1 Salomo e Wofuŋte ʒâŋe araŋ bacnehuc taha ufuŋ moc baocte manapaŋkewec, â e jahacne ŋicwofuŋ fic wâc iŋuc jaha baocte manasuwec. 2 Ehuc ŋic 70 tauseŋ jaŋe ficte jâcsiec hâpopie fisiocte sorec‐jopawec â 80 tauseŋ jaŋe tiki mâreŋko qânâ he qâfâuc eniŋte jaza sorec ewec, â 3 tauseŋ 600 jaŋe ine ŋic gie bambiŋ i hone soŋaŋ ejareniŋte mujarewec. 3 Eme Salomo e Tiro ŋicwofuŋ Hiramtao dâŋ ʒiŋuc râeme rawec: “Go mamac‐nane Dawidi bubiaŋ qacnehuc ŋeŋe juju ficticne moc baocte jâmâzâc jâc râecnemeŋ, iŋuc jaha no wâc râe‐narec. 4 Manakic, no Wofuŋ Anutu‐nanere ʒâŋe araŋ bacnehuc ufuŋ moc bazo ekopac. Bafârerâ mai‐ticnao hosâc âsu ririke me poroŋ furu mukicne i râe guruc ee me furic owâc qowi bâzi ririke, i sabata hombaŋko me mosa furune wahaocmu sâc â Wofuŋ Anutu‐nâŋecte hombaŋ gâcnao tiwâ bâzi rikepemurâ iŋuc ekopac. Gie i Israe ŋic jaŋe mimiŋzi ɋâric bahuc juniŋte mupaŋke‐jarekicne hâcne. 5 Nâŋere Anutu e nemu sasawa siric‐joparâ fekicne jukac, irec ufuŋ bazo ekopac i fekicne jaha eocmu. 6 Sambâŋne sambâŋne jaŋe ere sâc mi ehapie mozi ufuŋ moc sâcne bacneocmu? No iŋucnezi wemocko ufuŋ moc bacnepemu, aricne, mâc mai‐ticnao hosâc âsu ririkere ŋeŋe hae sawa bapemu. 7 Irec go gol â siliwa â aeŋ bâbâroŋ â aeŋ omane â qoruc bâbâroŋ â âmuc âmucne erâ keŋkeŋnezi wiac bapa saric ŋic moc râe‐narec; erâ wâc mamac‐nane Dawidizi gie bapa ŋic fuŋne mamana saric râec‐jopawec, ʒira no nahacnehec Juda mâreŋko â Jerusalem haeo juŋgopieŋ jaŋehec juocte râezemec. Erâ e metâ qâreŋ wâc mâmâc bahuc juzejec. 8 Erâ wâc Lebanoŋ mâreŋkonec jâmâzâc, wete â bone jâc râe‐narezemec, kiŋaŋ qaqafâcge jaŋe Lebanoŋ mâreŋko katapa fafasaere fuŋne mana‐hâmoeŋgopieŋ i manakopac hâcne. Eme kiŋaŋ qaqafâc‐nane jaŋe gore kiŋaŋ qaqafâc jaŋehec juniŋmu. 9 Ehuc ufuŋ bazo ekopac i fekicne â hone warecnehec eocmu irec katapa bocjaha bâmocke‐narenʒepieŋ. 10 No kiŋaŋ qaqafâcge katapa he fasaec eniŋmu jaŋe padi ɋaɋacne ŋemâc‐ticne 20 tauseŋ â padi âmuc âmucnere sâc ijaha, erâ waiŋ ʒopo 20 tauseŋ â wokemaŋ pake 20 tauseŋ jaha, iŋuc jarepemu.”

11 Eme Tiro ŋicwofuŋ Hiramzi papia moc Salomorao râeme rawec ira dâŋ ʒiŋuc bâtikiecnewec: “Wofuŋ e ŋicfâc‐ticne maŋjauŋ ejareekacte go ŋicwofuŋ jujarecmurâ âkendâŋguwec.” 12 Iŋuc murâ ʒiŋuc wâc ʒuhuckerâ muwec: “Israere Wofuŋ Anutu sambâŋ â mâreŋ bâfuac‐jofawec, e hâcne muac baafec ecnezo. E ŋicwofuŋ Dawidi ŋokâ moc mamana tarahec tahackewec. Erâ e maŋɋârâŋ â mamana tara tahackewecte Wofuŋte ufuŋ â e jahacne ŋicwofuŋ fic baocmu.

13 “Eme ʒi gie bapa ŋic fuŋne mamana saric moc, ʒâŋene Huramabi e sore‐garekopac. 14 E Daŋte ɋâric ŋokac moc ere ŋokâ â mamac‐ticne ine Tiroŋic. E gol, siliwa, aeŋ bâbâroŋ, aeŋ omane, qânâ â jâc, erâ qoruc bâbâroŋ â âmuc âmucne â keŋkeŋne erâ qoruc qaŋqaŋko hawari fuŋne fuŋne bapa irec fuŋne qazucne‐hâmokicne. Irec metâ qâreŋ i me i go gahacne gie bapa ŋic, mamacge Dawidi bomboŋ‐nanere gie bapa ŋic hâcne, jaŋehec baocte mucnetec sâcne bafâreocmu. 15 Irec bomboŋ‐nane, go padi ɋaɋacne â âmuc âmucne erâ wokemaŋ â waiŋte mumeŋ i kiŋaŋ qaqafâcge jaŋerao râetec razejec. 16 Eme nâŋe katapa basarâ mutec sâc Lebanoŋ mâreŋkonec he fasaec ehuc ʒae haferâ hâwecko bafârâ Jope haeo guruckenaŋmu. Eme go irecnec rotec Jerusalem haeo hefâzejec.”

17 Eme Salomo e mamac‐ticne Dawidizi ŋic ʒare‐jeŋic rowec i bâjâpehuc Israe mâreŋko jaba jumbiŋ ŋic i jaŋere ʒare rowec. Roku rofâreme ʒare‐jeŋic 153 tauseŋ 600 ewec. 18 Eme jaŋeraonec 70 tauseŋ jaŋe ficte jâcsiec hâponiŋte mujarewec â 80 tauseŋ jaŋe ine tiki mâreŋko qânâ he qâfâuc eniŋte mujarewec â 3 tauseŋ 600 jaŋe ine ŋic gie bambiŋ jaŋe hone soŋaŋ ejarehapie gie baniŋte mujarewec.