PETORO I
Petoro â ɋaticne Anderea jahe Galilaia mâreŋko qowi roro ŋic jupic. Juhapire Jesuzi rocjofame ŋicroro epic (Mataio 4:18–22). Petorore ʒâŋe raŋɋa Simoŋ. Jesuzi ʒâŋe ɋâri‐ticne Petoro (Kefa) muwec. Petoro e motec gâcne jaŋere micne bapa erâ juwec. Eme Jesu e juku hâmockonec faharerâ Genesarete riqicko motecfâcne fua‐jarehuc Petoro miti gie mocwâc mucnewec â hâmoc‐ticnere findaŋdâŋ muwec. Eme ʒâhec Tiri Mâro wahame Judaŋic bocjaha tumaŋnepie Petorozi jaŋere maio domahuc Jesure fuŋne muŋɋârâŋkewec (Aposolo 2:14–36). Erâ miti ufuŋte motâcko ŋicpuriŋ moc bâpiaŋkewec (Aposolo 3:1–8). Juku Jerusalem haeo mitire ʒika kâpâcwâru boc fuarâ fome Petorozi hae i beherâ mâreŋ rârecke raku Jope haeo fisirâ Tabita bâɋârewec (Aposolo 9:36). Erâ wâc Konelio â wiacfâcne miti jazawec (Aposolo 10). Eme Jerusalem haeo risiehame Herodezi qaocte kâpâcwâru ficko râeme ŋehame aŋelozi batarawec (Aposolo 12). Juku Paulozi Jerusalem haeo fisime Petoro â aposolo gâcne jaŋe turerâ qâpuc jaŋere dâŋ mumbiŋ (Aposolo 15). Dameŋ mocte Petoro â Paulo jahe Antiokia haeo bâbâfuac epic (Galata 2:11). Ʒâhecko ine Petorozi Siria mâreŋko miti gie bawec. Irecnec risierâ raku Roma haeo fisime rorâ qambiŋ.
Papia I i Petorozi Roma haeo juhuc qâreŋkewec. Mareko ehec mâmâc ira jupic. Papia i Asia mâreŋ masunao Paulore ŋicfâc jurambiŋ jaŋerao râewec (gaŋ 1:11). Jaŋe bekâ erâ jumbiŋ. Paulo e dameŋ ʒora kâpâcwâru ficko ŋehuc juwec. Eme firuepie waharâ Sipeŋ mâreŋko rawec mecne. Iŋuc ehuc juhame ŋic ŋokacfâcne mamac tâmiric jumbiŋ. Eme Mareko e Paulozi Roma haeo kâpâcwâru ficko juhame ra iqickewec (Kolosai 4:10). Iqickerâ risie warehuc Asia mâreŋ masunao Jesure kikefuŋfâc jurambiŋ jaŋere fuŋne manarâ Petororao fisirâ dâŋ binaŋ ecnewec. Eme Petorozi jaŋere papia qâreŋkewec, qâreŋkerâ Sila râcneme barawec. Sila ʒâŋene moc Siliwano. Eki hâcne Paulo miti kiŋaŋ ʒâʒâŋiŋ moc rame bâjâpehuc bafickeme Asia masunao miti gie bapic (Aposolo 15:40, â Petoro I 5:12).
Asia mâreŋ masunao mitiŋic ŋokac jurambiŋ jaŋe mitire erâ fific guguriŋ faio fembiŋ. Eme Petorozi hume keteŋ ejareme sanaŋkeniŋte papia râe‐jarewec. Gie i hâcne Wofuŋzi mucnewec (Luka 22:32). Dâŋ fuŋne kecʒiŋuc qâreŋke‐jarewec: Wiac furi sâko kitâc‐nâpokicnere Wofuŋtao qohotahuc sambâŋko merâfâc fokac irec mamanac juzo (gaŋ 1 â 2:1–10). Erâ dâŋ moc kecʒiŋuc: Mâreŋko jaba jueŋgopeneŋzi miti hata munârekicne ijaha âtehuc Wofuŋ bâjâpezo (gaŋ 2:11–25, â 3:1–12). Erâ moc: Jesure erâ ʒâic busâqocko juhuc mi dockezo, dâŋ i qâreŋkehuc bufac qajarewec (gaŋ 3:13–22, â gaŋ 4). Izi ʒâhec mumutâc dâŋ gâcne qâreŋke‐jarewec wâc (gaŋ 5).
1
Mumuʒâwe â jambuŋdâŋ
Petoro no Jesu Kristo ere aposolo jukopaczi Anutu bâwosâecfâc‐ticne Ponto â Galatia â Kapadokia â Asia â Bitinia mâreŋko ocŋondeŋ jaba juraŋgopieŋ ŋoŋere papia ʒi qâreŋkekopac. Jak 1:1 Anutu Mamaczi maname fowecte rowosâec‐ŋopawec ŋoŋe hâcne Mârozi maŋfuru bacŋopaocte â mume rereŋfâcne eniŋte Jesu Kristore soc ruambiŋ: Ŋoŋerao aki anonoc â wama fua bâbâriŋ fuahuc fozejec. Rom 8:29; Heb 12:24
Sambâŋ merâfâc‐nâŋec ʒâŋe rarac biaŋ irec ʒeriezo
