୨୧
ସାତ୍ଜାନ୍ ଶିଷ୍ୟଡ଼୍ ଜିସୁଙ୍କ୍ ଉଡ଼୍ତଡ଼୍
୧ ପେର୍କେ ଜିସୁ ତିବିରୀୟା ସମୁଦ୍ର ଆଞ୍ଚିନାଗ୍ ଶିଷ୍ୟଡ଼୍କ୍ ମେଣ୍ଡଅନ୍ଦାମ୍ ଦର୍ଶନ୍ ହିତ୍ତଣ୍ଡ୍ । ଅଣ୍ଡ୍ ଇଦ୍ ରକମ୍ ଦର୍ଶନ୍ ହିତ୍ତଣ୍ଡ୍; ୨ ଶିମୋନ୍ ପିତର୍, ତୋମା, ବେନଙ୍କ୍ ଦିଦୁମ୍ କେତିତଡ଼୍, ଗାଲିଲୀତେ କାନାନଡ଼୍ ନିତନିୟେଲ୍, ଜେବଦିତେ ମାର୍କିଡ଼୍ ନୁ ତାନ୍ ଶିଷ୍ୟଡ଼୍ ଲୋପେକେ ମେଣ୍ଡେ ଇର୍ୱୁଡ଼୍ ଅଣ୍ଡୟାଗେ ମାତ୍ତଡ଼୍ । ୩ ✡ଲୁକ ୫:୫.ଶିମୋନ୍ ପିତର୍ ଅଡ଼୍କିଂଙ୍କ୍ କେତ୍ତଣ୍ଡ୍, “ନାନ୍ କିକେ ପଇଦାନଙ୍କ୍ ଆଦୁତାନ୍ ।” ଅଡ଼୍ ଅଂକିଙ୍କ୍ କେତ୍ତଡ଼୍, “ମାମ୍ମେ ମିକା ନି ତଡ଼୍ ଆଦ୍ତମ୍ ।” ଅଡ଼୍ ପେଇସ୍ ଆଞ୍ଜ୍ ଓଡାତାଗ୍ ତାର୍ତଡ଼୍, ମେଣ୍ଡେ ଅଡ଼୍କିଂଙ୍କ୍ ଆଦ୍ ନାର୍କା ୱାଲା ୱାଟ୍ତଡ଼୍ ବାତେଙ୍କ୍ ଇତ୍କେ ବାତେମିକା ଦର୍କ । ୪ ବାତେଙ୍କ୍ ଇତ୍କେ ୱିଇଦାନ୍ ୱେଲେ ଜିସୁ ଆଞ୍ଚିନାଗ୍ ନିତ୍ତଣ୍ଡ୍; ମିକା ଅଣ୍ଡ୍ ଜିସୁ ହିଞ୍ଜ ଶିଷ୍ୟଡ଼୍ ପୁନଡ଼୍ । ୫ ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, “ପିଲାନଡ଼ି ମିୟାଗେ ବାତେଏ ତିନ୍ଦାନାଦ୍ ମିନ୍ଦେ ?” ଅଡ଼୍ ଅଂକିଙ୍କ୍ ଉତ୍ତର୍ ହିତ୍ତଡ଼୍, “ଇଲେ ।”
୬ ✡ଲୁକ ୫:୬.ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, “ଓଡେତ୍ ତିନ୍ଦେକାଇଦା ପାକ୍ ୱାଲା ୱାଟାଟ୍ ତ, ଆସୁଟେ ମିକିଂଙ୍କ୍ ଦର୍କିତା ।” ଆଗାଙ୍କ୍ ଅଡ଼୍ ୱାଲା ୱାଟ୍ତଡ଼୍, ମେଣ୍ଡେ ଗାଟି କିକେ ୱାଲାତାଗ୍ ହାର୍ତା ଅଡ଼୍ ୱାଲେତିଙ୍କ୍ ପିଡ଼ିଙ୍ଗାଙ୍କ୍ ପାର୍ୱଡ଼୍ ।
୭ ଜିସୁ ବେନ୍ ଶିଷ୍ୟଙ୍କ୍ ପ୍ରେମ ମାଡ଼ମାତ୍ତଣ୍ଡ୍, ଅଣ୍ଡ୍ ପିତର୍ତିଙ୍କ୍ କେତ୍ତଣ୍ଡ୍, “ଇଣ୍ଡ୍ ତ ପ୍ରବୁ ।” ଶିମୋନ୍ ପିତର୍ ଇଣ୍ଡ୍ ତ ପ୍ରବୁ ଇଞ୍ଜ କେତାନାଦ୍ କେଞ୍ଜି ତାନ୍ ଚକା କେର୍ସ୍ ସମୁଦ୍ରତାଗ୍ ତୁଲ୍ତଣ୍ଡ୍; ୮ ବାତେଙ୍କ୍ ଇତ୍କେ ବାଗାତ୍ ଶିଷ୍ୟଡ଼୍ କିକେ ମାନ୍ଦାନ୍ ୱାଲେତିଙ୍କ୍ ପିଡ଼ିଙ୍ଗି ସୁଦୁର୍ ଓଡାତାଗ୍ ୱାତ୍ତଡ଼୍, ବାତେଙ୍କ୍ ଇତ୍କେ ଅଡ଼୍ କୂଳତ୍ ଗାର୍ରେ ଦୁଇଶହ କାୟ୍ ଜେକେ ମାତ୍ତଡ଼୍ । ୯ ଅଡ଼୍ ଆଞ୍ଚିନାଗ୍ ଡିଗି ଆଗେ ଇର୍କିନାଗ୍ କିସ୍, ମେଣ୍ଡେ ତାନ୍ ପରୁ ୱାଟ୍ତାଉ ସୁକୁକ୍ କିକେ ନୁ ରୂଟି ୱାଟି ମାନ୍ଦାନାଦ୍ ଉଡ଼୍ତଡ଼୍ । ୧୦ ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, “ମିଡ଼୍ ଇଞ୍ଜେ ବେନା କିକେ ପୟିତ୍ତିଡ଼୍, ଆଗାଙ୍କ୍ ସୁକୁକ୍ ତାଡ଼ାଟ୍ ।”
୧୧ ଶିମୋନ୍ ପିତର୍ ଆଞ୍ଜ୍ ଶହେ ପାଚାଶ୍ମୁଣ୍ଡ୍ ବେଡ଼୍ୟା କିକେ ନିଣ୍ଡିମାନ୍ଦାନ୍ ୱାଲେତିଙ୍କ୍ ଆଞ୍ଚିନାଗ୍ ପିଡ଼ିଙ୍ଗି ତାତ୍ତଡ଼୍; ଆସର୍ କିକେଙ୍କ୍ ମିକା ୱାଲା ଦେଗ । ୧୨ ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, “ୱାସ୍ ମିକା ତିନୁଟ୍ ।” ଶିଷ୍ୟଡ଼୍ ଲୋପେ ବେନମିକା “ଅଂକିଙ୍କ୍ ବେନ,” ଇଞ୍ଜ ପାଚ୍ରାମାଡ଼ାଙ୍କ୍ ପାର୍ୱଡ଼୍, ବାତେଙ୍କ୍ ଇତ୍କେ ଅଣ୍ଡ୍ ଯେ ପ୍ରବୁ, ଇଦ୍ ଅଡ଼୍ ପୁତ୍ତଡ଼୍ । ୧୩ ଜିସୁ ୱାସ୍ ରୂଟି ତାସ୍ ଅଡ଼୍କିଂଙ୍କ୍ ହିତ୍ତଣ୍ଡ୍, ମେଣ୍ଡେ ଆଦେପୁଟୁଙ୍କ୍ କିକେ ମିକା ହିତ୍ତଣ୍ଡ୍ ।
୧୪ ଡଲ୍ତଡ଼୍ ଲୋପେଙ୍କ୍ ତେଦ୍ତା ପେର୍କେ ଜିସୁ ଶିଷ୍ୟଡ଼୍କ୍ ଇଦ୍ ମୁଣ୍ଡ୍ଦାମ୍ ଦର୍ଶନ୍ ହିତ୍ତଣ୍ଡ୍ ।
ଜିସୁ ନୁ ପିତର୍
୧୫ ଶିଷ୍ୟଡ଼୍ ତିତ୍ତା ପେର୍କେ ଜିସୁ ଶିମୋନ୍ ପିତର୍ତିଙ୍କ୍ କେତ୍ତଣ୍ଡ୍, “ହଁ ଯୋହନ୍ତେ ମାର୍ ଶିମୋନ୍, ନିମ୍ ବାତେଏ ନାକିଂଙ୍କ୍ ଇଡ଼୍ ଲୋପେଙ୍କ୍ ଗାଟି ପ୍ରେମ ମାଡ଼ୁତି ?” ଅଣ୍ଡ୍ ଜିସୁଙ୍କ୍ କେତ୍ତଣ୍ଡ୍, “ହଁ, ପ୍ରବୁ, ନାନ୍ ଯେ ନିକିଂଙ୍କ୍ ପ୍ରେମ ମାଡ଼ୁତାନ୍, ଆଦ୍ ନିମ୍ ପୁତ୍ତି ।” ଜିସୁ ଅଂକିଙ୍କ୍ କେତ୍ତଣ୍ଡ୍, “ନାୟାଦ୍ ମେଣ୍ଢାପିଲାଙ୍କ୍ ମେଇମ୍ ।” ୧୬ ଜିସୁ ଦ୍ୱିତୀୟଦାମ୍ ଅଂକିଙ୍କ୍ କେତ୍ତଣ୍ଡ୍, “ହଁ ଯୋହନ୍ ମାର୍ ଶିମୋନ୍, ନିମ୍ ବାତେଏ ନାକିଂଙ୍କ୍ ପ୍ରେମ ମାଡ଼ୁତିନ୍ ?” ଅଣ୍ଡ୍ ଜିସୁଙ୍କ୍ କେତ୍ତଣ୍ଡ୍, “ହଁ, ପ୍ରବୁ, ନାନ୍ ଯେ ନିକିଂଙ୍କ୍ ପ୍ରେମ ମାଡ଼ୁତାନ୍, ଆଦ୍ ନିମ୍ ପୁତ୍ତି ।” ଜିସୁ ଅଂକିଙ୍କ୍ କେତ୍ତଣ୍ଡ୍, “ନା ମେଣ୍ଢାକିଂଙ୍କ୍ ପୋଡ଼୍ପା ।” ୧୭ ଜିସୁ ମୁଣ୍ଡ୍ଦାମ୍ ଅଂକିଙ୍କ୍ ପାଚ୍ରାମାଡ଼୍ତଣ୍ଡ୍, “ହଁ ଯୋହନ୍ତେ ମାର୍ ଶିମୋନ୍, ନିମ୍ ବାତେଏ ନାକିଂଙ୍କ୍ ପ୍ରେମ ମାଡ଼ୁତି ?” ଇଗେ ପିତର୍ ମାନ୍ଦୁଃକାମ୍ ଆତ୍ତଣ୍ଡ୍ । ବାତେଙ୍କ୍ ଇତ୍କେ ଜିସୁ ମୁଣ୍ଡ୍ଦାମ୍ ପିତର୍ତିଙ୍କ୍ ପାଚ୍ରାମାଡ଼୍ତଣ୍ଡ୍, ନିମ୍ ବାତେଏ ନାକିଂଙ୍କ୍ ପ୍ରେମ ମାଡ଼ୁତି ? ଅଣ୍ଡ୍ କେତ୍ତଣ୍ଡ୍, “ପ୍ରବୁ, ନିମ୍ ସାରେ ବିଷୟ ପୁତ୍ତି; ନାନ୍ ଯେ ନିକିଂଙ୍କ୍ ପ୍ରେମ ମାଡ଼ୁତାନ୍, ଆଦ୍ ନିମ୍ ପୁତ୍ତିନ୍ ।” ଜିସୁ ଅଂକିଙ୍କ୍ କେତ୍ତଣ୍ଡ୍, “ନାୟାୱୁ ମେଣ୍ଢାକିଂଙ୍କ୍ ମେଇମ୍ ।”
୧୮ ନାନ୍ ନିଜାମ୍ କେତୁତାନ୍, ଲେୟ୍ ମାନ୍ଦାନ୍ ୱେଲେ ନିମ୍ ନିଜେତ୍ ସିଲେତିଙ୍କ୍ ଗାଟ୍ ୱାଟି ବେକେ ଇଚ୍ଛା, ଚିଟି ଆଞ୍ଜ ମାତ୍ତିନ୍, ବାତେଙ୍କ୍ ଇତ୍କେ ମୁଇତା ୱେଲେ ନିମ୍ ନିୟାୱୁ କାଇକ୍ ହାଆତିତି ନୁ ମେଣ୍ଡେ ୱେରଣ୍ଡ୍ ନିକିଂଙ୍କ୍ ଗାଟ୍ ୱାଟି, ବେକେ ନିୟାଦ୍ ଇଚ୍ଛା ଇଲେ, ଚିଟି ନିକିଂଙ୍କ୍ ଆଦ୍ତନ୍ । ୧୯ ପରମେଶ୍ୱର୍ତେ ଗୌରବ୍ ସେଙ୍ଗେ ପିତର୍ ବେଦ୍ରକମ୍ ଡଲିତଣ୍ଡ୍, ଇଦ୍ ବୁଜାମାଡ଼ାନଙ୍କ୍ ଜିସୁ ଆଦ୍ ରକମ୍ କେସ୍ ମାତ୍ତଣ୍ଡ୍ । ତିନ୍ପେର୍କେ ଜିସୁ ଅଂକିଙ୍କ୍ କେତ୍ତଣ୍ଡ୍, “ନା ପେର୍କେ ୱାଡ଼ାଟ୍ ।”
ଜିସୁ ନୁ ତାନ୍ ପ୍ରିୟ ଶିଷ୍ୟ
୨୦ ✡ଯୋହନ୍ ୧3:୨୫.ଜିସୁ ବେନ୍ ଶିଷ୍ୟଙ୍କ୍ ପ୍ରେମ ମାଡ଼ମାତ୍ତଣ୍ଡ୍ ନୁ ବେନ ନାର୍କେତ୍ ବଜିତାଗ୍ ଜିସୁନ୍ ପର୍ର ରହି, “ପ୍ରବୁ, ନିକିଂଙ୍କ୍ ବେନ ଶତ୍ରୁଡ଼୍ କାଇଦେ ପସ୍ପିତଣ୍ଡ୍ ଇଞ୍ଜ କେସ୍ ମାତ୍ତଣ୍ଡ୍,” ଆ ଶିଷ୍ୟଙ୍କ୍ ପିତର୍ ତିଡ଼ିଇ ପେର୍କେ ୱାଦାନାଦ୍ ଉଡ଼୍ତଣ୍ଡ୍ । ୨୧ ପିତର୍ ଅଂକିଙ୍କ୍ ଉଡ଼ି ଜିସୁଙ୍କ୍ କେତ୍ତଣ୍ଡ୍, “ପ୍ରବୁ, ଇଡ଼୍ୱାଦ୍ ବିଷୟ୍ ବେଲା ଆଦ୍ତେ ?”
