୨୭
ପାଉଲ୍ତିଙ୍କ୍ ରୋମ୍ତାଗ୍ ଆତ୍ତଡ଼୍
୧ ମାମ୍ମେ ଇତାଲିଆତାକ୍ ଏର୍ଦାଲା ଆଦ୍ତମ୍ ଇଞ୍ଜ ମାନ୍ ମାଡ଼୍ତାଙ୍କ୍ ପାଉଲ୍ ନୁ ମେଣ୍ଡେ ବେସ୍କ୍ତୁଡ଼୍ ବନ୍ଦିଡ଼୍, “ମହାରାଜା ସେନାଦଳ,” ପେଦେର୍ତେ ଅଣ୍ଡୟ୍ ରୋମୀୟ ସୈନିଡ଼୍ ବାହିନୀତେ ସେନାପତି ଯୁଲିୟସ୍ତେ କାୟ୍ଦାଗ୍ ସମର୍ପିତ୍ ଆତ୍ତଡ଼୍ । ୨ ମାମ୍ମେ ରୋମ୍ତେ ଆସିଆ ଦେଶ୍ତେ ଆଞ୍ଚିନ୍ ଗାଟ୍କିନାଗ୍ ଆଦାନ୍ ସେଙ୍ଗେ ତିଆର୍ ଆତ୍ତେ ଆଦ୍ରମୁତିୟମ୍ତେ ଅଣ୍ଡୟ୍ ଏର୍ ଜାହାଜ୍ତାଗ୍ ଆତ୍ତମ୍ । ଆରିଷ୍ଟାର୍କସ୍ ପେଦେର୍ତେ ଥେସଲନିକୀ ସହର୍ତଣ୍ଡ୍ ୱେରଣ୍ଡ୍ ମାସିଦୋନିଆ ନାରୁଣ୍ଡ୍ ମାତଡ଼୍ ମାତ୍ତଣ୍ଡ୍ । ୩ ମେଣ୍ଡନ୍ ଦିନ୍ ମାମ୍ମେ ସିଦୋନ୍ତାଗ୍ ହେୱ୍ତମ୍ । ଯୁଲିୟସ୍ ପାଉଲ୍ତିଙ୍କ୍ ସାୟେ ଉଡ଼ ମାତ୍ତଣ୍ଡ୍ । ପାଉଲ୍ତେ ସାଙ୍ଗଡ଼ାଗାଙ୍କ୍ ଅଂକିଙ୍କ୍ ଦର୍କାର୍ ଜିନିଷ୍ ତାତାନ୍ ସେଙ୍ଗେ ଅଡ଼୍କିଂଙ୍କ୍ କାଇଲାନଙ୍କ୍ ଅଣ୍ଡ୍ ପାଉଲ୍ତିଙ୍କ୍ ଗଟ୍ ହିତ୍ତଣ୍ଡ୍ । ୪ ସାଇପ୍ରସ୍ କେତ୍ତନ୍ ମାମ୍ମେ ଆଗାଙ୍କ୍ ଆଦାନ୍ ୱେଲେ ଆଞ୍ଚିନାକାଙ୍କ୍ ଗାଲ୍ ୱାତ୍ତାଙ୍କ୍ କୁପ୍ର ଗପ୍ତେ ହାଞ୍ଚ୍ ହାଞ୍ଚ୍ ଆତ୍ତମ୍ । ୫ ସିଲିଷୀଆ ନୁ ପଂଫୁଲିୟା ଜିଡ଼ି ଲିସିଆତେ ମାଏରାତାଗ୍ ହେୱୁତମ୍ । ୬ ଆଗେ ସେନାପତି ଅଣ୍ଡୟ୍ ଆଲେକ୍ଜାଣ୍ଡ୍ରିଆତେ ଜାହାଜ୍ ଇତାଲିଆତାକ୍ ଆଦାନ୍ ସେଙ୍ଗେ ତିଆର୍ ଆଦାନାଦ୍ ଉଡ଼ି ମାକିଂଙ୍କ୍ ଆଗେ କୁସ୍ପ୍ତଣ୍ଡ୍ ।
