1 Eme Josia e dâŋ râeme rame Juda â Jerusalem soŋaŋ jaŋe erao tumaŋne‐fârembiŋ. 2 Tumaŋne‐fârepie ŋicwofuŋ â Judaŋic â Jerusalem hae rune, erâ taha bapa â porofete â ŋic ŋokac fekicne â wahakicne jaŋe ʒeŋgoma Wofuŋte ufuŋko fembiŋ. Ferâ ŋehuc manahapie ŋicwofuŋzi Wofuŋte ufuŋko ʒâʒâficte papia qizec bâfuakicne ira dâŋ fowec i wose‐fârewec. 3 Wose‐fârerâ ŋicwofuŋ e wâtuŋ heririŋnao domahuc Wofuŋ bâjâpehuc maŋ â mamanasu‐ticnezi sâcmutâc â mumutaniŋ dâŋ â dâŋsanaŋ soŋaŋkerâ ʒâʒâfic papia qizecko dâŋ qâreŋkekicne fowec i ebac eocte Wofuŋte maio mupaŋkewec. Eme ŋic ŋokac jaŋe iŋuc jaha mupaŋke‐fârembiŋ.

4 Iŋuc epie ŋicwofuŋzi taha bapa sâko Hilikia â taha bapa gâcne sasawa erâ motâc soŋaŋ jaŋe Baali â Asera nemu â sambâŋko bâpiŋ guru dindiŋ jaŋere manasuhuc râqâc bapie ŋerawec i Wofuŋte ufuŋkonec bârârieniŋte jazawec. Ehuc wiac i Jerusalem hae upeo Kidoroŋ mâreŋko rikec‐joparâ ʒafe‐jeŋic hezurâ Bete haeo barawec. 5 Erâ Juda ŋicwofuŋ juwarembiŋ jaŋe Juda hae sâc â Jerusalem hae rârec rârec ira furu mâreŋko hosâc âsu rikeniŋte taha bapa âkendâŋ‐jopambiŋ i ekizia bârâriec‐jopawec. Ehuc Baali nemu, mosa ʒoaŋ erâ bâpiŋ ʒâŋe‐jeŋichec â guru dindiŋ gâcne jaŋere hosâc âsu rikehuc jumbiŋ ŋic i jaŋe bârâriec‐jopa‐fârewec hâcne. 6 Erâ Asera nemure ɋâŋ qâqâtâc i Wofuŋte ufuŋkonec rorâ Jerusalem hae upeo Kidoroŋ opâo bahu rikerâ henʒaŋ qanʒaŋnerâ uucne ameckerâ ŋic ŋokac omane jaŋere ʒâŋeruŋ gieo tiewec. 7 Erâ Wofuŋte ufuŋko ŋokac jaŋe Asera nemure ŋaqi wiac fujumbieŋ ira boe sau ŋic jaŋere fic ŋerawec i wâc hetâtie‐fârewec. 8 Erâ Juda hae sâc nemu araŋ bajarembiŋ taha bapa i jaŋe mume fisirâ honehapie hosâc âsu rikehuc jumbiŋ furu mâreŋ i Geba haeonec fuŋkerâ ima baraku Bere‐Seba haeo fisiwec. Erâ haesac motâc qanaopec, hae irec kia kâcɋene, ʒâŋene Josua, ere motâcko faŋfaŋ jaŋere furu mâreŋ fowec i wâc imackewec. 9 Eme taha bapa keci jaŋe Jerusalem haeo Wofuŋte alatao bâzi rikenʒipiŋte aka hejarekicne. Mâc taha bapa âgofâc‐jeŋic jaŋere ŋondeŋko juhuc poroŋ goreŋ tâmiric nâniŋte mana‐jarekicne. 10 Erâ ŋic moczi ŋokâ me otâ‐ticne Moleke nemure bâzi rikezacte Hinom ŋokâfâcne jaŋere wâneŋko Tofete hae ŋewec i wâc iŋuc jaha imackewec. 11 Erâ ŋicwofuŋte fic irec soŋaŋ moc juwec, ʒâŋene Nataŋ‐Melec, ere fickopec Wofuŋte ufuŋ motâc heririŋ ira Juda ŋicwofuŋ jaŋe ʒoaŋ araŋ bacnehuc ere biŋe becâsic mutiric‐jopapie jumbiŋ i wâc bârâriec‐jopa‐fârewec. Erâ ʒoaŋte biŋe keretac ŋerawec i wâc iŋuc jaha rike‐fârewec. 12 Erâ Juda ŋicwofuŋ jaŋe Ahaʒire fic feŋgaŋne faic irec bupunao alata bapie ŋewec i mecne â Manasezi Wofuŋte ufuŋ hae ʒoŋa jajahec ira alata bame ŋewec i wâc mâmâc hetâtierâ henʒaŋ qanʒaŋneme uucne eme rorâ Kidoroŋ opâo beheme huwec. 13 Erâ Oliwa tiki juwicnao Jerusalem hae ʒoaŋ wewefunao ira Israe ŋicwofuŋ Salomozi Sidoŋŋic â Moabi ŋic â Amoŋŋic jaŋere nemu repicne Asitorete â Kemosi â Milikom jaŋere furu mâreŋ barawec i wâc hetâtie‐fârewec. 14 Ehuc ɋâŋ wâtuŋ â Asera nemure ɋâŋ qâqâtâc doma rawec i hetâtierâ henʒaŋ qanʒaŋnehuc jaŋere dodoma tacko ŋic jaŋere siec guruckewec.

