9
Ya Tyumanem aw ya manga Judiyu
1 Na, awun paglongun ku kamayu aw tengteng yeiy matinaw kay nyakasambuk da aku kan Kristu aw beke' yeiy na galu'. Aw ya Ispiritu Santo, yan ya migmatinaw sa kanak anenganeng. 2 Migkalat to-o ya kanak ginawa kay gayed ku pig-anenganeng ya manga kadégan ku na manga Judiyu na wala' pangintu-u. 3 Kun mabatug pa galu na aku ya pa-emel-emelen na Tyumanem kalyu kanilan aw ka-eletan adti kan Kristu, yan saba ya imo-un ku pada makaluwa' silan. 4 Silan saba ya manga buwadbuwad ni Isra-él na pigpamalli' na Tyumanem na ma-imo' kanan mangayse'. Aw adti kanilan pigpakita' nan ya kanan kadyawan. Aw pig-imo' nan kanilan ya manga pakang na dayaw mig-iganget. Aw silan ya pig-atagan nan sa Uldin. Aw silan ya pigpalna-uwan nan kun unun nilan ya pagsimba kanan. Aw silan ya pigpakangan na Tyumanem sa madég na grasya. 5 Silan ya manga buwadbuwad ni Abraham, aw ni Isaak, aw ni Jakub na pigpamalli' na Tyumanem asini muna. Aw dun ni kanilan buwadbuwad ka͡utaw si Kristu na yan ya Tyumanem na migdumala sa kadég. Aw yan saba ya umba' deyen na wala' ya tyamanan. Amén.
6 Na, pangkay wala' pangintu-uwi na eped na manga Judiyu si Kristu, manang pigtuman saba na Tyumanem ya manga pigpakang nan adti manga buwadbuwad ni Isra-él. Kay dili' ya kadég na manga buwadbuwad ni Isra-él tengteng utaw na Tyumanem. 7 Aw maynan uman, pangkay awūn manga utaw na buwadbuwad ni Abraham, manang beke' na kadég nilan tengteng buwadbuwad nan. Kay pigpasulat na Tyumanem asini muna, law nan, “Magi kan Isa-ak ma-imo' kaw tyugbulan sa manga buwadbuwad na pigpakang da ku kanmu.” *9:7 Mabasa adti Génésis 21:12. 8 Aw ini ya kakawasan: Dili' ya kadég na ise' ni Abraham tengteng ise' na Tyumanem, manang idtu olo' na pigpakang na Tyumanem kanan. 9 Kay yan ya pigpakang na Tyumanem kanan, “Lumiku' aku adi tampid mayu salut na umay kasiling na maynini na bulan. Aw sa dili' pa aku lumiku' adi, ka͡utawan da si Sara sa ise' nan na eseg.” *9:9 Mabasa adti Génésis 18:10. 10 Aw beke' na yan da olo', manang nya-imo' yeiy uman adti duwa ya ise ni Ribéka aw ni Isa-ak na kanaten tyugbulan. 11-12 Sa wala' pa ka͡utawi si Ribéka sa ise' nan na pingin, miglong ya Tyumanem kanan, “Ya ise' mu na magulang, dumala͡an na mangud nan.” *9:11-12 Mabasa adti Génésis 25:23. Aw dun da na Tyumanem pa-ede-an ya palpa nan pangkay wala' pa silan ka͡utaw. Yanagaw, pigpamalli' nan ya sambuk, beke' na asuntu sa pag-imo' nilan sa madyaw aw malatay, manang asuntu na yan ya pagbaya' na Tyumanem. 13 Aw pigpasulat na Tyumanem asini muna, law nan, “Si Jakub, yan ya pigginawa͡an ku, manang si Isaw, pigkele͡an ku.”*9:13 Mabasa adti Malakiyas 1:2-3.
14 Na, kun maynan, makapaglong ka' kita na dili' matinaw ya pagbaya' na Tyumanem? Dili' saba!
15 Kay miglong ya Tyumanem kan Moysis,
“Kallatan ku ya pangkay singalan ya kaliman ku kallatan.
Aw pakadyawun ku ya pangkay singalan ya kaliman ku pakadyawun.” *9:15 Mabasa adti Éxudo 33:19.
16 Yanagaw ya pagkallat na Tyumanem, beke' na asuntu sa pag-imo' nilan sa madyaw aw beke' uman na asuntu sa kanilan pagkaliman. Manang yan olo' ya du-an, kay kyallatan nan silan. 17 Kay awun pigpasulat na Tyumanem asini muna na piglong nan sa para-un na hari' sa nasud na Ihiptu, “Ini ya du-an na pig-atag ku kanmu ya katundanan asini banwa na Ihiptu, pada magi dun ni kanmu kita-en ya kanak katulus aw ma-imo' dengganen ya ngalan ku adti kadég na banwa asini tas na lupa'.” *9:17 Mabasa adti Éxudo 9:16. 18 Yanagaw, ya kallat na Tyumanem pigpakita' nan adti pangkay singalan ya kaliman nan kallatan, aw pigpakategel nan ya pangkay singalan ya kaliman nan pakategelen.
