1 Elare ŋokâ Hosea e Israe ŋicwofuŋ jume jara jahec â moc eha Juda ŋicwofuŋ Ahaʒire ŋokâ Hisikiazi fuŋkerâ ŋicwofuŋ ewec. 2 E jara 25 bazurâ ŋicwofuŋ gie rorâ jara 29 Jerusalem haeo juwec. Neŋgoc‐ticne ʒâŋene Abia e Ʒekariare otâ. 3 Hisikia e apa‐ticne Dawidizi ewec irec sâc jaha ehuc Wofuŋte ʒâŋe faio wiac sasawa ebac eme sâcke‐fârewec. 4 Erâ furu mâreŋ bârârie‐fârerâ nemu wâtuŋ â Asera nemure ɋâŋ qâqâtâc wiac i henʒaŋ qanʒaŋne‐fârewec. Erâ Israe ŋic jaŋe Mosezi aeŋ bâbâroŋzi homa hawari bawec e hosâc âsu rikecne jumbieŋte iŋuc jaha qanʒaŋnewec. Homa hawari irec ʒâŋe Nehusitaŋ mujumbieŋ. 5 Hisikia e Israere Wofuŋ Anuturao rowecke‐jâmbâŋkewec. Irec Juda ŋicwofuŋ ere juwicnao juwarembiŋ me ere faicnao jufembiŋ jaŋeraonec e iŋucne moc mi juwec. 6 E Wofuŋtao qohota sanaŋkewec. Ehuc Wofuŋzi Mose sâcmutâc dâŋ mutâcnecnewec i aimuŋ jaha soŋaŋkewec. 7 E iŋuc eme Wofuŋzi ehec juha wiac i me i ebac ewec sâc fârio qafârewec. E Asiria ŋicwofuŋ maŋrâŋgeŋ bâfuacnehuc kiŋaŋ mi qacnewec. 8 Erâ Filisa ŋic imac‐jopa raku Gaza hae mâreŋko fisirâ ʒae â hae sacsanaŋ‐ticnehec i mâmâc ima bafârewec.

9 Elare ŋokâ Hosea Israe ŋicwofuŋ jume jara 7 ewec â Hisikia e Juda ŋicwofuŋ jume jara 4 ewec dameŋ ira Asiria ŋicwofuŋ Salimanesezi Samaria hae rasi rocnehuc fisirâ hae i somâckewec. 10 Somâckerâ fokuhame jara jahec â moc tarame hae rowec. Hosea e Israe ŋicwofuŋ jume jara 9 ewec â Hisikia e Juda ŋicwofuŋ jume jara 6 ewec dameŋ ira hâcne Samaria hae rokicne. 11 Eme Asiria ŋicwofuŋzi Israe ŋic mâreŋ‐ticnao bacjopa rarâ Hala haeo mecne â Goʒaŋ mâreŋte opâ moc ʒâŋene Haboro ira mecne erâ Medeŋic jaŋere hae ŋerawec ira mâmâc râec‐jopa rawec. 12 Jaŋe Wofuŋ Anutu‐jeŋicte dâŋ qatarahuc ʒâʒâfic‐ticne hetâcnembiŋ, erâ Wofuŋte kiŋaŋŋic Mosezi wiac sasawa mutâcne‐jarewec i mana rereŋ mi ehuc qâsua‐fârembiŋte iŋuc hâcne ejarekicne.

