1 Dawidizi ŋicwofuŋ juhame jara jahec â moc roroczi ʒuʒuhuc jaha fuahuc fowec. Iŋuc fuame Dawidizi Wofuŋ kio wâwâsic ecneme Wofuŋzi ʒiŋuc âzâcnewec: “Saulo e Gibeoŋ ŋic qâhâmoc‐jopawecte e jahacne me garikiŋfâcne jaŋerao kiŋtofa fokac.” 2 Iŋuc âzâcneme ŋicwofuŋ e Gibeoŋ ŋic hefârec‐jopawec. Gibeoŋ ŋic jaŋe Israe mâcne, jaŋe Amori ŋic ʒanʒaŋne hâcne. Jaŋe ŋic i jaŋe ʒuhuckerâ juniŋte Israe ŋic jaŋe mupaŋke‐jarehuc akic‐jopambiŋ. Ehame ʒâhec ine juhapie Saulozi Israe ŋic â Judaŋic jaŋere erâ ʒoɋac ehuc jopa mizieocte manasuwec. 3 Eme Dawidizi Gibeoŋ ŋic wio‐jarerâ muwec, “No wemo wiac eŋarepemu? No wiac weniŋuc jaha epe tiŋkeme ŋoŋe Wofuŋte biŋefâc jaŋere manapie sâckeocmu?” 4 Ŋicwofuŋ e iŋuc mume Gibeoŋ ŋic jaŋe dâŋ ʒiŋuc bâtikiecnembiŋ: “Nâŋe mecne â Saulo me garikiŋfâcne mecne nâŋere ŋondeŋko dâŋ fokac i siliwa me golzi sâcne mi bataraocmu. Erâ Israe ŋic izi me izi hâmome irec wâc manapene mi taraocmu.” Iŋuc mupie ŋicwofuŋzi wio‐jarerâ muwec, “Wemo wiac jaha eŋarepemurâ maŋkeŋgopieŋ?” 5 Iŋuc wio‐jareme jaŋe dâŋ ʒiŋuc bâtikiecnembiŋ: “Israe mâreŋko mi junaŋte bâsowec‐nâpohuc omaec‐nâpoocte maŋkewec 6 ŋic ere soctofa 7 nâretec Gibeoŋ haeo ʒira Wofuŋte maio Wofuŋ tiki‐ticnaoa bituac‐jopanʒepeneŋ.” Iŋuc mupie ŋicwofuŋzi muwec: “Sâcne, ŋarepemu.”

7 Erâ ŋicwofuŋ e Wofuŋte ʒâŋeo Saulo ŋokâ‐ticne Jonataŋ mujomirecnewec irec erâ Saulo ŋosa‐ticne Mefibose Jonataŋte ŋokâ hâcne e akickewec. 8 Ehuc Aja otâ‐ticne Rizipa erao Saulore ŋokâ jajahec fuapic ʒâŋe‐jekic Aromoni â Mefibose jahe rocjofawec. Erâ ʒuhuckerâ Mehola ŋic Bariʒilai ere ŋokâ Aderiele â Saulo otâ‐ticne Meraba erâ jahere ŋokâfâc 5 jumbiŋ jaŋe rocjopawec. 9 Erâ Gibeoŋ ŋic jareme jaŋe tikio Wofuŋte maio bituac‐jopapie 7 jaŋe mâmâc hâmombiŋ. Erâ i padi bâbâroŋ qa roro dameŋko iŋuc embiŋ.

10 Iŋuc epie Aja otâ‐ticne Rizipa e târu raŋɋa rorâ qorac mocko rumackewec. Erâ i qa roro dameŋko fuŋkerâ iŋuc ewec. Ehuc wipe qowi jaŋe fisinʒipiŋte ʒoaŋko â ŋafeo ruc bahuc juwec. Iŋuc ehuc juhame hoezi fuŋkerâ qâŋɋâŋ hecjopawec. 11 Aja otâ‐ticne Rizipa, e Saulozi ŋokac mamare rocjopawec jaŋeraonec moc e wiac iŋuc ehuc juhame Dawidizi biŋe manawec. 12 Manarâ ra Jabesi‐Gileade hae rune jaŋeraonec Saulo â ŋokâ‐ticne Jonataŋ jahere siec rowec. Jabesi‐Gileade haeonec jaŋe Bete‐Saŋ haeo ŋic ŋokac guru sâko jaŋere tomaonec kamierâ bacjofa wisembiŋ. Filisa ŋic jaŋe Giliboa tikio Saulo â Jonataŋ jofahuc toma ira hâcne behec‐jofapie fopic. 13 Eme Dawidi e Saulo â ŋokâ‐ticne Jonataŋ jahere siec rorâ fisime ŋic 7 bituac‐jopambiŋ jaŋere siec wâc ro qâzuc embiŋ. 14 Ehuc Saulo â ŋokâ‐ticne Jonataŋ jahere siec mecne â gâcne jaŋere siec mecne i Benjamiŋ mâreŋko Zela haeo mamac ŋosa‐jekic Kisi ere ʒâŋeruŋ gufukicne ira ducjopambiŋ. Ehuc ŋicwofuŋzi mutâcnewec irec sâc efârembiŋ. Iŋuc epie tarame mâreŋ‐jeŋicte erâ numupie Anutuzi mana‐jarewec.

15 Juku Filisa ŋic jaŋe Israe ŋic jaŋehec ʒika mocwâc fuŋkembiŋ. Eme Dawidi e ŋicfâcne jaŋehec mâmâc hurâ ʒika qaku boc betaŋkewec. 16 Ehame ŋicsâko mako jaŋere ɋâric moc, ʒâŋene Isibi‐Benobo, eki Dawidi qaocte manasuwec. E sându‐ticne aeŋ bâbâroŋzi bakicnere ŋemâc‐ticne i 300 ewec â ʒika‐ticne ombâŋnao jomawec. 17 Ehame Zeruja ŋokâ‐ticne Abisaizi fisirâ Dawidi bafickehuc Filisa ŋic qarâ qâhâmowec. Iŋuc eme Dawidi e ŋicfâcne jaŋehec ʒikao mocwâc mi rajâmbâŋkeocte heckecnembiŋ. Juku Israere ʒoctamaczi omaezacte hâwic‐jopame iŋuc hâcne embiŋ.

18 Eme irec faicnao Gobo haeo Filisa ŋic jaŋehec mocwâc qaqac embiŋ. Ehame Husaŋic Sibekaizi ŋicsâko jaŋere ɋâric moc ʒâŋene Safe qâhâmowec. 19 Ehame Gobo haeoa Filisa ŋic jaŋehec mocwâc qaqac embiŋ. Eme Betelehem haeonec ŋic moc ʒâŋene Jare‐Oregim ere ŋokâ Elihanaŋzi Gitiŋic Goliata qâhâmowec. E sându‐ticne i wâtuŋ neŋgocne iŋucne. 20 Eme Gati haeo ʒika mocwâc fuawec. Eme hae ira ŋic ʒâŋe biŋe sâkohec moc juwec e ŋicsâko jaŋere ɋâric jaha. E me kike motec‐ticne i 6 sasawa, qâhâckeme ʒare‐jeŋic 24 ewec. 21 E Israe ŋic hesuac‐jopakume Dawidi hahac‐ticne Simei ere ŋokâ Jonataŋzi qâhâmowec. 22 Ŋic jahec â jahec i jaŋe ŋicsâko jaŋere ɋâriczi Gati haeo jumbiŋ. Ehuc Dawidi â ŋicfâcne jaŋere meo fehuc hâmo‐fârembiŋ.