1 फरी छींनी मनी तछा येसु उसिसराए याङ़ाक गालील खन्‍दलाव तिबेरियास दहक सरैंःसिके। नक इताव ताके — 2 नक लिज़्‍यावर सिमोन पत्रुस, दिदुमस यादोज़्याव थोमा, गालीललाव काना नाखारलाव नथानेल, जब्‍दियाए ओज़ानी स़ोनो छुत ऩेब्‍लो उसिसनी याल्‍यो। 3 नो बेलाक सिमोन पत्रुसए ओनैंरालाई, “ङा ते ङाँःर क्‍योःना ची तखेप ङाबारिज़्‍या,” है ओरादोक ते, ओनैंराए, “गे मनी नँस ज़ गेबारिज़्‍या,” है दाद नोर प़ाइँ दोङ्गाल पसिद ऱील तुबुरी लिद ब ङाँःर तोबो ब माताकेर।

4 नम ज़राँः ज़राँः उसँनाक येसु दह छ्योक च्‍याँःसिद उलिज़्‍याव। खाली उसिसराए येसु ज़ लिद मासरेस्‍धुकेर। 5 हाःत ज़ येसुए, “अ बाबुज़ार, ङाँःर खावा तार्‍या की?” है ओरादोक ते, “अहँ, तोबो ब मातार,” है दोकेर। 6 नकिन येसुए, “जेदोङ्गाए ओवोर्दा जेजाल ख्याचिके, नल ङाँःर दैन्‍या जेले,” है ओरादोक ते, याजालर याख्याक ल्‍यो माल्‍यो ङाँःर हुद याजाल ब मास़ेल्‍धुकेर। 7 हाःत ज़ येसुए उयुँलाव उसिसए पत्रुसलाई, “नो ते गेप्रभु ज़ ची ओल्‍यो,” है ओदोव प़ाइँना पत्रुस लाला लुलु हाइसिउ ओक्‍वार क्‍वाइसिद दहल ज़ो·द येसुए ल्‍योदा बाके। 8 उपुर्काव उसिसर ते दोङ्गाल ज़ लिद ङाँःर ल्‍यो जाललाई स़ेले स़ेले पाखात पुलुस्‍केर। नो ङाँःर याराक्‍योःव पो कोसै तादाङ ते ओमाल्‍यो, दह छ्योकिन तसय मितरवा वाज़ ओल्‍यो।

9 नोर दह छ्योक याहुवत मेंः दासिउ म़ुथाल येसुए भरेसर ङाँःर हिप्‍द ओनैज़्‍याव रँःकेर। 10 नाःत ज़ येसुए, “जेराक्‍योःव ङाँःर ऩेबरेंवा रैचिके,” है ओरादोक ते, 11 सिमोन पत्रुस दोङ्गाल पसिद नो ङाँःर लिज़्‍याव जाललाई पाखात स़ेल्‍द रैक्‍यो। नल घेप्‍पा घेप्‍पा ङाँःर तसय त्रिपन्‍न गोता यागैव ओल्‍यो। हितावत मनी नो जाल जात्त ज़ ओमाचिसो ओल्‍यो। 12 नकिन येसुए फरी नोरालाई क़िद, “जेयाः बितालिहुचिके,” है यादोक्‍यो। नोराए फरी येसुलाई यासरेस्‍दी ब सुए ज़ ‘नँ ते गेप्रभु ची सा’ है मादोधुकेर। 13 येसु हुद भरेसर ङाँःर उकुइत रैद नोरालाई भाःद याएक्‍यो। 14 येसु सिद सैंसिद ओसोव छींनी उसिसराए ङ़ाक आवस स़ोंखेप सरैंःसिके।

