यूहन्नाए
छींनीकाव ओसरो चिथी
आव चिथी येसुए उसिस यूहन्नाए ओसरो ज़। आल ऩेब्लो मिँनी निय़ेन सरैंःसिउ लिज़्या। तोबो गायस यादोज़्यावए ओय़ेन ओसत ल्यो, उयुँ य़ालो रैंःज़्या (३ यूहन्ना १-६)। फरी तोबो दियोत्रिफस यादोज़्यावए ओय़ेन ते ओसत माल्यो, स॰व रैंःज़्या (९-१०)।
1
1 ङा इताव सेर्द लिज़्याव लोम्बा यूहन्नाए ल्योनी नँ ङायुँलाव गायसलाई आव चिथी परींद ङाईंज़्या। ङा नँलाई साचो मया ङादींज़्या।
नँलाई रँःद ङासुनी च्याँःसिउ ज़ लिज़्या
2 ङायुँलाव ङानैं, परमेस्वरए ल्योदा किताव नयुँ चाव उलिज़्याव, हिताव ज़ नक्याँर गराँव ओताक, प़ाइँनी ज़ धोल पोगोल ओजैनिउक लिद परमेस्वरलाई पोंखारिउ ज़ ङानैज़्या। 3 दाज्यु भाइर ननी याहुक परमेस्वरए ओपाँत नँ थ॰रिद सतस नदोज़्याव ङाथैक बनै खुसी ङाताके। 4 परमेस्वरए ओपाँताव ङाराजर्मैव नँ स्यासो ङाज़ार परमेस्वरए ओपाँत याबाज़्याव ङाथैक ङासुनी च्याँःसिउ ज़ लिज़्या।
5 नँ ङायुँलाव ङानैं, यायुँ हुबोरालाई नरासमारिक युँ हुबो य़ेन नदोज़्या। परमेस्वरए ओपाँताव आदा होदा बाऱिज़्याव मासरेस्सिउराए जूँनी नदोज़्याव य़ेन झन ज़ चाव लिज़्या। 6 नोराए मन्दलीए ओङ़ाक नमिन हाइद ‘चाव य़ेन दोज़्याव’ लिद गोहाई एज़्यार। निताव आदा होदा बाऱिज़्यावरालाई परमेस्वरए ओपैंज़्याव मिताव माथैंव मायो·वल सयो·द्याद येमत चावस नरापरींकिन ताखेहो है ङालिज़्या। 7 निताव मिँराए यायुँ माहुबोरास काता ज़ माऩिद ख्रीसए उमिन सथैन्याए जूँनी आदा होदा लिज़्यार। 8 है जैद गे नितावरालाई चिऊव ज़ परिज़्या। हो ताकिन ची गे ब नोरास साचो पाँ सथैन्यात सिप ज़ गेताज़्या।
घेप्पा जैसिउ पैंज़्याव दियोत्रिफस
9 आवकिन ङ़ादा नङाव मन्दलीलाई तोबो चिथी परींद ङायो। खाली जेङ़ैताव जैसिउ पैंज़्याव दियोत्रिफसए ङापाँ माभैंःके। 10 ङा जेल्योक हुव ङादैकिन नोए ओय़ेन भरी प़ाइँराए ङ़ाक सतैंद्यान्या ङाले। नोए माचाव पाँर गेङ़ैत झाःद्यासिज़्याव। ओल झन निताव य़ेनत उयुँ सोन्तोको माताद, ओल ब छुतरालाई माराचिऊव, चिऊज़्यावरालाई ब चिऊव मारायो। झन निताव चिऊज़्याव मिँलाई मन्दलीनी ब पले·ज़्याव।
चाव य़ेन दाज़्याव देमेत्रियस
11 नँ ङायुँलाव ङानैं, निताव माचाव य़ेन मादाद, नदोज़्याव मिताव चाव य़ेन दाव ज़ नैव ताके। चाव य़ेन दाज़्याव मिँ परमेस्वरनिकाव ज़ ताज़्या। माचाव य़ेन दाज़्यावए ते परमेस्वरलाई ब मारँःव। 12 देमेत्रियसए उजूँनी ते प़ाइँए ज़ चाव वाज़ पाँज़्यार, स़ोनो साचो पाँत उलिज़्याव ओक्याँनी ब रैंःज़्या। गे ब नो मिँलाई चाव ज़ थ·रैद होए उजूँनी गेपाँज़्या। गे गेपाँ साचो ज़ लिज़्या लिन्या नँ ब नसैंज़्या।
तुपैन्या पाँर
13 नँलाई है दान्या पाँर कुधु ज़ लिज़्या। उलिदी ब आव चिथील ङामासर। 14 बुरू जाँवाक नँस दैसिद गिनङाः गिनङाः जोरैद गिन्पाँया है ङालिज़्या।
15 परमेस्वरए नयुँ होलाँ जैद उईंवक। आलाव ननैंराए जेरो है दींज़्यार। नलाव प़ाइँ ङानैंरालाई तोबो तोबोनी जेरो है यादोयो।