1 Ahaʒi e Juda ŋicwofuŋ jume jara 12 eha Ela ŋokâ‐ticne Hoseazi fuŋkerâ Samaria haeo Israe ŋic jaŋere ŋicwofuŋ juhame jara 9 tarawec. 2 Ehuc Wofuŋte ʒâŋe faio wiac mamakâcne ewec. Erâ i Israe ŋicwofuŋ bâbâni juwarembiŋ jaŋere sâc wâc mi bâfuawec. 3 Ehame Asiria ŋicwofuŋ Salimanesezi râsi rocnehuc fisime Hoseazi kiŋaŋ qaqa‐ticne erâ juhuc moneŋ râcnehuc juwec. 4 Juku ine eeatuc gie bahuc kiŋaŋ sorec‐jopame Aigita ŋicwofuŋ Soerao rambiŋ, erâ jara sâc ejujec iŋuc ehuc Asiria ŋicwofuŋ moneŋ moc mi râcnewec; irec Asiria ŋicwofuŋzi fuŋne‐ticne iŋuc manahuc rorâ kâpâcwâru ficko râewec. 5 Asiria ŋicwofuŋ e iŋuc erâ Israe mâreŋ sâcke‐fârehuc ro rauc eraku Samaria haeo fisirâ hae i somâckera fohuc juhame jara jahec â moc tarawec. 6 Eme Hosea e ŋicwofuŋ gie bahuc jume jara 9 eha Asiria ŋicwofuŋzi Samaria hae rorâ Israe ŋic Asiria mâreŋko bacjopa rawec. Ehuc Hala haeo â Goʒaŋ mâreŋte opâ moc ʒâŋene Haboro ira erâ Medeŋic jaŋere hae sâko ŋerawec sâc ira mâmâc râec‐jopa rawec.

7 Israe ŋic jaŋe Wofuŋ Anutu‐jeŋiczi Aigita mâreŋko ŋicwofuŋ Faraore meonec batarac‐joparâ bacjopa wefuwec e bunao bahuc sâqocne bambiŋte â nemu gâcne dape‐jarembiŋte iŋuc fua‐jarewec. 8 Erâ Israe ŋic jaŋe mâreŋ ira fisiniŋte Wofuŋzi ŋic gurune gurune jâpec‐jopawec jaŋere sâcmutâc â eebapao siŋkembiŋ irec iŋuc fua‐jarewec. Jaŋe iŋuc ehuc Wofuŋ Anutu‐jeŋic nifepupu ecnembiŋ hâcne. 9 Ehuc Wofuŋ Anutu‐jeŋicte maio wiac kecʒiŋuc epie mi sâckewec: Hae‐jeŋic sâc mâreŋ hepie feme mutirihuc furu murambiŋ, erâ hae sacsanaŋ‐ticnehec â ʒae wiac i wâc mutirimbiŋ. 10 Ehuc nemu wâtuŋ â ɋâŋ qâqâtâc wiac furu mâreŋko â jâc dodomanere fuŋnao râepie doma rawec. 11 Iŋuc ehuc Wofuŋzi ʒâŋe fai‐jeŋicko ŋic gurune gurune jopa jâpec ejarewec jaŋe mâsi ehuc jumbiŋ irec sâc jaha ehuc Israe ŋic jaŋe mâreŋ iŋucnao hosâc âsu rike jumbieŋ. Wiac hehesicne iŋuc hâcne ehuc Wofuŋ maŋbâiŋ ecnembiŋ. 12 Ehuc ɋâŋ qâqâtâc jaŋere kiŋaŋ mi qaniŋte Wofuŋzi dâŋ ʒiŋuc jazawec i sifu mi manambiŋ: “Ŋoŋe wiac ʒi mi enʒepieŋ.” 13 Erâ Wofuŋ e porofete â findaŋdâŋ mumu ŋic jaŋere micko dâŋ ʒiŋuc râehuc Israe â Judaŋic uŋ sawaŋ ejarewec: “Ŋoŋe eebapa‐ŋeŋic sâqocnaonec risierâ apa ŋosafâc‐ŋeŋic sâcmutâc dâŋ mutâcne‐jarepo â kiŋaŋ qaqafâc‐nane porofete jaŋe ŋaza qazuc embiŋ, sâcmutâc â mumutâc dâŋnane i ŋoŋe paŋnea bajunʒepieŋ.” 14 Iŋuc jazame jaŋe apa ŋosafâc‐jeŋic jaŋe Wofuŋ Anutu mi manasiŋkembiŋ irec sâc jaha dâŋticne mi mamana maŋsanaŋ bâfuambiŋ. 15 Ehuc apa ŋosafâc‐jeŋic jaŋehec ʒâʒâfic ewec â uŋ sawaŋ ejarewec i â mumutâc dâŋticne mâmâc qikiŋnembiŋ hâcne. Ehuc ɋâŋ qâqâtâc burecne mai ejarehuc burecŋic jaha embiŋ. Erâ Wofuŋzi ŋic gurune gurune rârec‐joparâ juhuc wiac ebac embiŋ sâc ijaha enʒipiŋte aka hejarewec i sifu huckembiŋ. 16 Iŋuc ehuc Wofuŋ Anutu‐jeŋicte sâcmutâc râpecke‐fârerâ jaŋe jaŋac aeŋ wiac rike dockerâ bulimakao motecne jajahec jahere hawari ba akic embiŋ â Asera nemure ɋâŋ barâ sambâŋko mosa bâpiŋ dape‐jarembiŋ, erâ Baali nemu wâc dapecnembiŋ. 17 Iŋuc ehuc otâ ŋokâfâc‐jeŋic joparâ taha bâzi rikec‐jopambiŋ. Ehuc Wofuŋte ʒâŋe faio hehesicko huutuckerâ Wofuŋ maŋbâiŋ ecnembiŋ. 18 Irec Wofuŋzi Israe ŋic aaric mana‐jarehuc ʒâŋe mai‐ticnaonec bârâriec‐jopawec. Eme jaŋeraonec moczi moc mi jujâmbâŋkewec. Juda guru jaŋe sawa jumbiŋ.

