PHILIPPIA
Mi-ngai diang Paul Chemajia
Chonglamsaat
Paul in hiwa chemajiahi Christa inneisuonuk Philippi ah kaom kangamna ngaidiang kum 61 pheiwei imajia eii, halli hiwa chemajiahi Rome mikhumna ah omlaiya inmajia lei-echa (1:13). Hiwa chemajiahi Philippi khuopui suungnga kaom koisuokdiang imajia eii. Halli eini'n tirtonngai chuontho larik makheiya Philippi jarra lekteii ennum ni-inchumator. Philippihi Mecedonia ramsuungnga kaom khuopuilai eii. Halli mansakhet koisuok inn insakmasana mun khaum eii. Halli Paul li Silas innireella mansakhet koisuok inn inleisakmasana mun kha-um eii, halli inmani'n khawa khan inleiomlai, zaankhat minkhumna-ah inleida (Chuon 16). Paul in hiwa chemajia aleimajiana ajar angjet um leiomte. Inmani'n mikhumna-ah inom tia injetphakhan, kutchoi angjet inleimathuon jarra rokpuina apha kha-um aleiminchang (4:10-19). Halli ama'n mikhumna-ah aomnajarra, inmani diang kheella rilcheenna aleinei, halli Timothy li Epaphroditus hi koisuok inkhat ah aleizootpi (2:19-30) khawa kha e-inchu inmani lamkeinakha donnale inruoiya kaya inte.
Asuungnga kaom Chong
1. Paul in hiwa chemajiahi Philippi ah kaom koisuok ngaikha aminpaak ah aphut (1:1-2)
2. Halli ama jarra kasuok minjetsik ngaikha aminjet halli ama'n inmanisik beiya ngaidonpi (1:3–2:30)
3. Christian ringnasik ah minchuna angjet apeii (3:1–4:9)
4. Halli Paul in Philippi koisuok ngaidiang inmani kutchoi khat-um minpaakna inheiminchoi jarra aminpaak ah chemajiahi aminhek (4:10-23)
1
1 Christa Jisu suok Paul li Timothy makheiya:
Philippi ah kaom Christa Jisu le kaom Pathian mi ngai rakip, Koisuok lamkakei khat-um ama kasan ngai inchella, Chuon 16:12
2 Nipa Pathian Pumi Jisu Christa riangwai li dainakha nangnidiang inape erase.
Paul Larik Kateel ngaisik-ah ama'n Nipina
3 Kei'n nangnikha apharakip ah kana-ngaidonchak jarra Pathian kha kaminpaak, 4 halli nangni ngairakip sik-ah apharakip ah kananipi kaalkhan kei'n rathakarok ah nina kanei. 5 Ajarchu nangni'n inphutna makheiya awinikatung kei kadiang chongkahoi sikbeiya ningnasan jarra eii. 6 Halli Kei'n Pathian diang inngamna kanei, Christa Jisu nikhuo juotung maklaiseng nangni chungnga chuonkatha kanahongphutpui ama'n, chuonhi ahekmaklaiseng athocheisik eii. 7 Kei'n nangnikha kamalung suungnga kana-ngaidon chak! ajarchu kei'n nangni sikbeiya hiwa ki-ngaidonhi kei kasik achu katha eii tia ka-ngaidon. Tichu kei'n mikhumna-ah kaomlai khat-um chongkahoihi kheella songmatornasik khat-um minngir matornasik phakhan, nangni rakip in Pathian riangwai kha keile ningnachan puisuom. 8 Kei'n nangni rakip kana-ngaidonchak tihi Christa Jisu minriangna makheiya kajuo eii tia Pathian in kei kasakhi a-eii.
9 Khat-um nangni minriangnahi kadik singnatheina li inthiangnga jettheinasik-ah kheel kheella insoonnasik-ah kei'n Pathian diang kananipi. 10 Khawa e-inchu nangni'n angme kathakhetkha kadang matorna neiningte. Halli Christa nikhuoni khan inthiangmak khat um noonkuung makheiya inlitthei ningte. 11 Halli Jisu Christa inbit inapemator inthiang kadik kul kha lurnasik khat-um Pathian minpaaknasik nangni ringkhuo-ah siprase.