15 Erâ ʒuhuckerâ Bete haeo Nebate ŋokâ‐ticne Jeroboamzi Israe ŋic ejareme hehesic bâfuahuc alata â furu mâreŋ bapie ŋerawec i wâc iŋuc jaha hetâtierâ qânâ wiac i henʒaŋ qanʒaŋnekume uucne fuawec. Erâ Asera nemure ɋâŋ qâqâtâc i wâc ʒoczi rikewec. 16 Josia e iŋuc erâ forisie tikio ʒâŋeruŋ gufukicne ira siec fome honewec. Honerâ kiŋaŋ sorec‐jopame ra ro bafisipie Anuture ŋiczi wiac sasawa irec findaŋdâŋ muhuc Wofuŋte dâŋ mutaniŋkewec irec sâcko alata faio rikehuc bâbiewec. 17 Iŋuc erâ muwec, “Raecko ocna wemo wiacte qânâ ma honekopac?” Iŋuc wiome hae rune ŋic jaŋe ʒiŋuc âzâcnembiŋ: “I Anuture ŋic ere ʒâŋeruŋ. Eki hâcne Juda mâreŋkonec warerâ, Bete hae ʒira alata henʒaŋ qanʒaŋnekomec irec findaŋdâŋ muwec.” 18 Iŋuc mupie Josiazi muwec, “Behepie fozejec. Moczi moc siec‐ticne rorâ mi bârâriezejec.” Eme irec jaŋe siec‐ticne mi bârâriehuc Samaria mâreŋkonec porofete moc fisirâ hâmowec ere siechec behepie ijaha fowec. 19 Eme Israe ŋicwofuŋ jaŋe Wofuŋ maŋbâiŋ ecnehuc Samaria hae sâc furu mâreŋko ufuŋ bapie ŋerawec i wâc Josiazi bârâriewec. E Bete haeo ewec irec sâc jaha ejarewec. 20 Erâ furu mâreŋte taha bapa hae mâreŋ ira jumbiŋ jaŋe alata faio joparâ fai‐jeŋicko ŋicsiec gâcne rikewec. E iŋuc efârerâ Jerusalem haeo risiewec.

21 Eme ŋicwofuŋzi ŋic ŋokac ʒiŋuc jaza mutâc ewec: “Ŋoŋe ʒâʒâfic papia qizec ʒira dâŋ qâreŋkekicne fokac irec sâcko Wofuŋ Anutu‐ŋeŋicte aakic hombaŋ i mocwâc soŋaŋkenʒepieŋ.” 22 Aakic hombaŋ iŋucne i mumutara ŋic jaŋe ŋic jaŋerao mumutara gie bahuc jumbiŋ, me Israe â Juda ŋicwofuŋ juwarembiŋ dameŋ ira moc mi fuawec. 23 Ŋicwofuŋ Josia e gie bahuc jume jara 18 eha fuŋkerâ Jerusalem haeo Wofuŋte aakic hombaŋ i soŋaŋkepie fowec.

