1 Jesere haeo ŋic moc juwec ʒâŋene Naboti, ere waiŋ giezi Samaria ŋicwofuŋ Ahabare hae mâreŋ ŋifecnao fowec. 2 Irec ʒoaŋ mocko Ahabazi Naboti ʒiŋuc âzâcnewec: “Waiŋ giege i nore fic heririŋ fokacte naretec ira monʒaŋ gie bazepac. Ehuc noni irec okacne waiŋ gie biaŋne moc garezepac, me manatec sâckeme irec furine moneŋ garezepac.” 3 Iŋuc mume Nabotizi Ahaba dâŋ ʒiŋuc bâtikiecnewec: “No apa ŋosafâc‐nane jaŋere huhure wiac i mi garepemurâ Wofuŋte maio mupaŋkekopac.” 4 Jesere ŋic Nabotizi dâŋ iŋuc âzâcneme Ahaba e aarickeme dâŋemâc ficticnao fewec. Naboti e ʒiŋuc hâcne muwec: “No apa ŋosafâc‐nane jaŋere huhure wiac i mi garepemu.” Eme Ahaba e nânâ opâ qikiŋnerâ fofo‐ticnao waha rârâpe fowec.

5 Ehame ŋonâŋ‐ticne Isebezi iqickerâ wiocnehuc muwec, “Go wemocte aariczi maŋgao fusucmarâ foha nânâ mi nâkomec?” 6 Wiocneme ʒiŋuc âzâcnewec: “No Jesere ŋic Naboti âzâcnehuc ʒiŋuc mupac: ‘Go waiŋ giege qikiŋne‐naretec furine bazepac; me manatec sâckeocmuo ine irec okacne waiŋ gie jaha moc garezepac.’ Eme e dâŋ ʒiŋuc hâcne bârisie‐narejec: ‘No waiŋ gie‐nane mi garepemu.’ ” 7 Iŋuc mume ŋonâŋ‐ticne Isebezi ʒiŋuc âzâcnewec: “Goki Israe ŋic rauc‐joparâ mi jukic me? Ajoc, go faharerâ nânâ nârâ buge mâteŋkeoc. Eme no Jesere ŋic Naboti ere waiŋ gie i sâcne garepemu.”

8 Iŋuc murâ Isebe e Ahabare okacne papia qâreŋkerâ ere ʒâŋeoa basanaŋkehuc soŋaŋ â ŋic fekicne Nabotihec hae‐ticnao jumbiŋ jaŋerao râeme rawec. 9 Papiao dâŋ ʒiŋuc qâreŋkewec: “Ʒoaŋ moc bâtirihuc Naboti ecnepie ŋic ŋokac jaŋere ŋondeŋko ŋeŋe mamai ira ŋezejec. 10 Eme ere ŋifecnao ine ŋic repicne jajahec ejactepie ŋehuc ʒiŋuc muhuc fuŋne‐ticne muzepirec: ‘Go Anutu â ŋicwofuŋ musoriŋ‐jofameŋ.’ Iŋuc mupire jowa rarâ qânâzi hehâmonʒepieŋ.” 11 Eme soŋaŋ â ŋic fekicne Nabotihec hae ira jumbiŋ jaŋe Isebezi dâŋ râewec irec sâc embiŋ. Dâŋ i papia râe‐jarewec ira qâreŋke‐fârewec. 12 Eme jaŋe ʒoaŋ moc bâtirirâ Naboti ecnepie ŋic ŋokac jaŋere ŋondeŋko mai jaha ŋewec. 13 Ehame ŋic repicne jajahec jahe fisirâ Nabotire ŋifecnao waha ŋepic. Ehuc ŋic ŋokac jaŋere ʒâŋe faio Nabotire fuŋne ʒiŋuc mupic: “Naboti e Anutu â ŋicwofuŋ musoriŋ‐jofawec.” Jahe iŋuc mupire rorâ hae sahao bahurâ qânâzi hehâmombiŋ. 14 Iŋuc erâ Iseberao dâŋ ʒiŋuc râepie rawec: “Naboti e qânâzi hehâmokicne.”

