रोमीरालाई
पावलए परींद ओरायो चिथी
आव चिथी रोम सहरलाव मन्दलीए जूँनी पावलए ओसरो ज़। नो पो राज्या भरिलाव राजधानी उलिज़्याव। नल ख्वा ख्वा यहूदी धर्म मानिज़्यावर हुद मोसाए ओकानुन दाद वाज़ परमेस्वरस खैन्या ताज़्या है यालिज़्याव (रोमी २:१७-२९; ९:३०-३३)। है जैद आव चिथील पावलए येसु ख्रीसलाई युँ सुहुप्न्यानी वाज़ पाप भरी क्याल्सिद परमेस्वरस खैन्या ताज़्या लिद नो यापाँलाई उल्तैद ओरायो रैंःज़्या (३:२१-२८)। मिँ भरी सु ज़ धर्मी यामातावए (३:९-२०) नो येम यहूदीर तादी ब, छुत जातलावर तादी ब प़ाइँ मिँराए जूँनी ज़ (१:१६-१७; ३:२९-३१)। है जैद ननी ज़ छैंव पुरूस दैद माचाव भरिनी फुर्सुल तान्या ताज़्या (६:१–८:३९)।
1
पावलए ओय़ेन ख्रीसए ओपाँ सथैन्या
1 ङा पावल, येसु ख्रीसए ओनोकोर, परमेस्वरए चाव ओथा सथैन्यात ओसाची खतैसिउ ङालिज़्या। 2 नो चाव था परमेस्वरए ‘यान्या ङाले’ लिद अगमबक्ताराए यासरो धर्मसास्त्रल ङ़ादा ज़ य़ाका दाद ओनैज़्याव। 3 नो पाँ ओज़ा येसु ख्रीसए उजूँनी ज़। नो दाऊदए ओथोल ज़ मिँ मिन्सिद जर्मिके। 4 फरी छैंव पुरूसए ओसक्तीए गेप्रभु येसु ख्रीसलाई सिउनी ओसोचोइवए परमेस्वरए ओज़ा ज़ थ॰रिके। 5 है जैद ङा गेप्रभुए उमिननी ज़ यहूदीराकिन छुत जातलाव मिँरालाई ओल ओपाँत उघुरिउर जैद, यायुँ सुहुप्द्यान्याए जूँनी नोए ओल्योनी ज़ असिकर दैद ओसाची तान्या हक ब दैद ङानै। 6 जे मनी येसु ख्रीसए उमींर तान्या खुल्सिउर जेलिज़्या। 7 है जैद जे परमेस्वरए उयुँलाव मिताव रोमलाव छैंव उमींरालाई आव चिथी परींद ङायाचिज़्या। परमेस्वर गेबाबु स़ोनो गेप्रभु येसु ख्रीसनी जेल्योदा नियुँ गराँद जेयुँ होलाँ जैद ओयाचिरक।
पावल याल्योदा हुव ओपैंज़्याव
8 प़ाइँरानी ङ़ात आव तोबो पाँ लिज़्या — जे परमेस्वरए ओपाँत जेयुँ जेसुहुबो संसार भरिल प़ाइँदा ज़ थास्द ले। है जैद ङा जेजूँनी परमेस्वरलाई पोंखारिद येसु ख्रीसनी धन्याबाद चरैःव ज़ ङानैज़्या। 9 ओज़ाए ओय़ेनत बनै जाँगरस ओसेवा ङादोज़्याव परमेस्वरए ओङ़ाक जेलाई मनी खर्क ज़ ङामामेंःचिए। आव पाँत ओल ज़ साची लिज़्या। 10 ‘परमेस्वरए उयुँ ओताकिन ङा आथ पाला जेल्योदा हुव ङादैक’ लिद परमेस्वरलाई बिन्ती चरैःव ज़ ङानैज़्या। 11 ङा जेल्योङ जेलाई थ॰रिउ जैन्याए जूँनी परमेस्वरनिकाव काता असिकर याव ङादैकिन ताखेहो लिद जेस दैसिन्या बनै युँ ङादोज़्या। 12 ङा जेल्योक हुद जेस दैसिउ ङादैकिन गे तखेप्त ज़ गेयुँर सझेंःसिन्या गेले — जे ङा ङाल्योनी, ङा जे जेल्योनी। 13 आव ब सैंच्यो ङानैं ङामेंर, ङा जेल्योदा कुधु पाला ज़ हुन्या ङापैंके, खाली काता काताराए माधाःद हुव ङामादैके। जेल्योङाव ङायुँ ते इताव ज़ ओल्यो — किताव पो पोङ छुत जातलाव मिँरालाई परमेस्वरए ल्योदा हुन्या ङाराजैके, हिताव ज़ जे जेल्योङ मनी तोबो ऩेब्लो ङाराजैधुकिन ताखेहो लिद बनै युँ ङादोज़्याव। 14 ङा घेप्पा ज़िम्ज़ार, सैंवर मासैंवर, जो मितावरालाई तादी ब चाव था सथैन्या कर ज़ लिज़्या। 15 है जैद ङा जे रोमल लिज़्यावरालाई मनी चाव था सथैन्या युँ ङादोज़्या।
परमेस्वरस खैन्या येम
