येसुए ओसाचीराए याय़ेन
आव पोस्तोको लूकाए ओसरो ज़। गेप्रभु येसु स्वर्गत ओबाव स़ोनो छैंव पुरूस उपरींव छींनी (ओसाचीर १:१-११; २:१-४१) ओपाँ प़ाइँङ ज़ ओकेसो आल ज़ रैंःज़्या। ङ़ादा नो पाँ यरूसलेमनी सुरू ताद, नकिन यहूदिया स़ोनो सामरिया जीदा ब थास्के (१:८; ८:१,४), ननी फरी छुत जातलावराए ल्योङ ब केस्के (१०:१–११:१८)। हो बेलाक ज़ मन्दलीराए याखिरी पसिज़्याव पावलए परमेस्वरलाई सरेस्द (९:१-१९) मन्दलीरास खैद (९:२६-३०) स़ोंखेप पो पोङ बाद परमेस्वरए ओपाँ मिँरालाई सथैद मन्दलीर खदा याजैक्यो (१३:१–१४:२८; १५:३६–१८:२२; १८:२३–२१:१६)। छींनी झन पावल रोम सहर पै केस्द नलावरालाई मनी परमेस्वरए ओपाँ यासथैक्यो (२८:१६-३१)। है जैद येसुए ओसाचीर याकेसो भरिङ छैंव पुरूस ब यास यास बाद अचम्बलाव सरेसर सतैंद्याद यापाँ साचो ज़ थ·रैद ओरायो सरैंःसिउ लिज़्या।
1
1-2 माननिय थियोफिलस ज्यू,
ङ़ादाङाव ङासरो पोस्तोकोल, येसु ओय़ेनत उथूसिउकिन स्वर्गत ओबाज़्याव छ्याम पैकाव ओय़ेनर ओपाँर प़ाइँ ज़ सर्द नैद ङाईंए। हो छ्याम ज़ ओराछाँतिउ ओसाचीरालाई छैंव पुरूसए ओसक्तीनी ‘आव आव दोच्यो’ है दाद याख्यानैक्यो। 3 होकिन ङ़ादा ज़ बनै दुखस उसिउ छींनी येसु सैंसिद चालीस दिन भरी घरी पाला ज़ नोराए याङ़ाक सरैंःसिद, ‘आव ङा ज़’ लिद ओसरेसर ब सतैंद ओराएज़्याव, परमेस्वरए ओराज्यालाव पाँर ब ओरासथैज़्याव। 4 तछा नोरास ज़्यान्याए जूँनी दुप्सिद यालिज़्याक, “जे यरूसलेम माऱास्द ङाबाबु परमेस्वरए ओय़ाकालाई कींद नैचिके। ङा जेलाई नो ओय़ाकाए जूँनी ङ़ादाकिन ज़ है दाद ङानैचिए। 5 किताव यूहन्नाए जेलाई ऱील ओसछैंचिउ, हिताव ज़ जाँ छींनी छैंव पुरूसनी जेछैंरिज़्या,” है यादोक्यो।
येसु स्वर्गत ओबाव
6 नोर तछा दुप्सिद यालिज़्याक उसिसराए येसुलाई, “प्रभु, सैं आव बेलाक ज़ इस्राएलीराए गेराज्या रोमीरानी सोवोल्द नयासिरिज़्याव रो?” है यादोक ते, 7 येसुए, “बेला त़ोन्या, जुक त़ोन्या ङाबाबु परमेस्वरए उकुइत लिज़्या, जे सैंन्या ओमेला माले। 8 बुरू जे जेक्याँत छैंव पुरूस उहुक बनै घ्योःव सक्ती दैद यरूसलेमल, यहूदियाल, सामरियाल स़ोनो नामलाव काना कुनीङ पै ङासाचीर जेतारिज़्या,” है यादोक्यो।
9 हाःत ज़ येसु नोराए याङ़ाकिन ज़ याचिऊज़्याक ज़ नमदा छींसिद बादलए लुम्बैद मासरैंःक्यो। 10 नोराए नमदा लँ लँ याचिऊज़्याक होक ज़ उमँःजानी पालो क्वा क्वाइसिउनी ऩेब्लो याङ़ाक च्याँःसिहुकिनी। 11 नोनी, “अ गालीललाव मिँर, काराव नमदा भाल्सिद जेलिज़्याव? नो जेङ़ाकिन बाव येसु किताव नमदा उछींसिज़्याव जेरँःव, हिताव ज़ फरी तछा झरिहुरिज़्या।”
