1 Juku jara jahec â moc eha Wofuŋte dâŋzi Eliarao ʒiŋuc fuawec: “Go rarâ Ahaba fuacnezemec. Eme mupe mâreŋko hoe mocwâc heocmu.” 2 Iŋuc mume Elia e Ahaba fuacneocte rawec. Samaria mâreŋko ine roroc qaŋqaŋ jâmbâŋ fuarâ fowec. 3 Irec Ahaba e ficticnere micne Obadia hefârewec. Obadia e Wofuŋ araŋ boc bacnehuc juwec. 4 Irec Isebezi Wofuŋte porofetefâc qâhâmoc‐jopame Obadia e porofete 100 rocjoparâ bâfâuc‐jopame 50 guru jajahec epie qânâ hawecko soŋjoparâ nânâ opâ gumec‐jopahuc juwec. 5 Eme Ahabazi Obadia ʒiŋuc âzâcnewec: “Nâhâc mâreŋ sasawa opâ ʒâŋe â opâwâc forakac i âte‐fârezeperec. Ehuc kecɋaŋ wiac moc bâfuanacmuo ine becâsic â doŋgifâc‐nâhec jaŋe sipirickenʒipiŋte bafic‐jopazeperec.” 6 Iŋuc murâ mâreŋ âtenicte bâfâuckepic, ehuc Ahaba e ŋifec raha Obadiazi ŋifec rawec.

7 Eme Obadia e hatao rahame Eliazi bâfuawec. Bâfuame Obadiazi hone tarahuc ʒâŋe maine mâreŋko hetutuckerâ muwec, “Bomboŋ‐nane Elia, i go gahac me?” 8 Wiocneme muwec, “I no nahac hâcne. Irec go rarâ bomboŋge ʒiŋuc âzâcnec: ‘Manakic, Elia e fisijec.’ ” 9 Iŋuc mume Obadiazi muwec, “Kiŋaŋ qaqage no wemo hehesic bâfuapo irec Ahabazi nuocte ere meo râecnukomec? 10 Wofuŋ Anutuge e jujâmbâŋkekac, irec bomboŋ‐nanezi go basacguniŋte ŋicguru me uucmaŋ ira me ira kiŋaŋ sorec‐jopawec. Sorec‐jopame jaŋe wio‐jarepie mumbiŋ, ‘E ʒira mi jukac.’ Iŋuc mupie ine ŋicwofuŋzi uucmaŋ me ŋicguru i jaŋe ejareme mi bâfuacgumbiŋ i mupaŋkembiŋ. 11 Eme go ine nore mukomec, ‘Go rarâ bomboŋge ʒiŋuc âzâcnec: “Elia e fisijec.” ’ 12 Eme no rahape izia Wofuŋte Mârozi ira me ira wiac moc bacgu raocmu. Ehame no rarâ Ahaba âzâcnepe ware basacgu‐bipierâ no nuocmu. No ine ɋie‐naneonecteaŋ Wofuŋ araŋ bacne warehuc juekopac. 13 Erâ Isebezi Wofuŋte porofetefâc qâhâmoc‐jopame noni ŋic 100 rocjoparâ bâfâuc‐jopape 50 guru jajahec epie soŋjoparâ nânâ opâ gumec‐jopahuc jupo i bomboŋ‐nane go mi manameŋ me? 14 Ehuc mukomec, ‘Go rarâ bomboŋge ʒiŋuc âzâcnec: “Elia e fisijec.” ’ Iŋuc âzâcnepe e nuocmu!” 15 Iŋuc mume Eliazi muwec, “No kiŋaŋ qacnehuc juekopac Anutu Tâpiri Ɋuŋɋasaŋ Wofuŋ e jujâmbâŋkekacte miŋecgac no nahac jâmbâŋ Ahaba fuacnepemu.” 16 Iŋuc mume Obadiazi ra Ahaba bâfuarâ âzâcnewec. Âzâcneme Ahabazi Elia bâfuaocte rawec.

