1 है जैद येसु ख्रीसए उमिनत लिज़्‍यावरालाई परमेस्‍वरनी काता सजा ज़ तान्‍या माले। 2 येसु ख्रीसनी साःरो जुनी याज़्याव छैंव पुरूसए ओसक्तीनी नो ङ़ादाङाव पाप दाद सिन्‍या सजाल झाःज़्‍याव गेय़ेननी ऱास्‍सिद गेले। 3 गे माचाव य़ेन दोज़्यावराए गेक्‍याँत परमेस्‍वरए ओय़ेन सयो·न्‍या काता सक्ती ज़ ओमाल्‍योए नो कानुनए सुलाई ज़ धर्मी माजैधुव। है जैद परमेस्‍वरए ओल ओज़ालाई गे स्‍यासो मिँ जैद, गेपापए उजूँनी परींद, गेक्‍याँताव पापए ओसक्ती भरी सम़ैद्यासिक्‍यो। 4 परमेस्‍वरए ओकानुनलाव पाँ भरी गे माचाव य़ेन मादाद छैंव पुरूसनी दाज़्यावराए गेक्‍याँनी ज़ ओयो·क लिद ननी ज़ दाद्यासिक्‍यो।

5 क्‍याँनिकाव माचाव य़ेन दोज़्यावर ते याक्‍याँए ओपैंज़्यावदा वाज़ यायुँ झाःज़्यार। छैंव पुरूसनी दोज़्यावर ते छैंव पुरूसए ओपैंज़्यावदा ज़ यायुँ झाःज़्यार। 6 माचाव य़ेन दोज़्याव क्‍याँए ल्‍योदा यायुँ झाःज़्‍यावर पापल सिज़्‍यार। छैंव पुरूसए ओल्‍योदा यायुँ झाःज़्‍यावर ते यायुँ होलाँ ताद साःरो जुनी दैज़्‍यार। 7 नो क्‍याँए ल्‍योदा झाःसिउ युँ ते परमेस्‍वरकिन तँदा ताद परमेस्‍वरलाई सोज़्‍याव। परमेस्‍वरए ओकानुन धूँल मालिधुइ। 8 है जैद क्‍याँए ओपैंज़्याव माचाव य़ेननी सुए ज़ परमेस्‍वरलाई खुसी माजैधुव।

9 खाली जेस ते परमेस्‍वरए उपुरूस जेयुँल बास ओदोवए माचाव य़ेन दोज़्याव क्‍याँए उधूँल माताद परमेस्‍वरए उपुरूसए उधूँल जेलिज़्‍या। जोस ख्रीसए उपुरूस माले, हो ख्रीससकाव माःक। 10 है जैद जेक्‍याँत ख्रीस उलिकिन, पाखाताव जेक्‍याँ पापए उहुनाए उसिदी ब, परमेस्‍वरस जेखैवए परमेस्‍वरए उपुरूसनी साःरो जुनी जेदैज़्‍या। 11 येसुलाई सिउनी सोचोइज़्‍यावए उपुरूस जेयुँल बास ओदोवए, येसु ख्रीसलाई सिउनी सोचोइज़्‍याव ओबाबुए जेलाई मनी तछा ओल उपुरूसनी ज़ जेक्‍याँलाई अजम्‍बरी जुनील सोचोइचिरिज़्याव।

12 है जैद ङानैं ङामेंर, गेक्‍याँए मादान्‍या उखिम्‍ज़्‍याव मितावनी दान्‍या गेलाई काता कर ज़ माले। 13 क्‍याँए उखिम्‍ज़्याव मितावनी माचाव य़ेनल ज़ जेलिकिन सिन्‍या जेले। छैंव पुरूसए ओसक्तीनी ते निताव क्‍याँनिकाव माचाव य़ेनरालाई जेरासम़ैकिन साःरो जुनी ज़ दैन्‍या जेले। 14 परमेस्‍वरए उपुरूसए ओरापैज़्‍याव मितावनी दोज़्‍यावर ज़ परमेस्‍वरए ओज़ार ताज़्‍यार। 15 परमेस्‍वरनिकाव जेदैव पुरूसए जेलाई छे·द ज़ लिन्‍या उधूँलाव बाँदा स्‍यासो माजैचिउ, बुरू ओल परमेस्‍वरस ज़ा बाबु ज़ तान्‍या जैचिज़्‍याव। ननी ज़ गे परमेस्‍वरलाई ‘अब्बा, बाबु’ है ब गेदोज़्‍या। 16 छैंव पुरूस गे गेपुरूस जोरैसिद ‘परमेस्‍वरए ओज़ार गेताके’ है लिन्‍या पाँत ओल ओसाची ब याद नो गेयुँलाव पाँलाई जोर्द्यासिज़्‍याव। 17 गे ओज़ार गेतावए ओबताहा दैन्‍यार ब गेताके — ओज़ा ख्रीसस सिप ज़ दैन्‍या गेले। है जैद ओल उमिनताव दुखर गेदैकिन ओलस ज़ सुख ब दैन्‍या गेले।

