JOHANE II
Papia i Johanezi ŋokac bomboŋ moc qâreŋkecnewec. Ŋokac e jahacne â naru motecfâcne jaŋe mitidâŋ aimuŋ reŋkehuc jumbiŋ. Ŋokac e mitiŋic hae ira fisipie hefârec‐joparâ hezu hewâneŋ ejarehuc juwec. Eme mitire mumusifuc ŋic fisipie iŋuc jaha hefârec‐jopame eatuckenʒipiŋte uŋdâŋ râecnewec. Mumusifuc ŋic jaŋe, Jesu e mâreŋ sahachec fuawec, dâŋ i mickembiŋ hâcne.
Ŋokac bomboŋte mu qâreŋ ewec i kikefuŋ mocte manasuhuc mu qâreŋ ewec mecne.
1
Mumuʒâwe dâŋ
Ŋicraŋɋa no ŋokac bomboŋ bâwosâekicne go â naru motecfâcge ŋoŋere papia ʒi qâreŋke‐ŋarekopac. No maŋjauŋ eŋareekopac, erâ noni sawa mâcne, dâŋ fâri qizecne mana maŋ eeŋgopieŋ jaŋe mâmâc eŋareeŋgopieŋ. Pet I 5:1; Joh III 1:1 Miti maŋnâŋecko fokac erâ nâŋâcnehec fohuc juocmu sanaŋ, irec erâ ââgo jueŋgopeneŋ. Anutu Mamac â Jesu Kristo, Mamacte Ŋokâ, eraonec aki anonoc, uruc jauŋ â wama i dâŋfâri â maŋjauŋhec juhapene nâŋâcnao fotâcnerâ fohuc juocmu.
Maŋzi jauŋ babac ezo irec dâŋ
Naru motecfâcge gâcne Mamaczi sâcmutâc dâŋticne nâzâwec i reŋkehuc dâŋ fâri qizecne sâcne bajueŋgopieŋ, fuŋne‐jeŋic iŋuc manarâ bunane boc biaŋkewec. Eme ʒi ŋokac bomboŋ go sâcmutâc dâŋ moc gazape manac. Dâŋ furune aricne, raŋɋane fuŋnaonec mana warehuc jueŋgopeneŋ ijaha ʒiŋuc gazape: Maŋjauŋ eec ehuc junʒepeneŋ. Joh I 2:7 Anuture sâcmutâc dâŋ rereŋke izi hâcne maŋjauŋ ekac. Anuture sâcmutâc dâŋ fuŋnaonec mana warehuc jueŋgopieŋ i hâcne bajuhuc sâseniŋte muŋareekac.
Bâbâsifuc ŋic jaŋere dâŋ
Manakomec, eeatuc ŋic bocjaha fuambiŋ juraŋgopieŋ, jaŋe Jesu Kristo e mâreŋ sahachec fuawec, dâŋ i mickeeŋgopieŋ. Ŋic iŋucne hâcne eeatuc ŋic â Kristore râsi ɋizec mucnezo. Joh I 2:18; 4:1–3 Gie bapene ŋoŋerao fârine fuawec, i sifucke‐ŋarezacte soŋaŋ babac ehuc junʒepieŋ. Eme juku fârine ŋemâcne ronʒepieŋ. Gal 4:11 Moc e Kristore mu qaqazuc dâŋ mi bajuhuc âke sipuocmu e Anutu mi rauckeocmu. Moc e mu qaqazuc dâŋ bajuocmu e ine Mamac â Ŋokâ mâmâc rauc‐jofaocmu. Joh I 2:23 10 Ŋic moc e mu qaqazuc dâŋ i mi bajuekaczi iqic‐ŋopazo mume fic sakarecnehuc âgo mi ecnenʒepieŋ. Tes II 3:6; Ŋic I 13:17; Joh III 1:8 11 Moc e ŋic iŋucne âgo ecneocmuzi bâbâsifuc‐ticnere bafickeocmu.
Mumutara dâŋ
12 Dâŋ gâcne bocjaha fokac, erâ tintezi papiao qâreŋkezo mi enarekac. No ŋoŋerao biac fâpe miczi muc manac enaŋte mukopac. Ehuc bubiaŋ kâcɋene bâfuanʒepeneŋ. Joh II 1:13 13 Go qoge bâwosâekicne ere naru motecfâc jaŋe manasu‐gareŋgopieŋ.

1:1: Pet I 5:1; Joh III 1:1

1:5: Joh I 2:7

1:7: Joh I 2:18; 4:1–3

1:8: Gal 4:11

1:9: Joh I 2:23

1:10: Tes II 3:6; Ŋic I 13:17; Joh III 1:8

1:12: Joh II 1:13