1 Josafata e Juda ŋicwofuŋ jume jara 18 eha Ahaba ŋokâ‐ticne Jehoramzi Samaria mâreŋko juhuc Israe ŋic jaŋere ŋicwofuŋ ewec. Erâ jara 12 ŋicwofuŋ gie bahuc juwec. 2 Ehuc Wofuŋte ʒâŋe faio wiac mamakâcne ewec. Erâ i neŋgoc mamac jahecne jahere sâc wâc mâcne, e mamac‐ticnezi Baali nemure wâtuŋ âkendâŋne rawec i bârârie‐fârewec. 3 Erâ sifu Nebatere ŋokâ Jeroboamzi Israe ŋic hehesic eniŋte qafeŋ‐jopawec hehesic ira qohotawec.

4 Moabi ŋicwofuŋ Mesa e lama gume bâsokac ejare jujec. Erâ mucnekicne sâc jarane jarane lama motecne 100 tauseŋ jaha rorâ Israe ŋicwofuŋtao râeme rajujec. 5 Juku Ahaba hâmome Moabi ŋicwofuŋzi Israe ŋicwofuŋ râŋgeŋkecnewec. 6 Iŋuc eme ŋicwofuŋ Jehoramzi dameŋ ira Israe ŋic biric‐jopa‐fâreocte Samaria hae beherâ jaŋerao rawec. 7 Ehuc Juda ŋicwofuŋ Josafatarao dâŋ râehuc muwec, “Moabi ŋicwofuŋ e râŋgeŋke‐narekac. Irec Moabi ŋic jaŋehec ʒika qanacte nohec sâcne racmu me?” Iŋuc mume dâŋ ʒiŋuc bâtikiecnewec: “No fâpemu. Erâ wiac sasawa fonarekac i gore biŋe jaha, no nahacne mecne, ŋicfâc‐nane mecne, â becâsicfâc‐nane mecne, nâŋe gore hâcne.” 8 Iŋuc murâ ʒuhuckerâ wiocnewec, “Hata weniŋucpec râsi fisi‐jarenaŋmu?” Iŋuc wiome Jehoramzi âzâcnewec, “Edom mâreŋ burocnaopec râsi fisi‐jarenʒepeneŋ.”

9 Iŋuc murâ Israe ŋicwofuŋ e Juda ŋicwofuŋ â Edom ŋicwofuŋ jahehec rawec. Eme jaŋe râsi fisi‐jareniŋte ʒoaŋ gie bapa 7 râreckehuc juhapie momori â qowi bacjopa rambiŋ jaŋere opâ omaewec. 10 Iŋuc eme Israe ŋicwofuŋzi muwec, “Opoŋ, Wofuŋ e ŋicwofuŋ jahec â moc nâŋâc ʒi Moabi ŋic jaŋere meo râec‐nâpoocte hefârec‐nâpowec.” 11 Eme Josafatazi muwec, “Ŋondeŋ‐nâŋecko Wofuŋte porofete moc mi jukac me? E ecnepene Wofuŋ mu wioc ecnezac!” Iŋuc mume Israe ŋicwofuŋte kiŋaŋ qaqafâc jaŋeraonec moczi dâŋ ʒiŋuc bâtikiecnewec: “Safatare ŋokâ Elisa e ʒira jukac, eki hâcne Eliare kiŋaŋ qaqa juwec.” 12 Iŋuc mume Josafatazi muwec, “Wofuŋte dâŋzi erao fokac wâc.” Irec Israe ŋicwofuŋ â Josafata â Edom ŋicwofuŋ jaŋe mâmâc jaha Elisarao humbiŋ.