18 आव गेजिउताव गेदैज़्‍याव दुखर अजम्‍बरी जुनील गेदैरिज़्‍याव सुखकिन काता ज़ माले लिद ङायुँ हुप्‍द ले। 19 परमेस्‍वरए ओरासिर्जैव भरिए ब ‘परमेस्‍वरए ओज़ारालाई खर्क सतैंद अजम्‍बरी जुनी यायोके?’ लिद यायुँ थू जैव ज़ नैज़्‍यार। 20 नो ओरासिर्जैव भरी ते खेम्‍न्‍यादा म़ान्‍यादा बान्‍या ताकेर।8:20 उत ३:१७-१९ नो यानी माःक, ओल परमेस्‍वरए ज़ नै याजैक्‍यो। खाली नोरालाई मनी तोबो आस लिज़्‍या — 21 परमेस्‍वरए ओज़ारालाई फुर्सुल जैद ओज़गै मगै ओराएरिज़्‍याव मिताव ज़ नो ओरासिर्जैव भरी तछा खेम्‍न्‍या म़ान्‍यानी बाँचिद साःरोल पुलुस्‍न्‍या लेर। 22 किताव ज़ा दैन्‍या मेंमा उघर्लिज़्याव, हिताव ज़ नो ओरासिर्जैव भरिए नो भरी ओमातावा पै ‘आव जुकलाव दुखर खर्क खेम्‍के?’ लिद उथुपुल ताद गहनिउ ज़ लिज़्‍यार। 23 खाली नोर वाज़ माःक, गे उपुरूस बैना दैवराए मनी ‘आव सिन्‍यानी खर्क पुलुस्‍द ओज़ार गेमिन्‍सिके?’ लिद गेयुँ थू जैद कींव ज़ गेनैज़्‍या। 24 निताव आसए जूँनी ज़ परमेस्‍वरए ओपाँत गेहुके। हुन्‍या पाँत वाज़ आस ताज़्‍या, ताधुवलाई आस गेमादोदी ब ताए। 25 खाली गेआस आःपै माहुताव पाँत ओतावए, नो पाँ ओमाहुवा पै गेयुँ थू जैद कींव ज़ गेनैज़्‍या।

26 हिताव ज़ गेनी गेमादोधुज़्‍याव य़ेनल छैंव पुरूसए गेलाई सघैसिज़्‍याव। परमेस्‍वरलाई पोंखारिन्‍या मनी गेनी ज़ गेमासैंए। ओल छैंव पुरूसए ज़ गे सुए ज़ गेमाहाइधुज़्‍याव पाँर गेयुँल पाँद्यासिज़्‍याव। 27 प़ाइँ युँलाव पाँ सैंज़्‍याव परमेस्‍वरए नो छैंव पुरूसए गेयुँलाव ओपाँव पाँए ओअर्थ भरी तीज़्‍याव। काराव ल्‍यो ताकिन गे परमेस्‍वरए उमिनत लिज़्‍यावराए गेजूँनी नो पुरूसए पाँद ओयासिज़्‍याव पाँ भरी ओल परमेस्‍वरए उयुँलाव पाँस खैव लिज़्‍या।

28 आव पाँत गेयुँ हुप्‍ज़्‍या — परमेस्‍वरए उमिनताव खुल्‍सिउर, ओल्‍योदा यायुँ थू जैद नैज़्‍यावरालाई ओल परमेस्‍वरए ज़ प़ाइँ यालाई तान्‍या ज़ सखैद याएज़्‍याव। 29 परमेस्‍वरए ङ़ादाकिन ज़ ‘ङामींर ज़ तारिज़्‍यार’ लिद सरेस्‍द ओरानैज़्‍यावरालाई, नोराए याक्‍याँत तोबोका तोबो ओज़ाए ओगे रैन्‍यार याथ·रैक्‍यो। है जैद ओज़ा ख्रीस छींनी ताज़्‍याव भरिराए यादाज्‍यु ताके। 30 नो ङ़ादाकिन ओराथ·रैवरालाई ओल्‍योदा हुन्‍या ब याखुल्‍क्‍यो। ओल्‍योदा हुन्‍या ओराखुलोरालाई ओलस खैवर ब याजैक्‍यो। ओलस खैव ओराजैवरालाई याज़गै ल्‍योर ब याजैक्‍यो।

31 आव पाँ भरिल गे कै लिन्‍या लिक ते — परमेस्‍वर गेल्‍योदा ओतावए गेलाई सुए ज़ कैज़ माजैसिधुर। 32 तोबोका तोबो ओज़ा ओलस मानैद, सिन्‍या गेपोल झाःद्याज़्‍याव परमेस्‍वरए, गेलाई ओज़ास ज़ चाहिज़्‍याव भरी कै जैद मायासिउके? 33 ओल परमेस्‍वरए ज़ छाँतिद ओराथ·रैवरालाई सुए ज़ खत मारालैधुर। परमेस्‍वरए ओल ज़ उयुँलाव मितावर ओराथ·रैवए, 34 नोरालाई सजा यान्‍या सुए ची ओराथ·रैधुरिज़्‍याव? येसु ख्रीसए गेपापए जूँनी उजिउ झाःद्यासिक्‍यो। हो वाज़ माःक, सिउनी सोद, परमेस्‍वरए ओवोर्दा च़ुसिद गेजूँनी परमेस्‍वरलाई बिन्‍ती दाव ज़ नैज़्‍याव। 35 है जैद गेलाई ख्रीसए ओमयानी सुए ओपले·सिधुरिज़्‍याव? गेलाई दुख उहुदी ब, धो सहिन्‍या उहुदी ब, गेखिरी यापसिदी ब, करे गेतादी ब, नाङग्‍या गेतादी ब, ऩुल उहुदी ब, लरैं उहुदी ब, गेलाई ओमयानी काताए ब मापले·सिधुव। 36 धर्मसास्‍त्रल इताव सर्सिउ लिज़्‍या,