిఎతార్. ఎందానిఙ్‌ ఇహిఙ, ఆకెఙ్‌ పంబర మాటెఙ్‌ లెకెండ్‌ వారు ఒడ్ఃబితార్. 12 అహిఙ్‌బా, పేతురు నిఙితండ్రె, దూకిదు ఊహ్‌క్సి సొహాన్‌. వఙితి సుడ్ఃతిఙ్‌ పీన్‌గు సుటిస్తి తెల్లాని పాతెఙ్‌ అర్తి మహికదె సుడ్ఃతాన్. వాండ్రు జర్గితికెఙ్‌ వందిఙ్‌ బమ్మ అజి ఇండ్రొ మర్‌జి సొహాన్‌.

13 అయా రోజునె, సిసూర్‌లొఇ రిఎర్‌ ఎమాయుఇని ఉండ్రి నాటొ సొన్సి మహార్‌. ఎమాయు యెరూసలెమ్‌దాన్‌ పదకొండు కిలో మీటర్‌ దూరం మనాద్. 14 వారు రిఎర్‌ జర్గితి విజు వందిఙ్‌ వర్గిజి మహార్‌. 15-16 వారు ఆహె వర్గిజి మహిఙ్‌ యేసు వాండ్రె వాజి వరి వెట నడిఃతాన్. వారు వన్నిఙ్‌ సుడ్ఃతార్, గాని వన్నిఙ్‌ గుర్తు అస్తెఙ్‌ అట్‌ఏతార్. 17 నస్తివలె యేసు, “మీరు నడిఃజి వర్గిజిని యా మాటెఙ్‌ ఇనికెఙ్”, ఇజి వరిఙ్‌ వెన్‌బాతాన్. వారు దుకందాన్‌ మొకొం డిఃప్తారె, కద్లిఎండ నిహర్. 18 వెనుక వరిలొఇ క్లెయొపా ఇనికాన్‌ ఒరెన్‌ యేసుఙ్, “యెరూసలెమ్‌దు కూల వాతి వరి లొఇ మంజి, సొహి రోస్కాఙ్‌ జర్గితికెఙ్‌ నెస్‌ఇతికి నీను ఒరిదె”, ఇజి వెహ్తాన్‌. 19 “ఇనికెఙ్‌ జర్గితె?”, ఇజి వాండ్రు వెన్‌బాతాన్. దనిఙ్‌ వారు ఈహు వెహ్తార్‌. “నజరెతుదికాన్‌ యేసుఙ్‌ జర్గితి సఙతిఙ వందిఙ్‌ వర్గిజినాప్. వాండ్రు ఒరెన్‌ ప్రవక్త. వాండ్రు కితి గొప్ప పణిఙాణిఙ్‌ వెహ్తి గొప్ప సఙతిఙాణిఙ్‌ దేవుణు వన్నిఙ్‌ ఇస్టం ఆతాన్. లోకుర్‌ విజెరె బా వన్నిఙ్‌ ఇస్టం ఆతారె నమ్మితార్. 20 మా పెరి పుజెరిఙు, అతికారిఙు, రోమ అతికారి కీదు సావుదిఙ్‌ సిక్స సీదెఙ్‌ వన్నిఙ్‌ ఒపజెప్తార్. వారు వన్నిఙ్‌ సిలువాదు కుటిఙాణిఙ్‌ డెఃయిజి సప్తార్. 21 వీండ్రునె ఇస్రాయేలు లోకాఙ్‌ డిస్‌పిస్నికాన్‌ ఇజి మాపు ఎద్రు సుడ్ఃజి మహప్. యాకదె ఆఎండ, యా సఙతి జర్గిజి నేహన్‌ మూండ్రి దినమ్‌కు ఆతె.