Nâŋâc Anutu, Wofuŋ‐nâŋec Jesu Kristo ere Mamac, e muteŋkenʒepeneŋ. Eki Jesu Kristo hâmockonec faharewecte uruc jauŋ sâko‐ticnere erâ, juju fârire mamanac junaŋte bâɋârec‐nâpowec. Jak 1:18 Sambâŋko merâfâc‐ŋeŋic ʒaʒaŋke tâmiric â bie gufec tâmiric â hâmo qanʒaraŋ tâmiric woŋec‐ŋeŋic râekicne fokac, i juku rauckeniŋte iŋuc hâcne eŋarewec. Kol 1:12 Ehuc Anutu tâpiri‐ticnezi bâwâzâŋ‐ŋopame mamanasiŋhec juhapie juku dameŋ tarame bâbâpiaŋ kâdoc bâmockekicne i fua tâcneocmu. Joh 10:28; 17:11; Rom 5:3, 4; Gal 3:23; Kor I 2:5 Ŋoŋe irec ʒeri ehuc juŋgopieŋ, â Anutuzi muŋareme fific guguriŋ faio ferâ ʒâic busâqocko juhuc sifu dameŋ bembeŋne macte jamaŋ kirâ jueŋgopieŋ. Pet I 5:10; Heb 12:11; Jak 1:2; Kor II 4:17 Manaŋgopieŋ, gol i wiac ʒaʒaŋkene fuŋne‐ticne ʒocko taniŋkeekac, ŋoŋe ine mamanasiŋ‐ŋeŋic, wiac furi sâko jâmbâŋ, irec fârine fific guguriŋko fua taniŋkeme Jesu Kristo fifisi‐ticnao ŋoŋere ʒeri bubiaŋ â mumuteŋ â eri qaraweŋ fuaocmu. Muq 17:3; Mal 3:3; Rom 2:7, 10; Jak 1:3 Ŋoŋe Jesu e hawari‐ticne mi honembiŋzi sifu maŋŋeŋic qikiŋnecneeŋgopieŋ, erâ dameŋ ʒiŋucne wâc ʒâŋezi mi hohone sifu manasiŋkeeŋgopieŋ. Ehuc ʒeri bubiaŋ fuŋmoc, ŋicmiczi mi mumufuane, manacneeŋgopieŋ. Joh 17:20; 20:29; Kor II 5:7; Tim II 4:8 Mamanasiŋ‐ŋeŋicte fârine maŋ qâqâtâc‐ŋeŋicte bâbâpiaŋ hâcne, maic‐ŋopakacte ʒeri eŋgopieŋ. Rom 6:22
Porofete findaŋdâŋ mumbiŋ irec fârine fuawec
10 Bâbâpiaŋ i weniŋuc fuazokac, porofete jaŋe mârâc jaha iŋuc wiorâ gufu koparic ehuc jumbiŋ, ehuc ŋoŋerao aki anonoc fuaocte irec findaŋdâŋ muhuc jumbiŋ. Mat 13:17; Luk 10:24 11 Kristo e ʒâic fâro manaku eri tatamac‐ticne rorâ juocmu, irec dâŋ Mâro‐ticnezi maŋjeŋicko râeme jaŋe dameŋ wezimucko â weniŋucnao Kristo iŋuc fuacnezokac muhuc wawariehuc jumbiŋ. Mi Mâ 22:1; Jes 52:13—53:12; Luk 24:26 12 Jaŋe gie bambiŋ irec fârine jaŋacnao mâcne, ŋoŋerao fuaocte mukicne, i jaŋe mufua‐jarekicne. Eme ʒâhec irec fârine fuame Tiri Mârozi sambâŋkonec waharâ mitiŋic neŋgoc ŋejareme Biŋebiaŋ muromackembiŋ jaŋe hâcne findaŋdâŋte fârine mujaŋgeŋke‐ŋarembiŋ. Dâŋ irec ʒuhucne aŋelo jaŋe wâc mana ʒiguaniŋte buââkec jueŋgopieŋ. Efe 3:10; Luk 2:13
Qâpuc hata râpecke sanaŋkezo
13 Irec ŋoŋe maŋŋeŋicte umbika jomarâ maŋsowa junʒepieŋ, ehuc Jesu Kristo fua tâcnerâ aki anonoc bâfua‐ŋareocmu, irec mamanac junʒepieŋ. Luk 12:35; Efe 6:14 14 Anuture mume rereŋfâc ŋoŋe mârâc jaha qâpuc‐ŋeŋicko sasechec jujumbieŋ, juju sâc ijaha ʒiŋuczia mi junʒepieŋ. Rom 12:2; Efe 2:3; 4:17 15 Tiri runezi hefârec‐ŋopawec ere sâcko tiri jaha jufârenʒepieŋ. 16 Dâŋ ʒiŋuc hâcne qâreŋkekicne fokac: “No tiri jukopacte ŋoŋe tiri jaha junʒepieŋ.” Tah 11:44; 19:2; 20:7
Wiac furi sâkozi kitâc‐nâpowec
17 Ŋoŋe Mamac mucnehuc wâsickeeŋgopieŋ e ra rowec ware rowec mi ehuc juju bapa‐nâŋecte sâcko dâŋnâŋec mutaraocmu; irec ŋoŋe mâreŋko jaba juhuc sâc e araŋ bacnehuc junʒepieŋ. Mi Mâ 89:26; Jer 3:19; Mal 1:6; Mat 6:9; Rom 2:11 18 Ŋoŋe ʒiŋuc sâcne manaeŋgopieŋ, kâcɋenefâc‐ŋeŋic jaŋere sindaŋ hata âtehuc juhapie wiac sisirowenezi, gol siliwa wiaczi mi kitâc‐ŋopawec. Jes 52:3; Kor I 6:20; 7:23 19 Ŋoŋe Kristore soc furi sâko izi kitâc‐ŋopawec. E hâcne lama sahac fâsâc â wânâŋ tâmiric iŋucne juwec. Jes 53:7; Heb 9:14 20 E mârâc jaha, mâreŋte hobeteŋne mi fuahame gie i mucnekicne, fufua ine ʒâhec dameŋ tarazo ehame ŋoŋere erâ fuawec. Rom 16:25; Efe 1:4 21 Erâ ŋoŋe Anuturao ʒuhuc‐ŋopawec, Anutu hâmockonec bâɋârerâ eri tatamac hecneme huwec erao hâcne; eme irec mamanasiŋ â woworic‐ŋeŋic Anuturao fokac. Joh 14:6; Rom 4:24; Kol 1:27
Mitidâŋzi bâɋârec‐nâpowec
22 Ŋoŋe dâŋfâri murâ rereŋ ekupie maŋ qâqâtâc‐ŋeŋic ɋaɋackewec i ââgo fârihec eniŋte iŋuc fuawec; eme irec maŋzi jâmbâŋ ʒâʒâfic ehuc junʒepieŋ. Joh I 5:1 23 Ŋoŋe fufua ɋâri i ukic sisirowenaonec mâcne, mi sisirowenaonec, Anuture dâŋ jujune â fofo sanaŋ, irecnec âkeʒurâ fuambiŋ. Dan 6:26; Joh 1:13; Jak 1:18 24 Dâŋ ʒiŋuc hâcne fokac:
“Sahachec jaŋe sopâc kecɋaŋ iŋucne,
â ʒâŋe rarac biaŋ‐jeŋic i ʒariŋ âri iŋucne.
Sopâc kecɋaŋzi ɋaŋaekac â ârinezi mârâŋkeekac.
Anuture dâŋzi ine fofo sanaŋ foocmu.” Jes 40:6, 7; Jak 1:10, 11
25 Biŋedâŋ biaŋne ŋazakicne ʒi hâcne. Jes 40:8

