1 गे पावल, सिलास स़ोनो तिमोथीराए गेल्‍योनी गेबाबु परमेस्‍वर स़ोनो गेप्रभु येसु ख्रीसनी निमिनताव थेसलोनिके सहरल लिज़्याव मन्‍दलीलाई आव चिथी परींद गेयाचिज़्‍या। जेल्‍योदा परमेस्‍वरए उयुँ गराँद जेयुँ होलाँ जैद ओयाचिउक। 1:1 ओसा १७:१

2 गे गेपोंखारिक जे प़ाइँलाई एकम्‍न्‍या य़ाका दाद जेजूँनी परमेस्‍वरलाई धन्‍याबाद चरैःव ज़ गेनैज़्‍या। 3 जे गेबाबु परमेस्‍वरए ओङ़ाक जेयुँ हुप्‍द जेदोज़्‍याव य़ेन, नैं मेंए ल्‍योदा युँ थू जैद जेरासमारिज़्‍याव, स़ोनो गेप्रभु येसु ख्रीसए ओल्‍योदा आस दाद जेयुँ हुबोलाई माऱास्‍द थ॰रिद जेलिज़्‍याव रँःद गे जेलाई चेतैव ज़ गेनैचिज़्‍या।

4 जे परमेस्‍वरए उयुँलाव मिताव गेभाइर, जेलाई परमेस्‍वरए ओछाँतिचिउर ज़ जेल्‍यो लिन्‍या गेसैंज़्‍या। 5 जेलाई परमेस्‍वरए ओपाँ गेसथैचिक नो पाँ जेल्‍योङ पाँनी वाज़ उहुव माःक, छैंव पुरूसए ओसक्तीनी हुद जेयुँल साचो ज़ थ॰रिके। है जैद जेल्‍योङ गे जेजूँनी किताव मिँर गेल्‍यो जे ज़ जेसैंज़्‍या। 6 हुनी ज़ गे गेदोज़्‍याव मिताव स़ोनो गेप्रभुए ओदोज़्‍याव मिताव जे मनी दान्‍याकावर ज़ जेल्‍यो। हो बेलाक जेखिरी पसिद दुखर यायाचिज़्‍यावत ब छैंव पुरूसनी परमेस्‍वरए ओपाँर रेंद ज़ जेथैके। 7 जे माकेदोनिया स़ोनो अखैयालाव परमेस्‍वरए ओपाँत बाज़्‍यावराए याङ़ाक सतैंद नैसिउ मितावर जेलिज़्‍या। 8 जे जेल्‍योनी ज़ परमेस्‍वरए ओपाँ प़ाइँदा ज़ थास्‍नाके, माकेदोनिया स़ोनो अखैयाल वाज़ माःक, जोङ जोङ जेलाई ‘परमेस्‍वरए ओपाँत बाज़्‍यार दी’ लिन्‍या थैज़्‍यार होङ होङ ब परमेस्‍वरए उमिन थासो ज़ लिज़्‍या। है जैद गे जेजूँनी छुतङ पाँव ज़ मापरिके। 9 जेजूँनी याज़ अइ लिद पाँज़्‍यार, ‘थेसलोनिकेलाव मिँराए पावललाई ओनैंरास बनै चावस रैद अङग्‍या पुजा भरी ऱास्‍द जींदो साचो परमेस्‍वरए ल्‍योदा ओल्‍द होए ओसेवा वाज़ दोज़्‍यार दी, 10 स़ोनो गेलाई पापए सजानी पले·ज़्‍याव, नो सिउनी ओसोचोइव ओज़ा येसुलाई स्‍वर्गनी ओमाहुवा पै यायुँ थू जैद कींव ज़ नैज़्‍यार दी’ लिन्‍या याज़ सथैव ज़ यारानैज़्‍यार।