୨୬
ଆଗ୍ରୀପାନ୍ ମୁନ୍ନେ ପାଉଲ୍ ଆତ୍ମାସମର୍ତନ୍ ମାଡ଼୍ତଣ୍ଡ୍
୧ ଆଗ୍ରୀପା ପାଉଲ୍ତିଙ୍କ୍ କେତ୍ତଣ୍ଡ୍, “ନିକିଂଙ୍କ୍ ନି ବିଷୟ୍ତେ ବାତ୍ କେତାନଙ୍କ୍ ଆଦେଶ୍ ହିତ୍ତଡ଼୍ ପାଉଲ୍ କାୟ୍ ହାଆସ୍ ନିଜେ ସମର୍ତନ୍ ମାଡ଼ି କେତ୍ତଣ୍ଡ୍ ।”
୨ “ରାଜା ଆଗ୍ରୀପା ! ଇହୁଦୀଡ଼୍ ନାକିଂଙ୍କ୍ ବେନ୍ ବିଷୟ୍ତେ ଅବିଯୋଗ୍ ମାଡ଼୍ତଡ଼୍, ଆଦିନ୍ ବିରୁଦ୍ଦ୍ତେ ନି ମୁନ୍ନେ ନାନ୍ ଆତ୍ମସମର୍ତନ୍ ମାଡ଼ାନଙ୍କ୍ ସୁଯୋଗ୍ ଦର୍କ୍ତାଙ୍କ୍ ଅଣ୍ଡ୍ ନିଜେତିଙ୍କ୍ ଲେକେତ୍ ଇଞ୍ଜ ହେର୍କା ମାଡ଼ୁତଣ୍ଡ୍,” ୩ ବାତେଙ୍କ୍ଇତ୍କେ ଇହୁଦୀଡ଼୍ ରୀତିନୀତି ନୁ ମତାମତ ବିଷୟ୍ ନିମ୍ ସାୟେ ପୁତ୍ତିନ୍ । ଅନୁରଦ୍ ମାଡ଼ୁତାନ୍, ନିମ୍ ଗାଡ଼୍ସ୍ ଆସ୍ ନା ଗଟି କେଞ୍ଜେ ।
୪ “ପିଲେ ଦିନା କନ୍ସ୍ ନାନ୍ ବେଦ୍ପୁଟୁଙ୍କ୍ ବାଦ୍କ୍ତାନ୍, ଆଦ୍ ଇହୁଦୀଡ଼୍ ପୁତ୍ତଡ଼୍ । ମୁନେନ୍ ନିଜେତ୍ ଦେଶ୍ତାଗ୍ ନୁ ତାନ୍ପେର୍କେ ଯିରୁଶାଲେମ୍ତାଗ୍ ନାନ୍ ବେଲା ବାଦ୍କ୍ତାନ୍, ଆଦ୍ ମିକା ଇହୁଦୀଡ଼୍ ପୁତ୍ତଡ଼୍ । ୫ ✡ପ୍ରେରିତ ୨3:୬; ଫିଲିପିୟ 3:୫.ନାନ୍ ମୁନେନ୍ ପାରୂଶୀ ପେଦେର୍ତେ ମାନ୍ ଦର୍ମତାଦ୍ ସାରେତିଙ୍କ୍ ସୁଦୁର୍ ମାନ୍ଦେତାଗ୍ ସବ୍ୟ ଇନା ଜିୱୁନ୍ ବାଦ୍କ ମାତ୍ତାନ୍, ଅଡ଼୍ ଇଦ୍ ପୁତ୍ତଡ଼୍ ନୁ ଇଚ୍ଛା ମାଡ଼୍କେ, ଅଡ଼୍ ଇଦ୍ ବିଷୟ୍ତେ ସାକ୍ଷ୍ୟ ଇଦେ ପାର୍ଦ୍ତଡ଼୍ । ୬ ଇଶ୍ୱର୍ ମାନ୍ ଆନିଦାଦୀଡ଼୍କିଙ୍କ୍ ବେନ୍ ପ୍ରତିଜ୍ଞା କେସ୍ମାତ୍ତଣ୍ଡ୍, ଆଗେ ନାୟାଦ୍ ଆଶେ ମାନ୍ଦାନ୍ ସେଙ୍ଗେ ନାନ୍ ଇଗେ ବିଚାର୍ ଆଦାନଙ୍କ୍ ନିସ୍ ମିନ୍ଦେନ୍ । ୭ ମାନ୍ ନାରୁଡ଼୍ତେ ବାର ଗୋଷ୍ଠୀତଡ଼୍ ନାର୍କେ ପାୟାଲ୍ ପ୍ରବୁଙ୍କ୍ ଉପାସନା ମାଡ଼ି ଆଦ୍ ଅଣ୍ଡୟ୍ ବିଷୟ୍ ପାଏମ୍ ଆଦାନ୍ ସେଙ୍ଗେ ଆଶେ ମାଡ଼ିତଡ଼୍ । ହୋ ରାଜା, ନାୟାଦ୍ ଆଦ୍ ଆଶେ ମାଇଦିଙ୍କ୍ ଇହୁଦୀଡ଼୍ ନାକିଂଙ୍କ୍ ଦଷି ମାଡ଼ୁତଡ଼୍ । ୮ ଇଶ୍ୱର୍ ଯେ ଡଲ୍ତେନଡ଼୍କିଙ୍କ୍ ଡଲ୍ତାଗାଙ୍କ୍ ତେଏତିତଣ୍ଡ୍, ଇଦ୍ ବିଶ୍ୱାସ୍ ମାଡ଼ାନାଦ୍ ସମ୍ଭବ୍ ଆୟ୍ୟ ଇଞ୍ଜ ମିଡ଼୍ ବାତେଙ୍କ୍ ହାଲ୍ସୁତିଡ଼୍ ?”
୯ ✡ପ୍ରେରିତ ୮:3; ୨୨:୪,୫.“ନାଜରିତିୟ ଜିସୁନ୍ ପେଦେର୍ତେ ଅନ୍ମାନ୍ଦେତିଙ୍କ୍ ବନ୍ଦ୍ ମାଡ଼ାନ୍ ସେଙ୍ଗେ ନାନ୍ ପାର୍ତେଇସର୍ ଆଲ୍ସି ମାଡ଼ାନାଦ୍ ଟିକ୍ ଇଞ୍ଜ ହାଲ୍ସିମାତ୍ତାନ୍ । ୧୦ ଯିରୁଶାଲେମ୍ତାଗ୍ ନାନ୍ ଆଲେନେ ମାଡ଼୍ତାନ୍ । ବେଡ଼ିୟି ଯାଜକିଡ଼ାଗାଙ୍କ୍ ଅଦିକାର୍ ଚିଟି ଆସ୍ ଇଶ୍ୱର୍ତେ ପବିତ୍ର ବକ୍ତଡ଼୍ ଲୋପେଙ୍କ୍ ନାର୍ଗେ ନାରୁଡ଼୍କିଂଙ୍କ୍ ଜେଲ୍ତାଗ୍ ୱାଟ୍ତାନ୍ ନୁ ଅଡ଼୍କିଂଙ୍କ୍ ଡଲାନ୍ଦଣ୍ଡ୍ ହିଦାନ୍ ସେଙ୍ଗେ ନାନ୍ ଆଦିଙ୍କ୍ ସପଟ୍ ମାଡ଼୍ତାନ୍ । ୧୧ ନାର୍ଗେଦାମ୍ ପ୍ରାର୍ତନା ଲଅକିନାଗ୍ ନାନ୍ ଅଡ଼୍କିଂଙ୍କ୍ ଦଣ୍ଡ୍ ହିତ୍ତାନ୍ ନୁ ତାମ୍ ବିଶ୍ୱାସ୍ତାଗାଙ୍କ୍ ୱେରେ ମାଡ଼ାନ୍ ସେଙ୍ଗେ ଆଲ୍ସି ମାଡ଼୍ତାନ୍ । ନାନ୍ ଅଡ଼୍ ପର୍ର ହିସର୍ କପାମ୍ ଆତ୍ତାନ୍ ଯେ, ଅଡ଼୍ ପର୍ର ଅତ୍ୟାଚାର୍ ମାଡ଼ାନ୍ ସେଙ୍ଗେ ବିଦେଶ୍ ଟାୱୁନ୍କିନାଗ୍ ମିକା ଆଞ୍ଜ୍ମାତ୍ତାନ୍ ।”
