1 Juku porofete jaŋere motecfâc jaŋeraonec moc ere ŋonâŋzi Elisa wâsickehuc muwec, “Ŋowe‐nane kiŋaŋ qaqage e hâmowec. Erâ manakic, kiŋaŋ qaqage e Wofuŋ araŋ bacnehuc juwec. Ehame ʒi tofa‐nane bajukac ŋic eki ŋokâ jahec‐nane rocjofarâ kiŋaŋ qaqa bacjofaocte warejec.” 2 E iŋuc âzâcneme Elisazi dâŋ ʒiŋuc bâtikiecnewec: “No weniŋucko baficgupemu? Ficgao wemo wiac fokac i nazac.” Iŋuc mume ŋokaczi muwec, “Kiŋaŋ naruge no wiac moc mi fonarekac. Mâc, wokemaŋ ʒopo mocjaha jâmbâŋ ŋenarekac.” 3 Iŋuc âzâcneme Elisazi muwec, “Wiac go hurâ ra diguracfâcge jaŋeraonec ʒopo tacne bâfuacmu sâc rozemec. 4 Erâ ficgao risierâ motec jahecge jahehec motâc herâ ŋehuc ʒopo bafisicmu ira wokemaŋ i qoŋgiŋketec hurâ fuseme sâc bârârietec ŋezejec.” 5 Eme ŋokac e ŋokâ jahecne jahehec ficmaŋko raʒirâ motâc hewec. Erâ wokemaŋ qoŋgiŋkeme sâc ŋokâ jahecne jahe qosecne râcnepic. 6 Eme ʒopo i fuse‐fâreme ŋokâ‐ticne moc âzâcnerâ muwec, “Ajoc, ʒopo moc narec.” Iŋuc mume ŋokâ‐ticnezi muwec, “Qosackejec.” Ehame wokemaŋzi mâc wahahuc fowec i tâcnewec. 7 Iŋuc eme ŋokac e Anuture ŋic erao rarâ âzâcneme eki muwec, “Go rarâ wokemaŋ irec furine rorâ tofage bazuc. Eme tucne ŋeocmu izi ine go gahacne â ŋokâ jahecge dopec‐ŋopame junʒepieŋ.”

8 Dameŋ mocko Elisa e Sunem haeo ŋokac moc mafa sâkohec juwec ira rawec. Rame ŋokac e nânâ nâocte fotariecnewec. Irec juku dameŋ ira me ira hata iŋucpec fotâcnehuc fic ira ferâ nânâ nâjujec. 9 Iŋuc eme ŋokaczi ŋowe‐ticne âzâcnerâ muwec, “Manakic, no ŋic ʒi honepe Anuture tiriŋic moc ekac. E dameŋ sâc hata ʒira fotâcnehuc juekac. 10 Irec nâhâc ficbupuo maŋne piticne moc âke tâcnecnenac. Erâ ira fofo moc â tebo moc â ŋeŋe moc erâ lambe moc iŋuc râecnezeperec. Eme e dameŋ ira me ira nâhâcnao wareocmuo ine ira ŋeŋe juju ezejec.”

11 Eme dameŋ mocko fic ira fisirâ maŋne piticne ira ferâ waha fowec. 12 Fohuc kiŋaŋ qaqa‐ticne Gehasi âzâcnerâ muwec, “Sunem ŋokac e wiracnec.” Iŋuc mume Gehasizi wiracneme ra maŋfuŋ‐ticnao domawec. 13 Domame Elisazi kiŋaŋŋic‐ticne âzâcnewec, “Go ʒiŋuc âzâcnec: Honekic, go wiac sasawa ʒi enâcte‐fâremeŋ, irec nâhe wemo wiac jaha egarenacmu? Gore okacne ŋicwofuŋ me momori jaŋere micne moc sâcne dâŋ âzâcnenacmu me?” Iŋuc mupire ŋokaczi dâŋ ʒiŋuc bâtikiewec: “No ŋicfâc‐nane jaŋehec sâcne juekopac.” 14 Iŋuc mume Elisazi muwec, “Eme wemo wiac jaha ecnezo?” Mume Gehasizi dâŋ ʒiŋuc bâtikiecnewec: “No ʒiŋuc sawa honekopac: E ŋokâ moc mi jucnekac â ŋowe‐ticne e ŋicqizec jâmbâŋ.” 15 Iŋuc mume Elisazi muwec, “Wiracnec.” Iŋuc mume Gehasizi wiracneme fisi motâcko domawec. 16 Domahame Elisazi muwec, “Go juku dameŋ ʒiŋucne motec moc rorâ bajucmu.” Iŋuc âzâcneme ŋokaczi muwec, “Aricne, Anuture ŋic, bomboŋ‐nane, go kiŋaŋ naruge no mi eatucnuc.” 17 Eme ŋokac e juku ʒoaŋ dameŋ fuŋkehame Elisazi motecte âzâcnewec irec sâcko moc kiweckerâ rowec.