13 Hisikia e ŋicwofuŋ jume jara 14 eha Asiria ŋicwofuŋ Sanheribe eki râsi fisirâ Juda hae basanaŋkekicne sasawa ro rauc ewec. 14 Iŋuc eme Juda ŋicwofuŋ Hisikiazi Lakisi haeo Asiria ŋicwofuŋtao dâŋ râehuc ʒiŋuc muwec: “No wiac epe sâqorewec, irec sifu behecnurâ rac. Go ŋemâc i me i depemurâ munaretec depemu.” Iŋuc mume Asiria ŋicwofuŋ e Juda ŋicwofuŋ Hisikiazi siliwa moneŋ ŋemâc‐ticne 300 â gol ŋemâc‐ticne 30 râcneocte mucnewec. 15 Eme Hisikia e Wofuŋte ufuŋko â ŋicwofuŋ ficticnere kânoŋko siliwa fowec i râcne‐fârewec. 16 Erâ dameŋ ira Juda ŋicwofuŋ Hisikia e Wofuŋte ufuŋ motâcko erâ e jahacne ficmotâcte wâtuŋko gol ɋorockekicne fowec i bâhockerâ Asiria ŋicwofuŋ râcnewec. 17 Eme Asiria ŋicwofuŋ e Lakisi haeo ŋehuc Tarataŋ â Rabasarisi erâ Rabasake momori guru dindiŋhec sorec‐jopame raku Jerusalem haeo Hisikiarao fisimbiŋ. Fisirâ faicpec riqicte opâwâc qoruc qaqajac ŋic ere mâreŋ heririŋnao hata fokac ira domambiŋ. 18 Ehuc ŋicwofuŋte mupie ŋic micne ʒiŋuc jaŋe fisimbiŋ: Ŋicwofuŋ ficte micne sâko Eliakim, Hilikiare ŋokâ hâcne, â qâqâreŋ ŋic Sebena erâ Asafare ŋokâ Joa micne sâko‐jeŋic hâcne.

19 Eme Rabasakezi ʒiŋuc jazawec: “Hisikia âzâcneniŋ, ŋicwofuŋ sâko, Asiria ŋicwofuŋ hâcne, e ʒiŋuc mukac: ‘Ʒi wemo wiaczi dapeŋ egareha roweckehuc juekic? 20 Go manatec dâŋ sawazi ʒikare mamana â tâpiri bâfuaocmu ekac me? Go morao roweckehuc no râpecnumeŋ? 21 Ojai, go kâcbiŋ gunu herickekicne keci, Aigita hâcne, erao roweckekomec; eme gunu ira roweckeeŋgopieŋ jaŋe mejeŋic âke mârâŋkeekac i. Eme Aigita ŋicwofuŋ Farao e ŋic sasawa erao roweckeeŋgopieŋ jaŋe iŋuc hâcne ejareekac. 22 Go ʒiŋuc mecne nazacmu, “Nâŋe Wofuŋ Anutu‐nâŋec erao roweckeeŋgopeneŋ.” Hâc, eme weniŋuc? Hisikia e furu mâreŋ â Wofuŋ taha babacnere alata wiac ŋerawec i bârâriehuc Juda â Jerusalem ŋic ʒiŋuc jazawec, “Ŋoŋe Jerusalem haeo alata kecʒirec maŋfuŋko sawa dapehuc numunʒepieŋ,” Wofuŋ Anutu ere mukomec me? 23 Ajoc, bomboŋ‐nane, Asiria ŋicwofuŋ hâcne, ehec fuŋne babataniŋ gie banic me! Eme honenaŋ: No becâsic 2 tauseŋ garepemu, goki ine becâsicko rara ŋic irec sâc jaha sâcne bâfuac‐jopacmu me weniŋuc? 24 I eipiehuc ine wemocko bomboŋ‐nanere kiŋaŋŋic wawahane jaŋeraonec momori micne mocjaha mac sâcne jâpetec risieocmu? Eme go iŋucnezi ine keretac â ŋic becâsicko rarare Aigita jaŋerao ʒâŋe fihuc juekic! 25 Me weniŋuc? No Wofuŋzi mi mana‐nareha mâreŋ ʒi râsi ecnehuc ima qapemurâ wefupo me? Aricne, Wofuŋ e ʒiŋuc nazawec: Go ferâ mâreŋ keci râsi ecnehuc ima qazemec.’ ”