୭ ମାମ୍ମେ ନାର୍ଗେ ଦିନା ଯାକ ଜାମ୍ ଜାମ୍ ଆଞ୍ଜ୍ ଗାଟି ତିପାଲ୍ତେ କ୍ନୀଦର ଟାୱୁନ୍ ବକେତ୍ ହେୱ୍ତମ୍ । ଆଞ୍ଚିନାକାଙ୍କ୍ ଗାଲ୍ ୱାତ୍ତାଙ୍କ୍ ମାମ୍ମେ ମେଣ୍ଡେ ମୁନ୍ନେ ଆଦାନଙ୍କ୍ ପାର୍ୱମ୍, ଆଦିଙ୍କ୍ କ୍ରୀଟ ଗପ୍ତେ ତିନ୍ଦେପାକ୍ ହାଞ୍ଚ୍ ହାଞ୍ଚ୍ ଆଞ୍ଜ୍ ସାଲମୋନୀ ଗପିଙ୍କ୍ ଜିଡ଼୍ତମ୍ । ୮ ମାମ୍ମେ ହାଞ୍ଚ୍ ହାଞ୍ଚ୍ ଆଞ୍ଜ୍ ଗାଟି ତିପାଲ୍ତେ ଲାସିଆ ଟାଉନ୍ ବକେତ୍ ସୁନ୍ଦର୍ ଗାଟ୍ ପେଦେର୍ତେ ପଡ଼ିୟେତାଗ୍ ହେୱ୍ତମ୍ ।
୯ ମାମ୍ମେ ନାର୍ଗେ ଦିନା ଆଗେ ମାତ୍ତମ୍ । ଇହୁଦୀଡ଼ାଦ୍ ଉପବାସ୍ ପାଣ୍ଡୁମ୍ ତେରିମାତ୍ତାଙ୍କ୍, ଆସୁଟେ ଗଦାଡ଼୍ତାଗ୍ ଆଦାନାଦ୍ ବିପଦ୍ ମାତ୍ତେ । ଆଦିଙ୍କ୍ ପାଉଲ୍ ଅଡ଼୍କିଂଙ୍କ୍ ଇଦ୍ ଉପଦେଶ୍ ହିତ୍ତଣ୍ଡ୍; ୧୦ “ସାଙ୍ଗଡ଼ି, ନାନ୍ ପୁନ୍ଦାନଙ୍କ୍ ପାର୍ଦୁତାନ୍ ଯେ, ଯଦି ମାନାଡ଼୍ ଇଗାଙ୍କ୍ ମେଣ୍ଡେ ଏର୍ଦାଲା ଆଦ୍ତାଡ଼୍, ଆଲେକେ ବିପଦ୍ ଆଦ୍ତେ । ଇଦିନ୍ ତଡ଼୍ ମାତର୍ ଏର୍ଜାହାଜ୍ ନୁ ମାଲ୍ ନଷ୍ଟ ଆଦ୍ତେ ଆଦ୍ ଆୟ୍ୟ, ଇଗେ ମାନ୍ଦାନ୍ ନାରୁଡ଼୍ତେ ଜିୱୁଣ୍ଡ୍ତିଙ୍କ୍ ମିକା ବିପଦ୍ ମିନ୍ଦେ ।” ୧୧ ଇତ୍କେ ସେନାପତି ପାଉଲ୍ତେ ଗଟ୍ତିଙ୍କ୍ ବିଶ୍ୱାସ୍ ମାଡ଼କଟ୍ ଏର୍ଜାହାଜ୍ତେ ମୁକ୍ୟାଲ୍ ନୁ ଏର୍ଜାହାଜ୍ତେ ମାଲିକ୍ତେ ଗଟ୍ କେଞ୍ଜ୍ତଣ୍ଡ୍ । ୧୨ ଶାଲ୍ଦିନେ ମାନ୍ଦାନ୍ ସେଙ୍ଗେ ଗାଟ୍ତାଗ୍ ସୁବିଦା ହିଲ୍ୱେ ମାତ୍ତେ, ଆଦିଙ୍କ୍ ଜାହାଜ୍ତାଗ୍ ମାନ୍ଦାନ୍ ନାରୁଡ଼୍ ଲୋପେଙ୍କ୍ ନାର୍ଗେ ଗଦାଡ଼୍ତାଗ୍ ଆଞ୍ଜ୍ ଯଦି ପାର୍ଦ୍ତଡ଼୍, ଫୀନିକ୍ସ୍ତାଗ୍ ଶାଲ୍ କାଲାମ୍ ମାନ୍ଦାନ୍ ସେଙ୍ଗେ ହାଲ୍ସ୍ତଡ଼୍ । ଫୀନିକ୍ସ୍ ତିନ୍ଦେପାକେତ୍ ପେର୍କେତ୍ପାକ୍ ନୁ ଡେବେପାକେତ୍ ପେର୍କେତ୍ପାକ୍ ତାକ୍ ମୁନ୍ନେ ମାଡ଼ି ମାନ୍ଦାନ୍ କ୍ରୀଟତେ ଅଣ୍ଡୟ୍ ଗାଟ୍ ।
ଗଦାଡ଼୍ତାଗ୍ ଗାଲ୍ୱାର୍ସାମ୍
୧୩ ବେସୁଟ୍ ତିନ୍ଦେପାକ୍ କନ୍ସ୍ ସାୟେତ୍ ଗାଲ୍ ୱାତ୍ତେ, ନାରୁଡ଼୍ ଇଦିଙ୍କ୍ ଅଣ୍ଡୟ୍ ସାୟେତ୍ କାବୁର୍ ଇଞ୍ଜ ହାଲ୍ସ୍ତଡ଼୍ ନୁ ସିଲେତିଙ୍କ୍ ତେଇସ୍ କ୍ରୀଟତେ ହାଞ୍ଚ୍ ହାଞ୍ଚ୍ ଆତ୍ତଡ଼୍ । ୧୪ ଇତ୍କେ ସିଟ୍ପାଟ୍ ଗପ୍ତାକାଙ୍କ୍ ଡେବେପାକାଙ୍କ୍ ନୁ ମୁନେତ୍ ପାକାଙ୍କ୍ ଗାଲ୍ ଗାଟି ଉର୍ଗିଙ୍କ୍ ୱାତ୍ତେ, ୧୫ ଏର୍ଜାହାଜ୍ତିଙ୍କ୍ ତାଲ୍ଗ୍ତେ । ଜାହାଜ୍ତିଙ୍କ୍ ଗାଲ୍ ୱାଦାନାକ୍ ମୁନ୍ନେ ମାଡ଼େ ପାର୍ୱାଙ୍କ୍ ମାମ୍ମେ ମେଣ୍ଡେ ଚେଷ୍ଟା ମାଡ଼କଟ୍ ଗାଲ୍ ବେକେ ଆଦୁତ୍ତେ ଜାହାଜ୍ତିଙ୍କ୍ ଆକେନେ ଆଦାନଙ୍କ୍ ୱିଡ଼୍ସିତ୍ତମ୍ । ୧୬ ଅଣ୍ଡୟ୍ ସୁଦୁରାଦ୍ ଗପ୍ କାଉଦାତେ ତିନ୍ଦେପାକ୍ ଇସ୍ ଆଦାନ୍ ୱେଲେ ଗାଲ୍ତାଗାଙ୍କ୍ ସୁଦୁର୍ ରକ୍ଷା ପାଏମ୍ ଆତ୍ତମ୍ । ଆଗେ ମାମେ ବେଲାଆୟି ଜାହାଜ୍ତାଗ୍ ମାନ୍ଦାନ୍ ଓଡେତିଙ୍କ୍ ନିରାପଦ୍ ମାଡ଼ାନାଦ୍ ଶକ୍ତି ନେହେତାନଙ୍କ୍ ପାର୍ତ୍ତମ୍ । ୧୭ ଓଡେ ଚାଲାମାଡ଼ାନଡ଼୍ ଆଦିଙ୍କ୍ ଜାହାଜ୍ତେ ପର୍ର ତେଇସ୍ ନଡ଼୍ତଡ଼୍ ଜାହାଜ୍ତାଗ୍ ଲେକେତ୍ ତଃସିତ୍ତଡ଼୍ । ଜାହାଜ୍ ଲିବିଆ ଆଞ୍ଚିନାକ୍ ଉସ୍କତ୍ ଲୋପେ ଆଦ୍ତେ ଇଞ୍ଜ ୱେର୍ସ୍ମିକା ଓଡେ ଚାଲାମାଡ଼ାନଡ଼୍ ମଙ୍ଗ ଲେଇସିତ୍ତଡ଼୍ ଜାହାଜ୍ତିଙ୍କ୍ ଗାଲ୍ ବେକେ ଆଦୁତ୍ତେ ଆକେନ୍ ଆଦାନଙ୍କ୍ ୱିଡ଼୍ସିତ୍ତଡ଼୍ । ୧୮ ରହମକଟ ଗାଲ୍ ୱାଦାନ୍ ସେଙ୍ଗେ ମେଣ୍ଡନ୍ ଦିନ୍ ଅଡ଼୍ ଜାହାଜ୍ତାଗାଙ୍କ୍ ଜିନିଷ୍ ଏର୍ଦାଗ୍ ଏସ୍ତଡ଼୍, ୧୯ ମେଣ୍ଡନ୍ ଦିନ୍ ଜାହାଜ୍ତେ ବେସର୍ ସାମାନ୍ ଗଦାଡ଼୍ତାଗ୍ ଏସିତ୍ତଡ଼୍ । ୨୦ ଗାଟି ଗାଲ୍ ୱାସ୍ ମାନ୍ଦାନ୍ ସେଙ୍ଗେ ନାର୍ଗେ ଦିନା ମାମ୍ମେ ପଡ଼୍ଦ୍ ନୁ ଉକାକିଙ୍କ୍ ଉଡ଼ାନଙ୍କ୍ ପାର୍ୱମ୍ । ପେର୍କେ ମାମ୍ମେ ରକ୍ଷା ପାଏମ୍ ଆଦାନ୍ ସାରେ ଆଶେ ମାପ୍ତମ୍ ।
୨୧ ସାରେତଡ଼୍ ନାର୍ଗେ ଜେଲ୍ କାର୍ୱିନ୍ ମାତ୍ତେ ପେର୍କେ, ପାଉଲ୍ ନାରୁଡ଼୍ ଲୋପେଙ୍କ୍ ନିସ୍ କେତ୍ତଣ୍ଡ୍, “ସାଙ୍ଗଡ଼ି, ମିଡ଼୍ ନା ଗଟି ଇସାପ୍ତେ କ୍ରୀଟତାଗାଙ୍କ୍ ଜାହାଜ୍ ୱିଡ଼୍ସ୍ୱିଡ଼୍, ମାୟାଦ୍ ଇଦ୍ ଅସୁବିଦା ଆୟ ଆୟେଡ଼୍ । ୨୨ ଇତ୍କେ ଇଞ୍ଜେ ନାନ୍ ମିକିଂଙ୍କ୍ ଅନୁରଦ୍ ମାଡ଼ୁତାନ୍, ମିଡ଼୍ ସାହାସ୍ ପୟ୍ମୁଟ୍ । ମିଇ ଲୋପେଙ୍କ୍ ବେନନାଦ୍ ମିକା ଜିୱୁଣ୍ଡ୍ ଆନ, ଆସାମ୍ ଏର୍ଜାହାଜ୍ ନଷ୍ଟ ଆଦ୍ତେ । ୨୩ ନାନ୍ ବେନ୍ ଇଶ୍ୱର୍ତିଙ୍କ୍ ଉପାସନା ମାଡ଼ୁତାନ୍, ନିନେ ନାର୍କେ ଅନାଦ୍ ସ୍ୱର୍ଗ ଦୂତ ନା ବକେତ୍ ୱାସ୍ କେତ୍ତଣ୍ଡ୍, ୨୪ ‘ପାଉଲ୍ ନିମ୍ ୱେର୍ମା । ନିମ୍ ନିଜାମ୍ ମହାରାଜାନ୍ ବକେତ୍ ଆଦ୍ତିନ୍ । ନିକିଂଙ୍କ୍ ଇଶ୍ୱର୍ ଦୟା ମାଡ଼ିତନ୍, ନି ତଡ଼୍ ମାନ୍ଦାନ୍ ସାରେତଡ଼୍କିଂଙ୍କ୍ ଅଣ୍ଡ୍ ରକ୍ଷା ମାଡ଼ିତଣ୍ଡ୍ ।’ ୨୫ ଆଦିଙ୍କ୍ ଦାଦାଲଡ଼ି, ସାହାସ୍ ପଇମୁଟ୍ ! ବାତେଙ୍କ୍ଇତ୍କେ ନାନ୍ ଇଶ୍ୱର୍ତାଗ୍ ବିଶ୍ୱାସ୍ ମାଡ଼ୁତାନ୍, ନାକିଂଙ୍କ୍ ବାତ୍ କେତ୍ତଣ୍ଡ୍ ଆଦେପୁଟୁଙ୍କ୍ ଗଟେମ୍ ଆଦ୍ତେ । ୨୬ ଇତ୍କେ ମାନାଡ଼୍ ମୁନ୍ନେ ଆଞ୍ଜ୍ ଅଣ୍ଡୟ୍ ଗପିନାଗ୍ ନିତିତାଡ଼୍ ।”
୨୭ ଇଗେ ଆଦାନ୍ ଚଉଦ୍ ଦିନ୍ ପେର୍କେ, ମାମ୍ମେ ବୁମଦ୍ୟ ସାୱ୍ଡ଼େତାଗ୍ ଗାଲ୍ ତଡ଼୍ ତୁର୍ସୀ ଆଦାନ୍ ୱେଲେ ନାଡ୍ନାର୍କେ ଓଡେ ଚାଲାମାଡ଼ାନଡ଼୍ ହେର୍କା ମାଡ଼୍ତଡ଼୍ ଯେ, ମାମ୍ମେ ଆଞ୍ଚିନ୍ ବକେତ୍ ହେୱ୍ଦୁତମ୍ । ୨୮ ଅଡ଼୍ କଲ୍ସି ପୁତ୍ତଡ଼୍, ଆଗେ ଏର୍ଦେ କୁଇଙ୍ଗ୍ ଚାଳିଶ୍ ମିଟର୍ । ମେଣ୍ଡେ ସୁଦୁର୍ ପେର୍କେ ଉଡ଼୍ତଡ଼୍, ଏର୍ଦେ କୁଇଙ୍ଗ୍ ତିରିଶ୍ ମିଟର୍ କମ୍ ଆତ୍ତେ । ୨୯ ଜାହାଜ୍ ବେନ୍ ଆୟି ମେଟେତାଗ୍ ତାଲ୍ଗିତ୍ ଇଞ୍ଜ ୱେର୍ସ୍ ଅଡ଼୍ ପେର୍କେତ୍ ପାକେଙ୍କ୍ ନାଲୁ ସିଲେ ଲଙ୍ଗର୍ ୱାଟ୍ତଡ଼୍ ନୁ ୱେଇସ୍ ଆଦାନ୍ ଯାକ ପ୍ରାର୍ତନା ମାଡ଼ି କେପିମାତ୍ତଡ଼୍ । ୩୦ ତାନ୍ପେର୍କେ ଅଡ଼୍ ଚାଲାମାଡ଼ାନଡ଼୍ ଜାହାଜ୍ତାଗାଙ୍କ୍ ଡିଗି ଆଦାନଙ୍କ୍ ଚେଷ୍ଟା ମାଡ଼୍ତଡ଼୍ । ଜାହାଜ୍ତେ ମୁନ୍ନେ ପାକ୍ ମେଣ୍ଡେ ବେସ୍କ୍ ଲଙ୍ଗର୍ ୱାଟାନଙ୍କ୍ ହାଲ୍ସି ଅଡ଼୍ ଜାହାଜ୍ତେ ପର୍ର