17 Rarâ bâfuarâ ʒiŋuc muhuc âzâcnewec: “Israe ŋic maŋ bâsifuc ejareekic go hâcne me?” 18 Iŋuc mume dâŋ ʒiŋuc bâtikiecnewec: “No Israe ŋic maŋ bâsifuc mi ejareekopac. Go â kikefuŋfâcge ŋoŋe hâcne Wofuŋte sâcmutâc dâŋ qâsuahuc Baali nemu kiŋaŋ qajarehuc Israe ŋic maŋ bâsifuc ejareeŋgopieŋ. 19 Irec go dâŋ râetec rame Israe ŋic sasawa jaŋe Karamele tikio tumaŋnenʒepieŋ. Erâ Baali nemure porofetefâc 460 jaŋe mecne â Asera nemure porofetefâc 400, Isebere teboo nânâ nâeŋgopieŋ jaŋe mâmâc fisinʒepieŋ.”

20 Iŋuc âzâcneme Ahabazi Israe ŋic sasawa jaŋerao dâŋ râeme rawec. Ehuc Karamele tikio porofete hetumaŋ‐jopawec. 21 Eme Elia e ŋic ŋokac sasawa maŋfuŋ‐jeŋicko rarâ jaza muwec, “Ŋoŋe ra qohota ware qohota eku wezimucko beheniŋmu? Wofuŋ e Anutu fârine jukacko e bâjâpeniŋ, me Baali e nemu fârine jukacko ine e bâjâpeniŋ.” Mume ŋic ŋokac jaŋe dâŋ moc mi bâtikiecnembiŋ. 22 Eme Eliazi ŋic ŋokac ʒiŋuc jazawec: “Wofuŋte porofete no mocjaha jâmbâŋ hetirine jukopac, Baali porofetefâc‐ticne juŋgopieŋ ine 450. 23 Ŋoŋe mupie bulimakao ŋicne jajahec nârec‐jofaniŋ. Eme jaŋe jaŋac moc rowosâerâ hezurâ dâkâne dâkâne ʒocfikio râenʒepieŋ, ehuc ʒoc ine qazepie mi ʒazejec. Ehame no ine bulimakao moc i hezurâ ʒocfikio wâc râepemu, ehuc ʒoc wâc qazepe mi ʒaocmu. 24 Ehame ŋoŋe nemu‐ŋeŋicte ʒâŋe wiranʒepieŋ â noni Anutu‐nanere ʒâŋe wirapemu. Eme wenizi manarâ ʒoc bâtikieme wahaocmu, ere Anutu me nemu fârine jukac muzo.” Iŋuc mume ŋic ŋokac mâmâc sasawa mumbiŋ, “Dâŋ i biaŋne.” 25 Eme Eliazi Baali porofetefâcne jazawec, “Ŋoŋe ŋic bocjaha, irec ŋoŋe bânierâ bulimakao bâwosâerâ baʒaweniŋ. Erâ nemu‐ŋeŋic ʒâŋe‐ticne wira wâwâsic ecnenʒepieŋ, â ʒoc ine mi qazenʒepieŋ.” 26 Mume jaŋe bulimakao jarekicne i rorâ hezu bâmoc embiŋ, erâ Baali ʒâŋe‐ticne wâsickehuc mumbiŋ, “O Baali micnâŋecko roc.” I furicte fuŋkembiŋzi wirahuc juhapie guŋpitic ewec. Eme dâŋmarac moc mi fuawec, â moczi moc micjeŋicko mi rowec. Jaŋe ine alata bakicne i teriŋ qahuc râreckehuc domambiŋ. 27 Eme guŋpitic maickeme Elia e mu âkebic ejarehuc muwec, “Samarierâ wiraniŋ me, wiac e nemu i! E mamanasu gie bahuc ŋekac mecne, me hata pitic rajec, me hae mocko rajec jukac, me guŋ fokacte wiwickezo.” 28 Mume jaŋe owa ruruckembiŋ, erâ mâsi‐jeŋic moc embiŋ ine ʒika sâqe â sânduzi sahac‐jeŋic hetâcnepie socjeŋic rucnewec. 29 Guŋ pitic dameŋ jâurume maŋsifuc hawari ehuc domahapie owâ giere taha bapa dameŋ bembeŋkewec. Eme sifu dâŋmarac moc mi fuawec, moczi micjeŋicko mi rowec, moczi dâŋjeŋic mi reŋkewec.

