1 Porofete jaŋere motecfâc jaŋe Elisa âzâcnerâ mumbiŋ, “Manakic, goki micne banâretec jueŋgopeneŋ fic ʒi nâŋâcne sâc mi ekac. 2 Irec nâŋâc Jordaŋko rarâ ru sâc jâc ronʒepeneŋ. Ehuc ficnâŋec moc barâ ira ŋeŋe juju enʒepeneŋ.” Iŋuc mupie dâŋ ʒiŋuc bâtikie‐jarewec: “Sâcne, raniŋ.” 3 Iŋuc mume jaŋeraonec moczi ʒiŋuc âzâcnewec: “Go kiŋaŋ qaqafâcge nâŋehec razemec.” Iŋuc âzâcneme muwec, “Sâcne, no mâmâc ranaŋmu.” 4 Iŋuc murâ jaŋehec rawec. Eme jaŋe Jordaŋko fisirâ jâcsiec hembiŋ. 5 Eme ŋic moc e jâcsiec hehame râric‐ticnezi ŋeunuckerâ opâo huwec. Hume owackehuc muwec, “Opoŋ, bomboŋ‐nane, râric i ŋic mocte ropac!” 6 Iŋuc mume Anuture ŋiczi wiocnerâ muwec, “Wena hujec?” Iŋuc mume huwec ŋondeŋ i jâutume jâc piticne moc herâ râric huwec ira beheme hume râriczi afeckerâ wefu opâ faio fowec. 7 Iŋuc eme âzâcnerâ muwec, “Ajoc, roc!” Iŋuc âzâcneme meticne sicnerâ rowec.

8 Juku Siria ŋicwofuŋ e Israe ŋic jaŋehec ʒika qaocte kiŋaŋ qaqafâcne dâŋ ʒiŋuc muhuc jazawec: “Mâreŋ ŋondeŋ ira â ira teuŋ‐nane fozejec.” 9 Eme Anuture ŋic e Israe ŋicwofuŋtao dâŋ ʒiŋuc râeme rawec: “Rucge bahuc mâreŋ ŋondeŋ i mi jâuruzemec, Siria ŋic jaŋe ira huŋgopieŋ.” 10 Eme Israe ŋicwofuŋ e Anuture ŋiczi mâreŋ ŋondeŋ mutâcnecnewec ira ru baniŋte kiŋaŋŋic sorec‐jopawec. E iŋuc ehuc dameŋ sâc ŋeŋezic bâfuahuc juwec.

11 Eme Siria ŋicwofuŋ e wiac i honerâ mana mezac boc ewec. Erâ kiŋaŋ qaqafâcne hefârec‐joparâ ʒiŋuc jazawec: “Ŋoŋe nazaniŋ, nâŋâcnaonec mozi Israe ŋicwofuŋtao roweckerâ juhuc doc bacnâpoekac?” 12 Iŋuc mume kiŋaŋ qaqafâcne jaŋeraonec moczi dâŋ ʒiŋuc âzâcnewec: “O ŋicwofuŋ‐nane, ŋic moczi moc iŋuc mi eekac. Go guŋ fofo ficmaŋgao dâŋ muekic i porofete Elisa, Israe mâreŋko jukac, eki Israe ŋicwofuŋ âzâcneekac.” 13 Iŋuc âzâcneme muwec, “Ŋoŋe rarâ wena jaha jukac i honeniŋ, eme no kiŋaŋ sorec‐jopape rarâ ronʒepieŋ.” Iŋuc mume ʒiŋuc âzâcnembiŋ: “Manakic, e Dotaŋ haeo jukac.” 14 Iŋuc âzâcnepie becâsic â keretac â momori guru sâko sorec‐jopame ŋafeoa fisirâ hae i orâŋkembiŋ.

15 Ehame Anuture ŋic ere kiŋaŋ qaqazi furic uupicte fahare hurâ rahuc honeme momori â becâsic â keretac jaŋe hae i orâŋke‐fârerâ jumbiŋ. Kiŋaŋ qaqazi iŋuc honerâ muwec, “Opoŋ, bomboŋ‐nane, nâŋâc weniŋuc enaŋmu?” 16 Iŋuc mume ʒiŋuc âzâcnewec: “Mi hâwicguoc, nâŋâcnehec juŋgopieŋ jaŋe jaŋehec juŋgopieŋ i siric‐jopaŋgopieŋ.” 17 Iŋuc murâ Elisazi ʒiŋuc numuwec: “O Wofuŋ, no ʒiŋuc numu‐garekopac: Go ʒâŋe‐ticne bâtâcnetec ʒâŋe fifi eoc.” Iŋuc muhame Wofuŋzi ŋicmotec ere ʒâŋe bâtâcneme Elisa râreckerâ becâsic â keretac ʒocbâruŋhec tikio jupie honec‐jopawec. 18 Eme Siria ŋic jaŋe râsi fisicnepie Elisa e Wofuŋ ʒiŋuc muhuc numucnewec: “Go ŋic ʒi tiŋtuŋ bacjopacmurâ numu‐garekopac.” Eme Wofuŋzi Elisa nunumu‐ticnere sâcko tiŋtuŋ bacjopawec. 19 Eme Elisazi jazawec, “Hata ʒira mâcne, erâ wâc hae ʒi mâcne, bâjâpecnuniŋ; eme jowac‐ŋoparâ ra ŋic basaŋgopieŋ erao râec‐ŋopape.” Iŋuc murâ Samaria haeo jowac‐jopa rawec.