ମାନ୍ଦାନ୍ ଓଡାକିଙ୍କ୍ ମଦଲ୍ ରାପ୍ତଡ଼୍ । ୩୧ ଇତ୍କେ ପାଉଲ୍, ସେନାପତି ନୁ ସୈନ୍ୟଡ଼୍ କେତ୍ତଡ଼୍, “ଓଡେ ଚାଲାମାଡ଼ାନଡ଼୍ ଜାହାଜ୍ତାଗ୍ ମାନକଟ୍ ମାତ୍କେ, ମିଡ଼୍ ରକ୍ଷା ପାଏମ୍ ଆଦାନାଦ୍ ଆଶେ ହିଲ୍ଲେ ।” ୩୨ ଆଦିଙ୍କ୍ ସୈନ୍ୟଡ଼୍ ଅଡ଼୍କିଂଙ୍କ୍ ନଡ଼େ ଦେହେସ୍ ଏର୍ଦାଗ୍ ୱିଡ଼୍ସିତ୍ତଡ଼୍ ।
୩୩ ୱିଇଦାନ୍ ମୁନେଙ୍କ୍ ପାଉଲ୍ ସାରେତଡ଼୍କିଂଙ୍କ୍ ତିନ୍ଦାନ୍ ସେଙ୍ଗେ କେତ୍ତଣ୍ଡ୍ । ଅଣ୍ଡ୍ ଅନୁରଦ୍ତଡ଼୍, “ଇ ଚଉଦ ଦିନ୍ ଆଦୁତ୍ତେ, ମିଡ଼୍ ବାଆତେ ତିନ୍ୱିଡ଼୍ । ୩୪ ଅନୁରଦ୍ ମାଡ଼ୁତାନ୍, ଇଞ୍ଜେ ବାତ୍ ସୁଦୁର୍ ତିନୁଟ୍; ଜିୱୁନ୍ ମାନ୍ଦାନ୍ ସେଙ୍ଗେ ଇଦ୍ ନିହାତି ଦର୍କାର୍ । ୱେର୍ମାଟ୍ । ମିୟାଦ୍ ପରିତ୍ରାଣ୍ ତାଲ୍ତାଗାଙ୍କ୍ ଅଣ୍ଡୟ୍ କେଲ୍ ଗାଲା ନଷ୍ଟ ଆୟ୍ୟ ।” ୩୫ ଇଦ୍ କେସ୍ ପାଉଲ୍ ଇଶ୍ୱର୍ତିଙ୍କ୍ ଦନ୍ୟବାଦ୍ ଇସ୍ ରୂଟି ଉହୁସ୍ ତିତ୍ତଣ୍ଡ୍ । ୩୬ ଆଗାଙ୍କ୍ ସାରେତଡ଼୍ ସାର୍ଦେ ହାସ୍ ରୂଟି ତିତ୍ତଡ଼୍ । ୩୭ ଆସୁଟେ ଜାହାଜ୍ତାଗ୍ ୨୭୬ ଜାନ୍ ନାରୁଡ଼୍ ମାତ୍ତଡ଼୍ । ୩୮ ସାରେତଡ଼୍ ତିତ୍ତେ ପେର୍କେ ଜାହାଜ୍ତିଙ୍କ୍ ହାଲ୍କା ମାଡ଼ାନ୍ ସେଙ୍ଗେ ଆଗେ ମାନ୍ଦାନ୍ ସାରେ ଗହମ୍ତିଙ୍କ୍ ଗଦାଡ଼୍ତାଗ୍ ହେସିତ୍ତଡ଼୍ ।
ଜାହାଜ୍ ଉରୁଙ୍ଗ୍ତେ
