4
जे साहुर फरी, जेबाँदाराए ङ़ैत सतस दोच्‍यो। ‘गे गेर्गे ब स्‍वर्गत लिज़्‍या’ लिन्‍या तामेंःच्‍यो।
य़ाका दान्‍या पाँर
जे सैंसिद प़ाइँल ज़ धन्‍याबाद चरैःद पोंखारिउ ज़ नैच्‍यो। गे गेजूँनी ब ‘ख्रीसए कप्‍सिउ ओपाँ सथैन्‍या येम परमेस्‍वरए फैद ओरायोक’ लिद पोंखारिद्यासिच्‍यो। नो पाँ ङारासथैवनी ज़ झ्‍यालखानाल ङालिज़्‍या। जे ङाजूँनी ‘नो पाँ चावस पलासो ओदैवक’ लिद पोंखारिद्याँच्‍यो। परमेस्‍वरए ओपाँत मालिज़्‍यावराए याङ़ाक गहकस दोच्‍यो। नोरास पाँन्‍या मौका उहुकिन खेर ताझाःच्‍यो। सापीए ज़्यावलाई ङमो ओजैज़्याव मिताव जेपाँ मोहोन्‍यालो जैद यारासथैच्‍यो। जो मिताव यापाँए ओजवाप यान्‍या ब सैंच्‍यो।
तुपैन्‍या पाँर
आङाव ङाथा भरी तुखिकसए ओल्‍योनी जेथैरिज़्‍या। नो मिँ गेस प्रभुए ओय़ेन दाज़्‍याव बनै युँ हुबो गेयुँलाव गेभाइ ज़। ङा नो मिँलाई गेथार है दाद जेयुँर सझेंःद्यान्‍याए जूँनी जेल्‍योदा ङापरींज़्‍या। जेल्‍योनी हुव ओनेसिमसलाई ब नोस ज़ ङापरींज़्‍या। नो मिँ मनी युँ हुबो गेयुँलाव गेभाइ ज़। नोनी आङाव पाँ भरी है दाचिरिज़्‍यार।
10 ङास झ्‍यालखानाल लिज़्‍याव अरिस्‍तार्खसए जेरो है दाचिज़्‍याव। बारनाबासए ओभाइ मर्कूसए मनी जेरो है दाचिज़्‍याव। नो मर्कूसए उजूँनी ते ङ़ादा ज़ है दाद ङानैचिए, नो जेल्‍योक उहुकिन चावस नैच्‍यो। 11 युस्‍तस यादोज़्‍याव येसुए मनी जेलाई जेरो है दाचिज़्‍याव। ङास परमेस्‍वरए ओराज्‍यालाव य़ेन दोज़्‍याव यहूदीर आवर वाज़ लिज़्‍यार। ङायुँ ब कुधु ज़ होलाँ जैद्याँकेर। 12 येसु ख्रीसए ओनोकोर जेल्‍योनी हुव इपाफ्रासए मनी जेरो है दाचिज़्‍याव। नोए जेजूँनी ‘परमेस्‍वरए उयुँलाव मिताव य़ेनत उघुरिउर थ॰रिउर ओतारक’ लिद बनै धामास पोंखारिउ ज़ नैज़्‍याव। 13 ङा जेलाई साचो है ङादाचिज़्‍या, नो मिँए जे कलस्‍सी, लाउदिकिया स़ोनो हिरापोलिसलावराए जेजूँनी उयुँ थू जैद परमेस्‍वरए ओसेवा दोव ज़ नैज़्‍याव। 14 गेयुँलाव मिताव दाक्‍दर लूका स़ोनो देमासनी निल्‍योनी ब जेरो है दाचिज़्‍यार।
15 गे गेल्‍योनी लाउदिकियालाव गेदाज्‍यु भाइरालाई, नुम्‍फासलाई स़ोनो उझ़िमलाव दुप्‍सिज़्‍याव मन्‍दलीलाई ब जेरो लिज़्‍या। 16 आव चिथी जेप़रिउत लाउदिकियालाव मन्‍दलीलाई मनी प़रिउ याराएच्‍यो। होराए ल्‍योङाव ङापरींव चिथी ब जे रैद प़रिच्‍यो। 17 अर्खिप्‍पसलाई, ‘प्रभुए ओल्‍योनिकाव नदैव य़ेनलाई सयो·न्‍याए जूँनी नयुँ थू जैद लिनी दी’ है दोच्‍यो।
18 ङा पावलए ङाल्‍योनी ब जेरो है ङादाचिज़्‍या। आव जेरो ङा ज़ ङासरो सरेस्‍च्‍यो। ङा झ्‍यालखानाल लिज़्‍यावलाई तामेंःनाच्‍यो।
जेल्‍योदा परमेस्‍वरए उयुँ ओगराँक।