9
पावलए उयुँ ओभेराराए जूँनी ओघरो
1 ङा जेलाई साचो है ङादाचिज़्या, धुत ङामापाँए, ख्रीस साची लिज़्या। आव पाँत छैंव पुरूसनी ब ङायुँ छैंव ज़ लिज़्या। ङापाँ आव ज़ — 2-3 ङाभेराराए जूँनी ङायुँ बनै घरो ज़ लिज़्या। ङा नोराए यापोल ख्रीसए ल्योनी ख्यासिद ओसराप धूँल ङापरिदी ब, नोर याबाँचिकिन खुसी ङाताखेहो। 4 नो इस्राएलीरालाई ङ़ादाकिन ज़ ओल परमेस्वरए, ओज़ार जैन्या थ·रैद, ओज़गैर सतैंद्याद, ओबाचा स़ोनो ओय़ाकार ब याएक्यो। ओकानुन ब याद, ओसेवार दान्या यापैक्यो।9:4 प्रस ९:४ 5 अब्राहाम, इसहाक, याकूबर मनी नोराए यापुर्खार ज़। नोराए याथोल फरी ख्रीस ब मिँ मिन्सिद जर्मिके। नो प़ाइँराए ङ़ैत राज्या दान्या परमेस्वर ज़। नोए उमिन एकतार ज़ ओघ्योःक। आमेन।
इस्राएलीर प़ाइँ परमेस्वरए उमींर मालेर
6 परमेस्वरए नोरालाई ओय़ाका सयो·द ओमाराएज़्याव ते माःक। खाली इस्राएली भरी प़ाइँ याकूबए ओथोर यातादी ब परमेस्वरनी ते प़ाइँ मालेर। 7 हो मिताव ज़ अब्राहामए ओज़ार मनी प़ाइँ ओथोल ते मागनिसिर। धर्मसास्त्रल मनी परमेस्वरए अब्राहामलाई है दाद नैव,
“इसहाकनिकावर वाज़ नथोल गनिसिन्या लेर।”9:7 उत २१:१२
8 ननी ज़ रैंःज़्या, अब्राहामए ओक्याँ बातनिकावर माःक, परमेस्वरए अब्राहामलाई ओयो य़ाकानिकावर वाज़ परमेस्वरए ओज़ार ताज़्यार। 9 नो ओयो य़ाका आव ज़,
“ङा फर्नी आः बेलाक फरी ङाहुरिज़्या।
हो बेलाक नज्या साराए खेपा ज़ा दैरिज़्याव।”9:9 उत १८:१०
10 खाली हो वाज़ माःक, गेपुर्खा इसहाकए ओज्या रिबेकाए पाला, जोङोल्या खेपानी निदैक्यो। 11 नोनी चाव ब मादाद माचाव ब मादाद, निआमाए उफूल ज़ परमेस्वरए मिँरालाई ओराथ·रैज़्याव मिताव, 12 निय़ेननी माःक, ओल उयुँ स्यानी ज़ नोनी तोबोलाई रूजिद, रिबेकालाई, “ओदाज्युए ओभाइए ओसेवा दान्या ले,”9:12 उत २५:२३ है दोक्यो। 13 परमेस्वरए है उलिज़्याव मिताव धर्मसास्त्रल आव मनी सर्सिउ लिज़्या, “याकूबए ल्योदा ङायुँ लिज़्या, एसावए ल्योदा ङायुँ माले।”*9:13 छुत बुझिन्या — एसावलाई माःक, याकूबलाई ङारूजिके।9:13 मला १:२-३
परमेस्वरए उयुँ स्यानी ज़ याछाँतिज़्याव
14 जे ख्वा ख्वाराए, ‘निताव ताकिन ते परमेस्वरए न्यायस ज़ ओमादोज़्याव ची ओल्यो’ है ब जेलिज़्याखेहो। हिताव ते माःक। 15 परमेस्वरए मोसालाई है दोक्यो,
“जोए ल्योदा ङायुँ नान्या ङापैंज़्या, होए ल्योदा ङायुँ नाज़्या।
जोए ल्योदा ङायुँ सय़ालो ङापैंज़्या, होए ल्योदा ङायुँ य़ाल्ज़्या।”9:15 प्रस ३३:१९
16 परमेस्वरए मिँराए ल्योदा उयुँ ओय़ाल्ज़्याव याय़ेननी ब माःक, या यापैंज़्यावनी ब माःक, ओल परमेस्वरए उयुँ स्यानी वाज़ ताज़्या। 17 धर्मसास्त्रल परमेस्वरए राजा फारोलाई मनी है दोक्यो,
“नँ नक्याँत ङासक्ती सतैंन्याए जूँनी
नँलाई राजा जैद ङानैनिए।
ननी ज़ ङामिन संसार भरिल प़ाइँदा ज़ थास्न्या ले।”9:17 प्रस ९:१६
18 है जैद जोए ल्योदा परमेस्वरए उयुँ नान्या पैंज़्याव, होए ल्योदा उयुँ नाज़्या। फरी जोलाई परमेस्वरए खाव जैन्या पैंज़्याव, होलाई खाव ज़ जैज़्याव।
कुमाल्या स़ोनो गमए जा