22-23 మరి. మా లొఇ మన్ని సెగొండెక్‌ బోదెక్‌ మఙి నండొ బమ్మ కిబిస్తె. ఎలాగ ఇహిఙ, కోడిఃజామ్‌నె దూకిదు సొహి గాని వన్కాఙ్‌ వన్ని పీన్‌గు తోర్‌ఎతాద్. అవీకు మర్‌జి వాతెనె మఙి ఈహు వెహ్తె. దూతార్‌ వన్కాఙ్‌ తోరె ఆతారె, యేసు బత్కిత మనాన్‌ ఇజి వెహ్తార్‌‌ ఇజి. 24 మా వెట మనికార్‌ సెగొండార్‌ దూకిదు సొహరె, బోదెక్‌ వెహ్తి వజనె సుడ్ఃతార్. వన్నిఙ్‌ వారు సుడ్ఃఏతార్.

25-26 అయావలె వాండ్రు వరిఙ్, “బుద్ది సిలికిదెర్, ప్రవక్తరు వెహ్తి మాటెఙ్‌ విజు నమిదెఙ్‌ మిఙి నండొ కస్టం ఆజినాద్. క్రీస్తు యా లెకెండ మాలెఙ్‌ఓరిసి, దేవుణు మంజిని బాడిఃదు వన్నివెట అతికారమ్‌దు మండ్రెఙ్‌గదె?”, ఇజి వెహ్తాన్‌. 27 వాండ్రు దేవుణు మాటదు వన్ని వందిఙ్‌ రాస్తి మన్ని దని అర్దం వరిఙ్‌ వెహ్తాన్‌. మోసె రాస్తి పుస్తకమ్‌దాన్‌ మొదొల్సి ప్రవక్తరు విజెరె రాస్తి పుస్తకమ్‌ దాక మన్ని మటెఙ వెహ్సి వాతాన్.

28 వారు సొన్సిని నారు డగ్రు ఆతిఙ్, వాండ్రు వరిఙ్‌ డిఃసి మరి దూరం సొన్సిని లెకెండ్‌ నడిఃతాన్. 29 గాని వారు, “మా వెట మన్‌అ. పొద్దుఆజినాద్. సీకాట్‌ ఆతాద్”, ఇజి వెహ్సి వన్నిఙ్‌ మరి మరి వెహ్తాన్‌. అందెఙె వాండ్రు వరి వెట మండ్రెఙ్‌ సొహాన్‌. 30 వాండ్రు వరి వెట ఉండెఙ్‌ బస్తివెలె, రొటె అస్తాండ్రె దేవుణుదిఙ్‌ వందనమ్‌కు వెహ్సి దనిఙ్‌ రుక్సి వరిఙ్‌ సితాన్‌ 31 వెటనె వారు వీండ్రు యేసు ఇజి గుర్తు అస్తార్. గాని వాండ్రు వరిఙ్‌ తోర్‌ఏండ ఆతాన్. 32 అయావలె వారు రిఎర్, “వాండ్రు సర్దు, మా వెట వర్గిజి, దేవుణు మాటెఙ్‌ మఙి నెస్‌పిస్తివెలె, మా మన్సుదు నండొ సర్‌ద వాతి లెకెండ్‌ ఆతాద్‌ గదె”, ఇజి ఒరెన్‌ వెట ఒరెన్‌ వర్గితాన్. 33-34 వెటనె వారు నిఙితారె, యెరూసలెమ్‌దు సొహార్‌. అబె, వారు పదకొండు మణిసిర్‌ సిసూర్‌ని వరి వెట మహికార్‌ కూడ్ఃజి, “నిజమె, యేసు మర్‌జి నిఙితాన్. సిమొనుఙ్‌తోరె ఆతాన్‌ ఇజి వర్గిజి మహిక సుడ్ఃతాన్. 35 అయావలె వారు రిఎర్, సర్దు జర్గితికెఙ్‌ యేసు రొటె రుక్సివెలె వారు ఎలాగ గుర్తు అస్తారొ దన్నివందిఙ్‌ వెహ్తార్‌.

