1 Siria ŋicwofuŋ ere momorifâc jaŋere micne sâko ʒâŋene Naemaŋ e kâcɋene‐ticnezi mana biaŋkecnehuc manacneme fewec. Naemaŋ e hâcne momori micne bajareme ʒika gie bahuc jumbiŋko Wofuŋzi mana‐jareme Siria ŋic jaŋe râsifâc‐jeŋic sanaŋke‐jare jumbieŋ. Eme momori wânʒâŋ ŋic e hâcne wicsanaŋ fuacneme ihec juwec. 2 Dameŋ ira Siria ŋic jaŋe ʒika hata juhuc Israe ŋic jaŋere mâreŋkonec naru piticne moc rombiŋ, eme naru eki Naemaŋ ŋonâŋ‐ticne kiŋaŋ qacnehuc juwec. 3 Juku naru eki hâcne ŋokac bomboŋ‐ticne ʒiŋuc âzâcnewec: “Bomboŋ‐nane e Samaria haeo porofete moc jukac ere maŋfuŋko jume muzac ine porofete eki wicsanaŋ‐ticne bâsomiezac.” 4 Naemaŋ e dâŋ i manarâ kâcɋene‐ticnere ficko ferâ âzâcne muwec, “Israe mâreŋkonec naru e dâŋ iŋuc â iŋuc mukac.” 5 Eme Siria ŋicwofuŋzi muwec, “Wiac sâcne, rac. No ine Israe ŋicwofuŋ ere papia moc qâreŋkerâ garepe bara râcnezemec.”

Eme rawec hâcne, ehuc siliwa moneŋ ŋemâc‐ticne 10* I 20 tauseŋ kinare sâc tinac ekac. â gol moneŋ 6 tauseŋ erâ hombaŋ ŋaqi 10, wiac iŋuc barâ rawec. 6 Eme Israe ŋicwofuŋ ere papia bara râcnewec ira dâŋ ʒiŋuc fowec: “Papia kecʒi bâfuacguhuc dâŋ ʒiŋuc mufua‐garezejec: Kiŋaŋŋic‐nane Naemaŋ wicsanaŋ bâsomiec‐necmurâ gorao sorepe fakac.” 7 Israe ŋicwofuŋ e papia i woserâ ŋaqi‐ticne bâsuckerâ muwec, “No Anutu, juju roro â juju bâbâfua me, irec ŋic keci e ŋicticnere wicsanaŋ bâsomiepemurâ dâŋ râeme warekac! Keci honeniŋ, wiac izi âki eha nohec ʒika bâfuaocte mâsi ekac hâcne.”

8 Israe ŋicwofuŋ e ŋaqi‐ticne bâsuckewec irec biŋe Anuture ŋic Elisa ere hazecko hume ŋicwofuŋtao dâŋ kecʒiŋuc râeme rawec: “Wemocte ŋaqige bâsuckekomec? Ŋic e norao soretec wareoc me, erâ Israe guruo porofete moc jukac irec fuŋne manazejec.” 9 Dâŋ iŋuc rame Naemaŋ e becâsic â keretac‐ticnehec ra Elisare ficko fisirâ becâsic bâniniŋ‐jopawec. 10 Eme Elisa e dâŋ kecʒiŋuc muhuc kiŋaŋŋic‐ticne soreme Naemaŋtao wahawec: “Go Jordaŋ opâo hurâ opâ arec 7 ruazemec. Iŋuc etec sahacge biaŋkeme sahac fâsâc erâ jucmu.” 11 Naemaŋ e ine dâŋ i manahuc mana gâpârerâ risiehuc kecʒiŋuc muwec: “No manasupac, e fickonec waharâ maŋfuŋ‐naneo ware domahuc Wofuŋ Anutu‐ticnere ʒâŋe riwaseckeocmu, erâ meticnezi qajaeŋ qahuc wicsanaŋ bâsomieocmu. 12 Damasko haeo opâ Abana â Farapa jahe Israe mâreŋte opâ sasawa siric‐jopa‐fârekopirec. Opâ ruarâ sahac fâsâc eere hata fome ira sâcne mi ruazapo me?” Iŋuc muhuc aaric sâko manarâ risie rawec hâcne. 13 Ehame kiŋaŋ motecfâcne jaŋe maŋfuŋnao rarâ ʒiŋuc âzâcnembiŋ: “Mamac, porofete e wiac ŋemâcne moc mutâcne‐gareme mi enʒaŋ me? Eme, ‘Opâ ruarâ sahac fâsâc ec,’ iŋuc sawa gazakac i wemocte mi reŋkecmu?” 14 Iŋuc mupie e hurâ Anuture ŋic ere micsâcko Jordaŋ opâo arec 7 fo utuckewec; eme izia sahac‐ticne fâsâehuc biaŋkerâ naru motec gegecne jaŋere sahac iŋucne ewec.

