JUDA
Juda e Jakobo Tiŋne juju ere ɋa. Jahe Jesure ɋajahec hâcne. Mâc Judare papia i Jesu ɋajâmbâŋ‐ticnezi qâreŋkewec me mitiŋic moczi Judare ʒâŋeo âkehotahuc qâreŋkewec i mi mana sanaŋkeŋgopeneŋ. Mitire bâbâsifuc â mumusifuc ŋic dâŋjeŋic qâreŋkewec jaŋe ʒâhec, aposolo â Jesure ɋafâc hâmo‐fârehapie fuarâ gie‐jeŋic bambiŋte Jesure ɋajâmbâŋzi mâcne, mitiŋic moczi mecne qâreŋkewec. I ʒiŋuc ewec mecne: No dâŋ moc mâcne, aposolo gâcne â Jakobo jaŋe mitidâŋ mu qaqazuc erâ qâreŋkembiŋ ijaha mu qaqazuc ehuc qâreŋkekopac. Irec Petorore papia namba 2 ira miti bâbâsifuc ŋic jaŋere fuŋne bataniŋkehuc qâreŋkekicne, dâŋ ijaha tucne Judare papiao qâreŋkekicne.
Miti mamana jaŋere guruo bâbâsifuc ŋic fuambiŋ jaŋe pepec sâko erâ qâsuahuc mamakâc sâko erâ miti sisipiric gie bambiŋ. Eme Judare papia qâreŋkewec qâreŋŋic eki fuŋne‐jeŋic bataniŋkehuc miti mamana uŋ sawaŋ ejarehuc qâreŋkewec.
1
Mumuʒâwe â jambuŋdâŋ
Juda no Jesu Kristore kiŋaŋ qaqa â Jakobore ɋa. Mitio hefârec‐ŋoparâ Anutu Mamacte jauŋko râec‐ŋoparâ Jesu Kristore biŋe qacŋopakicne ŋoŋere papia ʒi qâreŋkekopac. Mat 13:55 Ŋoŋerao uruc jauŋ, wama â maŋjauŋ fua bâbâriŋ fuahuc fozejec. Pet II 1:2
Bâbâsifuc ŋic jaŋere dâŋ
(Pet II 2:1–7)
Âgo biaŋfâc‐nane, miti wirec‐nâŋecte qâreŋke‐ŋarepemurâ boc enareekac. Ehuc mitiŋic mamanasiŋte hata fosanaŋkeocte biricke‐nârekicne i sifuckezacte sasanaŋ bâfuarâ juju gie baniŋte irec faŋdâŋ qâreŋke‐ŋarepemurâ dameŋ‐nane maickekac. Tim I 1:18; Pet II 1:5; 2:21 Ŋic gâcne guru‐ŋeŋicko kamic kamic raʒimbiŋ, jaŋe fuŋne‐jeŋic qanaŋ ʒiŋuc qâreŋkekicne: Ŋic miti tâmiric, nâ areŋ juhuc sasec gie baeŋgopieŋ, ehuc wiac‐jeŋic Anuture jauŋdâŋzi foŋkehuc fekicne sâko‐nâŋec mocjaha, Wofuŋ‐nâŋec Jesu Kristo hâcne e mickeeŋgopieŋ. Gal 2:4; Pet II 2:1
Mârâc jaha okacne fisi‐jarewec jaŋere dâŋ
Ŋoŋe dâŋ mana‐fâreeŋgopieŋ ijaha manasu‐ŋarepe. Wofuŋ e Israe ŋicguru Aigita mâreŋkonec batarac‐joparâ ʒâhec dâŋticne qikiŋnembiŋ i jaŋe behec‐jopame sipirickembiŋ. Ʒar 14:35; Kor I 10:5; Pet II 1:12 Erâ aŋelo soŋaŋ gie‐jeŋic hetararâ hae mâreŋ‐jeŋic behembiŋ, jaŋe okac dameŋ sâkore woŋec foniŋte kâpâcwâru fofo sanaŋzi dapâczi ɋoroc‐jopawec. Fuf 6:1; Joh 8:44; Pet II 2:4, 9 Erâ Sodom, Gomora â hae rârec rârec ŋerawec, irec ŋic jaŋe ŋic keci jaŋe iŋucne sasec kosa ehuc mamakâc fuŋmoc bâfuapie ʒocsanaŋko behec‐jopame humbiŋ juŋgopieŋ, i hâhâwic râe‐nâreocte iŋuc ewec. Fuf 19:4–25; Pet II 2:6, 10
Miti sisipiric ŋic jaŋere dâŋ
Eme sifu ŋic keci jaŋe wâc iŋuc jaha, guŋko jujune tinac erâ sahaczi mamakâc eeŋgopieŋ, erâ fekicne ro waha âte ejarehuc tatamachec jaŋe wâc musuac‐jopaeŋgopieŋ. Pet II 2:10 Mikae e aŋelo fekicnezi Mose qâŋɋâŋ‐ticnere Sataŋhec iiriac erâ mu qaqatarac ehuc Sataŋ dâŋ sâqocne âzâcneocte maname quŋkeme ʒiŋuc sawa muwec: “Wofuŋzi okacne bazu‐garezejec.” Dan 12:1; Ʒek 3:2; Pet II 2:11 10 Ŋic keci jaŋe ine wiac kâuc baeŋgopieŋ i kosa musua‐fâreeŋgopieŋ, â qowi jaŋere sâc tinac erâ mâc maŋjeŋiczi manaeŋgopieŋ ira ine sâqorerâ sipirickeeŋgopieŋ. Pet II 2:12 11 Jei, jaŋe juku wenac eniŋmu? Jaŋe Kaiŋte hata âteeŋgopieŋ, â moneŋ mafare harac ehuc Bileamte bâbâsifuc bâfuaeŋgopieŋ, â Kora pepec‐ticnere sipirickewec iŋuc jaha pepec‐jeŋicte sipirickeeŋgopieŋ. Fuf 4:8; Pet II 2:15; Ʒar 31:16; 16:22 12 Ŋic i jaŋe hâcne nânâ qowire harac ehuc fisi tutumaŋ‐ŋeŋic hehegâpârene, mimi tâmiric nâ areŋ eene, karorac hoe mi hehuc mâc mâŋâŋzi ficneme rame arictac eekac irec sâcko jujune, jâc garaŋ garaŋne, fâri tâmiric, hâsi fâri hâmokicne, qâqâfiene, ŋic iŋucne tinac hâcne, Eʒek 34:8; Pet II 2:13 13 hâwec siri ʒocnehec bazu bâfeŋ eekac iŋucne, jaŋacne sâqocne miminehec qâqâtâtiene, bâpiŋ qâsoriekicne iŋucne, duŋdapâc fofo sanaŋ i jaŋere biŋe hâcne bâfuakicne. Jes 57:20; Pet II 2:17
Enokozi okac dameŋte findaŋdâŋ muwec
14 Adamte oso gitecne fua warekupie 7 eha Enoko fuawec, eme eki hâcne ŋic iŋucne jaŋere findaŋdâŋ ʒiŋuc muwec: “Wofuŋ e tiri ŋicfâc‐ticne guru hâhâwicne jaŋehec fisizokac, Fuf 5:21; Sâc 33:2; Ʒek 14:5 15 erâ ŋic mâmâc sasawa fuŋne‐jeŋic bataniŋkehuc ŋic sindaŋne jaŋe sindaŋ‐jeŋicte okacne bazu‐jareocmu. Ŋic sindaŋne miti tâmiric jaŋe wiac gâgâpâcne bocjaha mu bac eeŋgopieŋte katucne fisi‐jareocmu hâcne.” Mat 25:31 16 Ŋic izi mu qâtimbucne, isoc qaisocne, sasec fuŋne fuŋnere heʒâkiriŋkerâ jujune, pepecdâŋ mumune, ŋic moneŋ mafare mu bâmiriŋ eejarene, iŋuc hâcne jueŋgopieŋ. Pet II 2:10, 18
Uŋsawaŋ dâŋ
17 Âgo biaŋfâc‐nane, ŋoŋe ine Wofuŋ‐nâŋec Jesu Kristo aposolofâc‐ticne jaŋe qanaŋ dâŋ mumbiŋ, irec manasuhuc junʒepieŋ. Pet II 3:2 18 Jaŋe kecʒiŋuc ŋazahuc jumbiŋ: “Dameŋ bembeŋkeme ŋic âke sisicne fuarâ miti imackehuc sasec gie‐jeŋicte heʒâkiriŋkerâ juniŋmu.” Tim I 4:1; Pet II 3:5 19 Ŋic iŋucnezi hâcne fâfâuc bâfuaeŋgopieŋ, erâ Mâro tâmiric maŋ qâŋɋâŋne jueŋgopieŋ. Kor I 2:14 20 Jorocfâc‐nane, ŋoŋe ine tiri mamanasiŋ fârine izi ŋesiŋ ŋeŋarehame sanaŋkerâ junʒepieŋ. Ehuc Tiri Mârorao roweckerâ numuhuc junʒepieŋ. Kol 2:7; Tes I 5:11 21 Iŋuc ehuc Anuture maŋjauŋko aimuŋ junʒepieŋ. Erâ Wofuŋ‐nâŋec Jesu Kristo uruc jauŋ‐ticne fua tâcneme juju sanaŋko fisiniŋte woŋec junʒepieŋ. 22 Ŋic miti bape behepe bajueŋgopieŋ jaŋe dopec‐jopanʒepieŋ. 23 Â gâcne jaŋere busâqoc manarâ rucŋeŋic bahuc bafic‐jopanʒepieŋ, ehuc qoruc‐jeŋic sâqocnezi hegâpârekicne i wâc bâec banʒepieŋ. Amo 4:11; Ʒek 3:2; Jak 5:19; Bar 3:4
Mumutara dâŋ
24 Âkesiŋ‐ŋopame docke pârâc tâmiric juhapie tatamac‐ticnao bahacmâc â ʒerihec râec‐ŋopaocte tâpiri focnekac, Tes I 5:23; Fil 1:10; Pet II 3:14 25 Anutu mocjaha hâcne, e Wofuŋ‐nâŋec Jesu Kristore erâ bâbâpiaŋ‐nâŋec juekaczi tatamac â eri qaraweŋ â sasanaŋ â tâpiri mârâc dameŋ tâmiricko focnewec iŋuc jaha ʒi focnekac, erâ focne rahuc juocmu sanaŋ. Jâmbomac. Rom 16:27; Tim I 1:17; Pet II 3:18

