1 Josia e jara‐ticne 8 bazurâ fuŋkerâ ŋicwofuŋ ehuc Jerusalem haeo juhame jara 31 tarawec. Neŋgoc‐ticne ʒâŋene Jedida e Bozikata haeonec ŋic moc ʒâŋene Adaja ere otâ. 2 Eme Josia e Wofuŋte ʒâŋe faio wiac sasawa ebac eme sâcke‐fârewec. Erâ apa‐ticne Dawidire kike hata i âte sifuckehuc raʒi âte wefu âte moc mi ehuc ijaha bâjâpe‐fârewec.

3 Eme Josia e ŋicwofuŋ jume jara 18 eha Mesulamte ŋosa Azalia ŋokâ‐ticne qâreŋŋic Safaŋ e ŋicwofuŋzi ʒiŋuc muhuc Wofuŋte ufuŋko sorewec: 4 “Go taha bapa sâko Hilikiarao rarâ âzâcnetec Wofuŋte ufuŋko moneŋ bafisipie motâc soŋaŋ jaŋe ŋic ŋokac jaŋeraonec rorâ qâzuckembiŋ i wosezejec. 5 Erâ moneŋ i Wofuŋte ufuŋ hone soŋaŋ eeŋgopieŋ jaŋere meo râezejec. Eme jaŋe gieŋic Wofuŋte ufuŋ bâpiaŋkeniŋmu jaŋe gie furi jarenʒepieŋ. 6 Ine hâcne, kamunda â fic bapa â qânâ rârâe ŋic, erâ katapa me ufuŋ bâpiaŋkezore qânâ he qâfâuc ekicne irec furi wâc mâmâc ezejec. 7 Moneŋ raocmu irec fuŋne manazore mu wioc mi ejarezo. Jaŋe moneŋ mejeŋicko râeniŋmu i aijakic jaha ebac eniŋmu hâcne.”

8 Eme taha bapa sâko Hilikiazi qâreŋŋic Safaŋ dâŋ ʒiŋuc âzâcnewec: “No Wofuŋte ufuŋko sâcmutâc dâŋte papia qizec bâfuapo.” Iŋuc âzâcnerâ papia qizec i Safaŋ râcneme wosewec. 9 Eme qâreŋŋic Safaŋ e ŋicwofuŋtao risierâ dâŋ binaŋ ecnehuc ʒiŋuc âzâcnewec: “Kiŋaŋ qaqafâcge jaŋe ufuŋko moneŋ foekac i rofârerâ Wofuŋte ufuŋ hone soŋaŋ eeŋgopieŋ ŋic i jaŋere meo râembiŋ.” 10 Iŋuc murâ ʒuhuckerâ ŋicwofuŋ dâŋ ʒiŋuc âzâcnewec: “Taha bapa Hilikia e papia qizec moc narejec.” Safaŋ e iŋuc murâ ŋicwofuŋ wosecnewec.

11 Eme ŋicwofuŋ e sâcmutâc papia qizecko dâŋ fowec i manarâ ŋaqi qoruc‐ticne bâsuckewec. 12 Ŋicwofuŋ e iŋuc ehuc taha bapa Hilikia â Safaŋte ŋokâ Ahikam â Mikajare ŋokâ Akaboro, erâ qâreŋŋic Safaŋ â ŋicwofuŋ e jahacne kiŋaŋ qaqa, ʒâŋene Asaja, jaŋe dâŋ ʒiŋuc muhuc jaza sorec ewec: 13 “Apa ŋosafâc‐nâŋec jaŋe papia qizec ʒira dâŋ qâreŋkekicne fokac i reŋkehuc irec sâcko wiac ebac mi embiŋte Wofuŋte kimbeŋ hâhâwicnezi fai‐nâŋecko fekac. Irec ŋoŋe rarâ papia qizec ʒira dâŋ fome bâfuakicne irec erâ no nahacne â ŋic ŋokac â Judaŋic sasawa nâŋere erâ Wofuŋ mu wioc ecnenʒepieŋ.”

14 Iŋuc jazame taha bapa Hilikia â Ahikam â Akaboro â Safaŋ erâ Asaja jaŋe Harihasire ŋosa Salum, Tikiwa ŋokâ‐ticne hâcne, ere ŋonâŋ Hulidazi Jerusalem hae ŋondeŋne moc ʒâŋene Dâkâne Jajahec ira porofete ŋokac juwec erao rapie dâŋ muc manac embiŋ. Ŋowe‐ticne Salum e ine ŋicwofuŋte ŋaqi soŋaŋ juwec. 15 Eme ŋokac eki ʒiŋuc jazawec: “Israere Wofuŋ Anutu e ʒiŋuc mukac: ‘Norao sorec‐ŋopajec ŋic e ra âzâcneniŋ, 16 Wofuŋ e ʒiŋuc mukac: Manakic, no Juda ŋicwofuŋzi papia qizecko dâŋ sasawa wosejec irec fârine i hae mâreŋ â ŋecjucfâc‐ticne jaŋerao bâfuapemu. 17 Jaŋe no râpecnuhuc mejeŋiczi ɋâŋ qâqâtâc wiac bahuc aaric bâfua‐narerâ nemu gâcne hosâc âsu rike‐jarembiŋ, irec kimbeŋ‐nanezi mi hâhâpo bâruŋkehuc jaha foocmu hâcne. 18 Eme ŋoŋe no mu wioc enareniŋte sorec‐ŋopajec Juda ŋicwofuŋ e ʒiŋuc âzâcnenʒepieŋ: Go dâŋ wosemeŋ irec Israere Wofuŋ Anutuzi ʒiŋuc mukac: 19 No hae mâreŋ â ŋecjucfâc‐ticne ʒi jaŋe sâwecte biŋe ehuc omaeniŋte dâŋ mupo i manarâ ŋaqi qorucge bâsuckehuc nore maio kiomeŋ â maŋge bârisiehuc norao rume‐jâmbâŋkemeŋte no wâc mana‐garepo. 20 Irec go ʒiŋuc manac: No apa ŋosafâcge jaŋerao ʒuhucgurâ ʒâŋeruŋgao wamao râecgupemu. Ehame hae mâreŋ ʒira wiac repicne bâfuapemu i ʒâŋe fârigezi moc mi honecmu.’ ” Iŋuc jazame jaŋe risierâ dâŋ i ŋicwofuŋ âzâcnembiŋ.