ପାଉଲ୍ ନିଜର୍ ବାଦ୍ଲେମ୍ ବିଷୟ୍ କେତ୍ତଣ୍ଡ୍
(ପ୍ରେରିତ ୯:୧-୧୯; ୨୨:୬-୧୬)
୧୨ “ଇଦିନ୍ ମାଇଦିଙ୍କ୍ ମୁକ୍ୟ ଯାଜକିଡ଼ାଗାଙ୍କ୍ ଅଦିକାର୍ ଚିଟି ନୁ ଗଟ୍ ଅସ୍ ନାନ୍ ଦାମାସ୍କସ୍ତାଗ୍ ଆଞ୍ଜ୍ମାତ୍ତାନ୍ । ୧୩ ହଁ ରାଜା ଆଗ୍ରିପା, ହଟାତ୍ ଅନ୍ଦିନେ ପାୟାଲ୍ତେ ୱେଲେ ମେନ୍ ରଟିନ୍ ପର୍ର ନାନ୍ ପଡ଼୍ଦ୍ ୱେସ୍ତାଗାଙ୍କ୍ ମେଣ୍ଡେ ଅଦିକ୍ ଅଣ୍ଡୟ୍ ୱେସ୍ ଉଡ଼୍ତାନ୍, ସ୍ୱର୍ଗତାଗାଙ୍କ୍ ଆଦ୍ ୱେସ୍ ୱାସ୍ ନାକିଂଙ୍କ୍ ନୁ ନା ତଡ଼୍ ମାନ୍ଦାନଡ଼୍ତେ ତିଡ଼୍ୟିପାକ୍ ନିତ୍ତେ । ୧୪ ମାମ୍ମେ ସାରେତମ୍ ବୂମ୍ତାଗ୍ ରାୟ୍ତମ୍ ନୁ ହୀବ୍ରୁ ଗଟ୍ତେ ନା ସେଙ୍ଗେ ଅଣ୍ଡୟ୍ ଗଟ୍ କେଞ୍ଜ୍ତାନ୍, ‘ଶାଉଲ୍, ଶାଉଲ୍ ! ନିମ୍ ବାତେଙ୍କ୍ ନାକିଂଙ୍କ୍ ତାଡ଼ନା ମାଡ଼ୁତିନ୍ ? ଉଡ଼୍ଦାନଣ୍ଡ୍ ମାନେୟ୍ତେ କୟେଡୁଡ୍ତିଙ୍କ୍ ଲାତ୍ ରେହେତାନ୍ କନ୍ଦ୍ ଲେକାମ୍ ନିମ୍ ନିଜେ ଦେବ୍ ତିନ୍ତି*ଏପରି ବାବରେ ପ୍ରବୁ ତାଙ୍କ ଦୋଷ ସୁଦାରିବା ପାଇଁ ଏହା କରୁଛନ୍ତି ।’ ୧୫ ନାନ୍ ପାଚ୍ରାମାଡ଼୍ତାନ୍, ‘ପ୍ରବୁ, ନିମ୍ ବେନ ?’ ପ୍ରବୁ ଉତ୍ତର୍ ହିତ୍ତଣ୍ଡ୍, ‘ନାନ୍ ଜିସୁ, ବେନଙ୍କ୍ ନିମ୍ ତାଡ଼ନା ମାଡ଼ୁତିନ୍ । ୧୬ ଇତ୍କେ ତେଦି ନିଲ୍ମ୍ । ନିକିଂଙ୍କ୍ ନା ଦାସ ଲେକାମ୍ ନେହେତାନଙ୍କ୍ ନାନ୍ ନିକିଂଙ୍କ୍ ଦର୍ଶନ୍ ହିତ୍ତାନ୍ । ନେଣ୍ଡ୍ ନା ବିଷୟ୍ତେ ବାତ୍ ଉଡ଼୍ତିନ୍ ନୁ ୱାଦାନ୍ ଦିନାତେ ନାନ୍ ନିକିଂଙ୍କ୍ ବାତ୍ ତଅତିତାନ୍, ଆଦ୍ ବିଷୟ୍ ନିମ୍ ୱେରେ ନାରୁଡ଼୍କ୍ ସାକ୍ଷି କେତିତିନ୍ । ୧୭ ନାନ୍ ନିକିଂଙ୍କ୍ ବେନ୍ ଇହୁଦୀ ନୁ ଅଣଇହୁଦୀ ନାରୁଡ଼ାଗ୍ ରହତିତାନ୍, ଅଡ଼୍ଆଗାଙ୍କ୍ ନାନ୍ ନିକିଂଙ୍କ୍ ଉଦ୍ଦାର୍ ମାଡ଼ିତାନ୍ । ୧୮ ନିମ୍ ଅଡ଼ାଦ୍ କଣ୍ଡାଙ୍କ୍ ପରିଷ୍କାର୍ ମାଡ଼ିମ୍ । ଅଡ଼୍କିଂଙ୍କ୍ ଇକାଡ଼୍ତାଗାଙ୍କ୍ ୱେସିନାଗ୍ ନୁ ଶୟ୍ତାନ୍ତାଗାଙ୍କ୍ ଇଶ୍ୱର୍ତେ ପାକେ ତାତାନଙ୍କ୍ ଆଦ୍ତେ, ବେଲାକି ଅଡ଼୍ ନାକିଂଙ୍କ୍ ବିଶ୍ୱାସ୍ ମାଡ଼୍କେ ଅଡ଼ାଦ୍ ପାପ୍ କ୍ଷମା ଆଦ୍ତେ ନୁ ପ୍ରବୁ ହେଞ୍ଚ୍ତେ ନାରୁଡ଼୍ ଲୋପେ ଅଡ଼୍କ୍ ଅଦିକାର୍ ଦର୍କିତ୍ ।’ ”
ନିଜର୍ ପାଡ଼୍ୟି ବିଷୟ୍ତେ ପାଉଲ୍ କେତ୍ତଣ୍ଡ୍
୧୯ “ହଁ ରାଜା ଆଗ୍ରୀପା, ନାନ୍ ସ୍ୱର୍ଗତାଗାଙ୍କ୍ ବେନ୍ ଦର୍ଶନ୍ ଉଡ଼୍ତାନ୍, ଆଦିଙ୍କ୍ ଅପ୍ମାନ୍ ମାଡ଼ନ୍ । ୨୦ ✡ପ୍ରେରିତ ୯:୨୦,୨୮,୨୯.ନାନ୍ ମୁନେନ୍ ଦାମାସ୍କସ୍ ଯିରୁଶାଲେମ୍ତାଗ୍ ନୁ ତାନ୍ପେର୍କେ ଯିହୁଦା ପ୍ରଦେଶ୍ତେ ସାରେ ଏକାମ୍ ନୁ ଅଣଇହୁଦୀଡ଼୍ ଲୋପେ ପ୍ରଚାର୍ ମାଡ଼୍ତାନ୍, ବେଲାକି ଅଡ଼୍ ପାପାମ୍ତାଗାଙ୍କ୍ ମାଲ୍ସ୍ ଇଶ୍ୱର୍ ଗାର୍ରେ ୱାଦ୍ତଡ଼୍ ନୁ ଅଡ଼୍ ବାତ୍ ଅନୁତାପ୍ ମାଡ଼୍ତଡ଼୍, ଆଦ୍ ପାଡ଼୍ୟିତାଗ୍ ତଅତିତଡ଼୍ । ୨୧ ଇଦିନ୍ମାଇଦିଙ୍କ୍ ନାନ୍ ମନ୍ଦିର୍ତାଗ୍ ମାନ୍ଦାନ୍ ୱେଲେ ଇହୁଦୀଡ଼୍ ନାକିଂଙ୍କ୍ ପଇସ୍ ହାୱ୍କାନଙ୍କ୍ ଚେଷ୍ଟା ମାଡ଼୍ତଡ଼୍ । ୨୨ ଇତ୍କେ ନେଣ୍ଡ୍ ଯାକ ଇଶ୍ୱର୍ ନାକିଂଙ୍କ୍ ସାହାଯ୍ୟ ମାଡ଼୍ତଣ୍ଡ୍ ନୁ ଆଦିନ୍ ସେଙ୍ଗେ ନାନ୍ ନେଣ୍ଡ୍ ବେଡ଼୍ୟଡ଼୍ ସୁଦୁଲଡ଼୍ ସାରେତଡ଼୍ ବକେତ୍ ସାମାନ୍ ସାକ୍ଷ୍ୟ ହିଦାନ୍ ସେଙ୍ଗେ ଦାୟି ଆଦାନ୍ ସେଙ୍ଗେ ନିତ୍ତାନ୍ । ବାବବାଦୀଡ଼୍ ନୁ ମୋଶାଲ୍, ବାତ୍ ଗଟେମ୍ ଆଦ୍ତେ ଇଞ୍ଜ କେସ୍ମାତ୍ତଡ଼୍ ନାନ୍ ଟିକ୍ ଆଦେ ଗଟ୍ କେତୁତାନ୍ । ୨୩ ✡୧ କରନ୍ତିୟ ୧୫:୨୦.ମସୀହ ଦୁଃକାମ୍କଷ୍ଟ ମାଡ଼ିତନ୍ ନୁ ଡଲ୍ତଡ଼୍ ଲୋପେ ସାରେତିଙ୍କ୍ ମୁନେନ୍ ପୁନରୁତାନ୍ ଆସ୍ ଇହୁଦୀ ନୁ ଅଣଇହୁଦୀଡ଼୍ ବକେତ୍ ପରିତ୍ରାଣତେ ୱେସ୍ ତଅତିତଣ୍ଡ୍ ।”
୨୪ ଇଦ୍ରକମ୍ ପାଉଲ୍ ନିଜେ ରାଜି ଆସ୍ କେତ୍ତାନ୍ ୱେଲେ ଫେଷ୍ଟସ୍ କିଡ଼୍କି କେତ୍ତଣ୍ଡ୍, “ପାଉଲ୍, ନିମ୍ ବାୟାନି ! ନିୟାଦ୍ ନାର୍ଗେ ବୁଦ୍ଦ୍ ନିକିଂଙ୍କ୍ ବାୟେ ମାଡ଼୍ତେ !”
୨୫ ପାଉଲ୍ ଉତ୍ତର୍ ହିତ୍ତଣ୍ଡ୍, “ନାନ୍ ବାୟେ ଆୟନ୍ ମଣିମା ! ଫେଷ୍ଟସ୍ ବାତ୍ କେତୁତାନ୍ ଆଦ୍ ନିଜାମ୍ ନୁ ପ୍ରାମାଣ୍ତାଦ୍ ଗଟ୍ । ୨୬ ରାଜା ଆଗ୍ରୀପା ! ନିମ୍ ଇୱୁସାରେ ବିଷୟ୍ ପୁତ୍ତାଙ୍କ୍ ନାନ୍ ନି ମୁନ୍ନେ ଇଦ୍ ଗଟ୍ କେତାନଙ୍କ୍ ସାହାସ୍ ମାଡ଼ୁତାନ୍ ! ନାନ୍ ନିଜାମ୍ ପୁତ୍ତାନ୍ ଯେ, ଇୱୁସାରେ ବିଷୟ୍ ନିକିଂଙ୍କ୍ ତଅନ୍ଦ, ବାତେଙ୍କ୍ଇତ୍କେ ପୁନ୍ୱାଦ୍ ପଡ଼୍ୟେତାଗ୍ ମିଞ୍ଜୀ ଇଦ୍ ବିଷୟ୍ ଗଟେମ୍ ଆୟ୍ୟ । ୨୭ ରାଜା ଆଗ୍ରୀପା, ନିମ୍ ବାବବାଦୀଡ଼୍କ୍ ବିଶ୍ୱାସ୍ ମାଡ଼ୁତିନ୍ ତ ! ନାନ୍ ପୁତ୍ତାନ୍ ନିମ୍ ବିଶ୍ୱାସ୍ ମାଡ଼ୁତିନ୍ !”
