1 “Efeso haeonec kikefuŋ aŋelo-jeŋicte dâŋ kecšiŋuc qâreŋkec: `Bâpiŋ 7 mefâre-ticnezi badomahuc lambe 7 golzi bakicne irec ŋondeŋnao rac warec eekac, eki gore šiŋuc mukac: 2 No eebapagere â giegere â sasanaŋgere fuŋne manaekopac. Goki ŋic sâqocne mana qâoma mi ejareekic. Eme irec hâcne ŋic tucne jaŋe, nâŋe aposolo, muhuc burec epie burec-jeŋicte fuŋne bataniŋkemeŋ. 3 Erâ sasanaŋhec juhuc nore erâ šârâ hâriŋ faio tatakic tâmiric jumeŋ. 4 Eme no ine wiac kecšiŋucte gore manape bahacnehec ekac: Go mârâc jaha maŋjauŋ fogarewec sâc ijaha dameŋ šiŋuczia mi fogarekac. 5 Mârâc jaha hahaŋko rahuc jumeŋzi miŋecgac wahakomec. Eme go irec manasurâ maŋge bârisierâ mârâc hatagao mocwâc âtezemec. Iŋuc mi etec no gorao fisirâ lambege bârâriepemu. Maŋge mi bârisietec iŋuc hâcne epemu. 6 Moc ine etec manape sâckeekac, Nikolao ŋicfâc-ticne jaŋe wiac epie takicguekac, ine no iŋuc jaha wâc takicnuekac. 7 Mârozi kikefuŋ dâŋ jazakac, i hazecneheczi manazejec. Moc e sasanaŋ gie baraku batarame jujujâcte fârine Anuture paradisi gieo fuaekac i râcnepe nâocmu.'

8 “Simirna haeonec kikefuŋ aŋelo-jeŋicte dâŋ kecšiŋuc qâreŋkec: `Ʒâhec bâbâni â hâmorâ ɋâreweczi gore šiŋuc mukac: 9 Go fific guguriŋ faio qafec qawahac juekic, i manakopac. Erâ go mâririgehec. Á Judaŋic gâcnezi dâŋ gâgâpâcne gazaeŋgopieŋ, i wâc manakopac. Erâ jaŋe Judaŋic jâmbâŋ mâcne, jaŋe Sataŋte ŋicfâc. 10 Go wiac šârâ hâriŋne mocwâc fua-gareocmu irec mi hâwicguzejec. Manakic, Sataŋ e eesâic fua-ŋareocte ŋoŋeraonec tucne kâpâcwâru ficko râec-jopaocmu. Eme ŋoŋerao fific guguriŋ šoaŋ gie bapa 10 fuaocmu. Goki ine miti paŋšâic jaha bajuku hâmotec juju sanaŋte eriduzi geroŋgupemu. 11 Mârozi kikefuŋ dâŋ jazakac, i hazecneheczi manazejec. Moc e sasanaŋ gie baraku batarame hâmoc namba tuzi mi imackeocmu.'

12 “Peagamoŋ haeonec kikefuŋ aŋelo-jeŋicte dâŋ kecšiŋuc qâreŋkec: Sâqe momori, micne ŋifec â ŋifec bajuekaczi gore šiŋuc mukac: 13 Go hae jukomec, irec fuŋne manakopac, ira Sataŋte hozi sanaŋ fokac. Go šâŋe biŋe-nane paŋnea bajuekic. Mupe rereŋ biaŋ-nane Antipa e hae-ŋeŋic Sataŋzi ŋeŋe juju eekac ira hâcne qambiŋ, eme go dameŋ ira no manasiŋnurâ mi dockemeŋ. 14 Erâ no gore manape piticne babahacnehec ekac. Gore haeo ŋic gâcne juŋgopieŋ, jaŋe Bileamte hata âteeŋgopieŋ. Bileam e Balakezi Israe bitiŋ râe-jareocte âzâcneme eki qafeŋ-jopame ɋâŋte šepec nâhuc sasecko sâqorembiŋ. 15 Eme gore haeo ŋic gâcne jaŋe Nikolao ŋicfâc-ticne jaŋere hata âtehuc sâc ijaha eeŋgopieŋ. 16 Irec go maŋge bârisiezemec. Iŋuc mi etecne no gorao picpac jaha fisirâ ŋic hâcne râsi ejarehuc micnanere šikazi jopapemu. 17 Mârozi kikefuŋ dâŋ jazakac, i hazecneheczi manazejec. Moc e sasanaŋ gie baraku batarame e mana soŋne gumepemu. Erâ qânâ qaŋqaŋ râcnepemu, ira šâŋe qâreŋ-ticne moc fome runezia buc manaocmu.'

18 “Tiatira haeonec kikefuŋ aŋelo-jeŋicte dâŋ kecšiŋuc qâreŋkec: `Anuture Ŋokâ šâŋene šocbâruŋ iŋucne â kikene aeŋ bâroŋ iŋucne, eki gore šiŋuc mukac: 19 No eebapagere â maŋ jauŋgere â mamanasiŋgere â giegere â sasanaŋgere fuŋne manakopac. Erâ mârâc ɋicwânšâŋge afecne fowec, ši ine fekac, i wâc manakopac. 20 Erâ no kecšiŋucte gore manape bahacnehec ekac: Goki ŋokac Isebe mana qâoma ecnetec eki, no porofete ŋokac, muhuc ŋicfâc-nane dâŋ qazu-jarehuc qafeŋ-jopame sasec gie bahuc ɋâŋte šepec nâeŋgopieŋ. 21 E maŋticne bârisieocte šâfo bacnepo, eme eki ine maŋticne bârisierâ sasec-ticne beheocte mi muekac. 22 Manakic, no irec mupe huc hâmoc fuacneme fozejec, â ehec sasec eec eeŋgopieŋ jaŋerao fific guguriŋ kâcɋene fuazejec. Ŋokacte sasec wiac mi behepie iŋuc hâcne ejarepemu. 23 Á naru motecfâc-ticne jaŋere mupe huc mimicnezi bâhâmoc-jopazejec. Iŋuc epe hae sâc opâ ruac jaŋe, noni maŋjeŋicte guruc tuturuŋ hone tara-fâreekopac, i mana taraniŋmu. No ŋic mâmâc sasawa juju bapa-ŋeŋicte okacne bazu-ŋarepemu.

24 `à `Tiatira haeonec ŋic gâcne ŋoŋe burecdâŋ i qikiŋneeŋgopieŋ, ehuc ŋic gâcne, Sataŋte fuŋne mana utuckeeŋgopeneŋ mueŋgopieŋ, jaŋe mi bafic-jopaeŋgopieŋ, ŋoŋere mupe mananiŋ: No tagi gâcne fai-ŋeŋicko mi râeckopac. 25 Eme wiac fonarekac i paŋnea bajuhapie fisizepac. 26 Moc e sanaŋkerâ nore eebapa i eraku etaraocmu, e noni tâpiri râcnepe qâpuc jaŋere micne erâ 27 aeŋ gunu bajuhuc soŋaŋ-jopaocmu. Ehuc mâreŋ kuši wiac qapene šaŋkeekac iŋuc ejareocmu. 28 No Mamac-nanezi tâpiri narewec iŋuc jaha e râcnepemu, erâ wâc bâpiŋ sâko šuhuckecnepemu. 29 Mârozi kikefuŋ dâŋ jazakac, i hazecneheczi manazejec.'