1 ऩासिन्‍या छ्याम ओखेमोत सातालाव उस॰कताव छ्याम नम उसँनाक मरियम मग्‍दलिनी, ओनैं मरियमस खादर पोदा चिऊनाकिनी। 2 हाःत ज़ तोबो बनै घ्‍योःव भोंचालो हुद परमेस्‍वरए ओचाकर्‍या स्‍वर्गतिन झरिहुद नो कसिउ लुँलाई पल्‍तैद नो लुँत च़ुसिके। 3 नो चाकर्‍याए ओङाः बनै ज़ झिलिक झिलिको उलिज़्‍याव, ओक्‍वार ब पोम स्‍यासो तक तकौर यालिज़्‍याव। 4 नो गुज़्‍याव पाल्‍यार नोलाई रँःद याछ्याचेए भुम भुम गूद धलिद सिउ स्‍यासो ज़ ताकेर।

5 नो चाकर्‍याए नो मेंमानिलाई, “जिन ताछे·चिन, नो क्रुसत तङ्गैद यासैःव येसुलाई जिन्‍खिम्‍हुज़्‍याव ज़ ताखेहो। 6 नो आल माले। ङ़ादाकिनकाव है ओदाचिज़्‍याव मिताव नो सैंसिद सोधुके। अछादी आव यानैव पो चिऊचिन्‍केदा, 7 उसिसराए ल्‍योदा हतप्‍त ज़ बाद, ‘गेप्रभु सिउनी सैंसिद सोके। जेङ़ादा ज़ गालीलदा बाज़्या दी, होङ ज़ ओलस दैसिन्‍या जेले,’ है यारादोनाचिन्‍के,” है दाद फरी नोनिलाई, “आव भरी साचो ज़ है दाद ङानैचिने,” है उनिदोव प़ाइँना, 8 नोनी बनै छे·द निरेंतए चह चह ताद खादर पुपनी पुलुस्‍द धोंःनाद उसिसरालाई है यारादोनाकिनी। 9 निबाज़्‍याक येमक ज़ येसु उमँःजानी निङ़ाक च्‍याँःसिद, “जिनयुँ होलाँ जैचिन्‍के,” है उनिदोव प़ाइँना ज़, नोनी उखँ क्‍योःद धो दोकिनी। 10 नकिन येसुए नोनिलाई, “ताछे·चिन, नो ङाभाइरालाई, ‘जे प़ाइँ गालीलदा बाचिके दी, प्रभुस होङ ज़ दैसिन्‍या जेले दी,’ है यारादोचिन,” है निदोक्‍यो।

11 नोनी येमत निबाज़्‍याव बेलाक, येसुए ओमोरोलाई गुज़्‍याव ख्‍वा पाल्‍यार सहरल बाद नो यारँःव भरी प़ाइँ ज़ मुख्‍या पुजारीरालाई है यारादोकेर। 12 नो पुजारीराए पाल्‍याराए यापाँ थैद यहूदीराए यास़ेररास दुप्‍सिद सल्‍ला दाद नो पाल्‍यारालाई, कुधु पैसार याद, 13 “आव जेपाँ सुलाई ज़ है तारादोच्‍यो। बुरू जे, ‘गे रील ङ़ल्‍द गेलिज़्‍याक उसिसर हुद गेमासैंद हाइद यालाँव ओल्‍यो,’ है लिच्‍यो।” 14 फरी, “आव पाँर कैताराक हाकिमए ल्‍योक ओकेस्‍किन जे ताछे·च्‍यो, जेजूँनी पाँन्‍या गे ज़ गेलिज़्‍या,” है लिद यारापरींकेर। 15 है जैद नो पाल्‍याराए नो पैसार रैद नो है यारादोव मिताव ज़ है यारादोनाकेर। है जैद नो पाँ हो छ्यामकिन ज़ यहूदीराए खार्ल प़ाइँदा ज़ फींजिके।

16 नकिन एघार जना येसुए उसिसर गालील खन्‍दल बाद येसुए है ओरादोव दाँदात बाकेर। 17 नङ येसुस यादैसिउ प़ाइँना ज़ उसिसर उखँत फुलुप्‍सिद धो दोकेर। तोबो ऩेब्‍लोए फरी, ‘आव ओल ज़ सैं माःक ओताव’ लिद जाँ यायुँ ओमाहुप्‍ज़्‍याव। 18 नाःत ज़ येसुए, “नाम नमलाव हक भरी परमेस्‍वरए ङाकुइत ज़ याद नैनाव। 19 है जैद जे बाद प़ाइँ जातलाव मिँरालाई ङासिसर जैद ङाबाबु परमेस्‍वरए उमिननी, ङा ओज़ाए ङामिननी, छैंव पुरूसए उमिननी सछैंद, 20 ङा जेलाई किताव किताव ङापैचिउ, जे होरालाई मनी हितावनी ज़ यारापैच्‍यो। आव ब सैंच्‍यो, आव जुक ओमाखेमा पै ङा जेस ज़ ङातारिज़्‍या,” है यादोक्‍यो।