1 Juku Wofuŋzi ʒâʒâkiriŋ mâŋâŋko Elia sambâŋko bafeocte dameŋ bawec i bembeŋkeme Elia â Elisa jahe Giligali haeonec hahata rapic. 2 Ehuc Eliazi Elisa ʒiŋuc âzâcnewec: “Go ʒira juc; no ine Wofuŋzi Bete haeo rapemurâ sorecnukac.” Iŋuc mume Elisazi muwec, “Wofuŋ e jujâmbâŋkekac â go wâc jukic, irec erâ no mi behecgupemu.” Iŋuc mume jahe mâmâc jaha Bete haeo hupic. 3 Hu fisipire porofete jaŋere motecfâc Bete haeo jumbiŋ jaŋe Elisarao fisirâ ʒiŋuc âzâcnembiŋ: “Go miŋecgac Wofuŋzi bomboŋge gowac roocmu i moc manahuc jukomec me?” Iŋuc wiocnepie dâŋ ʒiŋuc bâtikie‐jarewec: “Oc, i manakopac, irec boc mi muniŋ.”

4 Iŋuc mume Eliazi ʒiŋuc âzâcnewec: “Elisa, go ʒira juc; no ine Wofuŋzi Jeriko haeo rapemurâ sorecnukac.” E iŋuc mume dâŋ ʒiŋuc bâtikiecnewec: “Wofuŋ e jujâmbâŋkekac â go wâc jukic, irec erâ no mi hetaracgupemu.” Iŋuc âzâcneme jahe mâmâc jaha raku Jeriko haeo fisipic. 5 Fisipire porofete jaŋere motecfâc Jeriko haeo jumbiŋ jaŋe Elisarao fisirâ ʒiŋuc âzâcnembiŋ: “Go miŋecgac Wofuŋzi bomboŋge gowac roocmu i moc manahuc jukomec me?” Iŋuc mupie dâŋ ʒiŋuc bâtikie‐jarewec: “Oc, i manakopac, irec boc mi muniŋ.”

6 Iŋuc mume Eliazi âzâcnewec, “Go ʒira juc, no ine Wofuŋzi Jordaŋ opâo rapemurâ sorecnukac.” E iŋuc mume Elisazi muwec, “Wofuŋ e jujâmbâŋkekac â go wâc jukomec, irec erâ no mi hetaracgupemu.” Iŋuc mume jahe mâmâc jaha ʒuhuckerâ rapic. 7 Ehame porofete motecfâc‐jeŋic jaŋeraonec 50 jaŋe wâc bâjâpec‐jofarâ jahehec mâmâc jaha rarâ taicko domahuc Jordaŋ opâ mecnao domahapire honec‐jofambiŋ. 8 Eme Eliazi ŋaqi‐ticne qâʒâkiriŋkerâ opâ qame tâcnerâ ŋifec â ŋifec ferâ domaha jahe kereŋnao fotâcnepic.

9 Fotâcnerâ Eliazi Elisa âzâcnerâ muwec, “No mi rocnuhapie gohec jukopackoa wemo wiac egarepemurâ manasukic i nazac.” Iŋuc âzâcneme Elisazi muwec, “Gore mârozi norao ɋârâŋnea fome rauckepemurâ enarekac.” 10 Iŋuc mume Eliazi muwec, “Go dâŋ mukomec i manape ŋemâcne ekac. Erâ rocnupie honecmuo ine mukomec iŋuc hâcne fua‐gareocmu. Mi honecmuo ine mukomec i wâc mi fua‐gareocmu.” 11 Iŋuc âzâcneme nazaŋ gazaŋ ehuc rahapire keretac â becâsic ʒocbâruŋnehec ututuŋ jaha fuarâ bârâwiŋ‐jofahuc Elia ʒâʒâkiriŋ mâŋâŋko rorâ sambâŋko bafembiŋ. 12 Bafepie Elisazi wiac i honerâ owackehuc muwec, “Mamac‐nane, mamac‐nane, Israere keretac â becâsicko rara ŋic!” Iŋuc murâ Elia honeocte fiipiewec.

Iŋuc erâ e jahacne ŋaqi qoruc rorâ fârehuc bâsuckeme dâkâne jajahec ewec. 13 Erâ Eliazi ŋaqi hetarame wahawec i rorâ risie ra Jordaŋ opâ mecnao domawec. 14 Ehuc Eliazi ŋaqi hetarame wahawec i rorâ ʒiŋuc muhuc opâ qawec: “Eliare Wofuŋ Anutu e wena?” Iŋuc muhuc opâ qame opâzi râwiŋnerâ ŋifec â ŋifec ferâ domaha fotâcnewec.

15 Eme Porofete jaŋere motecfâc Jeriko haeo jumbiŋ jaŋe domahuc honeku mumbiŋ, “Eliare mârozi Elisarao fotâcnekac hâcne.” Iŋuc murâ fisi bâfuarâ maŋfuŋnao mâreŋko fodapembiŋ. 16 Iŋuc erâ ʒiŋuc âzâcnembiŋ: “Manakic, kiŋaŋ qaqafâcge nâŋerao ŋic tâpirihec 50 juŋgopieŋ, jaŋe mana‐jaretec rarâ bomboŋge basanʒepieŋ. E Wofuŋte Mârozi ro baferâ tiki botâŋko me wâneŋ mocko behejec mecne.” Iŋuc mupie muwec, “Ŋoŋe mi sorec‐jopanʒepieŋ.” 17 Eme jaŋe fotariecnekupie fafierâ mume ŋic 50 sorec‐jopambiŋ. Eme jaŋe rarâ ʒoaŋ gie bapa jahec â moc basambiŋ, erâ sifu mi bâfuambiŋ. 18 Eme Elisa e Jeriko haeoa juhame risiepie jazarâ muwec, “Wiac no mi raniŋte ŋazapo i.”

19 Eme hae irec ŋic jaŋe Elisa ʒiŋuc âzâcnembiŋ: “Hae‐nâŋec ʒi biaŋne jâmbâŋ bakicne ŋekac i go gahac sâcne honekomec. Mocjaha, opâzi sâqocne â mâreŋ wâc guec tâmiric.” 20 Iŋuc mupie muwec, “Râqâc ɋâricne moc hâwec râerâ baware‐nareniŋ.” Iŋuc mume rorâ râcnembiŋ. 21 Râcnepie e opâ ʒâŋeo rarâ hâwec beheme hume muwec, “Wofuŋ e ʒiŋuc mukac: No opâ ʒi bâpiaŋkekopacte hâmo qanʒaraŋ tâmiric fua sawec erahuc junʒepieŋ.” 22 Irec Elisazi dâŋ muwec irec sâcko opâ i dameŋ ʒiŋuczia hucukic tâmiric foweczi fokac jaha.

23 Eme Elisa e Jeriko haeonec Bete haeo fewec. E hatao fehame motec piic piic gâcne jaŋe haeonec waharâ bâfuahuc mu ʒoraŋ ecnehuc mumbiŋ, “Utu pârâc go ferac! Utu pârâc go ferac!” 24 Jaŋe iŋuc epie e forisierâ honec‐jopahuc Wofuŋte ʒâŋeo sâwec‐jopawec. Sâwec‐jopame bea* Qowi mimicne â kâcɋene mocte ʒâŋe. ŋokacne jajahec jahe kâteonec wefurâ motec 42 kisuc qâsuc‐jopapic. 25 Eme irecnec ine Karamele tikio rawec. Erâ fotâcnerâ Samaria mâreŋko risiewec.