28
माल्ता तापुत
1 गे भरी कैज़ माताद पाखात गेपुलुसो प़ाइँना ‘आव तापुए उमिन माल्ता ची ओल्यो’ लिन्या गेसैंके। 2 नकाव लिज़्याव मिँराए गेलाई रँःद यायुँ नाद दया दासिकेर। नम फाइ फाइनी फुइ फुइ जैद बनै उज़्यूँःवए मेंःर दाद्यासिकेर। 3 पावलए सीं तकर रैद मेंःल ओझाःक मेंःए ओघम्काए घुल तोबो पुलुस्द पावलए उकुइ दा·दिक्यो। 4 नो तापुताव मिँराए उकुइत घुल उझुन्दिउ रँःद, “ओहो! आव मिँ ते ज्यानमारा ज़ ओल्यो ताखेहो। नाःल्दिउ ऱीनी उजुगिदी ब न्यायनी ते बाँचिउ मादैक्यो,” है लिकेर। 5 खाली पावलए उकुइ फरैद घुललाई मेंःल ख्याक्यो, ओल ते कैज़ माताके। 6 तापुताव मिँराए ते, ‘जुनी ब गोद सिए’ लिद चिऊद यानैज़्याव। कुधु पै चिऊद ब कैज़ ओमातावए, हाःकिन “आव मिँ ते देवता ची ओल्यो,” है लिकेर।
7 नो तापुताव याघेप्पा पब्लियसए ओएँःर उझ़िमर नजीदा ज़ यालिज़्याव। है जैद नोए गेलाई दया दाद स़ोंला पै बनै चावस ज़ नैसिक्यो। 8 नोए ओबाबु फू बान्या बेथाए ओजोरो हुद थलिद उलिज़्याव। पावलए नोलाई चिऊनाद परमेस्वरलाई पोंखारिद, ओक्याँत उकुइ नैद ओयोत, होक ज़ गराँके। 9 हाःकिन नो तापुताव मिँराए ‘पावलए अइ जैक्यो’ लिन्या थैद याजोरो हुवर प़ाइँ ओल्योक हुद यासगराँसिहुज़्याव। 10 है जैद गेलेवा भरी नो तापुताव मिँराए गेलाई बनै मानस ज़ नैद, गेबान्या छ्याम ओतावत येमताव गेज़्यावर ब झाःद्यासिकेर।
रोम याकेसो
11 माल्ता तापुत स़ोंमैना गेतावत तोबो अलेक्जेन्द्रिया सहरनी हुव जहाजत गेबाके। नो जहाज य़ुँदा भरी नो तापुत नैसिउ उलिज़्याव, ओङ़ैत जोङोल्या देवता यादोज़्यावए ओअङग्या खुपिसिउ उलिज़्याव। 12 माल्ताकिन सुराकुसाई सहरक बाद स़ोंला पै नक ज़ गेलिके। 13 नकिन फरी बाद इतालिया देसलाव रेगियन सहरल गेकेस्के। नल तछा गेतावत दखिन त॰नी बतास चलिद ऩेलात ज़ पतिओली सहरल गेकेस्के। 14 नो सहरल येसुए ओपाँत बाज़्यावरास गेदैसिक, नोराए ‘गेस ल्यो ताके’ है यादासिक ते नोरास तसाता पै गेलिके। नकिन बल्ल रोम सहरदा ज़ गेबाके। 15 रोमलाव यायुँ हुबोराए ‘हुज़्यार दी’ लिन्या थैद ख्वार अप्पियस बजारक पै, ख्वार तीन-भत्ती बजारक पै गेलाई च़िहुसिकेर। पावलए नोरालाई रँःद उयुँर होलाँ ताद परमेस्वरलाई धन्याबाद चरैःक्यो।
16 रोम गेकेसोत पावललाई तोबो सिपाईंए ओपासल झ्यालखानाकिन अछतङ तोबो झ़िमल ल्यो एकेर।
पावलए रोमलाव यहूदीरालाई ओरासथैव