16 ङा ख्रीसए चाव ओथा सथैन्या ङालाज माहुइ। यहूदीर तादी ब, छुत जातलावर तादी ब आव पाँत यायुँ हुप्ज़्यावरालाई परमेस्वरनिकाव साःरो जुनी दैन्या सक्ती लिज़्या। 17 ननी ज़ परमेस्वरए मिँरालाई ओलस ओरासखैज़्याव येम ब सतैंसिउ लिज़्या। नो येम ओजरानी उतुपाङ पै गेयुँ गेसुहुबोनी वाज़ लिज़्या। धर्मसास्त्रल मनी इताव सर्सिउ लिज़्या,
“उयुँ हुप्द परमेस्वरस खैव मिँ वाज़ बाँचिज़्या।”1:17 हब २:४
परमेस्वरए ओङ़ाक काता निउँ ज़ माले
18 मिँराए यादोव पापत स़ोनो अधर्म यादोज़्याव य़ेन भरित परमेस्वरए ओसजा सरैंःसिउ लिज़्या। नोराए यायुँल माचाव वाज़ नैद परमेस्वरए साचो ओपाँलाई ब वैंज़्यार। 19 नोराए यायुँल परमेस्वरए उजूँनी ते ङ़ादाकिन ज़ सैंद यानैज़्याव, काराव ल्यो ताकिन ओल परमेस्वरए ज़ सतैंद नैद यायो। 20 परमेस्वरए आव संसार ओजैज़्यावकिन ज़ ‘ओगेर उगुनर स़ोनो खर्क ज़ माखेम्न्या ओसक्तीर आवर ज़’ लिन्या प़ाइँए ज़ सैंद नैर। ओललाई यामारँःधुदी ब ओदोज़्याव य़ेननी ज़ रैंःज़्या। है जैद सुलाई ज़ ‘आव भरी गेमासैंए’ लिन्या काता निउँ ज़ माले। 21 हिताव सैंज़्यावत ब परमेस्वरलाई नैद्याव परिन्या मान ब नैद माएर, धन्याबाद ब माचरैःर। नोराए झन अऩाकलाव पाँर ससैद यायुँनी काता ज़ माहुन्या तानाकेर। 22 नोर, ‘गे बनै सैंन्यार गेलिज़्या’ है यालिज़्यावत ब काता ज़ मासैंन्यार ताकेर। 23 बनै ज़गै मगैव, उजिउँनी लिज़्याव, खर्क ज़ माखेम्ज़्याव परमेस्वरए ओपोल झन जै जन्तु, बाज़ा बिज़ा, ऱूइज़ा वान्ज़ा, मिँराए अङग्या जैद, नोराए यासेवा दोज़्यार।1:23 ब्य ४:१६-१८
24 है जैद परमेस्वरए ‘आवर कै जैद ब माताके’ लिद यामन लागिउ य़ेनदा ज़ याऱास्क्यो। हाःकिन नोर झन या याल युँ माजामो य़ेनर वाज़ दाद याइज्यात याज़ झाःज़्यार। 25 सैंज़्यावत ब परमेस्वरनिकाव साचो ओपाँलाई ऱास्द, होए ओपोल झन धुतनी ताव पाँलाई रैद, हो ज़ साचो जैकेर। एकम्न्या ओमान नैद्याव परिन्या प़ाइँ जैज़्याव परमेस्वरलाई माभैंःद ओसेवा ब मादाद, झन ओल ओराजैवराए यासेवा ज़ दोनाकेर।
26 है जैद परमेस्वरए नोरालाई लाज मोर्नो य़ेनदा ज़ याऱास्क्यो। ननी ज़ मेंमाराए मनी दाव परिन्या य़ेनलाई ऱास्द या याल युँ माजामो य़ेन ज़ दोनाकेर। 27 हो मिताव ज़ खेपाराए मनी मेंमारास माताद झन या याल ज़ यायुँ मानैधुद युँ माजामो य़ेनर ब दोनाकेर। नितावराए यापाप याक्याँत याज़ भुगिरिज़्यार।
28 नोराए परमेस्वरए ओमान नैद्याव माभैंःद यायुँ बिप्यादा वाज़ याझाःवए परमेस्वरए नोरालाई ‘कुबानी याय़ेनदा ज़ घबाज़्यारक’ लिद बिप्यादा ज़ याऱास्क्यो। 29 है जैद नोराए याय़ेन जम्मा माचाव वाज़ लिज़्या — युँनी कुबातैं हुन्या, लोभ दान्या, छुतलाई सोन्या, प़ाइँत ज़ मी तून्या, मिँ सैःन्या, इ़सिन्या, धुतैद ज़्यान्या, छुलैं पुलैं दान्या, अर्काए उछींनी पाँन्या, 30 अर्काए उमिन बले·द्यान्या, परमेस्वरलाई सोन्या, स॰द सँ सँनी बँ बँ लिन्या, सघ्योःसिन्या, माचाहिउ बुद्धी कलैन्या, बाबु आमाए ओपाँ माभैंःन्या, 31 पत मुर्ख जैसिन्या, सतत मालिन्या, युँ मानान्या, सुए ल्योदा ब युँ माजैन्या। 32 निताव य़ेन दाज़्यावराए, ‘परमेस्वरए ओकानुननी सिन्या सजा ते दैव ज़ परिके’ लिन्या यासैंज़्यावत ब झन याजिउ नदा ज़ च्यो च्यो झाःज़्यार। छुत निताव य़ेन दोज़्यावरास मनी बनै रेंद यापाँ तप्द याराएज़्यार।