1:1: Mat 13:55

1:2: Pet II 1:2

1:3: Tim I 1:18; Pet II 1:5; 2:21

1:4: Gal 2:4; Pet II 2:1

1:5: Ʒar 14:35; Kor I 10:5; Pet II 1:12

1:6: Fuf 6:1; Joh 8:44; Pet II 2:4, 9

1:7: Fuf 19:4–25; Pet II 2:6, 10

1:8: Pet II 2:10

1:9: Dan 12:1; Ʒek 3:2; Pet II 2:11

1:10: Pet II 2:12

1:11: Fuf 4:8; Pet II 2:15; Ʒar 31:16; 16:22

1:12: Eʒek 34:8; Pet II 2:13

1:13: Jes 57:20; Pet II 2:17

1:14: Fuf 5:21; Sâc 33:2; Ʒek 14:5

1:15: Mat 25:31

1:16: Pet II 2:10, 18

1:17: Pet II 3:2

1:18: Tim I 4:1; Pet II 3:5

1:19: Kor I 2:14

1:20: Kol 2:7; Tes I 5:11

1:23: Amo 4:11; Ʒek 3:2; Jak 5:19; Bar 3:4

1:24: Tes I 5:23; Fil 1:10; Pet II 3:14

1:25: Rom 16:27; Tim I 1:17; Pet II 3:18