୨୨ ଜିସୁ ପିତର୍ତିଙ୍କ୍ କେତ୍ତଣ୍ଡ୍, “ନାୟାଦ୍ ମେଣ୍ଡଅନ୍ଦାମ୍ ୱାଦାନାଦ୍ ଆଦାନ୍ ଯାକ ଅଣ୍ଡ୍ ବାଦ୍କିନ୍ ଇଞ୍ଜ ଯଦି ଇଚ୍ଛା ମାଡ଼ିତାନ୍, ଆଲାଇତ୍କେ ଆଗେ ନିୟାଦ୍ ବାତେଏ ମିନ୍ଦେ ? ନିମ୍ ନାକିଂଙ୍କ୍ ପେର୍କେ ମାଡ଼ା ।”
୨୩ ଆଗାଙ୍କ୍ ଆ ଶିଷ୍ୟ ବେସୁଟ୍ ମିକା ଡଲନ୍, ତାମୁଣ୍ଡ୍କିଡ଼୍ ଲୋପେ ଇଦ୍ ଗଟ୍ ପ୍ରଚାର୍ ଆଦ୍ତେ, ମାତର୍ ଅଣ୍ଡ୍ ଡଲନ୍ ଇଞ୍ଜ ଜିସୁ ଅଡ଼୍କିଂଙ୍କ୍ କେଲଣ୍ଡ୍ । ଅଣ୍ଡ୍ ମାତର୍, “ନାୟାଦ୍ ୱାଦାନାଦ୍ ଯାକ ଅଣ୍ଡ୍ ମାନିଣ୍ଡ୍ ଇଞ୍ଜ ଯଦି ନାନ୍ ଇଚ୍ଛା ମାଡ଼ିତାନ୍, ଆଲେକେ ଆଗେ ନିୟାଦ୍ ବାତେଏ ମିନ୍ଦେ,” ଇଞ୍ଜ କେସ୍ମାତ୍ତଣ୍ଡ୍ ।
୨୪ ବେନ ଇ ସାରେ ବିଷୟ୍ତେ ସାକ୍ଷ୍ୟ ହିତ୍ତଣ୍ଡ୍ ନୁ ଇୱୁସାରେ ଲେକିମିନ୍ଦେଣ୍ଡ୍, ଅଣ୍ଡ୍ ଆ ଶିଷ୍ୟ; ମେଣ୍ଡେ ଅନାଦ୍ ସାକ୍ଷ୍ୟ ନିଜାମ୍, ଆଦ୍ ମାମ୍ମେ ପୁତ୍ତମ୍ ।
ଶେଷ୍ ବିଷୟ୍ ଇଦ୍
୨୫ ଜିସୁ ମେଣ୍ଡେ ନାର୍ଗେ ପାଡ଼୍ୟି ମାଡ଼ିମାତ୍ତଣ୍ଡ୍; ଆଉ ସାରେ ଯଦି ୱେରୱେର ମାଡ଼ି ଲେକି ମାନ୍ଦାନ୍ ଇତ୍କେ, ଆଲେକେ ଇସର୍ ବଇ ଲେକା ଆୟେଡ଼୍ ଯେ, ନାୟାଦ୍ ବିଚାର୍ତେ ଇଦ୍ ଜଗତ୍ତାଗ୍ ମିକା ଆୱୁ ସାରେ ନେହେତାନ୍ ସେଙ୍ଗେ ପଡ଼ିୟେ ଆୟ୍ୟ ଆୟେଡ଼୍ ।