1 Juda ŋicwofuŋ Ahaʒiare ŋokâ Joasi e ŋicwofuŋ jume jara 23 eha Jehu ŋokâ‐ticne Joahaʒizi Samaria haeo juhuc fuŋkerâ Israe ŋic jaŋere ŋicwofuŋ erâ jara 17 juwec. 2 Ehuc Wofuŋte ʒâŋe faio wiac mamakâcne ehuc Nebate ŋokâ‐ticne Jeroboamzi Israe ŋic ejareme hehesic bâfuambiŋ, hata i mi râpeckewec. 3 Irec Wofuŋ e kimbeŋ‐ticnezi Israe ŋic bâruŋke‐jareha Siria ŋicwofuŋ Haʒaele â ŋokâ‐ticne, ʒâŋene Beŋhada, jahere meo ʒuʒuhuc jaha râec‐jopahuc juwec. 4 Iŋuc eme Joahaʒi e Wofuŋ kio wâwâsic ecneme Wofuŋzi kio wâwâsic‐ticne manawec. Wofuŋ e Siria ŋicwofuŋzi fific guguriŋ ejarewec i honewec hâcne. 5 Ehuc bâbâfirie ŋic moc âkendâŋne‐jareme eki Siria ŋic jaŋere meonec batarac‐jopawec. Iŋuc ejareme Israe ŋic jaŋe juwicnao jumbiŋ irec sâc hae‐jeŋickoa jumbiŋ. 6 Erâ Jeroboam kikefuŋfâcne jaŋe Israe ŋic ejarepie hehesic bâfuambiŋ i mi râpeckehuc hata ijaha âtembiŋ. Erâ Asera nemure ɋâŋ qâqâtâczi Samaria haeo ʒuhuckerâ ŋewec. 7 Eme Joahaʒire momori bocjaha mocwâc mi jumbiŋ. Momori ʒiŋuc sawazi jumbiŋ: Becâsicko rara ŋic 50 â keretac 10 â kikezi rara ŋic 10 tauseŋ! Israe ŋic jaŋe Siria ŋicwofuŋzi jopahuc âtenʒaŋ‐jopakume rufe iŋucne embiŋ hâcne. 8 Eme Joahaʒizi wiac sasawa ebac ewec â tâpiri‐ticnere fuŋne i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne. 9 Eme Joahaʒi e hâmome apa ŋosafâcne jaŋerao ʒuhuckehuc Samaria haeo duckembiŋ. Ehame ŋokâ‐ticne ʒâŋene Jehoasi eki tucticne qarâ ŋicwofuŋ juwec.

10 Joasi e Juda ŋicwofuŋ jume jara 37 eha Joahaʒi ŋokâ‐ticne Jehoasizi fuŋkerâ Samaria haeo juhuc Israe ŋic jaŋe ŋicwofuŋ ejarewec. Erâ ŋicwofuŋ juhame jara 16 tarawec. 11 Erâ e wâc Wofuŋte ʒâŋe faio wiac mamakâcne ewec jaha. Ehuc Nebate ŋokâ‐ticne Jeroboamzi Israe ŋic ejareme hehesic bâfuambiŋ hehesic i mi râpeckehuc ijaha ehuc juwec. 12 Erâ Jehoasizi wiac sasawa ebac ewec â tâpiri‐ticnere fuŋne bataniŋkehuc Juda ŋicwofuŋ Amaziahec qaqac epic i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne. 13 Eme Jehoasi e hâmome apa ŋosafâcne jaŋerao ʒuhuckehuc Israe ŋicwofuŋ jaŋe fombiŋkoa Samaria haeo duckembiŋ. Eme Jeroboamzi eri ŋeŋe‐ticnao ŋewec.

14 Elisa e huc bame hâmozo ehuc fohame Israe ŋicwofuŋ Jehoasizi erao hurâ ʒiŋuc muhuc kiowec: “Mamac‐nane, mamac‐nane! Israere keretac â becâsicko rara ŋic!” 15 Iŋuc mume Elisazi ʒiŋuc âzâcnewec: “Tepe neŋgocne â motecne roc.” Âzâcneme tepe neŋgocne â motecne rowec. 16 Rome Elisazi Israe ŋicwofuŋ ʒiŋuc âzâcnewec: “Tepe âpârec.” Iŋuc âzâcneme tepe âpârewec. Âpâreme Elisazi meticne ŋicwofuŋte me faio râewec. 17 Ehuc muwec, “Ʒoaŋ wewefunaopec qâqâtâc kataŋ i motâc roc.” Mume e iŋuc ewec. Eme Elisazi ʒiŋuc âzâcnewec: “Ajoc, qâtâcnec.” Âzâcneme iŋuc ewec. Eme Elisazi muwec, “Wofuŋzi bafic‐nâpoocmu irec tepe motec, Siria mâreŋ bawahahuc bafic‐nâpoocmu irec tepe motec! Go Siria ŋic Afeke haeo jopaku jopa miziecmu hâcne.” 18 Iŋuc murâ ʒuhuckerâ muwec, “Tepe motec roc.” Iŋuc mume rowec. Rome Israe ŋicwofuŋ ʒiŋuc âzâcnewec: “Tepe motec izi mâreŋ qac.” Âzâcneme arec jahec â moc sawa qarâ behewec. 19 Iŋuc eme Anuture ŋic e Israe ŋicwofuŋ ere aarickeme muwec, “Go mâreŋ arec 5 me 6 qanʒaŋ. Go iŋuc etec muzac ine Siria ŋic jopaku jopa mizienʒaŋ. Ʒi ine go Siria ŋic arec jahec â moc sawa jopacmu.”

20 Eme Elisa hâmome duckembiŋ. Ehame jara mocte maŋnao ʒoaŋ dameŋ fuŋkehame Moabi ŋic jaŋe Israe mâreŋko râsi fisimbiŋ. 21 Juku dameŋ mocko ŋic gâcne jaŋe ŋic moc hâmome duckezo ehuc juhapie râsi guru fisipie honec‐jopambiŋ. Ehuc ŋic hâmocnere qâŋɋâŋ i Elisare nombâŋko behepie huwec. Eme qâŋɋâŋzi hu Elisare siec heuwarâ izia ɋârerâ fahare domawec.

22 Siria ŋicwofuŋ Haʒaele e Joahaʒire dameŋko Israe ŋic fific guguriŋ mâretec ejarewec. 23 Ehame Wofuŋ e honec‐joparâ busâqoc mana‐jarehuc buuruc qajarewec. E Abraham, Isaka â Jakobo jaŋehec ʒâʒâfic ewec irec erâ moc mi bâsirowec‐jopahuc jaŋehec juwec. Me bebehec‐jopa sanaŋ i moc mi ewec hâcne. 24 Juku Siria ŋicwofuŋ Haʒaele e hâmome ŋokâ‐ticne Beŋhadazi tucticne qarâ ŋicwofuŋ ewec. 25 Ehame Haʒaele ŋokâ‐ticne Beŋhadazi Jehoasi mamac‐ticne Joahaʒihec ʒika qahuc hae gâcne jâoc rowec i Jehoasizi mocwâc rowec. Jehoasi e arec jahec â moc Beŋhada ro waha âte ecnehuc Israe hae i mocwâc rowec hâcne.