JOHANE III
Micne bapa moc juwec ʒâŋene Gaio. Erao miti kiŋaŋ fisipie moneŋ mafa jare tahac ejujec. Miti kiŋaŋ ŋic ŋokac jaŋe qâpuc jaŋeraonec wiac mi rombiŋ, miti mamana jaŋe ine ehâmo‐jarembiŋ. Eme Gaio eki iŋuc jaha buafec jaha wiac ejareme Johanezi irec biŋe manarâ bubiaŋ dâŋ qâreŋkecnewec. Eme miti kiŋaŋ ŋic moc ʒâŋene Demetrio eki Gaiorao fisime iŋuc jaha ehâmocneocte Johanezi qâreŋkecnewec.
Hae ijaha ŋic moc juwec ʒâŋene Diotrefe, eki ine miti kiŋaŋ ŋic ŋokac hone takirec‐jopahuc wiac sakare‐jarehuc juwec. Irec Johanezi ere mana sâqorehuc dâŋticne qâreŋkewec.
1
Mumuʒâwe â bubiaŋ dâŋ
No ŋicraŋɋazi âgo‐nane Gaio gore papia ʒi qâreŋkekopac. No gore jâmbomac enarekac. Joh II 1:1 Âgo‐nane, maŋge mitio sâcne foekac, iŋuc jaha sahackopec huc ʒâic tâmiric sâcne juhâmocmurâ enarekac. Joh II 1:4 Go dâŋ fâri qizecne sâcne bajuhuc reŋkeekomec, irec âgo gâcne jaŋe ware dâŋ binaŋ epie manarâ bunane boc biaŋkekac. Naru motecfâc‐nane jaŋe dâŋ fâri qizecnere hata âteeŋgopieŋ, dâŋ i manarâ bubiaŋ fekicne jâmbâŋ manaekopac.
Miti kiŋaŋŋic ehâmo‐jarewec
Âgo‐nane, go ŋic âgo ehâmo‐jareekomec, erâ bembeŋkonec sawa mâcne, ʒorickonec mâmâc ejareekic, i sâcnea eekic. Ŋic jaŋe ʒira kikefuŋte maio jauŋgere mu warec embiŋ. Ŋic fâpie go Anutu ʒâŋe biŋe‐ticnere erâ hone jauŋ ejarerâ râec‐jopatec rapie biaŋkeocmu. Tit 3:13 Jaŋe ʒâŋe‐ticnere erâ miti kiŋaŋ rahuc mâreŋ‐jeŋic beherâ qâpuc jaŋeraonec moneŋ mafa mi roeŋgopieŋte ehâmo‐jarezo hâcne. Apo 20:35; Kor I 9:12, 15 Ŋic iŋucne âgo ejarehuc bafic‐jopapene dâŋ fâri qizecne haŋ baocte munârekicne hâcne. Heb 13:2; Joh II 1:10
Diotrefe e ŋic qaisoc‐jopawec
No kikefuŋ dâŋ wirec‐jeŋic qâreŋkepo. Eme Diotrefe e micne‐jeŋic juocte muekaczi dâŋnâŋec qikiŋneekac. 10 Irec no fârâ juju bapa‐ticnere fuŋne bataniŋkepemu. E nâŋere burec ehuc boc musâqorec‐nâpoekac. Erâ i sawa mâcne, ŋic fâpie e jahac hezu hewâneŋ mi ejarehame gâcnezi ejarepie qatara‐jarerâ kikefuŋ sahacnao râec‐jopaekac.
Demetrio ere manapie sâcke‐fârewec
11 Âgo‐nane go ŋic jaŋe wiac sâqocne epie mi bâjâpec‐jopazemec, wiac biaŋne epie ine bâjâpec‐jopazemec. Moc e wiac biaŋne ehuc juocmu ere muzo, e Anuturaonec fuakicne. Moc e sâqocne ehuc juocmu, e Anutu mi ʒâŋitawec muzo. Joh I 3:6, 9 12 Demetrio ere fuŋne ine ŋic sasawa mutaniŋke‐fârembiŋ. Erâ mitio fuŋne‐ticne taniŋkewec wâc. Nâŋe iŋuc jaha dâŋticne dopeckeŋgopeneŋ. Erâ dâŋ jâmbomac mueŋgopeneŋ i manaekic. Joh 19:35; 21:24
Mumutara dâŋ
13 Dâŋ gâcne bocjaha fokac, erâ tinte â fedazi qâreŋkezo mi enarekac. Joh II 1:12 14 No gorao biac fâzore mukopac. Fâ fisipe miczi nazaŋ gazaŋ ezeperec. 15 Wama gorao fozejec. Âgo jaŋe manasu‐gare‐fâreŋgopieŋ. Go iŋuc jaha âgofâc‐nâŋec ʒâŋe‐jeŋic wosehuc manasu‐jarezemec.

1:1: Joh II 1:1

1:2: Joh II 1:4

1:6: Tit 3:13

1:7: Apo 20:35; Kor I 9:12, 15

1:8: Heb 13:2; Joh II 1:10

1:11: Joh I 3:6, 9

1:12: Joh 19:35; 21:24

1:13: Joh II 1:12