1 Iŋuc mume Elisazi muwec, “Wofuŋte dâŋ ʒi mananiŋ: Wofuŋ e ʒiŋuc mukac: Tomâcko dameŋ ʒiŋucne poroŋ uuc ɋaɋacne ŋemâc‐ticne mocjahare sâc i furine siliwa dâkâne moc â padi bâbâroŋte uucne ŋemâc‐ticne jajahecte sâc i furine siliwa dâkâne mocjahazia Samaria haere sac‐motâcko roniŋmu.” 2 Iŋuc mume ŋicwofuŋzi momori jaŋere micne meticnao rowecke jujec eki Anuture ŋic dâŋ ʒiŋuc muhuc âzâcnewec: “Wofuŋ e sambâŋ motâc baandaŋkeme wiac iŋucne sâcne fuaocmu me?” Iŋuc mume porofetezi ʒiŋuc âzâcnewec: “Go ʒâŋe fârigezi hone‐jâmbâŋkecmu, erâ sifu wiac i piticne moc mi nâhuŋgaŋkecmu.”

3 Eme ŋic wicsanaŋhec jahec â jahec jaŋe haesac motâcko ŋehuc jumbiŋ. Eme jaŋe hâcne jaŋackoaŋ nazaŋ gazaŋ erâ mumbiŋ, “Nâŋâc wemocte hâmocte woŋec sawa ʒira boc ŋenaŋmu?” 4 Iŋuc murâ mumbiŋ: “Nâŋâc haemaŋko raʒinaŋ, iŋuc murâ raʒinaŋmuo ine ira roroc fokacte hâmonaŋmu. Me ʒi jaha ŋenaŋ, iŋuc murâ ŋenaŋmuo ine hâmonaŋmu wâc. Irec nâŋâc sahac‐nâŋec qaisockehuc Siria ŋic jaŋere teuŋko ranaŋ. Eme jaŋe akic‐nâpozo murâ akic‐nâponʒepieŋ me nâpozo murâ nâponʒepieŋ.” 5 Iŋuc murâ hae fure pârâckeha Siria ŋic jaŋere teuŋko raniŋte hata fuŋkembiŋ. Eme rarâ Siria ŋic jaŋere teuŋ qaŋeŋnao fisirâ honepie ira moczi moc mi juwec. 6 Siria ŋic jaŋe Wofuŋzi ejareme keretac â becâsic momori guru sâko jaŋere fânâŋ manarâ jaŋe jaŋackoaŋ nazaŋ gazaŋ erâ mumbiŋ, “Manaŋgopieŋ, Israe ŋicwofuŋ e Hiti ŋicwofuŋ â Aigita ŋicwofuŋ sasawa rocjopame râsi fisi‐nâreŋgopieŋ hâcne.” 7 Iŋuc murâ hae fure pârâckeha wisembiŋ. Ehuc juju‐jeŋicte manabâc erâ qoruc boze â becâsic â doŋgi wiac‐jeŋic i teuŋko hetararâ wisembiŋ hâcne. 8 Eme ŋic wicsanaŋhec jaŋe teuŋ qaŋeŋnao fisirâ boze mocko raʒimbiŋ. Raʒirâ ira nânâ opâ fowec i nâmbiŋ. Ehuc siliwa â gol â ŋaqi qoruc fowec i rorâ bara soŋ‐kembiŋ. Ehuc risierâ boze mocko raʒirâ ira wiac fowec i wâc iŋuc jaha rorâ bara soŋkembiŋ.

