Tagakaulo New Testament Roma 10

1 Kay manga inulug ku na nyangintu-u la, ya tengteng na kaliman ku aw ya gayed ku pyanawagtawagan adti Tyumanem na paluwa-en galu ya manga kadégan ku na Isra-él adti manga sala' nilan. 2 Makamatinaw aku na nyatibulluk silan dyumalug sa Tyumanem, manang wala' nilan kalabeti ya imo-unun na tengteng makatutuk sa Tyumanem. 3 Asuntu na migtibagseg silan mig-imo' sa pa-agi na dawaten silan galu na Tyumanem, yanagaw wala' nilan daluga ya pa-agi na Tyumanem kun unun nan ya pagdawat kanilan kasiling na wala' da ya sala'. 4 Manang si Kristu yan ya miglingeb sa kadakula' na tud dun ni Uldin kay magi kanan dawaten na Tyumanem ya pangkay singalan na mangintu-u kanan.

Ya kadég na utaw mabatug da paluwa-en

5 Na, kya-ede-an da tadun ya piglong ni Moysis asini muna kun unu ya pa-agi na dawaten na Tyumanem ya utaw. Aw yeiy ya pagtuman sa kadakula' na Uldin. Pigsulat ni Moysis:

“Ya utaw na makatuman sa kadég na manga sugu' dun ni Uldin,

yan ya utaw na makatagtun sa ginawa na wala' ya katigkasan.” *

6 Manang ya manga utaw na pigdawat na Tyumanem kasiling na wala' da ya sala' magi sa pagpangintu-u nilan, dili' silan maka-usip sa maynini: “Singalan ya un manik adti tas na langit?” (Ya kakawasan: un mangay kan Kristu aw papanugun asini tas na lupa'.)

7 Aw “Singalan uman ya un manog adti banwa na Kaludukan?” (Ya kakawasan: un angayen si Kristu lekat adti manga nyangkamatay.) 8 Manang awun pigpasulat asini muna:

“Ya tingeg na Tyumanem malapit dun ni kanmu,

aw awun da ni anenganeng mu aw molas da mu paglongun.” *

Aw ya tingeg na Tyumanem yeiy, gayed nami pigpa-ede' adti madég na utaw pada mangintu-u silan kan Kristu. 9 Kay kun ubat-ubat mu adti eped na utaw na si Jisus ya Pangulu aw kun mangintu-u kaw na pigmataw sakanan na Tyumanem lekat adti pagkamatay, na, makaluwa' kaw saba. 10 Kay dawaten saba na Tyumanem ya utaw kasiling na wala' da ya sala' kun mangintu-u sakanan dun ni kadakula' na anenganeng nan. Aw kun ubat-ubat nan ya kanan pagpangintu-u, paluwa-en sakanan na Tyumanem. 11 Kay pigpasulat na Tyumanem asini muna: “Ya kadég na nyangintu-u kanan, dili' silan kabullugan.” *

12 Yanagaw, adti anenganeng na Tyumanem mig-unawa la ya manga Judiyu aw ya manga Héntil. Kay ya Tyumanem yan ya Pangulu sa kadég, aw yan ya matag sa grasya adti kadég na mangintu-u kanan. 13 Kay pigpasulat na Tyumanem asini muna: “Pangkay singalan ya magtawag adti Tyumanem, paluwa-en nan saba.” *

14 Manang unun nilan ya pagtawag kanan kun wala' pa silan pangintu-u? Aw unun nilan uman ya pagpangintu-u kanan kun wala' pa nilan dengega ya Madyaw na Ubat-ubat kan Kristu? Aw unun nilan ya pagpakadengeg sa Madyaw na Ubat-ubat kun wala' ya mag-ubat-ubatay dun ni kanilan? 15 Aw unun nilan ya pagpanaw na un mag-ubat-ubat kun wala' ya migpadala kanilan? Kasiling na pigpasulat na Tyumanem: “To-o madyaw kun awun utaw na dumateng na un magpa-ede' sa madyaw na ubat-ubat.” *

16 Manang tabay olo' ya dyumalug sa Madyaw na Ubat-ubat. Kasiling na piglong ni Isayas asini muna, law nan, “Kay Tyumanem, singalan ya nyangintu-u sa pig-ubat-ubat nami?”*

17 Pangkay maynan ya nya-imo', manang adun, makapaglong kita na mabatug da saba na manga utaw ya pagpangintu-u kun dengegen nilan ya Madyaw na Ubat-ubat kan Kristu. Aw dengegen nilan yeiy kun awun utaw na magpa-ede' kanilan.

18 Pagaw awūn utaw na musip, law nan, “Unu ka', wala' pa dengega na manga utaw na Isra-él ya Madyaw na Ubat-ubat kan Kristu?”

Ya tubag ku kanan, “Dyengeg da saba nilan! Kasiling na pigpasulat na Tyumanem kan Dabid:

“Ya piglong nilan, nyabekkal da saba adti kadakula' na banwa

aw dyengeg da na kadég na utaw asini tas na lupa'.*

19 Pagaw awūn pa uman utaw na maglong, “Basi wala' na manga utaw na Isra-él kalabeti ya kakawasan na Madyaw na Ubat-ubat kan Kristu.”

Ya tubag ku kanan, “Kyalabetan da saba nilan. Pangkay dun ni manga allaw ni Moysis, miglong ya Tyumanem kanilan:

‘Pakadawayen ku kamu sa eped na manga utaw na wala' pa pakasambuk kanak.

Aw pakadamanen ku kamu asuntu na pakadyawun ku ya manga utaw na wala' pa paka-ede' kanak.’ ” *

20 Aw wala' ni Isayas tagu-tagu-a ya piglong na Tyumanem adti manga utaw:

“Kyinita' aku na manga utaw na Héntil,

pangkay wala' silan paninaw kanaken.

Aw migpakilala aku kanilan,

pangkay wala' silan usip kun singalan aku.” *

21 Manang maynini ya pagkasampet na Tyumanem sa manga utaw na Isra-él:

“Gayed aku tyumagad kanilan na lumiku' adi kanaken,

manang wala' ya kalim nilan dumalug sa manga sugu' ku,

aw kenne' na pangkategelan na anenganeng nilan.”*

Roma
<
10
>

*10:5 10:5 Mabasa adti Libitiko 18:5.

*10:8 10:8 Mabasa adti Déutéronomiyo 30:14.

*10:11 10:11 Mabasa adti Isayas 28:16.

*10:13 10:13 Mabasa adti Joél 2:32.

*10:15 10:15 Mabasa adti Isayas 52:7.

*10:16 10:16 Mabasa adti Isayas 53:1.

*10:18 10:18 Mabasa adti Salmo 19:4.

*10:19 10:19 Mabasa adti Déutéronomiyo 32:21.

*10:20 10:20 Mabasa adti Isayas 65:1.

*10:21 10:21 Mabasa adti Isayas 65:2.