24 Eme Josia e ʒuhuckerâ faŋfaŋdâŋ mumu ŋic â hafec qaŋgec bapa ŋic â ɋâŋ qâqâtâc â nemuɋâŋ, erâ wiac mamakâcne sasawa Juda mâreŋko â Jerusalem haeo fowec i bârâriec‐jopa‐fârewec. Erâ i taha bapa Hilikiazi Wofuŋte ufuŋko papia qizec bâfuawec ira sâcmutâc dâŋ qâreŋkekicne fowec i dopeckehuc iŋuc ewec. 25 Juwicnao ŋicwofuŋ juwarembiŋ jaŋe e iŋucne juhuc Mosere sâcmutâc dâŋte sâcko maŋ â mamanasu â tâpiri‐jeŋic furu jaha Wofuŋtao râepie mi fowec. Me faicnao e iŋucne wâc moc mi fuarâ jumbiŋ.

26 Erâ sifu Wofuŋ e Juda kimbeŋ sâko qacnewec i mi fâre wahawec. E Manasezi maŋbâiŋ ecnewecte iŋuc hâcne ewec. 27 Irec Wofuŋzi ʒiŋuc muwec: “No Israe ʒâŋe mai‐naneonec bârâriepo irec sâc jaha Juda bârâriepemu. Erâ Jerusalem hae no nahac bâwosâepo i wâc behe sanaŋkepemu. Erâ ʒâŋe‐nanezi ufuŋ ʒira foocte mupo ufuŋ i wâc iŋuc jaha behepemu.”

28 Eme Josiazi wiac sasawa ebac ewec irec binaŋ i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne. 29 Josia e ŋicwofuŋ juhame Aigita ŋicwofuŋ Farao Neko e Asiria ŋicwofuŋtao Eufrata opâo fewec. Ehame ŋicwofuŋ Josia e bâfuaocte rame Farao Nekozi honerâ Megido haeo qâhâmowec. 30 Qâhâmome kiŋaŋ qaqafâcne jaŋe qâŋɋâŋ‐ticne keretac mocko râerâ Megido haeonec Jerusalem haeo barambiŋ. Erâ e jahacne ʒâŋeruŋ gufukicne ira duckembiŋ. Ehuc ŋic ŋokac jaŋe Josia ŋokâ‐ticne Joahaʒi rorâ wokemaŋ ruacnehuc mamac‐ticnere tuc qarâ juocte ŋicwofuŋ âkendâŋnembiŋ.

31 Joahaʒi e jara 23 bazurâ ŋicwofuŋ ehuc mosa jahec â moc Jerusalem haeo juwec. Neŋgoc‐ticne ʒâŋene Hamutali Libina haeonec ŋic moc ʒâŋene Jeremia ere otâ. 32 Eme Joahaʒi e apa ŋosafâc‐ticne jaŋe embiŋ irec sâcko Wofuŋte maio mamakâcne ewec. 33 Eme Farao Neko e Joahaʒizi Jerusalem haeo ŋicwofuŋ mi juocte manasuhuc Hamati mâreŋko hae moc, ʒâŋene Ribela, ira kâpâcwâru ficko râewec. Ehuc Juda mâreŋ rune jaŋe siliwa ŋemâc‐ticne 100 â gol ŋemâc‐ticne 100 jaha Farao e jahacne biŋe râcnehuc juniŋte mujarewec. 34 Erâ Josiare ŋokâ Eliakimzi mamac‐ticnere tuc qarâ juocte ŋicwofuŋ âkendâŋnehuc ʒâŋe‐ticne herisierâ Jojakim muwec. Ehuc Joahaʒi rorâ Aigita mâreŋko barame ira hâmowec. 35 Ehame Jojakimzi Farao siliwa â gol râcneniŋte mukicne i râcnehuc juwec. Erâ e Faraozi muwec irec sâc moneŋ râcneniŋte mâreŋ ira sahac taha rârâe hata i fuŋkewec. Ehuc Farao Neko râcneocte mâreŋ irec ŋic ŋokac jaŋe siliwa â gol fojarewec sâc râeniŋte mupaŋke‐jarewec.

36 Jojakim e jara 25 bazurâ ŋicwofuŋ ehuc Jerusalem haeo jara 11 juwec. Neŋgoc‐ticne ʒâŋene Ʒebida e Ruma haeonec ŋic moc ʒâŋene Pedaja ere otâ. 37 Eme Jojakim e apa ŋosafâcne jaŋe embiŋ irec sâcko Wofuŋte maio wiac mamakâcne ewec.