11
Ataliazi Judare kikefuŋ jaŋere eri ŋeŋe ro rauc ewec
(Bin II 22:10—23:21)
1 Atalia e ŋokâ‐ticne Ahaʒiazi hâmome honerâ izia faharerâ ŋicwofuŋte garikiŋfâc jaŋe ʒeŋgoma bâsirowec‐jopawec. 2 Ehame Ahaʒiare seŋ, ŋicwofuŋ Joramte otâ Joseba, eki Ahaʒiare ŋokâ Joasi e ŋicwofuŋte ŋokâfâc gâcne jopazo ehapie jaŋeraonec rorâ soŋaŋ‐ticnehec guŋ fofo ficmaŋ mocko soŋjofawec. E iŋuc eme Ataliazi mi qâhâmowec. 3 Atalia e Juda mâreŋko ŋokacwofuŋ juhame motec e Wofuŋte ficko soŋkekicnere Josebahec jara 6 juwec.
4 Eme jara 7 ehame Jojadazi kiŋaŋ sorec‐jopame ra Kari momori ŋic 100 â soŋaŋ jaŋere micnefâc rocjopapie Wofuŋte ufuŋko fisimbiŋ. Fisipie jaŋehec ʒâʒâfic moc ehuc Wofuŋte ufuŋko mumupaŋko râec‐jopahuc ŋicwofuŋte ŋokâ jowatuwec. 5 Ehuc ʒiŋuc jaza mutâc ewec: “Ŋoŋe wiac ʒiŋuc enʒepieŋ: Guru moc sabata hombaŋko soŋaŋ juniŋte wareniŋmu ŋoŋe ŋicwofuŋte fic i soŋaŋkenʒepieŋ. 6 Â guru moc ŋoŋe ine Suru sacmotâcko domanʒepieŋ â guru moc ŋoŋe ine motâcko soŋaŋ domaniŋmu jaŋere râpeo domanʒepieŋ. Iŋuc ehuc ŋicwofuŋte fic i sacfozic ecnenʒepieŋ. 7 Ehame guru jajahec sabata hombaŋko gie tâmiric juniŋmu ŋoŋe ine Wofuŋte ufuŋko ŋicwofuŋ soŋaŋkenʒepieŋ. 8 Ehuc ʒikare wiac meŋeŋicko fefâreme ŋicwofuŋ orâŋkerâ domanʒepieŋ. Ehame ŋic izi me izi maic‐ŋopame qanʒepieŋ. Ŋoŋe iŋuc ehuc ŋicwofuŋzi juocmu sâc junʒepieŋ.”
9 Eme momori micne jaŋe taha bapa Jojadazi mutâcne‐jarewec irec sâc efârembiŋ. Ehuc micne jaŋe ŋicfâc‐jeŋic sabata hombaŋko gie bapa dameŋ‐jeŋic mi fowec jaŋe mecne â hombaŋko gie bapa dameŋ‐jeŋic fowec jaŋe mâmâc jowac‐joparâ taha bapa Jojadarao fisimbiŋ. 10 Fisipie taha bapa e ŋicwofuŋ Dawadire sându maro Wofuŋte ufuŋko fowec i rorâ momori micne jarewec. 11 Jareme soŋaŋ jaŋe ʒikare wiac i mejeŋicko fefâreme ufuŋ ŋifec â ŋifec, faic â juwic erâ alata mâmâc orâŋke‐fârerâ domambiŋ. 12 Eme Jojada e ŋicwofuŋte ŋokâ jowa waharâ qizec‐ticnao eri hendiŋ hecneme huwec. Iŋuc erâ sâcmutâc dâŋqâhâc râcnewec. Eme ŋicwofuŋ âkendâŋnerâ wokemaŋ ruacnembiŋ. Ehame jaŋe me pocpoc qahuc mumbiŋ, “Ŋicwofuŋ e juraʒihuc juzejec sanaŋ!”
13 Eme Atalia e soŋaŋ â ŋic ŋokac jaŋere fânâŋ manarâ jaŋerao Wofuŋte ufuŋko raʒiwec. 14 Ehuc ʒiŋuc honewec: Ŋicwofuŋ âkendâŋ‐jopakicne doma jumbieŋ irec sâcko ŋicwofuŋ e wâtuŋ heririŋko domawec, â momori micne â qeŋ qaqa ŋic jaŋe ŋicwofuŋte gâjoŋko domahapie mâreŋ irec ŋic ŋokac jaŋe sasawa kiwac qawaehuc qeŋ qambiŋ. Jaŋe iŋuc epie Atalia e ŋaqi qoruc‐ticne bâsuckerâ owackehuc muwec, “Doc bapa, doc bapa.” 15 Iŋuc mume taha bapa Jojada e momori 100 jaŋere micne âkendâŋ‐jopakicne jaŋe ʒiŋuc jazarâ muwec: “Momori ŋondeŋkonec bârârieniŋ. Ehuc ŋic i me i moczi bâjâpeme e wâc qâhâmozo.” Taha bapa e ʒiŋuc hâcne jazawec: “Ŋoŋe ŋokac e Wofuŋte ufuŋko ʒira mi qâhâmonʒepieŋ.” 16 Iŋuc mume jaŋe mâc rorâ bara ŋicwofuŋte ficko Becâsic Motâcko fisirâ ira qâhâmombiŋ.
17 Eme Jojadazi ŋic ŋokac jaŋe Wofuŋte ŋicfâc erâ juniŋte Wofuŋ â ŋicwofuŋ erâ ŋic ŋokac jaŋere ʒâʒâfic moc bâfuawec. Erâ ŋicwofuŋ â ŋic ŋokac jaŋere moc bâfuawec wâc. 18 Eme mâreŋ irec ŋic ŋokac jaŋe heâckerâ Baali nemure ufuŋko rarâ ufuŋ i heropiembiŋ. Ehuc alata â ɋâŋ qâqâtâc‐ticne i henʒaŋ qanʒaŋne‐fârembiŋ. Erâ Baali nemure taha bapa Mataŋ e alata ŋerawec irec maŋfuŋko qapie hâmowec. Iŋuc epie taha bapa Jojada e ruc bapa ŋic jaŋe Wofuŋte fic soŋaŋkeniŋte râec‐jopawec. 19 Erâ momori micne â Kariŋic â soŋaŋ â ŋic ŋokac sasawa rocjopame Wofuŋte ufuŋkonec ŋicwofuŋ jowarâ asasai âtehuc soŋaŋ jaŋere motâcko fotâcnerâ ŋicwofuŋ ficko rambiŋ. Eme ŋicwofuŋ e eri ŋeŋe‐ticne rorâ ŋewec. 20 Iŋuc eme mâreŋ irec ŋic ŋokac jaŋe kiwac qawaembiŋ. Erâ ŋicwofuŋte ficko ʒikazi Atalia qapie hâmome haezi fânâŋ tâmiric fowec.
21 Joasi e jara‐ticne 7 bazurâ ŋicwofuŋ ewec.