20 Eme Samaria haeo fisirâ izia Elisazi ʒiŋuc muwec: “O Wofuŋ, go ŋic ʒi jaŋere ʒâŋe bâtâcnetec mocwâc ʒâŋe fifi eniŋ.” Eme Wofuŋzi ʒâŋe‐jeŋic bâtâcneme ʒâŋe fifi ehuc Samaria hae ʒâʒâŋiŋko jumbiŋ i hone tarambiŋ. 21 Eme Israe ŋicwofuŋzi honec‐joparâ Elisa ʒiŋuc âzâcnewec: “Mamac‐nane, no jopape me?” 22 Iŋuc mume Elisazi dâŋ ʒiŋuc bâtikiecnewec: “Go mi jopazemec. Go ʒika â tepegezi ŋic kâpâcwâru bacjopameŋ jaŋe wemocko jopacmu, ʒi nânâ opâ hejarepie nârâ bomboŋ‐jeŋictao mocwâc risieniŋ.” 23 Iŋuc mume ʒepec sâko rike bâmoc ejareme nâpie râec‐jopame bomboŋ‐jeŋictao risiembiŋ. Eme irec Siria ŋic jaŋe Israe mâreŋko râsi mocwâc mi fisimbiŋ.

24 Juku Siria ŋicwofuŋ Beŋhadazi momorifâc‐ticne ʒeŋgoma biric‐joparâ micne bajareme ferâ Samaria hae somâckembiŋ. 25 Jaŋe Samaria hae somâckerâ fohapie hae ira roroc sâko fuarâ fowec. Ehame doŋgi mocte qizecnere furine siliwa moneŋ 80 râembiŋ â kâte basac râqâc piticne moc irec furine siliwa moneŋ 5 ewec. 26 Eme Israe ŋicwofuŋ e haesac faio fotâcneme ŋokac moczi owackerâ wiracnehuc muwec, “O ŋicwofuŋ‐nane, go baficnuc!” 27 Iŋuc mume ŋicwofuŋzi muwec, “Wofuŋzi mi baficguocmuo no weniŋucko sâcne baficgupemu? Padi qaqa tomaonec me waiŋ qaqa nombâŋkonec wiac mocwâc baficgupemu me?” 28 Iŋuc murâ ŋicwofuŋzi ŋokac ʒiŋuc wiocnewec: “Wemo wiac jaha egarekac?” Iŋuc wiocneme dâŋ ʒiŋuc bâtikiecnewec: “Ŋokac ʒizi ʒiŋuc nazawec: ‘Ŋokâge qikiŋnetec miŋecgac nanac, eme tomâcko ine nore ŋokâ nâzeperec.’ 29 Iŋuc mume ŋokâ‐nane rikerâ nâpec. Eme hae fureme ʒiŋuc âzâcnepo: ‘Ŋokâge qikiŋnetec nanac.’ Iŋuc mupe e ŋokâ‐ticne soŋkejec.” 30 Eme ŋicwofuŋ e ŋokacte dâŋ i manarâ haesac faio fotâcnehuc ŋaqi qoruc‐ticne bâsuckewec. Ehame ŋic ŋokac jaŋe ʒâŋe firâ honepie ŋicwofuŋ e ombâŋnao mateŋ qonaŋkerâ juwec. 31 Ehuc muwec, “Safati ŋokâ‐ticne Elisa ere qizeczi furu foocmuo Anutuzi bâtiŋnu rahuc juzejec.”

32 Eme Elisa e soŋaŋ jaŋehec ficticnao ŋembiŋ. Ŋehapie ŋicwofuŋ e ŋic moc sorewec. Eme kiŋaŋŋic e mi fisihame Elisazi soŋaŋ ʒiŋuc jazawec: “Ŋoŋe ʒika qaqa keci e upe‐nane qâtâcneniŋte kiŋaŋ sorec‐jopajec i moc manaŋgopieŋ me? Erâ mananiŋ, kiŋaŋŋic e fisihame ŋoŋe motâc herâ basanaŋkecnenʒepieŋ. Erâ ʒi bomboŋ‐ticnere kike fânâŋzi râpefuŋnaoa warekac i mi manaŋgopieŋ me?” 33 E soŋaŋ jaŋehec dâŋ iŋuc muhuc ŋehame ŋicwofuŋzi fisicnerâ muwec, “Manaŋgopieŋ, wiac hâhâwicne ʒi Wofuŋtaonec! No wemocte Wofuŋte woŋec boc ŋepemu?”