୨୮ ଆଗ୍ରୀପା ପାଉଲ୍ତିଙ୍କ୍ ଉତ୍ତର୍ ହିତ୍ତଣ୍ଡ୍, “ଇଦ୍ ସୁଦୁଟ୍ ସମୟ୍ତେ ଲୋପେ ନିମ୍ ବାତ୍ ନାକିଂଙ୍କ୍ କ୍ରିଷ୍ଟିୟାନ୍ ବାଦ୍ଲା ମାଡ଼ିତାନ୍ ଇଞ୍ଜ ହାଲ୍ସୁତିନ୍ ?”
୨୯ ପାଉଲ୍ ଉତ୍ତର୍ ହିତ୍ତଣ୍ଡ୍, “ସୁଦୁର୍ ଦିନାମ୍ ଆୟି ବା ଗାଟି ଦିନାମ୍ ଆୟି, ଇଶ୍ୱର୍ତାଗ୍ ନାନ୍ ପ୍ରାର୍ତନା ମାଡ଼ୁତାନ୍, ନିନ୍ ନୁ ନେଣ୍ଡ୍ ନା ଗଟି କେଞ୍ଜମାନ୍ଦାନ୍ ସାରେତଡ଼୍ ନା ଲେକାମ୍ ଆୟ୍ମୁଟ୍, ବେଲାବା ବନ୍ଦି ଆଦ୍ତନ୍ ଇଦ୍ରକମ୍ ଇକ୍ଲେମ୍ ତଡ଼୍ ତଅମୁଟ୍ ଇଞ୍ଜ ନାନ୍ କେଲନ୍ ।”
୩୦ ତାନ୍ପେର୍କେ ରାଜା, ରାଜ୍ୟପାଳ, ବର୍ଣ୍ଣିସ୍ ନୁ ମେଣ୍ଡେବାଗାତଡ଼୍ ଆଦାନଙ୍କ୍ ତେଦ୍ତଡ଼୍ । ୩୧ ଅଡ଼୍ ଆଦାନ୍ ୱେଲେ ତାମ୍ତାମ୍ କେତ୍ତଡ଼୍, “ଇଣ୍ଡ୍ ନାରୁଣ୍ଡ୍ ଇଦ୍ ରକମ୍ ବାତ୍ ପାଡ଼୍ୟି ମାଡ଼ଣ୍ଡ୍, ବାତ୍ ସେଙ୍ଗେ ଅଣ୍ଡ୍ ଡଲାନ୍ଦଣ୍ଡ୍ ପାଏମ୍ ଆଦ୍ତଣ୍ଡ୍ ବା ବନ୍ଦି ଆଦ୍ତନ୍ ।” ୩୨ ଆଗ୍ରୀପା ଫେଷ୍ଟସ୍ତିଙ୍କ୍ କେତ୍ତଣ୍ଡ୍, “ଉପବାସ୍ତାଗ୍ ଯଦି ଇଣ୍ଡ୍ ନାରୁଣ୍ଡ୍ ମହାରାଜାନାଗ୍ ଆବେଦନ୍ ମାଡ଼କଟ୍ ମାତ୍କେ, ମାମ୍ମେ ଅଂକିଙ୍କ୍ ମୁକ୍ତି ହିଦାଙ୍କ୍ ପାର୍ୱେମ୍ ।”