15 Eme Isebe e Naboti qânâzi hehâmokicne dâŋ i manarâ izia Ahaba ʒiŋuc âzâcnewec: “Ajoc, go Jesere ŋic Naboti ere waiŋ gie moneŋzi furine bazo mutec qatarawec i ro rauc ec. E mi jukac, e hâmojec hâcne.” 16 Eme Ahaba e Nabotizi hâmowec irec biŋe manarâ izia Jesere ŋic Nabotire waiŋ gie i hurâ ro rauc eocte faharewec.

17 Ehame Wofuŋte dâŋzi Tisibe ŋic Elia erao ʒiŋuc fuawec: 18 “Ajoc, go faharerâ hu Israe ŋicwofuŋ Ahaba Samaria haeo jukac e iqickec. Manakic, e Nabotire waiŋ gie ro rauc eocte ira rajec jukac. 19 Erâ ʒiŋuc âzâcnezemec: ‘Wofuŋ e ʒiŋuc mukac: “Go mâreŋ rune qâhâmohuc mâreŋ‐ticne wâc mâmâc romeŋ me?” ’ Erâ ʒuhuckerâ ʒiŋuc âzâcnezemec: ‘Wofuŋ e ʒiŋuc mukac: “Nabotire soc wahame qâto jaŋe apurumbiŋkoa juku gore soc wahame apurunʒepieŋ wâc.” ’ ”

20 Iŋuc mume Ahabazi Elia dâŋ ʒiŋuc âzâcnewec: “O râsi‐nane, goki bâfuacnukomec me?” Mume dâŋ ʒiŋuc bâtikiecnewec: “Go gahac Wofuŋte ʒâŋe faio wiac mamakâcne ecmurâ irec feŋeŋko femeŋte bâfuacgukopac. 21 Manakic, no wiac repicne bâfua‐garepemu. Ehuc ofaŋgurâ ŋicfâcge rambaŋko me niŋgiŋko jujune jaŋe Israe guruonec bârârâŋ‐jopa‐fârepemu. 22 Erâ no aaric bâfua‐narehuc Israe ŋic ejaretec hehesic bâfuambiŋ irec erâ kikefuŋfâcge jaŋe Nebatere ŋokâ Jeroboamte kikefuŋ â Ahia ŋokâ‐ticne Basare kikefuŋ ejarepo irec sâc jaha ejarepemu hâcne. 23 Erâ Wofuŋzi Isebere wâc ʒiŋuc muwec: ‘Qâto jaŋe Jesere hae maŋnaoa Isebe nâfâreniŋmu.’ 24 Erâ ŋicfâcge jaŋeraonec i me i haeo hâmopie qâto jaŋe nâcjopaniŋmu â ŋicfâcge i me i kâteo hâmopie wipe jaŋe nâcjopaniŋmu.”

25 Ahaba e ŋonâŋ‐ticne Isebezi qafeŋkeme Wofuŋte ʒâŋe faio wiac mamakâcne eocte irec feŋeŋko fewec e iŋucne moc mi juwec. 26 E Wofuŋzi Israe ŋic jaŋere ʒâŋe faio Amori ŋic jopa jâpec ejarewec jaŋe ehuc jumbiŋ irec sâc wiac repic qapicne ehuc ɋâŋ qâqâtâc jaŋerao siŋke‐jâmbâŋkewec.

27 Eme Ahaba e dâŋ i manarâ ŋaqi qoruc‐ticne bâsuckerâ mateŋ qonaŋkewec, erâ nânâ sowa juhuc mateŋheckoaŋ foc faharec ewec. E iŋuc ehuc rume rume juwec. 28 Ehame Wofuŋte dâŋzi Tisibe ŋic Eliarao ʒiŋuc fuawec: 29 “Go Ahabazi nore maio rume‐jâmbâŋkekac i honekomec me? E nore maio rume‐jâmbâŋkekacte ere dameŋko wiac repicne i mi bâfuapemu. Juku ine ŋokâ‐ticnere dameŋko kikefuŋfâcne jaŋerao wiac repicne bâfuapemu.”