36 వారు వర్గిజి మహివలెనె యేసు వాండ్రె వరి నడిఃమి నిహండ్రె, “సమాదనం కల్గిపిద్”, ఇజి వెహ్తాన్‌. 37 దూబ తోరితాద్‌ ఇజి ఒడిఃబిజి వారు నండొ తియెల్‌ ఆతార్. 38 నస్తివలె వాండ్రు, “ఎందానిఙ్‌ మీరు తియెల్‌ ఆజిన్‌దెర్‌? ఎందనిఙ్‌ అనుమానమ్‌కు మీ మన్సుద్‌ వాజినె? 39 నానె వాండ్రు ఇజి నమిదెఙ్‌ నా కిక్కాఙ్‌ కాల్కాఙ్‌ సుడ్ఃదు. ఎందానిఙ్‌ ఇహిఙ, నఙి మన్ని లెకెండ్‌ దూబదిఙ్‌ ఒడొఃల్‌ మన్‌ఉ. 40 యా మటెఙ్‌ వెహ్సి వాండ్రు వరిఙ్‌ వన్ని కిక్కు కాల్కు తోరిస్తాన్.

41-43 అహిఙ్‌బా వారు సర్దదాన్‌ బమ్మదాన్‌ ఇంక నమ్మిఎండ మహార్‌. అందెఙె వాండ్రు వరిఙ్, “తిండ్రెఙ్‌ ఇనికబా మనాదా?”, ఇజి వెన్‌బాతిఙ్, వారు ఉండ్రి సుహ్తి మొయ ముకెఙ్‌ సితార్. వాండ్రు లొస్తాండ్రె వరి ఎద్రు తిహన్. 44 మరి వాండ్రు వరిఙ్, “నాను మీ వెట మహివలె యాకెఙ్‌నె మీ వెట వెహ్త. ఇనిక ఇహిఙ, మోసె రాస్తి పుస్తకమ్‌దు, ప్రవక్తరు రాస్తి పుస్తకమ్‌దు, కీర్తన పుస్తకమ్‌దు నా వందిఙ్‌ రాస్తి మనికెఙ్‌ విజు పూర్తి ఆదెఙ్‌వెలె”, ఇజి. 45 వాండ్రు దేవుణు మాటెఙ్‌ అర్దం కిదెఙ్‌ వరిఙ్‌ సాయం కిత్తాన్. 46-47 వాండ్రు వరిఙ్‌ ఈహు వెహ్తాన్‌. “యా మాటెఙ్‌ రాస్త మనాద్. అయాక ఇనిక ఇహిఙ, క్రీస్తు మాలెఙ్ ఓరిసి, సాజి మూండ్రి రోస్కాణిఙ్‌ సావుదాన్‌ నిఙ్‌నాన్‌లె. యెరూసలెమ్‌దు మొదొల్సి లోకాఙ్‌ విజెరిఙ్‌ వన్ని అతికారమ్‌దాన్‌ ‘పాపమ్‌కు ఒప్పుకొడ్ఃఅ’, దేవుణు సెమిస్నాన్”, ఇని మాట వెహె ఆనాద్‌లె. 48 మీరు సుడ్ఃతికెఙ్‌ లోకాఙ్‌ వెహ్తెఙ్. 49 నా బుబ్బ ఒట్టు కితి దేవుణు ఆత్మదిఙ్‌ నాను మిఙి పోక్న. గాని ముస్కుహాన్‌ సత్తు మీ ముస్కు వానిదాక మీరు యెరూసలెం పట్నమ్‌దునె మండ్రు.

50 పట్నం వెల్లి బెతానియ నారు డగ్రు దాక వాండ్రు వరిఙ్‌ ఒతాన్. వాండ్రు కికు పెహ్తండె, వరిఙ్‌ దీవిస్తాన్. 51 దీవిసి మహివలె వాండ్రు వరిఙ్‌ డిఃస్తాన్. దేవుణు వన్నిఙ్‌ వాండ్రు మంజిని బాడిఃదు ఒత్తాన్. 52-53 వారు వన్నిఙ్‌ మాడిఃస్తారె, నండొ సర్దదాన్‌ యెరూసలెమ్‌దు మర్‌జి వాతార్. వారు డిఃస్‌ఏండ గుడిఃదు మంజి, దేవుణుదిఙ్‌ పొగిడిఃజి మహార్‌.