15 Fâsâerâ e jahacne â ŋicfâcne sasawa Anuture ŋic erao risiembiŋ. Erâ fe mai‐ticnao domahuc muwec, “Manakic, mâreŋ gâcnao nemu fârine moc mi juŋgopieŋ, Israe mâreŋko Anutu jukac e mocjahazi fârine, no iŋuc manakopac. Irec kiŋaŋŋicge no bubiaŋte wiac garezo ekopac i rozemec.” 16 Eme Elisazi muwec, “Wofuŋ kiŋaŋ qacneekopac e jâmbomac jukacte ere maio mukopac: No wiac i moc mi ropemu.” Ʒoɋac ecne‐bipieme sifu qikiŋnewec. 17 Iŋuc eme Naemaŋzi muwec, “I mukicte foha moc numu‐garepe: Manahaŋ kiŋaŋŋicge no becâsic jajaheczi ââsickene irec sâc mâreŋ mac narepie barazepac; no ocna juhuc nemu mâcne, Wofuŋ e sawa taha bâzi wiac rikecnehuc juzo mukopac. 18 Wiac mocjaha kecʒiŋuc sawa epe Wofuŋzi sifu mana urue‐narezejec: Kâcɋene‐nanezi nemu Rimoŋ taha nunumu wiac ecneocte ufuŋ‐ticnao feocmu, ehuc me ombâŋ‐naneo bâsiŋnehuc nemu Rimoŋ ere maio fodapeocmu, eme no iŋuc jaha nemu Rimoŋ ere maio fodapepemu, irec sawa Wofuŋzi mana urue‐narezejec.” 19 Eme dâŋ ʒiŋuc bâtikiecnewec: “Wamao razemec.”

Eme Naemaŋzi Elisa beherâ rame mi ʒoraha 20 Anuture ŋic Elisa ere kiŋaŋ motec Gehasizi ʒiŋuc manasuwec: “Bomboŋ‐nane e Siria ŋic Naemaŋzi wiac bawarewec i mi rohuc wemocte mâc soreme risiekac. Wofuŋ e jujâmbâŋkekacte no bâjâperâ gasacke rahuc eraonec wiac gâcne rozepac.” 21 Iŋuc murâ Naemaŋ bâjâpewec. Eme Naemaŋ e ŋic moc gasackehuc bâjâpeme hone taraocte keretackonec wahawec. Ehuc wiocnewec, “Wemo wiac?” 22 Wiocneme Gehasizi muwec, “Mâcne, bomboŋ‐nane e ʒiŋuc gazapemurâ sorecnujec: ‘Porofete jaŋere motecfâc jaŋeraonec ŋic jajahec miŋecne mac ʒi Eferaim tiki mâreŋkonec fisikopirec. Irec go siliwa moneŋ wezimuc mac â hombaŋ ŋaqi jajahec i sâcne jactenʒaŋ?’ ” 23 Iŋuc mume Naemaŋzi muwec, “Sâcne siliwa moneŋ bocjaha ʒi roc.” Iŋuc murâ fotariecnehuc siliwa moneŋ bocjaha i kânoŋ jajahecko ŋierâ micne ʒâfickewec, erâ hombaŋ ŋaqi jajahec i mâmâc rorâ kiŋaŋ qaqa jahec‐ticne jactewec. Eme jahe i barâ bâniepire Gehasizi râpefuŋ‐jekicko rawec. 24 Raku tikio fisirâ jaheraonec rorâ ficko râewec. Ehuc ŋic jahe sorec‐jofame risiepic. 25 Eme Gehasi e ficmaŋko ferâ bomboŋ‐ticnere maio domame Elisazi wiocnerâ muwec, “Gehasi go wena jumec?” Wiocneme Gehasizi muwec, “Kiŋaŋ qaqage no ira me ira moc mi rapac.” 26 Iŋuc mume Elisazi dâŋ ʒiŋuc bâtikiecnewec: “Ŋic e gohec bâbâfuac enicte keretac‐ticnaonec wahajec dameŋ ira maŋnanezi gohec mi jujec me? Go moneŋ â ŋaqi qoruc romeŋ hâcne. Erâ izi oliwa gie â waiŋ gie â lama bulimakao â kiŋaŋ qaqaŋic me ŋokac furine bazo murâ furine bac. 27 Ehame Naemaŋte wicsanaŋ gorao fotâcnerâ ɋâricfâcge jaŋerao wâc fohuc juzejec sanaŋ.” Iŋuc âzâcneme Gehasi e wicsanaŋ qaŋqaŋ jâmbâŋ sinou iŋucnehec ehuc bomboŋ‐ticnere ʒâŋe maionec hurâ rawec.