19 Erâ Judaŋic jaŋe wâc Wofuŋ Anutu‐jeŋicte sâcmutâc dâŋ i paŋpaŋnea mi bajumbiŋ. Ehuc Israe ŋic jaŋe eebapa gâcne bâfuambiŋ ira ninipembiŋ jaha. 20 Iŋuc epie Wofuŋzi Israere ɋâricfâc sasawa qikiŋ‐joparâ fific bacjopahuc ima bapa ŋic jaŋere meo râec‐joparâ juku ʒâŋe mai‐ticnaonec bârâriec‐jopa‐fârewec.

21 Wofuŋ e iŋuc ehuc Israe ŋic Dawidire kikefuŋkonec bârâc qârâwiŋ‐jopame jaŋe Nebate ŋokâ‐ticne Jeroboam ŋicwofuŋ âkendâŋnembiŋ. Eme eki Israe ŋic fârec‐jopame Wofuŋ râpeckerâ bahac sâko bâfuambiŋ. 22 Ehuc Jeroboamzi wiac hehesicne ebac ewec i mi râpeckehuc ira qohota‐fârembiŋ. 23 Iŋuc epie Wofuŋ e kiŋaŋŋicfâc‐ticne porofete dâŋ jazawec irec sâcko Israe ŋic jaŋe ʒâŋe mai‐ticnaonec bârâriec‐jopawec. Israe ŋic mâreŋ‐jeŋickonec rocjoparâ Asiria mâreŋko kâpâcwâru bacjopa rakicne jaŋe dameŋ ʒi juŋgopieŋ jaha.

24 Ehame Asiria ŋicwofuŋzi Israe ŋic jaŋere okacne Babe â Kuta, Awa â Hamati erâ Sefarawaim mâreŋkonec ŋic ŋokac rocjoparâ Samaria hae ŋerawec ira guruc‐jopawec. Eme jaŋe Samaria mâreŋ rauckerâ hae ŋerawec ira jurambiŋ. 25 Erâ ira fisi juhuc Wofuŋ araŋ mi bacnembiŋ. Eme irec Wofuŋzi laioŋ ejareme guru‐jeŋicko fisirâ jaŋeraonec gâcne ki qâsuc ejarembiŋ. 26 Iŋuc ejarepie Asiria ŋicwofuŋ dâŋ ʒiŋuc âzâcnembiŋ: “Ŋic gurune gurune goki rocjoparâ bacjopa ra Samaria hae ŋerakac sâc guruc‐jopameŋ jaŋe mâreŋ irec nemure sâcmutâc mi manaŋgopieŋ. Irec erâ nemuzi laioŋ ejareme guru‐jeŋicko fisirâ ŋic ŋokac gâcne ki qâsuc ejareŋgopieŋ.” 27 Iŋuc âzâcnepie Asiria ŋicwofuŋzi dâŋ ʒiŋuc jazawec: “Ŋoŋe mâreŋ irecnec taha bapa bacjopa warekicne jaŋeraonec moc bârisiepie ra ijaha juhuc mâreŋ irec nemure sâcmutâc qazu‐jarezejec.” 28 Iŋuc mume Samaria mâreŋkonec taha bapa bacjopa rakicne jaŋeraonec moczi mocwâc risierâ Bete haeo juhuc Wofuŋ araŋ bacnehuc juniŋte qazu‐jarewec.