Christa ah Karing
12 Ule naingai kei'n nangnidiang kanaminjetzoot, khawa khachu kei katakchunnga kasuok chuonngai rakiphi chongkahoihi kheella minloknasik eii. 13 Khawajarra kei'n mikhumna ah kiomhi Christa sik-ah suok ka-ejarra eii tihi reng omnamun ka-ngaak mi rakip khat-um aleiilaak mi rakip innum innajetjei. Chuon 28:30
14 Halli keihi mikhumna-ah innada jarra kangamna angjet in Pumi diang kheella malung inngamna innei, hiwajarra inmani'n chongkahoi kha*chongkahoi kha, aleiilaak larik ah chu Pathian chong tia inthul. apharakip ah kachi omlekleiya kheella rilsuoknasik ah malung inngamnakha hong-insoonnasik eii.
15 Adik, mi lekkhat in Christa kha in-enzootmak jarra khat-um murruolsiak inthozoot jarra inmani'n ama kha inrilmalar takkha mi lekkhat inchu katha lamtiang Christa kha inrilmalar. 16 Halli mi lekkhat in hiwahi inminriang jarra intho, ajarchu keihi Pathian in chongkahoi songtheinasik-ah chuon inapeii eii tihi inmani'n injet. 17 Khale inruoiya aleiilaak mi lekkhat in Christa hi malung inthiangnga rilmu, takkha intheinuo ah kaom ratha inngaidon malungnga inril; halli kei'n mikhumna ah kaomlai kheella poongna napenasik-ah inmani'n inleingaidon.
18 Khawa khan iteii arei ommak? Christa hi kathamak lamtiang e-innum emakli kadik lamtiang e-innnum Christa kha inrilna zootrei lamtiang inril innum Christa kha inriljarra kei'n kalarokcheisik eii. 19 Ajarchu kei'n kajet nangni Pathian ningna nipinakhan halli Jisu Christa Ratha makheiya kajuo nasannakhan keihi mikhumna makheiya innalamasuosik eii. 20 Halli kei'n inthiangnga kimanuom li inngamna khachu kei kachuon thosik kasuok chuonna angtikniteii injaknuning, takkha apharakip ah khat-um atuunnum kei'n malung kaminngarsik eii, hiwajarra kei'n kathi innum karing innum kapum karatha pumpui'n Christa diang kayana kaminmunsik eii. 21 Khale inruoiya kei kasik achu, ringnahi Christa eii, halli kathi hi-um nemna eii. 22 Takkha kei'n kataksak hi kalaringsik suok inchu, kei'n keella Christa sik ah anemnakaom chuon lathomator kate. Takkha kei'n inthiangnga lajetmong angme kei'n kakadangsik. 23 Tichu keihi lam inni karra sinasik-ah upka-inchaak-ah kaomjei. Halli Christa le omsuomnasik-ah kei'n hiwa ringkhuohi kamathaan zoottheijei, ajarchu hiwahi kheella katha chuonkha eii. 24 Takkha nangnisik-ah chu kei'n taksa ah kalaringnga kiomhi kathadoom eii. 25 Halli kei'n hiwasik-ah ka-inngamna hiai, suoilekleiya kei'n kajet, kei kalaringsik eii. Halli kei'n nangni rakip ngaikha kanalaompui suomsik eii, nangnirakip insoonnasik khat-um ngamna khan kheella roknasik eii. 26 Kei'n nangni karra woikhat kaheiwa phakhan nangni'n kei kajarra Christa Jisu diang kheella in-orna ningneisik eii.
27 Nangni diang arei kaom inkhatchu nangni ringkhuo omchan rakipkha Christa chongkahoi dungjuiya erase, kei'n nangni kanapha kaheiwa innum kaheiwa matormak innum, nangni ngai rakip in ratha khatbit ah kacheet ah ningngirra ningom, khat-um ngamna chongkahoi khan malung khatbit-ah ningdeisuomma ning om tihi kei'n kajet sik eii. 28 Halli ning inhalpui ngaikha chimaru, apharakip ah malung kangar eru, halli hiwa ningtho jarra inmanikha kajeimak in eii, khat-um nangnihi kamator ning eii tia mijetnasik eii, ajarchu Pathian kha eii nangnidiang matorna kanapeii. 29 Ajarchu nangnidiang Christa sepa thonasik-ah aphakacha napei ejei, amadiang ka-ngamnabit emak-ah ama sikbeiya poongna kaneisik um ning-ejei. 30 Atuunchu keile raal katho kasisik-ah inchel chajei. Halli hiwa raalhi akathengnga kei'n kaindeipui laiya ningnamu raal khale in-angrip eii, halli nangni'n ning ijet angnga, khawale in-angrip ah kei'n atuun katung kaindeipuiya kiom raalkha eii. Chuon 16:19-40