19 जे ख्वाराए है जेलिज़्याखेहो, ‘ओल ज़ नै ओराजैव ताकिन ते कै जैद यागल्ती थ·रैद ओराएज़्याव? परमेस्वरए मिँरालाई गोइँद ओराएज़्यावकिन सुए ची तँदा ओलाँधुरिज़्याव?’ 20 ङा ते झन है ङादाचिज़्या, ए निताव पाँज़्याव मिँ, नँ कै जैद परमेस्वरस याः नदोज़्याव? गम जाए ब ओक्याँ जैज़्यावलाई, ‘ङालाई काराव अइ नजैनाव?’ है मादोव।9:20 यसै २९:१६; ४५:९ 21 नो गम जा जैज़्याव कुमाल्याए जो मिताव ओजैदी ब ओल ओमाहाँ ज़ लिज़्या। ख्वारालाई बनै घेप्पा, याएः ल्योर याजैज़्याव, ख्वारालाई अइज़ तके दँकावर याजैज़्याव। 22 परमेस्वरए ओय़ेन ब हिताव ज़। उरिस चोवराए याक्याँत उरिसलाव सक्ती सतैंन्या ब ओल ओमाहाँ ज़ लिज़्या। हैदी मनी नोर नास दैन्याकावर यालिदी ब नोराए याक्याँत उरिस थामिउ ज़ नैज़्याव। 23 है जैद निताव उरिस चोवरालाई मनी हैज़ ओराजैकिन, उयुँ नावरालाई झन कै जैद ओदया सतैंद मारायोके? नोरालाई ते ङ़ादाकिन ज़ ओज़गै दैन्यार ब जैद ओरानैज़्याव। 24 गे ओछाँतिसिउर ब उयुँ नावर ज़ गेलिज़्या — यहूदीर वाज़ माःक, जे छुत जातलावर ब जेलिज़्या। 25 अगमबक्ता होसेए मनी परमेस्वरए ओपाँ अइ लिद सर्द नैव,
“ङामींर मातावर ङामींर ज़ ङाराजैरिज़्या।
ङामन मालागिउरालाई ङामन लागिउर ङाराजैरिज़्या।”9:25 होसे २:२३
26 स़ोनो,
“ ‘जे ङामींर माःक’ है ओरादोव पोल
झन नल ज़ ‘जींदो परमेस्वरए ओज़ार ज़’ है दान्या लेर।”9:26 होसे १:१०
27 यसैयाए मनी इस्राएलीराए जूँनी अइ लिद सर्द नैव,
“इस्राएलीर समुन्द्रलाव बालुवा स्यासो मागनिसिधुन्यार यालिदी ब,
छ्या वाज़ परमेस्वरए ओङ़ाक थ॰रिन्या लेर।
28 परमेस्वरए आव मानुवात ओपाँ चाँदो ज़ छत्कैद सयो·रिज़्याव।”9:27-28 यसै १०:२२-२३
29 फरी तोथोल यसैयाए किताव ओसरो, हिताव ज़ तान्या ले —
“गेथोर माहान परमेस्वरए तोबो ऩेब्लो बाँचैद ओमायासिउ ताकिन,
सदोम स़ोनो गमोरालाव स्यासोर तान्या गेल्यो।”9:29 यसै १:९
इस्राएलीराए परमेस्वरस खैन्या येम यामादैव
30 ङा है ङालिज़्यावए ओअर्थ आव ज़ — यहूदीकिन छुत जातलाव मिँराए परमेस्वरए ल्योदा बान्या येम यामाखिम्दी ब, परमेस्वरए ल्योदा यायुँ यासुहुबोनी झन, नो येम ज़ दैकेर। 31 यहूदीराए ते परमेस्वरए ल्योदा बान्या येम ङ़ादाकिन ज़ कानुन भैंःद दान्यानी याखिम्दी ब मादैकेर। 32 काराव यामादैव? काराव ल्यो ताकिन नोराए युँ हुप्न्यानी यामाखिम्ज़्याव, कानुनलाव य़ेननी वाज़ याखिम्ज़्याव। है जैद नोर धर्मसास्त्रलाव सर्सिउ ‘सुत़ुम्न्या लुँत’ पर्दप्द यापाव मिताव ज़ ताके। 33 नलाव सर्सिउ आव ज़,
“ङा सियोनलाव ङाराज्याल मिँराए यायुँ केःद्यान्या सुत़ुम्न्या लुँ थाँद ङानै।
नो लुँत यायुँ हुप्ज़्यावर लाज मोर्नो तान्या मालेर।”9:33 यसै २८:१६
9:4 9:4 प्रस ९:४
9:7 9:7 उत २१:१२
9:9 9:9 उत १८:१०
9:12 9:12 उत २५:२३
*9:13 9:13 छुत बुझिन्या — एसावलाई माःक, याकूबलाई ङारूजिके।
9:13 9:13 मला १:२-३
9:15 9:15 प्रस ३३:१९
9:17 9:17 प्रस ९:१६
9:20 9:20 यसै २९:१६; ४५:९
9:25 9:25 होसे २:२३
9:26 9:26 होसे १:१०
9:28 9:27-28 यसै १०:२२-२३
9:29 9:29 यसै १:९
9:33 9:33 यसै २८:१६