1 Jehu e jara 7 ŋicwofuŋ juha Joasizi ŋicwofuŋ gie rorâ Jerusalem haeo jara 40 juwec. Neŋgoc‐ticne ʒâŋene Zibia e Bere‐Seba haeonec. 2 Joasi e taha bapa Jojadazi wiac sasawa âzâcne qazuc ewecte ebac eme Wofuŋte ʒâŋe faio sâcke‐fârewec. 3 Erâ ine furu mâreŋ i mi imacke‐fârekicne. Irec ŋic ŋokac jaŋe ʒuhuckerâ furu mâreŋko taha â hosâc âsu rike jumbieŋ.

4 Eme Joasizi taha bapa ʒiŋuc jazawec: “Moneŋ wiac irec me irec taha ufuŋko bafekicne me ŋic moczi wiac irec me irec moneŋ râeocte mukicne, me ŋic moczi e jahacne maŋte Wofuŋte ufuŋko bafisiocmu; 5 taha bapa ŋoŋe ŋic manac‐jopaŋgopieŋ sâc ronʒepieŋ. Ehuc moneŋ izi ufuŋte wiac i me i bâbâpiaŋkenere sâc ekac i honerâ bâpiaŋkenʒepieŋ.” 6 Eme ŋicwofuŋ Joasi ere jara 23 tarame taha bapa jaŋe ufuŋ i sifu mi bâpiaŋkembiŋ. 7 Irec ŋicwofuŋ Joasizi taha bapa Jojada â taha bapa gâcne hetumaŋ‐joparâ ʒiŋuc jazawec: “Ŋoŋe wemocte ufuŋ mi bâpiaŋkeŋgopieŋ? Ŋoŋe âgofâc‐ŋeŋic jaŋeraonec moneŋ mocwâc mi ronʒepieŋ. Moneŋ i ufuŋ bâpiaŋkezo irec biŋe qanʒepieŋ.” 8 Iŋuc jazame taha bapa jaŋe ŋic ŋokac jaŋeraonec moneŋ mocwâc mi roniŋte maŋ mocjaha embiŋ. Erâ jaŋe ufuŋ i mi bâpiaŋkeniŋte manapie sâckewec.

9 Eme taha bapa Jojada e katapa moc rorâ tapanao hawecne bâsurâ ŋic jaŋe Wofuŋte ufuŋko fec wahac ejumbieŋ ira fâreopec alata heririŋko heme ŋewec. Ehame taha bapa motâc soŋaŋ domambiŋ jaŋe moneŋ Wofuŋte ufuŋko bafisikicne i rofârerâ ira râepie huwec. 10 Eme dameŋ ira me ira katapao moneŋ bocjaha ŋeme honerâ ŋicwofuŋte qâqâreŋ ŋic â taha bapa fekicne jaŋe fisirâ Wofuŋte ufuŋko moneŋ ŋewec i woserâ kânoŋko ropie hume micne bândeŋne jumbieŋ. 11 Erâ moneŋ i honepie sâckeme gie soŋaŋ jaŋerao râepie jaŋe fic bapa ŋic ufuŋ ira gie bambiŋ jaŋe 12 â qânâ rârâe â he qanʒaŋ ee ŋic jaŋe gie furi jare jumbieŋ. Erâ moneŋ gâcne katapa â qânâ he qanʒaŋ ekicne erâ wiac i me i Wofuŋte ufuŋ bâpiaŋkeniŋte basambiŋ ira rawec. 13 Erâ Wofuŋte ufuŋko moneŋ bafisimbiŋ izi Wofuŋte biŋe siliwa râqâc me waha bâbâhâpo gunu me soc titie râqâc me qeŋ me gol â siliwa râqâc gâcne mi bambiŋ. 14 Moneŋ i Wofuŋte ufuŋ bâbâpiaŋke â ŋic ira gie bambiŋ jaŋere biŋe sawa ewec. 15 Jaŋe manapie sâckeha gie bambiŋte ŋic gie furi jareniŋte moneŋ mejeŋicko râembiŋ jaŋerao fuŋnere mu wioc moc mi embiŋ. Jaŋe gie‐jeŋic i aijakic jaha bambiŋ. 16 Mâc kiŋ â sâqocne tâtâmire taha irec moneŋ i ine Wofuŋte ufuŋko mi bafisimbiŋ. Moneŋ izi ine taha bapa jaŋere biŋe ewec.

17 Eme dameŋ ira Siria ŋicwofuŋ Haʒaelezi ferâ Gati haeo ʒika qahuc hae i rowec. Erâ Jerusalem haeo ʒika qaocte fezo hata fuŋkewec. 18 Ehame Juda ŋicwofuŋ Joasizi mamac apa ŋosafâcne Juda ŋicwofuŋ raŋɋane Josafata â Joram â Ahaʒia jaŋe wiac sasawa mumupaŋko râehuc bâtirimbiŋ i â e jahacne wiac tirine, erâ Wofuŋte ufuŋko â ŋicwofuŋ ficticnere kânoŋko gol fowec i rorâ Siria ŋicwofuŋ Haʒaelerao râeme rawec. Iŋuc eme Haʒaele e Jerusalem hae i râpeckerâ rawec.

19 Joasizi wiac sasawa ebac ewec i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne. 20 Joasi e jahacne kiŋaŋ qaqafâc jaŋe râŋgeŋkecnehuc faharerâ Sila haeo hata rakac ira Milore ficko qâhâmombiŋ. 21 Erâ i kiŋaŋ qaqa jahec‐ticne Simeatire ŋokâ Joʒakari â Somerire ŋokâ Joʒabada jahe qapire hâmowec. Hâmome apa ŋosafâcne jaŋerao ʒuhuckehuc Dawidire hae qizecko duckembiŋ. Ehame ŋokâ‐ticne ʒâŋene Amazia eki tucticne qarâ ŋicwofuŋ juwec.