1 Ahabare ŋokâfâc 70 jaŋe Samaria haeo jumbiŋ. Eme Jehu e papia ʒiŋuc qâreŋkerâ Samaria haeo haere fekicne â soŋaŋ, erâ Ahabare ŋokâfâc jaŋere wiʒec jumbiŋ jaŋerao râeme rawec: 2 “Bomboŋ‐ŋeŋicte ŋokâfâc jaŋe ŋoŋehec juŋgopieŋ, erâ keretac â becâsic foŋarekac â hae sacsanaŋ‐ticnehec â ʒikare wiac foŋarekac wâc. 3 Irec ŋoŋe bomboŋ‐ŋeŋicte ŋokâfâc jaŋeraonec biaŋne â gie irec sâc moc bâwosâenʒepieŋ; ehuc mamac‐ticnere ŋicwofuŋ ŋeŋeo hepie ŋeme bomboŋ‐ŋeŋicte kikefuŋfâc jaŋere erâ ʒika qanʒepieŋ.” 4 Eme jaŋe mâretec jâmbâŋ hâwic‐jopame ʒiŋuc mumbiŋ: “Ŋicwofuŋ jajahec jahe mi sanaŋkepicte nâŋâc wâc sâcne mi sanaŋkenaŋmu.” 5 Iŋuc murâ ŋicwofuŋ ficte micne juwec â haere micne â soŋaŋ, erâ motec jaŋere wiʒec jaŋe mâmâc sasawa Jehurao dâŋ râehuc ʒiŋuc mumbiŋ: “Nâŋe gore kiŋaŋ qaqafâc, irec wiac i me i enaŋte munâretec efârenaŋmu. Nâŋe ŋic moc ŋicwofuŋ mi âkendâŋnenaŋmu. Wiac manatec sâckekac sâc enârec.” 6 Iŋuc mupie Jehu e papia arec moc ʒiŋuc muhuc qâreŋkerâ râeme rawec: “Ŋoŋe norao roweckeŋgopieŋko â micnane reŋkeniŋte afeckeŋgopieŋko ine tomâcko dameŋ ʒiŋucne bomboŋ‐ŋeŋicte ŋokâfâc jaŋere qizec barâ Jesere haeo ʒira fisinʒepieŋ.” Ŋic kâcɋene i jaŋe ŋicwofuŋte ŋokâfâc 70 jaŋe gume jowac ejarehapie sokambiŋ hâcne. 7 Eme papiazi fisi bâfuac‐jopame ŋicwofuŋte ŋokâfâc 70 jaŋe sasawa joparâ qizec‐jeŋic i kâdocko ropie hume Jehurao Jesere haeo râepie rawec. 8 Ehame kiŋaŋŋic moc e Jehurao fisirâ ʒiŋuc âzâcnewec: “Ŋicwofuŋte ŋokâfâc jaŋere qizec i biac bawarembiŋ.” Iŋuc âzâcneme muwec, “Haesac motâcko guru jajahec guruckepie ŋeha hae fureoc.” 9 Izi hae fureme ra domahuc ŋic ŋokac dâŋ ʒiŋuc jazawec: “Ŋoŋe bahacmâc, â noni ine bomboŋ‐nane râsi ecnehuc doc bapo. Eme ʒi jaŋe mozi jopa‐fârewec? 10 Ŋoŋe ʒiŋuc manapaŋkeniŋ: Wofuŋ e Ahaba kikefuŋfâcne jaŋere dâŋ sasawa muwec i fârimâc mi eocmu. Wofuŋ e kiŋaŋŋic‐ticne Elia ecneme dâŋ muwec irec sâcko efârekac hâcne.” 11 Jehu e iŋuc murâ Ahabare kikefuŋfâc, ŋic fekicne â âgo fuŋfuŋfâc‐ticne erâ taha bapafâcne Jesere haeo jumbiŋ jaŋe ʒeŋgoma jopa‐fârewec.