29 Ehame ŋic gurune gurune jaŋe hae‐jeŋic sâc jurahuc sifu nemuɋâŋ barâ Samaria ŋic jaŋe furu mâreŋ barambiŋ ira râec‐jopambiŋ. 30 Ehuc Babeŋic jaŋe Suko‐Beno nemu araŋ bacnembiŋ â Kutiŋic jaŋe Neregali nemu araŋ bacnembiŋ â Hamati ŋic jaŋe ine Asima nemu araŋ bacnembiŋ. 31 Â Awiŋic jaŋe nemu jahec‐jeŋic Nibahaʒi â Taratac jahe araŋ bajactembiŋ â Sefarawaim ŋic jaŋe wâc iŋuc jaha nemu jahec‐jeŋic Adiramelec â Anamelec jahe araŋ bajactehuc naru motecfâc‐jeŋic joparâ bâzi rike‐jactembiŋ. 32 Jaŋe iŋuc ehuc Wofuŋ wâc araŋ bacnerâ guru‐jeŋickonec ŋic fuŋne fuŋne bâwosâec‐jopapie jaŋe furu mâreŋte taha bapa juhuc ŋic ŋokac jaŋere erâ furu mâreŋko taha bâzi rike jumbieŋ. 33 Iŋuc ehuc ŋifec Wofuŋ araŋ bacne jumbieŋ â ŋifec ine mâreŋfuŋ‐jeŋicte eebapa i bâjâpehuc nemufâc‐jeŋic kiŋaŋ qajare jumbieŋ jaha. 34 Erâ eebapa raŋɋane i ʒiŋuczia bajuŋgopieŋ jaha. Jaŋe Wofuŋ araŋ mi bacneeŋgopieŋ, ehuc Wofuŋzi dâŋsanaŋ â mumutâc erâ sâcmutâc dâŋ Jakobo, ʒâŋe‐ticne Israe muwec, ere ɋâricfâc jarewec i wâc mi reŋkeeŋgopieŋ. 35 Wofuŋ e jaŋehec ʒâʒâfic ehuc ʒiŋuc mutâcne‐jarewec: “Ŋoŋe nemu gâcne araŋ mi bajarenʒepieŋ, me mi dape‐jarenʒepieŋ, me kiŋaŋ qajarehuc taha bâzi wâc mi rike‐jarenʒepieŋ. 36 Ŋoŋe Wofuŋ e jahac tâpiri sâko‐ticnao meticnezi bacŋopa wefuwec e sawa araŋ bacnenʒepieŋ â e sawa fodapecnehuc taha bâzi rikecnenʒepieŋ. 37 Ehuc dâŋsanaŋ â mumutâc â sâcmutâc dâŋ qâreŋke‐ŋarewec i aimuŋ jaha soŋaŋkehuc ebac enʒepieŋ. Ŋoŋe nemu gâcne araŋ mi bajarenʒepieŋ. 38 Erâ ŋoŋehec ʒâʒâfic epo irec mi nikec‐ŋopazejec. Ŋoŋe nemu gâcne araŋ mi bajarenʒepieŋ. 39 Ŋoŋe Wofuŋ Anutu‐ŋeŋic no araŋ banarepie kisâfâc‐ŋeŋic jaŋere meonec batarac‐ŋopapemu.” 40 Iŋuc jazame jaŋe sifu eebapa raŋɋa‐jeŋic i ebac ehuc Wofuŋte dâŋ mi manambiŋ.

41 Ŋic guru i jaŋe iŋuc ehuc ŋifec Wofuŋ araŋ bacnembiŋ â ŋifec ine nemuɋâŋfâc‐jeŋic kiŋaŋ qajarembiŋ. Ehame ɋâricfâc‐jeŋic jaŋe apa ŋosafâc‐jeŋic jaŋe embiŋ irec sâc jaha embiŋzi ehuc juŋgopieŋ jaha.