୩୯ ମେଣ୍ଡନ୍ ଦିନ୍ ନାର୍କା ଅଡ଼୍ ବେନ୍ ଦେଶ୍ତେ ଆଞ୍ଚିନାଗ୍ ୱାସ୍ ହେୱ୍ତଡ଼୍, ଆଦ୍ ଅଣ୍ଡୟ୍ ସୁଦୁର୍ ସାୱ୍ଡ଼େତେ ଉସ୍କ ନେଲ୍ । ଆଗେ ଜାହାଜ୍ତିଙ୍କ୍ ନିଲ୍ସ୍ପାନଙ୍କ୍ ଚେଷ୍ଟା ମାଡ଼୍ତଡ଼୍ । ୪୦ ଆଦିଙ୍କ୍ ଲଙ୍ଗର୍ତେ ସାରେ ନଡ଼େ କୟସ୍ ଗଦାଡ଼୍ ଏର୍ଦାଗ୍ ୱିଡ଼୍ସିତ୍ତଡ଼୍ । ମେଣ୍ଡେ ପର୍ଦା*ଷ୍ଟିଆରିଙ୍ଗ୍ ଜାହାଜ୍ତିଙ୍କ୍ ଚାଲା ମାଡ଼ାନାଦ୍, ବା ହେଣ୍ଡେଲ୍ତେ ନଡ଼େକିଙ୍କ୍ ଲେଇସ୍ ମୁନ୍ନେ ତଅସ୍ ମାନ୍ଦାନ୍ ମଙ୍ଗତିଙ୍କ୍ ତେହେତଡ଼୍ । ଆଦିଙ୍କ୍ ଜାହାଜ୍ ଗାଲ୍ଦେ ତୁର୍ସୀ ଆଞ୍ଚିନାକ୍ ଆତ୍ତେ । ୪୧ ଇତ୍କେ ଉସ୍କତାଗ୍ ତାଲ୍ଗି ଜାହାଜ୍ତେ ମୁନେତ୍ ପାକ୍ ମଦଲ୍ ମୁଡ଼ୁନ୍ଦ୍ତେ ନୁ ଏର୍ ୱାସ୍ ଗାଟି ଜର୍ତେ ତାଲ୍ଗି ଜାହାଜ୍ତେ ପେର୍କେତ୍ ପାକ୍ ଲଙ୍ଗର୍ ଦୁଡ଼ା ଦୁଡ଼ା ଆତ୍ତେ ।
୪୨ ବନ୍ଦିଡ଼୍ ଆଞ୍ଚିନାକ୍ ଇନ୍ତେ ଆଞ୍ଜ୍ ମିରିତଡ଼୍ ଇଞ୍ଜ ହାଲ୍ସି ଅଡ଼୍କିଂଙ୍କ୍ ଆୱୁକାନ୍ ସେଙ୍ଗେ ସୈନିକିଡ଼୍ ବିଚାର୍ ମାଡ଼୍ତଡ଼୍ । ୪୩ ଇତ୍କେ ସେନାପତି ପାଉଲ୍ତେ ଜିୱୁଣ୍ଡ୍ ଗେଲ୍ପାନଙ୍କ୍ ହାଲ୍ସ ମାତ୍ତଣ୍ଡ୍; ଆଦିଙ୍କ୍ ଅଣ୍ଡ୍ ସୈନିକିଡ଼୍କ୍ ଆଗାଙ୍କ୍ ମନା ମାଡ଼୍ତଣ୍ଡ୍ । ଇନ୍ତେ ଆଦ୍ ପାର୍ତେନଡ଼୍ ସାରେତଡ଼୍କ୍ ଇନ୍ତେ ଆଞ୍ଜ୍ ବୂମ୍ ଆଞ୍ଚିନାକ୍ ଆଦାନଙ୍କ୍ କେତ୍ତଣ୍ଡ୍, ୪୪ ମେଣ୍ଡେ ମାଡ଼େତ୍ ପାଟା ବା ଜାହାଜ୍ତାଗ୍ ଉରୁଙ୍ଗ୍ତେ ଦୁଡ଼ାଙ୍କ୍ ପଇସ୍ ବୂମ୍ ଆଞ୍ଚିନାକ୍ ଆଦାନଙ୍କ୍ ମେଣ୍ଡେ ବାଗାତଡ଼୍କିଙ୍କ୍ କେତ୍ତଣ୍ଡ୍ । ଇଦ୍ ରକମ୍ ମାମ୍ମେ ସାରେତମ୍ ଗେଲ୍ପାନଙ୍କ୍ ଗପିନାଗ୍ ଆଞ୍ଜ୍ ଏୱୁତମ୍ ।