18 Eme motec e soka‐fârerâ ʒoaŋ mocko padi roro ehuc jumbiŋ ira mamac‐ticnerao rawec. 19 Rarâ mamac‐ticne wâsickehuc ʒiŋuc muwec: “O utu‐nane, utu‐nane!” Iŋuc mume mamac‐ticnezi kiŋaŋ qaqa‐ticne âzâcnerâ muwec, “Hâporâ neŋgoc‐ticnerao rac.” 20 Iŋuc âzâcneme kiŋaŋ qaqa e bafahare hâporâ neŋgoc‐ticnerao rawec. Eme neŋgoc‐ticnezi qicticnao râeme ŋeha guŋpitic eme motec e hâmowec. 21 Hâmome neŋgoc‐ticnezi rorâ bafe Anuture ŋic ere fofoo râewec. Râeme foha motâc herâ rawec. 22 Rarâ ŋowe‐ticne wiracnehuc muwec, “Go kiŋaŋŋic jaŋeraonec moc â doŋgi moc iŋuc râe‐naretec no Anuture ŋic erao biac rarâ risiepe.” 23 Iŋuc mume ŋowe‐ticnezi muwec, “Go miŋecgac wemocte erao racmu. Miŋecgac i mosa furune me sabata hombaŋ mi ekac.” Iŋuc mume ŋonâŋ‐ticnezi muwec, “Izi wemo eocmu.” 24 Eme ŋokac e doŋgi sate hecnerâ kiŋaŋŋic‐ticne ʒiŋuc âzâcnewec: “Go qowi ʒi ecnetec gasackezejec, uneŋ uneŋ mi juzejec. No nahac gazape ira sawa bâniniŋkezemec.” 25 Eme ŋokac e raku Anuture ŋiczi juwecko Karamele tikio fisiwec.

Eme Anuture ŋic e ŋokaczi fisime honerâ kiŋaŋ qaqa‐ticne Gehasi ʒiŋuc âzâcnewec: “Sunem ŋokac taicko warekac ocni, honec. 26 Go picpac jaha rarâ bâfuac. Ehuc ʒiŋuc wiocnec: ‘Go sâcne jukomec? Ŋowege e sâcne jukac me? Erâ motec e wâc sâcne jukac me?’ ” Eme ŋokaczi dâŋ ʒiŋuc bâtikiecnewec: “Sâcne jufâreŋgopeneŋ.” 27 Iŋuc murâ ra tikio Anuture ŋic erao fisirâ kike‐ticnao rorâ basanaŋkewec. Iŋuc eme Gehasi e ro bârârieocte warewec. Wareme Anuture ŋiczi muwec, “E busâqoc faio juhuc ekacte behetec eoc. Wofuŋ e wiac i hesoŋkehuc mi mufua‐narewec.” 28 Eme ŋokaczi muwec, “Bomboŋ‐nane, no motecte moc numu‐garepo me? Erâ, ‘Go mi eatucnuc,’ iŋuc mi gazapo me?” 29 Iŋuc mume Elisazi Gehasi ʒiŋuc âzâcnewec: “Umbikage jomarâ gunu‐nane rorâ rac. Ŋic i me i moc hatao bâfuac‐joparâ ‘ʒoaŋ biaŋ’ mugarepie okacne mi bâtikiezemec. Mâc raku gunu‐nane i motecte maio râezemec.” 30 Iŋuc mume motecte neŋgoczi muwec, “Wofuŋ e jujâmbâŋkekac â go wâc jukic, irec no mi behecgupemu.” Iŋuc mume Elisa e faharerâ bâjâpewec. 31 Gehasi e bânierâ ra gunu i motecte maio râewec. Râeme ɋâreocte fânâŋ me qiriŋ wiac moc mi fuawec. Irec Gehasi e bomboŋ‐ticne bâfuaocte risierâ bâfuahuc ʒiŋuc âzâcnewec: “Motec e mi ɋârejec.”