30 Eme Eliazi ŋic sasawa jazawec, “Noraopec wareniŋ.” Mume eraopec rafârembiŋ. Eme Wofuŋte alata hetâtiekicne i heɋârerâ bawec. 31 Mârâc jaha Wofuŋte dâŋ Jakoborao ʒiŋuc fuawec: “Ʒâŋege Israe muzo.” Eme Israe hâcne ere motecfâc 12 jaŋeraonec ŋic guru 12 fuambiŋ ʒare‐jeŋicte sâc Eliazi qânâ 12 rowec. 32 Rorâ qânâ izi Wofuŋte ʒâŋeo alata moc bawec. Erâ alata râreckehuc pare kâcɋene baratiehuc bawec. 33 Tarame ʒocfiki barâ bulimakao hefâuckerâ dâkâ barâ ʒocfiki faio râewec. Erâ muwec, “Pake‐ŋeŋiczi opâ fiarâ qowi bâzio â ʒocko hesieniŋ.” 34 Ehapie muwec, “Mocwâc eniŋ.” Mume mocwâc embiŋ. Ehapie muwec, “Harierâ epie arec 3 eoc.” Mume i wâc embiŋ. 35 Eme opâzi alata rârec mâreŋ qâurucke‐fârehuc pare mâmâc bâfusewec.

36 Eme owâ gieo taha bajumbieŋ dameŋ i maickeme porofete Elia e ware mai domarâ ʒiŋuc muwec: “O Wofuŋ, Abraham Isaka â Israe jaŋere Anutu, go Israe guruo Anutu jukic â no kiŋaŋ qaqage jukopac, ehuc wiac sasawa ʒi gore micte ekopac irec fuŋne miŋecgac bataniŋkezemec. 37 Micnaneo roc, o Wofuŋ, micnaneo roc, eme ŋicguru ʒi jaŋe Wofuŋ go Anutu jukic â maŋjeŋic bârisiekic i mana jaŋgeŋkenʒepieŋ.” 38 Iŋuc muhame Wofuŋte ʒocbâruŋ waharâ taha qowi â ʒoc â qânâ â wândoc ʒâseŋke‐fârewec â pareo opâ ʒâkereŋkewec. 39 Ŋic ŋokac sasawa jaŋe wiac i honerâ mâreŋko qarâ ʒâŋe mai‐jeŋic hetutuckerâ fohuc mumbiŋ, “Wofuŋ e Anutu fârine, Wofuŋ e Anutu fârine.” 40 Eme Eliazi jazawec, “Ajoc, Baali porofetefâcne rocjopa‐fâreniŋ, moczi moc mi wisezejec.” Mume rocjopambiŋ. Eme Eliazi Kisoŋ opâo bacjopa hurâ ira qâhâmoc‐jopa‐fârewec.

41 Elia e iŋuc erâ Ahaba ʒiŋuc âzâcnewec: “No hoe wareme fânâŋ manakopacte go ferâ nânâ opâge nâc.” 42 Iŋuc âzâcneme Ahaba e nânâ opâ nâocte fewec. Ehame Elia e Karamele tiki botâŋnao fewec. Ferâ waha ŋehuc daperâ qizec‐ticne dieŋ jahecne jahere ŋoŋondeŋko dunduŋ hume kumbeŋkewec. 43 Iŋuc erâ kiŋaŋŋic‐ticne ʒiŋuc âzâcnewec: “Ajoc, go ferâ hâweckopec fic.” Iŋuc âzâcneme e ferâ fihuc muwec: “No hâwecko wiac moc mi honekopac.” Iŋuc mume Eliazi muwec, “Go mocwâc fec wahac etec arec 7 ezejec.” 44 Eme kiŋaŋŋic e arec 7 tataranao ferâ waharâ ʒiŋuc âzâcnewec: “Manakic, karorac piticne mac ŋic mocte metape iŋucne hâwecko fuakac.” Iŋuc mume Eliazi muwec, “Hoezi Ahaba hebâzickezacte go ferâ âzâcnetec keretac‐ticne baʒawierâ huoc.” 45 Ehame dameŋ mi ʒorahame karorac â mâŋâŋ jahe qâzuckepire sambâŋ gâpâre‐fâreme hoe micsâko hewec. Eme Ahaba e keretac‐ticnao ferâ Jesere haeo risiewec. 46 Ehame Wofuŋte tâpirizi Elia baafeckeme umbika‐ticne jomarâ Ahaba sirickehuc gasackerâ Jesere haesac motâcko bâbâni fisiwec.