यहूदाए ओपोल छुतलाई याजैव
12 हाःत ज़ येसुए उसिसर जैतून दाँदातिन झरिद नजिककाव यरूसलेम सहरदा बाकेर। नो दाँदातिन आधा घन्तावाकाव येम उलिज़्याव। 13 सहरल केस्द नोर हाः बेलाकाव यालिज़्याव ओतर्ताव ताललाव कुन्तील बाकेर। नो कुन्तील पत्रुस, यूहन्ना, याकूब, अन्द्रियास, फिलिप, थोमा, बारथोलोमाइ, मत्ती, अल्फयसए ओज़ा याकूब, देसभक्ता सिमोन स़ोनो याकूबए ओज़ा यहूदास सिप ज़ यालिज़्याव। 14 नोरास नल येसुए ओआमा मरियम, येसुए ओभाइर स़ोनो येसुसकाव मेंमार दिनकाव ज़ दुप्सिद प़ाइँए तयुँ जैद पोंखारिउ ज़ यानैज़्याव।
15 तछा यायुँ हुबोर तसय बीसा दुप्सिद यालिज़्याक पत्रुस नोराए याङ़ाक च्याँःसिद अइ लिद पाँके, 16 “अ ङानैं ङामेंर, आदा थैचिके। येसुलाई सूँपिज़्याव यहूदा इस्करियोतए उजूँनी भाःकाव धर्मसास्त्रलाव सर्सिउ पाँ भरी यो·के। नो पाँ भरी छैंव पुरूसए ङ़ादा ज़ दाऊद राजाए ओयाःनी है लिद ले। 17 नो मिँ ङ़ादा गेस ज़ ओल्यो। आव गेय़ेनत मनी नोए उजुँ ब ओल्यो ज़।”
18 नो मिँ येसुलाई क्योःन्या घुस ज़्याद नो पैसाए एँः तोबो लँःक्यो। नो एँःल ज़ बाप तेद उभूँदीर पा·द च्याल्नी ब्याल ताद सिके। 19 यरूसलेम सहर भरिल नो पाँ थास्द नो एँःए उमिन या याखामनी आखेल्दामा नैदिकेर। नोए ओअर्थ ‘झीए एँः’।
20 पत्रुस फरी, “होए उजूँनी ङानैं ङामेंर, भजन पोस्तोकोल इताव सर्सिउ लिज़्या,
‘नोए ओपो रितो ओताक,
नल बासिन्या सु ज़ तातारक।’
स़ोनो,
‘ओदैव य़ेन ब छुतए ओनैंवक।’1:20 भज ६९:२५; १०९:८
21-22 है जैद गेप्रभु येसुलाई रँःव, ङ़ादाकिन गेस गेस बाऱिउ मिँ नोए ओपोल तोबो जैव ताके — गे मिताव ज़ नो मनी येसु सिउनी सैंसिद ओसोव साची याधुन्याकाव ओताक। नो मिँ ऱील सछैंज़्याव यूहन्नाए ओपालाकिन येसु स्वर्गत ओबाज़्याव पै गेस गेस लिज़्याव मिँ ज़ ताव परिके,” है ओरादोक ते, 23 नोराए तोबो योसेफ बारसाबास यादोज़्याव (नोलाई युस्तस मनी है यादोज़्याव), स़ोनो तोबो मतियास यादोज़्याव, नोनी ऩेब्लोए निमिन हाइद, 24-25 अइ लिद परमेस्वरलाई पोंखारिकेर, “अ प्रभु प़ाइँए युँलाव पाँ सैंज़्याव, यहूदाए ते गेसकाव ओय़ेनलाई ऱास्द सराप दैन्या ओपोल ज़ बाके। है जैद नोए ओऱासो य़ेनत आव ऩेब्लोनी काताकावलाई नैन्या नपैंज़्याव, गेलाई सतैंद्याव ताके।” 26 नोनी निमिनत गोला याझाःक मतियासए उमिन परिके। है जैद नो एघार जनात चा·सिके।