26 Eme Hilikiare ŋokâ Eliakim â Sebena â Joa jaŋe Rabasake ʒiŋuc âzâcnembiŋ: “Kiŋaŋŋicfâcge nâŋe Aramaio dâŋko dâŋ nâzâzemec, nâŋe dâŋ i sâcne manaŋgopeneŋ; ŋic ŋokac qânâsacko ŋeŋgopieŋ jaŋere maio nâŋehec Hebiraio dâŋko muc manac mi ezemec.” 27 Rabasakezi ine muwec: “Hâc, dâŋ bajukopac i bomboŋ‐nanezi ŋoŋe â bomboŋ‐ŋeŋic ŋoŋe sawa ŋazapemurâ sorecnuwec me? Aricne, e ŋic qânâsacko ŋeŋgopieŋ â ŋoŋehec mâmâc ho fâzi‐ŋeŋic nâniŋte mukicne jaŋerao mâmâc mupemurâ sorecnuwec.”

28 Rabasakezi iŋuc murâ ra mai domahuc Hebiraio dâŋko hahaŋne bahuc ʒiŋuc muwec: “Ŋicwofuŋ sâko, Asiria ŋicwofuŋ hâcne, ere dâŋ mananiŋ! 29 Eki ʒiŋuc mukac: ‘Ŋoŋe Hisikia manacnepie mi eatuc‐ŋopazejec, e nore meonec batarac‐ŋopaocte tâpiri mi focnekac. 30 Erâ ʒiŋuc muhuc Wofuŋtao roweckeniŋte ŋazame mi mananʒepieŋ wâc: Wofuŋ e jâmbomac batarac‐nâpoocmu, ehuc hae sâko ʒi Asiria ŋicwofuŋte meo feocte mi manaocmu.’ 31 Asiria ŋicwofuŋzi ʒiŋuc mukacte Hisikia dâŋticne mi mananʒepieŋ: ‘Ŋoŋe nohec wama babac erâ haeonec wahanʒepieŋ; iŋuc erâ ŋoŋe sasawa ŋaŋacne waiŋ â nemuja nâhuc junʒepieŋ, erâ opâ i ŋaŋacne nombâŋkonec fiarâ nâhuc junʒepieŋ wâc. 32 Iŋuc ehuc juhapie noni fâ fisirâ mâreŋ mocko jowac‐ŋopa rapemu, mâreŋ i ŋaŋacne mâreŋ iŋucne, ira padi mecne, waiŋ mecne, nânâ mecne, waiŋ gie mecne oliwa jâc mecne â baŋac mâmâc forakac hâcne. Irec ŋoŋe ira mi hâhâmo juraʒihuc junʒepieŋ. Eme Hisikiazi eatuc‐ŋopahuc ʒiŋuc mume mi mananʒepieŋ: Wofuŋzi batarac‐nâpoocmu. 33 Ŋicguru gâcne jaŋere nemuzi mâreŋ‐jeŋic Asiria ŋicwofuŋ ere meonec moc batarambiŋ me? 34 Hamati â Arapada hae jahere nemufâc weni? Sefarawaim â Hena erâ Iwa hae jaŋere nemu jaŋe weni? Â Samaria mâreŋte nemufâc jaŋe weni? Jaŋe Samaria nore meonec moc batarambiŋ me? 35 Me mâreŋ irec nemu sasawa jaŋeraonec mozi mâreŋ‐ticne nore meonec batarawecte Wofuŋzi Jerusalem hae nore meonec bataraocte muŋgopieŋ?’ ”

36 Jaŋe ine mâc fâsâerâ domahuc dâŋ moc mi bâtikiecnembiŋ, i ŋicwofuŋte dâŋ moc ʒiŋuc fowecte iŋuc embiŋ: “Ŋoŋe dâŋ moc mi bâtikiecnenʒepieŋ.” 37 Eme Hilikiare ŋokâ Eliakim, ŋicwofuŋ ficte micne juwec, e â qâreŋŋic Sebena erâ Asafare ŋokâ, micne sâko Joa hâcne, jaŋe ŋaqi‐jeŋic bâsuckerâ Hisikiarao risierâ Rabasakezi dâŋ muwec irec binaŋ bacnembiŋ.