32 Eme Elisa e fisirâ ficmaŋko raʒirâ motec e fofo‐ticnao hâmocne foha honewec. 33 Honerâ motâc herâ Wofuŋ numucnewec. 34 Erâ motecte faio ferâ masune motecte masuo iticnewec, erâ ʒâŋe â meticnezi iŋuc jaha efârerâ motecte faio fohame motecte sahaczi hâroŋkewec. 35 Iŋuc eme faharerâ ficmaŋkoa rac warec ewec. Izi motecte faio mocwâc ferâ waha fowec. Eme motec e kisiec arec 7 qawec, ehuc ʒâŋe fiwec. 36 Iŋuc eme Elisazi Gehasi hefârehuc muwec, “Go Sunem ŋokac wiracnec.” Wiracneme ŋokaczi Elisarao fisime âzâcnewec, “Ŋokâge rorâ bafaharec.” 37 Iŋuc âzâcneme ŋokac e Elisare kikefuŋko fodapehuc ʒâŋe mai‐ticne mâreŋko hetutuckewec. Iŋuc erâ fahare ŋokâ‐ticne rorâ hâpome rapic.

38 Eme Elisa e Giligali haeo mocwâc risiewec dameŋ ira Israe mâreŋko roroc fuarâ fowec. Eme porofete jaŋere motecfâc jaŋe maŋfuŋnao ŋehapie kiŋaŋ qaqa‐ticne Gehasi âzâcnerâ muwec, “Kuʒi kâcɋene herâ porofete motecfâc‐jeŋic jaŋere sic rikec.” 39 Eme ŋic moczi gieo romboc roocte ra juku kâteonec rumiwarec muc irec hândâŋne i honerâ bojazaŋ hâcne muhuc bocjaha ameckewec. Erâ haeo fisirâ wiac i wemo wiac i mi manahuc qame sic kuʒio huwec. 40 Eme i ŋic jaŋe nâniŋte hoŋke‐jarewec. Jaŋe ine sic i nâhuc owackerâ mumbiŋ, “O Anuture ŋic, kuʒi ʒira hâmoc fokac.” Iŋuc murâ sic i mi nâmbiŋ. 41 Eme Elisazi muwec, “Nânâ poroŋ uucne bawareniŋ.” Eme poroŋ i kuʒio hoŋkeme hume muwec, “Ajoc, ŋic hoŋke‐jarepie nâniŋ.” Eme kuʒi ira ine sisipiric moc mi fowec.

42 Eme Baali‐Salisa haeonec ŋic moczi gie‐ticne ɋâricnaonec padi bâbâroŋzi poroŋ 20 bakicne i erâ jacgoŋ ɋâricne kânoŋ‐ticnao ŋierâ Anuture ŋic e bafisicnewec. Eme Elisazi muwec, “Ŋic jaretec nâniŋ.” 43 Iŋuc mume kiŋaŋ qaqa‐ticnezi muwec, “No wiac ʒi weniŋuc ŋic 100 sâko ʒi jarepe sâcjopaocmu?” Iŋuc mume harierâ muwec, “Ŋic jaretec nâniŋ. Wofuŋ e ʒiŋuc hâcne mukac: ‘Jaŋe nâ tiwâ eniŋmu.’ ” 44 Iŋuc mume manarâ hejarewec. Eme ŋic jaŋe Wofuŋzi muwec irec sâcko nâ tiwâ embiŋ.