1 Ahaba e Eliazi wiac sasawa ebac ewec â ʒikazi porofete qâhâmoc‐jopawec irec binaŋ i Isebe bacne‐fârewec. 2 Eme Isebe e kiŋaŋŋic moczi Elia dâŋ ʒiŋuc âzâcneocte sorewec: “Go ŋic qâhâmoc‐jopamecte tomâcko dameŋ ʒiŋucne go wâc qâhâmocguzo. Iŋuc mi egarenaŋmuo ine jaŋere okacne nemu jaŋe no bazu‐narenʒepieŋ.” 3 Eme Elia e hâwickeme juju‐ticne ŋezickehuc faharerâ raku Juda hae moc ʒâŋene Bere‐Seba ira fisirâ kiŋaŋŋic‐ticne beheme ŋewec.

4 Eme Elia e jahackoaŋ mâreŋ burocnao ʒoaŋ mocjahare sâc ʒuhuckerâ rawec. Raku kasaŋ kasaŋ jâc mocte fuŋnao waha ŋewec. Ehuc hâmoocte ʒiŋuc muhuc numuwec: “Ʒi sâckekac. O Wofuŋ, miŋecgac juju‐nane nowac roc. No mamacfâc‐nane jaŋere sâc mi sirickekopac.” 5 Iŋuc murâ kasaŋ kasaŋ jâc fuŋnao waha fowec. Fohame aŋelo moczi bâuahuc âzâcnerâ muwec: “Go faharerâ nânâ nâc.” 6 Eme Elia e ʒâŋe firâ qizec botâŋ‐ticnao poroŋ moc qânâo rikekicne â opâ ʒopo moc iŋuc ŋeme honewec. Honerâ nânâ opâ i nârâ mocwâc waha fowec. 7 Fohame aŋelozi mocwâc fisi bâuahuc muwec, “Go faharerâ nânâ nâc. Go iŋuc mi ecmuo ine hata raragezi boc ŋemâcke‐gareocmu.” 8 Iŋuc âzâcneme faharerâ nânâ opâ nâwec. Eme nânâ nâwec izi basanaŋkeme Anuture tiki Horebe ira fisiocte ŋafe ʒoaŋ 40 rahuc juwec.

9 Rahuc juku Horebe tikio qânâ hawec moc bâfuarâ ira ŋec foc ewec. Eme izia Anuture dâŋzi fisicnewec. Ehuc ʒiŋuc âzâcnewec: “Elia, go ʒira wemo bahuc jukic?” 10 Eki muwec, “No Anutu Tâpiri Ɋuŋɋasaŋ Wofuŋ gore erâ ʒocne fârone ehuc juekopac, i ʒiŋucte: Israe ŋicguru jaŋe gohec ʒâʒâfic ekicne i behembiŋ, alatage hetâtiembiŋ, porofetefâcge ʒikazi jopambiŋ; eme no mocjaha hâcne hetirine jukopac, ehame no wâc juju‐nane omaeocte giene baŋgopieŋ.”

11 Eme muwec, “Go waha fe tikio Wofuŋ mai ecnerâ domac.” Eme mi Wofuŋzi fisi fotâcnezejec i! Ine qanaŋ mâŋâŋ ɋicwânʒâŋne Wofuŋ bâniecnehuc tiki qâfâuckewec â qorac henʒaŋnewec; erâ Wofuŋ jahacne mâŋâŋko mi juwec. Mâŋâŋ fotâcneha homeŋ bawec; homeŋ maŋnao Wofuŋzi wâc mi juwec. 12 Homeŋ niniŋkeha ʒocbâruŋ fisiwec; Wofuŋzi ine ʒocmaŋko wâc mi juwec. Ʒoc wiseha mâŋâŋ fânâŋ ananacne mac fuawec. 13 Eliazi i manarâ ʒâŋe maine ŋaqi‐ticnezi qofackerâ waha hawec motâcko domawec. Ehame marac fânâŋ moc hazec‐ticnao qaqazuwec, ine ʒiŋuc wiocnewec: “Elia, go ʒira wemo bahuc jukic?” 14 Eme micnao rorâ muwec, “No Anutu Tâpiri Ɋuŋɋasaŋ Wofuŋ, gore erâ ʒocne fârone i ʒiŋucte ehuc juekopac: Israe ŋicguru jaŋe gohec ʒâʒâfic ekicne i behembiŋ, alatage hetâtiembiŋ, porofetefâcge ʒikazi jopambiŋ, eme no mocjaha hetirine jukopac, eha no wâc juju‐nane omaeocte giene baŋgopieŋ.”

15 Eme Wofuŋ e ʒiŋuc âzâcnewec: “Go hata waremeckoa mâreŋ burocnao raku Damasko haeo fisizemec. Fisirâ Haʒaele wokemaŋ ruacnetec Siria ŋic jaŋere ŋicwofuŋ ezejec. 16 Erâ Jehu, Nimisire ŋokâ, wokemaŋ ruacnetec Israe ŋic jaŋere ŋicwofuŋ ezejec, â Elisa, Safati ere ŋokâ, Abe‐Mehola haeonec, e wokemaŋ ruacnetec gore tuc qarâ porofete juzejec. 17 Eme ŋic gâcne Haʒaele ʒika‐ticne wisecneniŋmu jaŋe Jehuzi jopazejec. Â ŋic gâcne Jehu ʒika‐ticne wisecneniŋmu jaŋe Elisazi jopazejec. 18 No ine sifu Israe guru jaŋere ukicne ŋicŋokac 7000 Baali nemu dieŋzi mi hecnembiŋ â e mi muduckembiŋ jaŋe akic‐jopape juniŋmu hâcne.”

19 Iŋuc âzâcneme Elia e faharerâ raku Safati ŋokâ‐ticne Elisa e bulimakao ŋicne 24 kioŋ ɋeticke‐jarerâ ejareme mâreŋ bâfâuckepie soŋaŋ‐jopahuc juha bâfuawec. Erâ fotâcnehuc ŋaqi‐ticne wickeme Elisare faio fewec. 20 Eme Elisa e bulimakao behec‐joparâ Elia bâjâperâ gasackehuc muwec, “Sifu mana‐naretec rarâ neŋgoc mamac jahec‐nane muduc‐jofarâ ie ware bâjâpecgupe.” Iŋuc mume Eliazi dâŋ ʒiŋuc bâtikiecnewec: “Go mocwâc risiec; erâ no wiac egarepac irec manasuzemec.” 21 Iŋuc âzâcneme Elisa e risierâ bulimakao kioŋ hetara‐jarerâ qâhâmoc‐jopawec. Ehuc kioŋ izia biuc‐jeŋic rikerâ ŋic jareme nâmbiŋ. Iŋuc erâ faharerâ Elia bâjâpehuc kime bafic ecnewec.