यहूदाए ओसरो
चिथी
आव चिथी याकूबए ओभाइ यहूदाए ओसरो ज़। नो मिँ येसुए ओभाइ ब ओल्यो (मर्कूस ६:३)। हो बेलाक परमेस्वरए ओपाँ बङ्गैद धुतनी पैज़्यावराए परमेस्वरए उयुँ मिँराए ल्योदा ओय़ाल्ज़्याव रँःद, “जो गेदोदी ब ऱास्सिज़्याव,” है यालिज़्याव (यहूदा ४)। है जैद आव चिथील यहूदाए नोराए यापाहा झाःद (८-११,१६,१९) परमेस्वरए उमिनत लिज़्याव ओनैं ओमेंरालाई नो पाँरानी सम्जैद ओराजोगोइव सरैंःसिउ लिज़्या।
1
1 ङा याकूबए ओभाइ यहूदा, येसु ख्रीसए ओनोकोरए ङाल्योनी, जे परमेस्वरए ओछाँतिचिउर, परमेस्वर गेबाबुए उयुँल लिज़्यावर, येसु ख्रीसए उमिनत नैसिउरालाई आव चिथी परींद ङायाचिज़्या। 2 जेल्योदा परमेस्वरए उयुँ झन ज़ ओगराँनाक, जेयुँ ब झन ज़ होलाँ ओतानाक, जे जेल युँ थू जैसिन्या ब झन ज़ ओतानाक।
परमेस्वरकिन तँदाङावरालाई सजा हुन्या ले
3 ङायुँलाव ङानैं ङामेंर, परमेस्वरए ल्योनी सिप गेदैव जुनी इताव लिज़्या लिद जेलाई सर्द ङायाच्या है ङाल्यो। खाली परमेस्वरए छैंव उमींरालाई एकम्न्याकावए जूँनी ओयासिउ युँ हुप्न्या ओपाँलाई जात्त ज़ माऱास्द जोर्द्याव ताके है लिद जेलाई सर्द्यान्या ओचाहित ची ताके। 4 काराव ल्यो ताकिन धुतनी पैज़्यावर तोबो ऩेब्लो म़ोंसिद जेखार्ल ख्वास पसिद लेर। नो धुतनी पैज़्यावर परमेस्वरकिन तँदा जैसिद उयुँ य़ाल्ज़्याव परमेस्वरलाई रँःद, “जो गेदोदी ब ऱास्सिज़्याव,” लिद तोबोका तोबो गेर्गे प्रभु येसु ख्रीसलाई याभीःव मिताव ज़ ताके। है जैद नितावराए यासजा भाःकिन ज़ नैसिउ लिज़्या।
5 आव ङासर्ज़्याव पाँर प़ाइँ ज़ जेसैंज़्या। हैदी ब तोबो ऩेब्लो ङासम्जैचिज़्या। परमेस्वरए उमींरालाई इजिपनी पाथस ओरापले·व छींनी ओललाई ऱासोर सोतोर्यान ज़ याख्याक्यो। 1:5 प्रस १२:५१; गन्ती १४:२९-३० 6 स्वर्गताव परमेस्वरए ओचाकर्यार ब परमेस्वरए ओरायो पोल मालिद ओलकिन स॰द तँदा बावरालाई परमेस्वरए सजा यान्या छ्याम ओमाहुवा पै चुम चुमोल थुनैद यानैव। 7 हिताव ज़ सदोम, गमोरा स़ोनो निलापजीकाव सहरलाव मिँराए ब युँ माजामो पातर्या पातर्नी य़ेनर यादोवए खर्क ज़ माजिप्तिन्या मेंःए ज़्यास ताकेर। 1:7 उत १९:१-२४ नो आज्याल पै सतैंद नैसिउ लिज़्या।
8 परमेस्वरए ओपाँकिन नो धुतनी पैज़्यावर मँलाव स्यासो पाँर पैद याक्याँलाई ब माछैंव जैज़्यार। नोराए सुए पाँ ब माभैंःर। स॰द स्वर्गताव घेप्पाराए यामिन ब बले·द याराएज़्यार। 9 खाली परमेस्वरए प़ाइँरानी घेप्पा ओचाकर्या मिखाएलए ब निताव सैतानए उमिन बले·द मायो। नो चाकर्या मोसाए ओमोरोए उजूँनी सैतानस निइ़सिक सैतानलाई थल्द ओपाहा झाःद्यान्या युँ ब मादोक्यो। बुरू, “नँलाई परमेस्वरए ज़ ओफाल्निउक,” है दोक्यो। 1:9 ब्य ३४:६; दान १०:१३,२१; १२:१; जक ३:२ 10 हैदी ब निताव तँनी पैज़्यावराए ते झन यामाथ·रैधुव पाँत ल़॰ज़्यार। नितावर पुसुराए माँःती यायुँनी जो हुज़्या हो ज़ दाद यानी ज़ चुयाप जैसिज़्यार। 11 नितावरालाई थैए माँतकन लिज़्या। नोर ओभाइलाई सैःज़्याव कयिनए ओयेमदा ज़ बाकेर। स़ोनो लोभए जूँनी बालामए ओदोव य़ेनदा ज़ हिउ झाःकेर। है जैद किताव तँदा जैसिज़्याव कोरहलाई परमेस्वरए खदम ओख्याव, नोर ब हिताव ज़ तारिज़्यार। 1:11 उत ४:३-८; गन्ती २२:१-३५; १६:१-३५