17 पावल स़ोंला ओतावत नलाव यहूदीराए याघेप्पारालाई दुप्द अइ लिद यासथैक्यो, “अ ङादाज्यु भाइर, ङा गेजिज्यु बाज्युराए याचलन स़ोनो गेजातलाव मिँरालाई काता ज़ बले·द ङामाराएदी ब, यरूसलेमलाव यहूदीराए ङालाई क्योःद रोम सरकारए ल्योदा सूँपिनाकेर। 18 रोमीराए ङापाँ फाल्द ङालाई सैःन्या स्यासो काता ज़ मादैद ऱासो यापैंज़्याव। 19 ङामीं यहूदी दाज्यु भाइराए याउपर्त काता खतर लैन्या पाँ ज़ ओमाल्यो, खाली यहूदीराए ते झन ङालाई ऱास्न्या पाँलाई यामाभैंःवए माहाराजाए ल्योदा बिन्ती दान्या कर ज़ लागिके। 20 खास ङा इस्राएलीराए आस दाद यानैज़्याव ख्रीसए उजूँनी है ङारादोवनी ज़ ङालाई इताव साँगलए किद नैनार। है जैद नो पाँर जेलाई है दान्याए जूँनी आछिम ङाखुल्चिउ,” है ओरादोक ते, 21 नोराए, “गे आःपै यहूदिया देसनी नँ नजूँनी काता चिथी ज़ गेमादैताए। ननी हुज़्याव गेमींराए यायाःनी ब नजूँनी माचाव काता ज़ गेमाथैताए। 22 खाली प़ाइँङ ज़ जे ख्रीस्त्यानराए जेजूँनी ‘आवराए यापाँ थिक माले’ है यालिज़्याव वाज़ गेथैज़्या। है जैद जेपाँ किताव उलिज़्याव, गे मनी तखेप थैव ताके,” है दोकेर।
23 है जैद ‘आव छ्याम दुप्सिउ ताके’ लिन्या याथ·रैव छ्याम यहूदीर पावलए उझ़िमक ओपाँ थैना काला मुलु हुकेर। हो छ्याम छकाल्न्याकिन ऱिमक पै पावलए नोरालाई परमेस्वरए ओराज्यालाव पाँर पलास्द्याद, मोसाए ओकानुन स़ोनो अगमबक्ताराए येसुए उजूँनी यासरो भरिनी थ·रैद्याद यायुँ सुहुप्द्यान्या धामा दोक्यो। 24 नोर ख्वाराए ओपाँ चावस थैद नो पाँत यायुँ हुप्के, ख्वाराए ते माभैंःकेर। 25 है जैद या या माखैद ननी पुलुस्द याबाज़्याक पावलए आव तोबो पाँ याङ़ैत झाःद याएक्यो, “जेजिज्यु बाज्युरालाई छैंव पुरूसए है ओरादोव पाँ ते थिक ज़ ताद ले। नो पाँ यसैया अगमबक्ताए अइ लिद सर्द नैद यायो,
26 ‘आव मिँरालाई है यादोनाके,
थैन्या ते जेथैज़्या, जेमातीधुइ।
रँःन्या ते जेरँःज़्या, जेमासरेस्धुइ।
27 आवराए यायुँ काता ज़ मातीधुन्या भुत्यासो ताद ले।
यार्ना ब सूइसिउ मिताव ताद ले।
यामी ब च़िम जैद यानैज़्याव मिताव लिज़्या।
निताव यामाताव ताकिन आः झरी यामीए रँःधुखेरहो,
यार्नाए थैधुखेरहो,
यायुँल तीधुखेरहो।
ङाल्योदा यायुँ फर्कैधुखेरहो।
सोजोकावर ब ङाराजैधुखेहो।’ 28:26-27 यसै ६:९-१०
28 है जैद आव ब सैंच्यो — आछिमकाव जेथैव परमेस्वरनिकाव हुव बाँचैन्या पाँर जेल्योङ मारहिद छुत जातलाव मिँराए ल्योदा बारिज़्या। नोराए ते झन थैन्या लेर।” 29 [पावलए आव पाँ है ओरादोवत यहूदीर या या खर्लेसिद पुलुस्द बाकेर।]
30 पावल रोम सहरल झ़िमए किराया फो·द ऩेरिम भरी नल ज़ लिके। उझ़िमक हुज़्याव भरिरालाई चावस सुम्द, 31 परमेस्वरए ओराज्यालाव पाँर सथैद, घ्योःव युँस प्रभु येसु ख्रीसए उजूँनी ब पलास्द ओराएज़्याव। नो य़ेनत सुए ज़ यामावैंज़्याव।