9 Iŋuc erâ jaŋackoaŋ nazaŋ gazaŋ erâ mumbiŋ, “Nâŋâc wiac eŋgopeneŋ ʒi mi sâckekac. Ʒoaŋ gie bapa ʒi biŋe biaŋte ʒoaŋ. Eme nâŋâc niniŋkerâ woŋec ŋehapene hae ŋaferâ fureocmu ine okacne fisi‐nâreocmu. Irec nâŋâc ʒiŋuczia rarâ ŋicwofuŋte wiacfâc jazanaŋ.” 10 Iŋuc murâ ra haesac motâc soŋaŋ wira‐jarehuc ʒiŋuc jazambiŋ: “Nâŋe Siria ŋic jaŋere teuŋko rambeneŋ. Ehuc ira ŋic moc mi jume hone manac embeneŋ, me fânâŋ wiac moc mi manambeneŋ. Mâc, boze‐jeŋic sawa ine ŋeekac sâc iŋuc furu jaha ŋejec â becâsic â doŋgi ine niŋgiŋ‐jopakicne doma rambieŋ.” 11 Iŋuc jazapie haesac motâc soŋaŋ jaŋe wirapie ŋicwofuŋte wiacfâc jaŋerao rawec. 12 Eme ŋicwofuŋ e ŋafeo jaha faharerâ kiŋaŋ qaqafâc‐ticne jazarâ muwec, “Siria ŋic jaŋe râsi enârehuc wiac weniŋuc jaha eŋgopieŋ i ŋazape mananiŋ. Nâŋâc nânâre hâmoŋgopeneŋ i jaŋe manaŋgopieŋ. Erâ irec ʒiŋuc muhuc kâteo soŋkerâ foniŋte teuŋ‐jeŋic behembiŋ: ‘Jaŋe haeonec wahapie nâŋâc ɋâricne rocjoparâ haemaŋko raʒinʒepeneŋ.’ ” 13 E iŋuc mume kiŋaŋ qaqafâcne jaŋeraonec moczi ʒiŋuc muwec: “Ŋic gâcnezi becâsic gâcne domaŋgopieŋ ʒi jaŋeraonec memoc rocjoparâ raniŋ. Jaŋe juniŋmuo ine Israe ŋic ʒanʒaŋne ʒira ŋeniŋmu jaŋere sâc jaha juniŋmu, me hâmoniŋmuo ine biac sipirickembiŋ jaŋere sâc boc mi sirickeniŋmu. Ajoc, ŋic sorec‐jopapene ra honeniŋ.” 14 Iŋuc mume jaŋe keretac jajahec rorâ becâsic ɋeticke‐jarembiŋ. Iŋuc epie ŋicwofuŋzi ʒiŋuc jazahuc sorec‐jopawec: “Ŋoŋe rarâ hone‐hâmoniŋ.” 15 Iŋuc jazame jaŋe Siria ŋic bâjâpec‐joparâ raku Jordaŋko fisimbiŋ. Erâ ʒiŋuc honembiŋ: Siria ŋic jaŋe fâro faio wisehuc ŋaqi qoruc â ʒikare wiac gâcne hatao ititiŋkepie forawec. Kiŋaŋŋic jaŋe iŋuc honehuc risierâ ŋicwofuŋ dâŋ binaŋ ecnembiŋ.

16 Eme ŋic ŋokac jaŋe rarâ Siria ŋic jaŋere teuŋko nânâ mafa fowec i rofârembiŋ. Ehuc poroŋ uuc ɋaɋacne ŋemâc‐ticne mocjahare sâc irec furi i siliwa dâkâne moc râembiŋ â padi bâbâroŋte uucne ŋemâc‐ticne jajahecte sâc irec furi i Wofuŋte dâŋte sâcko siliwa dâkâne mocjaha jaha râembiŋ. 17 Eme ŋicwofuŋ e momori jaŋere micne meticnao hesiŋne jujec eki haesac motâc soŋaŋkeocte râewec. Eme ŋicwofuŋzi Anuture ŋictao fisime Anuture ŋiczi dâŋ muwec irec sâcko ŋic ŋokac jaŋe ira âtekupie hâmowec. 18 Anuture ŋic e ŋicwofuŋ ʒiŋuc hâcne âzâcnewec: “Tomâcko dameŋ ʒiŋucne Samaria haere sacmotâcko padi bâbâroŋte uucne ŋemâc‐ticne jajahecte sâc i siliwa dâkâne mocjahazi furine baniŋmu â poroŋ uuc ɋaɋacne ŋemâc‐ticne mocjahare sâc i siliwa dâkâne mocjahazia furine baniŋmu.” 19 Eme micne e dameŋ ira dâŋ ʒiŋuc bâtikiecnewec: “Wofuŋ e sambâŋ motâc baandaŋneocmuo wiac ʒiŋucne sâcne fuaocmu me?” Iŋuc muhame ʒiŋuc âzâcnewec: “Go ʒâŋe fârigezi wiac i hone‐jâmbâŋkecmu, erâ sifu wiac i piticne moc mi nâhuŋgaŋkecmu.” 20 Eme iŋuc hâcne fuacnewec. Ŋic ŋokac jaŋe haesac motâcko âtekupie hâmowec hâcne.