13 Eme Elisazi Israe ŋicwofuŋ dâŋ ʒiŋuc âzâcnewec: “Go norao wemocte warekic? Go neŋgoc mamac jahecge jahere porofetefâc jaŋerao rac.” E iŋuc mume Israe ŋicwofuŋzi âzâcnerâ muwec, “Aricne, Wofuŋ e ŋicwofuŋ jahec â moc ʒi nâŋe Moabi ŋic jaŋere meo râec‐nâpoocte hefârec‐nâpowec.” 14 Iŋuc mume Elisazi muwec, “Anutu Tâpiri Ɋuŋɋasaŋ Wofuŋ e jujâmbâŋkeme kiŋaŋ qacneekopacte no Juda ŋicwofuŋ Josafata ere boc mi enareme muzac go wâc mi honecguzapo. 15 Ʒi ine gae hehe ŋic moc jowa wareniŋ.” Eme gae hehe ŋiczi fisirâ gae heme Wofuŋte tâpirizi Elisarao fotâcnewec. 16 Fotâcneme muwec, “Wofuŋ e ʒiŋuc mukac: ‘No opâwâc kereŋkekicne ʒira mupe opâ ʒâkâŋne ʒâkâŋne fua fezejec.’ 17 Wofuŋ e ʒiŋuc hâcne mukac: ‘Ŋoŋe mâŋâŋ me hoe moc mi honehapie opâzi wâc qârosoc ʒira fuse‐fâreocmu. Ehame ŋaŋacne â qowifâc‐ŋeŋic, bulimakaofâc‐ŋeŋic hâcne, ŋoŋe nâniŋmu.’ 18 Wofuŋzi wiac iŋucne eocte moc mi quŋkekac. Erâ Moabi ŋic jaŋe meŋeŋicko râec‐jopaocmu wâc. 19 E iŋuc eme ŋoŋe hae sacsanaŋhec sasawa â hae hone aŋacnehec i ro rauc efâreniŋmu. Ehuc jâc biaŋne i qafararâ opâ ʒaŋe sasawa i âte bâzicke‐fâreniŋmu. Erâ wâc mâreŋ dâkâne biaŋne i qânâzi hefuse‐fâreniŋmu.” 20 Hae fureme taha bâzi ee dameŋko opâzi Edom mâreŋkonec waharâ mâreŋ i sâcke‐fârewec.

21 Ŋicwofuŋ jaŋe Moabi ŋic râsi rojarehuc fisipie biŋe‐jeŋic manarâ ʒikare wiac babajune ŋicmotec â ŋic jâmbâŋ mâmâc hefârec‐jopapie fisipie mâreŋ‐jeŋicte mao biric‐jopambiŋ. 22 Eme Moabi ŋic jaŋe furic uupicte faharerâ honepie ʒoaŋzi wefurâ opâo âeckeme opâzi soc tinac bâbâroŋ ewec. 23 Iŋuc honerâ mumbiŋ, “Keci soc jâmbâŋ i, jâmbomac, ŋicwofuŋ jaŋe jaŋaczia qâqâhâmoc embieŋ. Ajoc, ŋicbureŋ, mafa‐jeŋic rozo ranaŋ!” 24 Iŋuc murâ Israe ŋic jaŋere teuŋko fisipie Israe ŋic jaŋe faharerâ jopapie wisembiŋ. Wisepie jopa jâpec ejarehuc Moabi ŋic afecne mi jopambiŋ. 25 Erâ hae imackehuc mâreŋ guecnehec ira qânâ ropie ferâ ŋefacke‐fârewec. Erâ opâ ʒâŋe sasawa âte bâzicke‐fârembiŋ â jâc biaŋne i ʒeŋgoma qafara‐fârembiŋ wâc. Iŋuc ekupie Kiri‐Harese hae mocjahazi sawa ŋewec. Ehame tacbaŋ qaqa ŋic jaŋe wâc fisirâ hae somâckehuc ʒika qambiŋ. 26 Eme Moabi ŋicwofuŋ e, sâcne mi sanaŋkepemu iŋuc honerâ ʒika bapa ŋic 700 rocjoparâ Edom ŋicwofuŋ maickehuc somâmaŋkonec wiseniŋte ʒika qambiŋ. Erâ sifu mi sanaŋkembiŋ. 27 Eme Moabi ŋicwofuŋ e mârâc ŋokâ‐ticnezi tucticne qarâ juocte mukicne e rorâ taha bâzi ririkere sac faio râerâ rikewec. E iŋuc eme Israe ŋic jaŋe manapie mamakâcne eme e beherâ mâreŋ‐jeŋicko risiembiŋ.