BARARUŊ DÂŊ
Johane e Efeso haeo juhuc Jesure kikefuŋfâc jurambiŋ jaŋe mamac ejarewec. Ejarehuc juhame mitire ʒika fuawec. Eme kia e Johane rorâ Patimo nucko bararâ kâpâcwâru bame ŋehuc juwec. Ŋehuc juhame Wofuŋzi juku wiac fuazokac i âzâcne jâutuc eme hone manac ewec. Erâ papiao qâreŋke‐fârewec. Wofuŋ Jesu e jahac mâreŋko juhuctecne, fifisi dameŋ‐ticne bembeŋkeha wiac fuazokac irec findaŋdâŋ gâcne muwec (Mataio gaŋ 24 â 25). Ine wiac fuazokac irec dâŋ neŋgocne sâko â maine mufuawec, ehuc mutaniŋkewecte sâcne mana ɋârâŋkehuc qâreŋkewec. Erâ moc ʒiŋuc: Wiac fuazokac irec dâŋne sawa maŋnao mi fuame binaŋ bahuc qâreŋkewec, wiac fuazokac irec hawarine maŋʒâŋe‐ticnezi mâmâc honewec. Wiac furune jâmbâŋ irec hawari fuŋne fuŋe honewec i mâreŋŋic nâŋâcne dâŋko bâtikiehuc qâreŋkewec. Eme sifu hawari wiac gâcne irec fuŋne mana jaŋgeŋkenaŋte emâmâŋkeeŋgopeneŋ. Erâ nâŋâc dâŋ gâcne i kâuc baeŋgopeneŋte Johanere findaŋdâŋ qâoma ecnerâ mi behepene fozejec. Dâŋ irec maŋnao uŋdâŋ â babasanaŋ dâŋ â maŋ babaafec dâŋ bocjaha fokac. Irec Johanere dâŋ soŋne hâcne i wâc gâbâ woserâ numuhuctecne giene banʒepeneŋ. Barahuc juhapene ʒâhec fârio qaocmu ira mana utuckehuc mana taranʒoŋgopeneŋ.
1
Mumuʒâwe dâŋ
Jesu Kristore mu bararuŋ dâŋ, dameŋ mi ʒoraha wiac fuaocte mukicne i kiŋaŋŋicfâcne jaza mutâc eocte Anutuzi Jesu mufuacnewec, eme eki aŋelo‐ticne soreme kiŋaŋŋic‐ticne Johane âzâcne jâutuc ewec. Dan 2:28, 29 Eme eki Anuture dâŋ â Jesu Kristore mumutaniŋ dâŋ hone manac eweczi manapaŋkehuc mufuawec. Bar 6:9 Eme findaŋdâŋ i wose‐jareocmu e jahacne mecne, â dâŋ mu qâreŋ ekicne manarâ maŋkeniŋmu jaŋe mecne, mâmâc juhâc qâhâmoniŋmu. Dameŋ bembeŋkekac hâcne. Bar 22:7, 10
Jambuŋ â mumuteŋ dâŋ
Johane no Asia mâreŋko kikefuŋ 7 juŋgopieŋ ŋoŋere papia ʒi qâreŋkekopac. Juweczi jukac erâ wâc wareocmu eraonec mecne, â mâro 7 eri ŋeŋefuŋ‐ticnao juŋgopieŋ jaŋeraonec mecne, Wah 3:14, 15; Jes 41:4; Bar 3:1; 5:6 â Jesu Kristo eraonec aki anonoc â wama ŋoŋerao fotâcnerâ fozejec. Eki hâcne mume sasanaŋ erâ wâc hâmockonec fafahare irec micne, â mâreŋ sâc ŋicwofuŋ jaŋere fekicne sâko jukac. E maŋjauŋ enârehuc socticnezi sâqocnaonec bâhoc‐nâporâ Mi Mâ 89:27, 37; 130:8; Jes 40:2; Joh 18:37; Kol 1:18; Heb 9:14; Bar 3:14; 7:14; 19:16 uucmaŋ‐ticnere kikefuŋfâc bacnâporâ Anutu â Mamac‐ticnere taha bapafâc junaŋte munârewec, erao hâcne eri qaraweŋ â tâpiri ɋuŋɋasaŋ fokaczi fohuc juzejec sanaŋ. Jâmbomac. Bar 5:10; Pet I 2:5, 9; Wah 19:6; Jes 61:6
Manaŋgopieŋ, e karorac faio warekac, eme ŋic sasawa ʒâŋe‐jeŋiczi honeniŋmu, â âkeckembiŋ jaŋe mâmâc honeniŋmu. Erâ mâreŋ sâc ŋic gurune gurune jaŋe ere kio mamakuc eniŋmu. Dâŋ i jâmbomac jâmbâŋ. Dan 7:13; Ʒek 12:10–14; Joh 19:37; Luk 23:27, 28 “Nonizia ʒâhec â bâbâni”, Wofuŋ Anutu e iŋuc mukac, e juweczi jukac erâ wâc wareocmu, e bapafâre hâcne. Wah 3:14; Jes 41:4; Bar 4:8; 21:6
