22
Dawidire mumuteŋ gae
(Mi Mâ 18:1–50)
1 Dawidi e Saulo â ŋic gâcne sasawa jaŋe râsi ecnehapie Wofuŋzi jaŋere meonec batarawec dameŋ ira Wofuŋ muteŋ bâteŋ ecnehuc gae ʒiŋuc hefuawec:
2 “Wofuŋ e qânâ tiki‐nane â huec‐nane â babatara‐nane.
3 Anutu‐nane e nore jâc, dapeŋ‐ticnao soŋkekopac.
E maro‐nane, â bâbâpiaŋte wâtuŋ‐nane â hae sanaŋ‐nane, no erao soŋkekopac.
E ŋeŋezic‐nane, e wiac hâhâwicne fua‐nareme ŋezicnuekac.
4 No Wofuŋ, mumuteŋte hozi, e wira wâwâsic ecneekopac,
eme râsifâc‐nane jaŋeraonec bataracnuekac.
5 “Hâmocte temboŋzi qâurucnuwec,
sisipiricte rumizi bârârâŋnuwec.
6 Hâmoc haere niŋgiŋzi hehawicnuwec,
hâmocte bitiŋ bâmbeŋkepo.
7 “Bipic tara‐nareme Wofuŋ wâsickepo,
Anutu‐nanezi baficnuocte ki owâ ecnepo.
Ufuŋ‐ticnao marac fânâŋ‐nane manawec,
kio owa‐nanezi hazec‐ticnao qaqazuwec.
8 “Eme mâreŋzi ɋiɋiteckerâ suriŋkewec;
sambâŋte hobeteŋnezi wâc suriŋkehuc ɋarac ɋarac qawec;
i ere kimbeŋte iŋuc fuawec.
9 Sâke hawec‐ticnaonec hosâc wahawec,
micticnaonec ʒocbâruŋ wefuwec,
ʒoc kine liŋnerâ râwiŋnewec.
10 E sambâŋ bârâriehuc tara wahawec,
kike rurumaŋ‐ticnao duŋdapâc fowec.
11 Kerubim fainao ŋehuc sawao warewec,
mâŋâŋte faio ŋehuc wareha honekicne.
12 Dapâczi foŋkehuc ŋaqi ecnewec,
karorac ɋâfoŋne opâneheczi orâŋkehuc boze ecnewec.
13 Mai‐ticnao tatamac fowec
irecnec ʒoc kinezi iiŋkehuc bâruŋkewec.
14 Wofuŋzi wâc sambâŋko ɋuŋ hewec,
Femicne Sâkozi dâŋfânâŋ ewec.
15 E tepe‐ticne qâtâcneme râwiŋnerâ rame tâtiembiŋ,
bâbâric‐ticne wicke‐jareme hâwic‐jopame wisembiŋ.
16 Eme hâwec ʒâkâŋ fâhâŋne wirictowec,
â mâreŋte hobeteŋne tâtâc fuawec.
Wofuŋte hahanecko,
sâke rombâŋ‐ticnere fânâŋte iŋuc hâcne fuawec.
17 “E faic juhuc meticne sicnerâ rocnuwec,
ʒâkâŋ sâkoonec fârecnume wefupo.
18 Râsi wânʒâŋ‐nanere meonec bataracnuwec,
â qaisocnumbiŋ jaŋere tâpirizi siricnuha,
sifu mejeŋickonec bâhocnuwec.
19 Dameŋ gâgâpâcne maicnume quruŋ herâ fisi‐narembiŋ,
ehame Wofuŋzi ine sacfozic enarewec.
20 E unucnurâ toma sâkoo râecnuwec,
nore aŋackewecte bataracnuwec.
21 “Wofuŋ e tiŋne jupo irec furine narewec,
menane ɋaɋacne honehuc okacne bazu‐narewec.
22 No Wofuŋte hata paŋʒâic bâjâpepo,
â sindaŋ ehuc Anutu‐nane mi râpeckepo.
23 Tiŋne juju‐ticnere dâŋ i dameŋ sâc hone dendeŋneekopac,
â sâcmutâc dâŋticnaonec moc mi qâsorieekopac.
24 No ere maio bahacmâc jupo,
â kiŋhec ezipore bâec bahuc jupo.
25 Irec Wofuŋzi tiŋne juju‐nanere sâcko okacne narewec,
eebapa‐nane ɋaɋacne fome ʒâŋenezi honewec irec sâcko.
26 “Ŋic maŋuruchec e maŋuruc hawari fuacneekic,
ŋic siocmâc e siocmâc hawari fuacneekic.