19 Na, pagaw musip kamu kanak, “Ananga' pa nan pasala-en ya manga utaw? Singalan ka' ya makatagen sa pagbaya' na Tyumanem?” 20 Manang singalan kaw na magpa-ayil sa maynan adti Tyumanem? Utaw kaw saba olo' na pig-imo' nan! Kasiling kitadun na kulun. Aw dili' makapaglong ya kulun adti mag-imo-ay kanan, “Ananga' aku mu imo-un na maynini?” 21 Ya mag-imo-ay sa kulun, yan ya magbaya' kun unu ya imo-un nan adti libukuk na lupa'. Kun kaliman nan imo-un duwa, ya sambuk imo-un nan madyaw na seledanan aw ya sambuk dili' to-o madyaw na seledanan, mabatug nan saba kay yan ya magbaya'. 22 Aw yeiy saba ya pig-imo' na Tyumanem. Kun kaliman nan pa-emel-emelen ya kadég na nyakasala' aw pa-ede' ya kanan katulus, yeiy ya kanan pagbaya'. Manang pigtagenan pa nan ya kanan kadaman adti manga utaw na umba' pa-emel-emelen 23 pada kita-en ya kadakula' na kadyawan na pig-atag nan adti manga utaw na pigkallatan nan aw silan ya pigtagilanan sa matas na dengeg dun ni allaw na dumadateng pa. 24 Aw maynan ya kadég tadun na pigtawag nan na ma-imo' kanan manga utaw, beke' olo' na lekat adti manga Judiyu, manang lekat uman adti manga Héntil. 25 Kay pigpasulat na Tyumanem magi sa kanan propita na si Osiyas asini muna, law nan:
“Ya beke' na kanak manga utaw,
tawagen da ku silan adun na ‘Kanak manga utaw’.
Aw ya wala' ku ginawayi asini muna,
ginawa͡an da ku silan adun. *9:25 Mabasa adti Osiyas 2:23.
26 “Aw adti manga banwa na piglongan ku ya manga utaw na ‘Kamu beke' na kanak manga utaw’,
tawagen da silan adun na ‘Mangayse' na Tyumanem na lyekatan sa ginawa.’ ” *9:26 Mabasa adti Osiyas 1:10.
27 Aw pigpasulat nan uman magi sa propita na si Isayas asini muna, law nan, “Pangkay ya kadég na buwadbuwad ni Isra-él kasiling na pantad dun ni baklayan na dagat, manang tabay olo' kanilan ya paluwa-en na Tyumanem. 28 Kay awun allaw na pigtagilan nan na pa-emel-emelen ya manga utaw, aw maksay nan saba yeiy imo-un.” *9:28 Mabasa adti Isayas 10:23.
29 Aw awun pa uman pigsulat ni Isayas, law nan:
“Ya Tyumanem na migdumala sa kadég,
kun wala' pa kitadun nan atagi na buwadbuwad, wala' da galu ya nyasama' kanaten.
Masiling kitadun galu na manga utaw dun ni manga syudad na Sodoma aw Gomora na pig-apnas nan.” *9:29 Mabasa adti Isayas 1:9.
Ya pagpalipaslipas na manga utaw na Isra-él kan Kristu
30 Yanagaw, naten anenganengen ya manga utaw na Héntil. Wala' silan pagtibagseg na lanasen ya kanilan manga sala'. Manang silan baling ya pigdawat na Tyumanem kasiling na wala' ya sala' asuntu sa kanilan pagpangintu-u kan Kristu. 31 Manang ya manga utaw na Isra-él na migtibagseg dyumalug sa Uldin pada dawaten galu silan na Tyumanem, wala' nilan kabatug tumana ya kadég na sugu' na awun ni Uldin. 32 Aw ananga' wala' nilan kabatug tumana? Kay ya kanilan pigsaligan, yan ya imo-unun nilan na madyaw aw beke' na pagpangintu-u kan Jisus. Pigsungkul silan dun ni batu na pagkasungkulan. *9:32 Si Jisus, yan ya palangad batu na magpakasungkul sa manga utaw. 33 Aw kasiling na pigpasulat na Tyumanem, law nan:
“Pakanyegi mayu! Awūn batu na pigbetang ku dun ni Ziyon. *9:33a Ya Ziyon, yan ya ngalan na kampo adti seled na syudad na Jérusalim na palaguyanan na manga utaw asini muna, aw yan ya dadan na ngalan na syudad na Jérusalim.
Aw ya batu yeiy, magpakasungkul sa manga utaw aw magpakatuwad kanilan.
Manang ya kadég na nyangintu-u kanan, dili' silan kabullugan.”*9:33b Mabasa adti Isayas 8:14 aw 28:16.
*9:7 9:7 Mabasa adti Génésis 21:12.
*9:9 9:9 Mabasa adti Génésis 18:10.
*9:11-12 9:11-12 Mabasa adti Génésis 25:23.
*9:13 9:13 Mabasa adti Malakiyas 1:2-3.
*9:15 9:15 Mabasa adti Éxudo 33:19.
*9:17 9:17 Mabasa adti Éxudo 9:16.
*9:25 9:25 Mabasa adti Osiyas 2:23.
*9:26 9:26 Mabasa adti Osiyas 1:10.
*9:28 9:28 Mabasa adti Isayas 10:23.
*9:29 9:29 Mabasa adti Isayas 1:9.
*9:32 9:32 Si Jisus, yan ya palangad batu na magpakasungkul sa manga utaw.
*9:33 9:33a Ya Ziyon, yan ya ngalan na kampo adti seled na syudad na Jérusalim na palaguyanan na manga utaw asini muna, aw yan ya dadan na ngalan na syudad na Jérusalim.
*9:33 9:33b Mabasa adti Isayas 8:14 aw 28:16.