1:1: Jak 1:1

1:2: Rom 8:29; Heb 12:24

1:3: Jak 1:18

1:4: Kol 1:12

1:5: Joh 10:28; 17:11; Rom 5:3, 4; Gal 3:23; Kor I 2:5

1:6: Pet I 5:10; Heb 12:11; Jak 1:2; Kor II 4:17

1:7: Muq 17:3; Mal 3:3; Rom 2:7, 10; Jak 1:3

1:8: Joh 17:20; 20:29; Kor II 5:7; Tim II 4:8

1:9: Rom 6:22

1:10: Mat 13:17; Luk 10:24

1:11: Mi Mâ 22:1; Jes 52:1353:12; Luk 24:26

1:12: Efe 3:10; Luk 2:13

1:13: Luk 12:35; Efe 6:14

1:14: Rom 12:2; Efe 2:3; 4:17

1:16: Tah 11:44; 19:2; 20:7

1:17: Mi Mâ 89:26; Jer 3:19; Mal 1:6; Mat 6:9; Rom 2:11

1:18: Jes 52:3; Kor I 6:20; 7:23

1:19: Jes 53:7; Heb 9:14

1:20: Rom 16:25; Efe 1:4

1:21: Joh 14:6; Rom 4:24; Kol 1:27

1:22: Joh I 5:1

1:23: Dan 6:26; Joh 1:13; Jak 1:18

1:24: Jes 40:6, 7; Jak 1:10, 11

1:25: Jes 40:8