2
Christa Nunchan inchuol khat-um Alokna
1 Christa diang ning i-om ringkhuo khan nangnidiang ranak ngarna anamin eii khat-um ama minriang nakhan anaminhoi, nangni'n Ratha ah ning inchunsuom,*nangni'n ratha ah ning inchunsuom; emakli ratha khan khatli khat inchuntheina sik-ah inaheiruoi ejei. halli nangni'n khatle khatsik-ah minriang li malungtai nakha ningnei. 2 Nangni karra malung khatbit e-inlang, in-angrip minriang nei-inlang ratha khatbit ah khat-um malung khatbit e-inlang kei irok-hi huui namintung piru. 3 Halli angrakip ah inpaam malungroon emakli in-ornasik chuonkha thomaru, takkha khatli inkhatdiang nunchan inniam eru, halli mi-ngaikha nangneek ah katha in-eii ti-inlang ngaidonro. 4 Han nangni'n ningtheinuo sikbit-ah ka-ngaidon emaru, takkha khatlikhat imanuom kha-um ngaidonpiru. 5 Nang malungroon khachu Christa Jisu'n iroon omchan esik eii.
6 Pathian omchanle in-angrip kha Jisu'n anei,
takkha ama'n Pathian le †aom; emakli hong enasik.in-angpuimak chakmak tia leithomak khat-um leingaidonmak.
7 Hiwa rathuulla, ama'n apum takkha iteii lei in-emak
halli ama'n suok omchankha alei.
Ama'n miring omchanna ajuo inchang
halli miring omchanna ajuo-inlar.
8 Ama'n nunchan lei-inniam halli chongkajui inkhat eya thinasik katung aleisi,
halli ama'n cross ah athi.
9 Hiwa jarra Pathian in ama kha insaangkhet munna kadomsaang
halli ama kha ramingkarra insaangkhetsik raming aleipeii.
10 Han, Jisu raming inkaya jarra
marwaanna kaom, nuoipil chungnga kaom, khat-um nuoipil nuoiya karingnga kaom rakip in‡hiwa tinachu akathi ngai'n inchat omleiya aziingna nuoipil suungnga inring sik eii.
keimurkhup ah inbok inta chubei inthosik eii, Isa 45:23
11 halli mirakip in Jisu Christa hi Pumi eii tia inmalarsik eii,
Apa Pathian lurnasik-ah.
Nuoipilchungnga War angnga Kawar
12 Khawale inruoiya kei iminriang kasapngai, kei'n nangnile nileiomsuomlai ningni'n kachong ningjui angnga, hiwaneek ah kathachu kei'n nangnile inlaak-ah kaom kaalkhan kachong ningjuikha kheella areiom. Halli ningni'n kachi khat-um intuulle inruoiya nangni sanminringna kha puimintung nasik-ah song-inlang omru. 13 Ajarchu nangnikha ama lungdou ah chuon naminthonasik khat-um naminjuinasik ah Pathian in apharakip ah nangni chungnga chuon athoa aom.
14 Rasa neileiya khat-um murruolsiak katho elekleiya chuonrakip thoru. 15 Khawakha e-inchu manmasituolla kathamak khat um manu karoonngai karra ningni'n noonkuung kaneimak khat-um inthiang ka eii Pathian kadik sangai ning esik eii. Innidan 3:25
Arsi'n lairalak inminwar angnga nangni innum inmani karra ningwarsik eii. 16 Nangni'n ringna chongkha inmanidiang ningpe. Halli hin ningtho inchu, Christa Nikhuoni khan nangni jarra kei'n in-ornasik arei kamusik eii, ajarchu kei kasongnali kachuontho ngaikha lailamma mangmakjei tia inlarsik eii.
17 Khale inruoiya kei kathisen ringkhuohi dooiphur phurpeii angnga nangni inngamnakha Pathian diang ningpeluut inchu, kei'n rokkata nangni ngaile karoknahi kamalarsik eii. 18 Hiwale in-angrip ah nangni um ningroksik eii, halli nangni roknakha keidiang ningmalarsik eii.
Timothy li Epaphroditus
19 Pumi lungdoukha e-inchu, kei'n Timothy hi nangnidiang innoottheiya juotirkate tia ka-ngaidon, khawakha e-inchu kei'n nangnijarra chong kajetli kei kadiang ratharokna enasik eii. 20 Halli amabit eii kei imanuom kajet, khat-um nangni ngai sikbit ah kana ngaidonpi. 21 Khawajarra Jisu Christa chuon kaentok ommujei, mirakip in inmani i-manuom khabit in-entok ah inomjei. 22 Takkha ningni'n jetru Timothy apumtak in rahoi kasouk ka eii tia aminmu, ajarchu apali asa angnga ama'n keile chongkahoi sikbeiya chuon kileithosuomjei. 23 Khawajarra kei kadiang angme kasuoksik tihi kajetli kajetmak phakhan, kei'n amahi nangnidiang juotirnasik-ah inngamna kanei. 24 Halli kei innum nangni koolla innottheiya juotung matornasik ah Pumi diang inngamna kada.
25 Itichu kei'n kachuon thopui khat-um raalmi ki-epuisuom, halli nangnisik-ah taangwa kinchangnga kei kanasansik-ah ningjuotir nisopui Epaphroditus hi-um nangnidiang juominjuonook nasik-ah arei omsik eii tia kalei. 26 Halli ama'n nangni ngai rakip anamuzoot jarra anarangaitui halli ningni'n amahi apum dammak tihi ningjetjarra ama malung leipoong. 27 Tichu adik, ama'n ana-ah athideng, takkha Pathian minriangnakha amadiang om, halli ama diangbit ema-ah kei kadiang um kipoong chungnga kapoong inkhat mumaknasik ah aminriangna kha anape. 28 Khawajarra kei'n amahi nangni ngai koolla kajuo minjuozoot theijei, khawakha e-inchu ningni'n ama kha ning munook kaalkhan rokna neiningte, halli kei ipoong hium omkhai nunijei. 29 Ama kha Pumi ramingnga malungkarok tak-ah naleidonpiru, halli ama le in-angrip mi rakip takchungnga um nakayapiru. 30 Ajarchu nangni ngai'n ningnasan matormak chuon angjet ama'n kei kadiang nasannasik bit ah ama'n Christa chuonna apum inpesuok ah kapoong deiya kathideng ejei.