12 Iŋuc erâ fahare Samaria haeo rawec. Raku hatao lama soŋaŋ jaŋere lama kanʒaŋ bâbâtâc fic ŋewec ira 13 Juda ŋicwofuŋ Ahaʒiare soctofafâc bâfuac‐jopawec. Ehuc wio‐jarerâ muwec, “Ŋoŋe more ŋicfâc?” Wio‐jareme mumbiŋ, “Nâŋe Ahaʒiare soctofafâc. Nâŋe ŋicwofuŋ ɋârifâc‐ticne, erâ neŋgoc ŋokacwofuŋ ɋâricfâc‐ticne iqic‐jopanaŋte wahaŋgopeneŋ.” 14 Iŋuc mupie Jehuzi muwec, “Ɋâricne rocjopaniŋ.” Iŋuc mume jaŋe ɋâricne rocjoparâ moc mi akic‐jopahuc ŋic 42 jaŋe ʒeŋgoma lama kanʒaŋ bâbâtâc fic ŋewecko nombâŋ moc fowec ira jopa‐fârembiŋ.

15 Eme irecnec rarâ Rekaba ŋokâ‐ticne Jonadaba e Jehu bâfuaocte warehuc juha bâfuarâ “ʒoaŋ biaŋ” mucnewec. Ehuc wiocnewec, “Nore maŋzi gorao fokac irec sâc jaha gore maŋzi norao fokac me?” Iŋuc wiocneme Jonadabazi dâŋ ʒiŋuc bâtikiecnewec: “Iŋuc hâcne.” Iŋuc mume Jehuzi muwec, “Iŋuc fokacko mege narec.” Iŋuc âzâcneme meticne sicnecnewec. Sicneme rorâ fâreme keretac‐ticnao feme domapic. 16 Ehuc Jehuzi muwec, “Nohec rarâ Wofuŋte erâ ʒoɋac‐nane fuakac i honezemec.” Iŋuc mume keretac‐ticnao mâmâc rapic. 17 Raku Samaria haeo fisirâ Jehu e Wofuŋzi Elia dâŋ âzâcnewec i deŋkeocte hae ira Ahabare kikefuŋfâc jumbiŋ jaŋe ʒeŋgoma jopaku jopa miziewec.

18 Iŋuc erâ ŋic ŋokac hetumaŋ‐joparâ ʒiŋuc jazawec: “Ahabazi Baali nemu kiŋaŋ qacnewec i wahakac â noni ine fehuc qacnepemu. 19 Irec Baali nemu porofetefâc‐ticne e fodapecneeŋgopieŋ â taha bapafâc‐ticne jaŋe sasawa hefârec‐jopaniŋ. No Baali nemu taha bâzi sâko rikecnezo ekopacte moczi moc mocko mi juzejec. Moc e taha bâzi ira mi juocmu e hâmo‐jâmbâŋkeocmu.” Jehu e Baali nemure araŋ bapafâc jaŋe bâsirowec‐jopaocte maŋkehuc eeatuc gie i bawec. 20 Ehuc muwec, “Baali nemure tutumaŋ dameŋ moc bâtirizo.” Iŋuc mume jaŋe dameŋ moc bâtirimbiŋ. 21 Eme Jehu e dâŋ râeme Israe mâreŋ sâckerâ rawec. Eme Baali nemure araŋ bapafâc jaŋeraonec moczi moc mi juhuc sasawa jâmbâŋ fisi‐fârembiŋ. Fisi‐fârerâ Baali nemure ufuŋko fekupie ufuŋ i fusucmarâ qiŋqiŋ qawec. 22 Eme Jehuzi ŋaqi soŋaŋ juwec ŋic e âzâcnerâ muwec, “Baali nemu araŋ bapafâc‐ticne jaŋere ŋaqi bawarec.” Iŋuc âzâcneme ŋic e ŋaqi‐jeŋic bawarewec. 23 Eme Jehu â Rekaba ŋokâ‐ticne Jonadaba jahe Baali nemure ufuŋko fepic. Ferâ Jehuzi Baali nemu araŋ bapafâc‐ticne dâŋ ʒiŋuc jazawec: “Ŋoŋe aimuŋ jaha hohone efâreniŋ. Wofuŋte kiŋaŋŋic moczi moc ŋoŋere ŋondeŋko ʒira mi ŋezejec, Baali nemure araŋ bapafâc ŋoŋe buc jâmbâŋ ŋenʒepieŋ.” 24 Iŋuc jaza‐fârerâ taha bâzi â qowi bâzi rikeocte raʒiwec.

Eme Jehu e ŋic 80 ufuŋ râpenao râec‐joparâ dâŋ ʒiŋuc jazawec: “Moc e ŋicguru kecʒi meŋeŋicko râec‐jopakopac jaŋeraonec moc manacneme wiseocmu e ŋic wiseocmu ere due baocmu.” 25 Iŋuc murâ qowi bâzi rikeme tarame izia soŋaŋ â micne jazarâ muwec, “Ajoc, ʒi ficmaŋko raʒirâ jopaniŋ, moczi moc mi wisezejec.” Iŋuc jazame soŋaŋ â micne jaŋe ʒikazi qâhâmoc‐joparâ râpenao behec‐jopambiŋ. Erâ Baali nemu ufuŋ maŋne ʒâʒâŋiŋ ira raʒirâ 26 ɋâŋwâtuŋ moc domawec i rorâ bawaha ʒocko rikembiŋ. 27 Ehuc Baali nemure ɋâŋ qâqâtâc â ufuŋ i hetâ qâtâtiepie sesucne fuarâ jawa mâreŋ ewec fokac jaha.

28 Jehu e iŋuc hâcne ehuc Israe maŋnao Baali nemu hetâtie‐fârewec. 29 Erâ Jehu e iŋuc ehuc sifu Nebatere ŋokâ Jeroboam ere hehesic i mi râpeckewec. Jeroboam e hâcne Israe ŋic ejareme Bete haeo â Daŋ haeo bulimakao motecnere hawari golzi bakicne ŋepic ira hehesic bâfuambiŋ. 30 Eme Wofuŋzi Jehu ʒiŋuc âzâcnewec: “Go nore ʒâŋe faio wiac sasawa etec biaŋke‐fârewec â nore maŋko dâŋ fowec irec sâcko Ahabare kikefuŋfâc wiac ejaremeŋte ɋâricfâcge fua fepie arecne 4 eocmu jaŋe Israere eri ŋeŋeo ŋenʒoŋgopieŋ.” 31 Erâ ine Jehu e Israere Wofuŋ Anutu ere sâcmutâc dâŋ i maŋticnezi sakarehuc ira mi ninipe‐hâmowec. E Jeroboamzi Israe ŋic ejareme hel esic bâfuambiŋ, hehesic i mi râpeckewec.

32 Eme dameŋ ira Wofuŋzi fuŋkerâ Israe dâkâne gâcne râpec‐jopawec. Iŋuc eme Haʒaelezi Israe mâreŋ ʒiŋuc irec rune bawahac‐jopa‐fârewec: 33 Gileade â Gadeŋic jaŋere mâreŋ sasawa Jordaŋ opâonec domarâ ʒoaŋ wewefunaopec rakac, erâ Rubeŋ â Manase ŋic jaŋere mâreŋ i Aronoŋ opâo Aroe hae ŋekac irecnec fuŋkerâ raku Gileade â Basaŋ mâreŋko fisikac. 34 Jehuzi wiac sasawa ebac ewec â tâpiri‐ticnere fuŋne sasawa i Ŋicwofuŋ jaŋere Binaŋ Qâhâc papia qizecko qâreŋke‐fârekicne. 35 Eme Jehu e apa ŋosafâc‐ticne jaŋerao ʒuhuckehuc hâmome jaŋe fombiŋkoa Samaria haeo duckembiŋ. Eme ŋokâ‐ticne Joahaʒi eki tucticne qarâ ŋicwofuŋ juwec. 36 Jehuzi Samaria haeo ŋicwofuŋ iuhuc Israe ŋic qaŋeŋ‐jopahuc juhame jara 28 tarawec.