15 नोर यायाःर याबितालिउत येसुए सिमोन पत्रुसलाई, “अ यूहन्‍नाए ओज़ा सिमोन, नँ ङालाई आवराकिन कुधु ज़ मया नदाँज़्याव रो?” है ओदोक ते, पत्रुसए, “हैज़ प्रभु, नँलाई मया ङादींज़्याव नँ ज़ नसैंज़्‍या,” है ओदोक ते, येसुए, “हो ची ताकिन्‍दा ङापाथार छोद्याँके।” 16 नकिन येसुए फरी ब, “अ यूहन्‍नाए ओज़ा सिमोन, ङालाई साचो ज़ मया नदाँज़्याव रो?” है ओदोक ते, पत्रुसए, “हैज़ प्रभु, नँलाई मया ङादींज़्याव नँ ज़ नसैंज़्‍या,” है ओदोक ते, येसुए, “हो ची ताकिन्‍दा ङाबेधारालाई याचिऊयो,” है दोक्यो। 17 फरी ब येसुए, “अ यूहन्‍नाए ओज़ा सिमोन, है जैद ङालाई मया नदाँज़्याव ज़ रो?” है ओदोक ते, पत्रुसलाई नो पाँ स़ोंखेप है ओदोवए पत्रुसए उयुँ माचाव दाद, “प्रभु प़ाइँ युँलाव पाँ नसैंज़्‍या। नँलाई मया ङादींज़्याव मनी नँ ज़ नसैंज़्या सानी,” है ओदोक ते, येसुए, “हो ची ताकिन्‍दा ङाबेधार पाथस छोद्याँके। 18 ङा नँलाई साचो है ङादींज़्‍या, नर्सार उलिज़्‍याव बेलाक नवाँःफोर पो·सिद जोदा बान्‍या नयुँ लिज़्‍या होदा ज़ नबाज़्‍याव। खाली नर्सार खेम्‍द नसेरोत नकरर रा·द्याद नवाँःफोर छुतए पो·द्याद बान्‍या युँ नमादोज़्‍यावदा करस ज़ लाँन्‍या लेर,” है दोक्‍यो। 19 येसुए आव पाँर, ‘पत्रुस इतावनी सिद परमेस्‍वरए उमिन सघ्‍योःद्यान्‍या ले’ लिद ङ़ादा ज़ सतैंदिक्‍यो। है जैद येसुए पत्रुसलाई आव भरी है दाद, “ङाछींत हुन्‍के,” है दोक्‍यो।

20 नाःत ज़ पत्रुस उछींदा ओभाल्‍सिक येसुए उयुँलाव उसिस मनी उछीं उछीं उहुज़्‍याव रँःक्‍यो। नो उसिस ज़ ङ़ादाङाव नो भत्‍यारल येसुए ओछातीत कँ लिद, “प्रभु, नँलाई धोका याज़्‍याव सु?” है दाज़्‍याव मिँ। 21 पत्रुसए नोलाई रँःद येसुलाई, “प्रभु, आवलाई छींनी कै तान्‍या?” है ओदोक ते, 22 येसुए, “ङा फरी ङामाहुवा पै नो मिँलाई मासिन्‍या ङाजैदी ब नँ है लिन्‍या काता ओमेला ज़ माले, नँ ङाछींत घुहुनी,” है दोक्‍यो। 23 नो येसुए ओपाँनी ज़ नो उसिस सिन्‍या माले लिन्‍या यायुँ हुबोराए खार्ल फींजिके। खाली ओल येसुए ते ‘आव सिन्‍या माले’ है ओदोव ते माःक। ‘ङा फरी ङामाहुवा पै आव मिँ ओमासिदी ब नँ है लिन्‍या ओमेला माले,’ है वाज़ ओदोव ची।

24 आव पाँर ङामीए रँःद सर्ज़्‍याव ङा नो उसिस ज़। आव ङासरो पाँ भरी साचो थ॰रिउ ज़ लिज़्या।

25 आव ङासरोकिन येसुए छुत ब कुधु य़ेनर ज़ दाद नैव। खाली तोबो तोबोनी सर्न्‍या ताकिन सर्सिउ पोस्‍तोकोर आव मानुवात ब मासुइँःखेहो।