Johane Patimo nucko maŋne ŋerisiewec
Johane no fific guguriŋte â uucmaŋte â Jesure woŋec jujure mâmâc qâtec‐ŋopahuc âgo babafic‐ŋeŋic juekopac. Eme no Anuture dâŋte â Jesu mutaniŋkepore Patimo nucko râecnupie ŋepo. 10 Ŋehuc Wofuŋte ʒoaŋko maŋ qâruru‐nane ropieme râpefuŋ‐naneo dâŋsâko qeŋfânâŋ iŋucne fuame 11 ʒiŋuc manapo: “Wiac honekomec i papiao qâreŋkerâ kikefuŋ 7 kecʒiŋuc jaŋerao râetec razejec: Efeso haeo â Simirna haeo â Peagamoŋ haeo â Tiatira haeo â Sarde haeo â Filadefia haeo â Laodikea haeo.” Bar 2:8; 22:13
Johanezi Jesure hawari honewec
12 Eme no ŋic dâŋ nazawec e honepemurâ fotikiepo. Fotikierâ lambe 7 golzi bakicne honepo. 13 Lambe ŋondeŋko moc domame honepo, e hawarine ŋic hawari tinac. Ŋaqi‐ticne ʒoricne waha domawec, â amecnao umbika golzi bakicne fowec. Eʒek 1:26; 8:2; Dan 7:13; 10:5 14 Qizec‐ticne â qizec susuc‐ticne qaŋqaŋ jâmbâŋ, kota hâpokicne, faroqac iŋucne, â ʒâŋe jahecne ʒoc bâruŋkeekac iŋucne tinac. Dan 7:9; 10:6; Bar 2:18; 19:12 15 Kike jahec‐ticne ine aeŋ ʒocko ʒahuc bâruŋkeekac iŋucne tinac â dâŋ hawari‐ticne opâ sâro fânâŋ tinac. Eʒek 1:24; 43:2 16 Mefâre‐ticnezi bâpiŋ 7 badomawec, â michawec‐ticnao sâqe momori moc bune râpene micnehec waha domawec, â ʒâŋemai‐ticne ine ʒoaŋ gereŋ gereŋne eekac iŋuc tinac tamaewec. Bar 2:12, 16; 19:15
Jesuzi Johane mu bâmiriŋ ecnewec
17 No hawari‐ticne iŋuc honerâ rândiŋkerâ kikefuŋnao hâmocne tinac fopo. Fohape mefâre‐ticne fai‐naneo râerâ ʒiŋuc nazawec: “Go mi hâwicguoc, ʒâhec bâbâni â juju rune no hâcne ʒi; Jes 44:6; 48:12; Dan 8:18; 10:15–19 18 manakic, no hâmorâ ɋârepozi juraʒihuc jupemu sanaŋ, erâ hâmoc â hârâc motâc‐jekicte ki noni bajuekopac. 19 Go wiac honemec â ʒiŋuczia fuakac â ʒâhec fuaocmu i mâmâc qâreŋke‐fârezemec. Jes 48:6; Dan 2:29 20 Erâ mefâre‐naneo bâpiŋ 7 i mecne â lambe 7 golzi bakicne mâmâc honemec, irec fuŋne gazape manac: Bâpiŋ 7 i kikefuŋ 7 jaŋere aŋelo, â lambe 7 ine kikefuŋ 7. Mal 2:7; Dan 2:29

1:1: Dan 2:28, 29

1:2: Bar 6:9

1:3: Bar 22:7, 10

1:4: Wah 3:14, 15; Jes 41:4; Bar 3:1; 5:6

1:5: Mi Mâ 89:27, 37; 130:8; Jes 40:2; Joh 18:37; Kol 1:18; Heb 9:14; Bar 3:14; 7:14; 19:16

1:6: Bar 5:10; Pet I 2:5, 9; Wah 19:6; Jes 61:6

1:7: Dan 7:13; Ʒek 12:10–14; Joh 19:37; Luk 23:27, 28

1:8: Wah 3:14; Jes 41:4; Bar 4:8; 21:6

1:11: Bar 2:8; 22:13

1:13: Eʒek 1:26; 8:2; Dan 7:13; 10:5

1:14: Dan 7:9; 10:6; Bar 2:18; 19:12

1:15: Eʒek 1:24; 43:2

1:16: Bar 2:12, 16; 19:15

1:17: Jes 44:6; 48:12; Dan 8:18; 10:15–19

1:19: Jes 48:6; Dan 2:29

1:20: Mal 2:7; Dan 2:29