यायुँनी जो हुज़्या हो ज़ दोज़्यार
12 नितावर प्रभु-भोजल यालाज माहुद जेस सिप ज़्यान्या ते ओमासहिउ पाँ ज़। नोर याफू सव़ाँन्याए जूँनी वाज़ हुज़्यार। नितावर उऱी माल्यो बादललाई बतासए आदा होदा ओख्याज़्याव मितावर ज़ लिज़्यार। ओसै माझाःज़्याव ओजरानी ज़ थँव सीं स्यासोर ब लिज़्यार, ओजरानी ज़ भोसो स्यासोर ब लिज़्यार। 13 नितावराए लाज मोर्नो माचाव याय़ेन भरी भलए ओख्याव फुइ स्यासोर ज़ लिज़्यार। तोबो पोक मालिज़्याव आदा फ्योंनी होदा फ्यों बाज़्याव सोरो स्यासोर ब लिज़्यार। नोराए याजुँ खर्क ज़ माखेम्न्या सुन्द मुन्दौ चुम चुमोल नैसिउ लिज़्या।
14 नितावराए जूँनी आदमए ओपालाकिन सात प़िरीङ जर्मिउ हनोकए 1:14 उत ५:१८,२१-२४ छींनीकावए जूँनी अइ लिद पाँके,
“परमेस्वरए हजारका हजार ओचाकर्यारास हुद,
15 आव नामलाव मिँर ओलकिन तँदा जैसिद मादान्या यादोव भरी,
स़ोनो उउपर्त माचाव यापाँव भरी ब सतैंद्याद सजा यान्या ले।”
16 निताव मिँर एकतार ज़ व़ीनी फुइ लिद रूम्रूमैव ज़ लिज़्यार। जो यायुँनी हुज़्या हो ज़ दोज़्यार। स॰द सघ्योःसिद मिँरालाई याल्योदा जैन्याए जूँनी रलक ब यारापारैज़्यार।
जोगोइसिद जे जे सपारैसिच्यो
17 खाली जे ते ङायुँलाव ङानैं ङामेंर, गेप्रभु येसु ख्रीसए ओसाचीराए ङ़ादाकिन ज़ यासथैचिज़्याव पाँर तामेंःच्यो। 18 नोराए यापाँ तोबो आव ज़, “खेम्न्या बेलाक परमेस्वरए ओपाँलाई हसैद ल़॰द यायुँनी जो हुज़्या हो ज़ दोरिज़्यार।” 19 नो परमेस्वरए उमिनत लिज़्यावरालाई फातैव पैंज़्यावर ब नोर ज़। नोरास परमेस्वरए उपुरूस ओमाल्योए नोराए मानुवाताव बिचारनी वाज़ दोज़्यार।
20 खाली जे ते ङायुँलाव ङानैं ङामेंर, परमेस्वरए ओपाँत जे जे सपारैसिन्याए जूँनी जे जेल छैंव पुरूसनी पोंखारिसिच्यो। 21 स़ोनो गेप्रभु येसु ख्रीसए ओदयानी जेदैरिज़्याव अजम्बरी जुनीलाई जेयुँ थू जैद जेकींक गेलाई मया दाज़्याव परमेस्वरए ओक्याँत ख्यासिद लिच्यो। 22 परमेस्वरए ओपाँत यायुँ चबनै माथ॰रिद ऩेथोदा लिज़्यावरालाई ब परमेस्वरए ओपाँत मयास यायुँ सुहुप्द्याद, 23 मेंःए ओज़्यासनी याराजोगोइच्यो। फरी ख्वारालाई जेरासमारिक नोराए याय़ेन माचाव बेथा मिताव ओतावए नोरास जोगोइसिद दोच्यो।
परमेस्वर दाइनो ओताक
24 गेलाई मादान्या य़ेनराल परिन्या मितावरानी पाथस जोगोइद, गेखत माल्योर जैद, ज़गै मगैव ओङ़ाक ब माछे·द रेंद ज़ बान्या जैज़्याव परमेस्वरए उमिन ओघ्योःक। 25 गेप्रभु येसु ख्रीसनी गेलाई बाँचैज़्याव नो तोबोका तोबो परमेस्वरलाई खर्क ज़ माखेम्न्या ज़गै मगैव स़ोनो नाम नमलाव ओराज्या ओचलैज़्याव ओसक्ती ङ़ादाकिन छींङ पै ज़ ओताक। आमेन।