ŊICWOFUŊ II
1
Ahaʒia hâmoc‐ticnere binaŋ
Ahaba hâmome Moabi ŋic jaŋe Israe ŋic râŋgeŋke‐jarembiŋ. Eme Ahaʒia e Samaria mâreŋko juhuc ficticne feŋgaŋne 2 irec sac âte tantaŋnerâ waha qarâ huc bame fowec. Fohuc kiŋaŋŋic‐fâcne ʒiŋuc muhuc jaza sorec ewec: “Ŋoŋe rarâ Ekoroŋte nemu Baali‐Ʒebubu e huc ʒizi behecnuocmu me mâcne irec mu wioc ecneniŋ.” Ehame Wofuŋte aŋelozi Tisibe ŋic moc ʒâŋene Elia ʒiŋuc âzâcnewec: “Ajoc, go faharerâ ra Samaria ŋicwofuŋte kiŋaŋŋicfâc bâfuac‐joparâ ʒiŋuc jazac: ‘Hâc, ŋoŋe manapie Israe mâreŋko Anutu mi jukac irec Ekoroŋte nemu Baali‐Ʒebubu e mu wioc ecneniŋte raŋgopieŋ?’ Irec Wofuŋ e ʒiŋuc mukac: ‘Go fofogaonec mi faharehuc hâmo‐jâmbâŋkecmu hâcne!’ ” Iŋuc âzâcneme Elia e faharerâ rawec.
Eme kiŋaŋŋic jaŋe ŋicwofuŋtao risiepie wio‐jarerâ muwec: “Ŋoŋe wemocte risieŋgopieŋ?” Mume jaŋe âzâcnerâ mumbiŋ: “Ŋic moczi fisi bâfuac‐nâporâ ʒiŋuc nâzâjec: ‘Ŋoŋe ŋicwofuŋ sorec‐ŋopajec erao mocwâc risierâ ʒiŋuc âzâcneniŋ: Wofuŋ e ʒiŋuc mukac: Go manatec Israe mâreŋko Anutu mi jukac irec Ekoroŋte nemu Baali‐Ʒebubu e mu wioc ecneniŋte ŋic sorec‐jopakomec? Irec go fofogaonec mi faharehuc hâmo‐jâmbâŋkecmu hâcne.’ ” Jaŋe iŋuc âzâcnepie wio‐jarerâ muwec, “Ŋic e weniŋucnezi fisi bâfuac‐ŋoparâ dâŋ i ŋazajec?” Mume dâŋ ʒiŋuc bâtikiecnembiŋ: “E qizec susuc‐ticne ʒoricne, erâ umbika moc becsahaczi bakicne i ombâŋnao jomajec.” Iŋuc âzâcnepie muwec, “I Tisibe ŋic ʒâŋene Elia eki hâcne.”
Ŋicwofuŋzi iŋuc murâ momori 50 jaŋere micne moc e momorifâc‐ticne 50 jaŋehec sorec‐jopawec. Eme Elia e tiki mocte botâŋnao ŋehame momori jaŋere micnezi fe fisirâ ʒiŋuc muhuc âzâcnewec: “O Anuture ŋic, go ŋicwofuŋzi hufâcmurâ mukac.” 10 Iŋuc mume Eliazi momori 50 jaŋere micne dâŋ ʒiŋuc bâtikiecnewec: “No Anuture ŋic jukopacko sambâŋkonec ʒoc waharâ go gahacne â momorifâcge 50 ŋoŋe ʒâseŋ‐ŋopazejec.” Iŋuc muhame mi sambâŋkonec ʒoc waharâ micne e jahacne â momorifâc‐ticne 50 ʒâseŋ‐jopa‐fârezejec i.
11 Ehame ŋicwofuŋ e mocwâc momori 50 jaŋere micne moc e momorifâc‐ticne 50 jaŋehec sorec‐jopawec. Eme momori jaŋere micne e ferâ Elia ʒiŋuc muhuc âzâcnewec: “O Anuture ŋic, go ŋicwofuŋzi biac jâmbâŋ hufâcmurâ mukac.” 12 E iŋuc mume Eliazi dâŋ ʒiŋuc bâtikiecnewec: “No Anuture ŋic jukopacko sambâŋkonec ʒoc waharâ go gahacne â momorifâcge 50 ŋoŋe ʒâseŋ‐ŋopazejec.” Iŋuc muha izia Anuture ʒoczi sambâŋkonec waharâ micne e jahacne â momorifâcne 50 ʒâtâmirec‐jopawec.
13 Ehame ŋicwofuŋ e harierâ momori 50 moc jaŋere micne e momorifâcne 50 jaŋehec sorec‐jopawec. Eme momori 50 i jaŋere micne eki fe fisirâ Elia dieŋzi hecnewec. Ehuc mu wâwâsic ecnehuc muwec, “O Anuture ŋic, go sifu juju‐nane â kiŋaŋ qaqafâcge ʒi jaŋere juju i honetec wiac furi sâko ezejec. 14 Manakic, sambâŋkonec ʒoczi waharâ momori 50 jaŋere micne jajahec â gurufâc‐jekic 50 guru jajahec jaha mâmâc ʒâtâmirec‐jopawec; nore juju ine sifu honetec furi sâko ezejec.” 15 Iŋuc mume Wofuŋte aŋelozi Elia ʒiŋuc âzâcnewec: “Go ehec huc; go ere mi hâwicguoc.” Iŋuc mume Elia e faharerâ momori jaŋere micne ehec ŋicwofuŋtao hupic. 16 Hu fisirâ ŋicwofuŋ ʒiŋuc muhuc âzâcnewec: “Wofuŋ e ʒiŋuc mukac: ‘Go Israe mâreŋko Anutu mi jume tinac Ekoroŋte nemu Baali‐Ʒebubu e mu wioc ecneniŋte kiŋaŋ sorec‐jopameŋte fofogaonec mi faharehuc hâmo‐jâmbâŋkecmu hâcne.’ ”
17 Eme ŋicwofuŋ e Eliazi Wofuŋte dâŋ muwec irec sâc hâmowec. E hâmome ŋokâ‐ticne moc mi juwecte ɋaticne Jehoramzi tucticne qawec. I Josafata ere ŋokâ Joramzi Juda ŋicwofuŋ jume jara jajahec eha iŋuc fuawec. 18 Ahaʒiazi wiac gâcne ebac ewec i ʒeŋgoma Israe ŋicwofuŋ jaŋere Binaŋ Qâhâcko qâreŋke‐fârekicne.