27 Ŋic maŋɋaɋachec e maŋɋaɋac hawari fuacneekic,
ŋic bâbâŋoricne e bâbâŋoricne hawari fuacneekic.
28 Ine hâcne, ŋic waha qaqane bafic‐jopaekic,
â maŋfefehec jaŋe bawahac‐jopazore hone jâjâpec‐jopaekic.
29 Jâmbomac, o Wofuŋ, go nore lambe,
go Anutu‐nanezi dapâc‐nane batamaeekic.
30 Jâmbomac, gohec râsi guru sâcne qâtâtiec‐jopapemu,
Anutu‐nane gohec qânâsac sâcne qambaraŋkepemu.
31 Anutu kecʒi e hata‐ticne qarâ biaŋ,
Wofuŋte dâŋ i fâri fideteŋ,
ere dapeŋko soŋkeeŋgopieŋ jaŋe ʒeŋgoma sabec‐jopaekac.
32 “Wiac Wofuŋtao ʒuhuckehuc mo Anutu mo jukac?
Me Anutu‐nâŋectao ʒuhuckehuc mo qânâ sanaŋ mo domakac?
33 Anutu kecʒi e nore dapeŋ sanaŋ,
eki hâcne hata‐naneo ʒârâ ʒâpâ bârâriewec.
34 Kike râe‐narewec i kâte bulimakao jaŋere kike iŋucne,
erâ tiki toŋko âkendâŋnuwec.
35 E menane ʒika gie qazucnewec,
eme aeŋ bâbâroŋzi tepe neŋgoc bakicne
i sâcne fârehuc juekopac.
36 Goki sâsâoc maro biaŋge tahacnumeŋ,
eme baficgezi bâsokacnuwec.
37 Go âte sanaŋkepemurâ mâreŋ sawane bâfua‐naremeŋ,
eme kike‐nanezi biric borocne mi ewec.
38 No râsifâc‐nane jâpec‐jopa raku siric‐jopapo,
erâ omaec‐jopaku jaha risiepo.
39 No jopa mizierâ henʒaŋ‐jopakupe fahareniŋte eipiembiŋ,
kike‐nanere rurumaŋko rândiŋkerâ fombiŋ.
40 Ʒika qaqare tâpiri joma‐naremeŋ,
ehuc râsifâc‐nane bârokawec‐jopatec docke‐narembiŋ.
41 Go râsifâc‐nane jâpec‐jopatec râpecnurâ wisembiŋ,
eme qaisocnumbiŋ jaŋe imac‐jopapo.
42 Jaŋe ʒâŋe fipie bafic moc mi fuawec,
jaŋe Wofuŋtao kio wâwâsic epie okacne mi bâtikie‐jarewec.
43 Henʒaŋ‐jopakupe rufe iŋucne embiŋ,
no henʒaŋ qanʒaŋ‐joparâ âtenʒaŋ‐jopaku
hae ʒoŋao jawa sânʒâŋ bebehene irec sâc behec‐jopapo.
44 “Ŋicne ŋicne jaŋehec ʒika fowefume baficnumeŋ,
qâpuc guru jaŋere micne râecnumeŋ,
ŋicguru kâuc bacjopapo jaŋe kiŋaŋ qanarembiŋ.
45 Ŋic furunezi fisirâ dape‐narembiŋ,
biŋe‐nane manarâ izia micnane reŋkembiŋ.
46 Ŋic furune jaŋe hâbi‐jeŋic goroŋkewec,
eme ɋarac ɋarac qahuc huec‐jeŋickonec wahambiŋ.
47 “Wofuŋ go jukomec. Qânâ sanaŋ‐nane go muteŋguzo,
bâbâpiaŋ‐nanere qânâ sanaŋ, Anutu‐nane go muteŋ bâteŋ egarezo.
48 Anutu goki hâcne mana‐narehaŋ okacne bazu‐jarepo,
go hâcne ŋicguru bâuruŋ‐jopatec nore rurumaŋko raʒimbiŋ.
49 Go hâcne râsifâc‐nane jaŋeraonec bataracnumeŋ,
goki bafaharecnutec râsifâc‐nane siric‐jopapo,
goki hâcne ʒika qaqa jaŋeraonec bataracnumeŋ.
50 “O Wofuŋ, go iŋuc emeŋte qâpuc jaŋere guruo muafecgupe,
â ʒâŋege mumuteŋ gae hecnepe.
51 Go ŋicwofuŋge no ʒeri aŋac sâko tahacnukic,
â wokemaŋ ruacge no aki anonoc bâfua‐narekic,
Dawidi no â ɋâricfâc‐nane tatara tâmiric.”