1 Wofuŋ kimbeŋ‐ticnezi Israe ŋic jaŋerao mocwâc bâruŋkeme Dawidi esoc qafeŋ ecnehuc ʒiŋuc muwec: “Go rarâ Israe ŋic â Judaŋic wosec‐jopac.” 2 Eme irec ŋicwofuŋzi momori jaŋere micne e jahacnehec juwec, ʒâŋene Joabe, e âzâcnerâ muwec: “Go rarâ Israe ŋicguru Daŋ mâreŋkonec ware raku Bere‐Seba haeo fisikac mâreŋ ŋondeŋ ira ŋic ŋokac juŋgopieŋ i wosec‐jopac. Eme no ŋic ŋokac wezimuc juŋgopieŋ jaŋere ʒare manazepac.” 3 Iŋuc mume Joabezi ŋicwofuŋ ʒiŋuc âzâcnewec: “Ŋicwofuŋ‐nane go juhuc honehaŋtec Wofuŋ Anutugezi ŋic ŋokac arec 100 irec sâc basawec‐jopazejec. Eme ŋicwofuŋ‐nane, go irec wemocte boc egarekac?” 4 Iŋuc mume ŋicwofuŋ e Joabe â momori micne gâcne boc decjopakume jaŋe faharerâ Israe ŋic wosec‐jopaniŋte rambiŋ. 5 Erâ Jordaŋ opâ fotâcnerâ wâneŋ ʒâʒâŋiŋko Aroe hae ŋekac ira fohuc gie‐jeŋic fuŋkerâ Gade â Jazere haeo rambiŋ. 6 Eme irecnec ine Gileade haeo rambiŋ, erâ fotâcnerâ Hitiŋic jaŋere mâreŋko hae moc ʒâŋene Kadesi ira fisimbiŋ. Erâ fotâcnerâ raku Daŋ haeo fisimbiŋ. Eme irecnec ine bâŋorierâ Sidoŋ haeo rambiŋ. 7 Erâ Tiro hae sacsanaŋ‐ticnehec ira fisirâ Hiwiŋic â Kanaaŋ ŋic jaŋere hae sasawa i jufârembiŋ. Izi Judare Negebe mâreŋko Bere‐Seba haeo rambiŋ. 8 Eme mâreŋ i jufârerâ mosa 9 â ʒoaŋ gie bapa 20 tarame Jerusalem haeo mocwâc fisimbiŋ. 9 Fisirâ Joabezi ŋic ŋokac wosec‐jopakicne jaŋere ʒare i ŋicwofuŋ râcnewec. Israe maŋnao ŋic ʒika‐jeŋichec momori wânʒâŋ 800 tauseŋzi jumbiŋ â Judaŋic jaŋerao ine 500 tauseŋ jumbiŋ.

10 Ŋic ŋokac wosec‐jopame tarame Dawidire maŋzi mi sâcke‐jâmbâŋkewec. E ʒiŋuc muhuc Wofuŋ âzâcnewec: “No wiac epe sâqore‐jâmbâŋkewec. O Wofuŋ, go kiŋaŋŋicge nore kiŋ bahac i bârâriecmurâ numu‐garekopac. No wiac mutucne jâmbâŋ epo hâcne.” 11 Eme hae fureme Dawidi e fahareme findaŋdâŋ mumu ŋicticne Gade erao Wofuŋte dâŋzi ʒiŋuc fuawec: 12 “Go rarâ Dawidi ʒiŋuc âzâcnec: ‘Wofuŋ e ʒiŋuc mukac: No wiac jahec â moc bâmocke‐garekopac. Irec go gahac, moc me moc mutec bafisi‐garepemu.’ ” 13 Eme irec Gadezi Dawidirao fisirâ âzâcnehuc muwec: “Mâreŋgao jara jahec â moc roroc fuaocte egarekac? Me râsi jaŋe mosa jahec â moc kikeo kikeo egarepie wise wise juzo mukomec? Me mâreŋgao ʒoaŋ gie bapa jahec â moc hucukic mimicne moc fuaocte egarekac? No sorecnujec erao dâŋ okacne weniŋuc barâ risiepemu i aimuŋ jaha manatâc qâtâc ec.” 14 Iŋuc mume Dawidizi Gade ʒiŋuc âzâcnewec: “No busâqoc ŋemâcnere faio jukopac; irec ŋicmeo mi fehuc Wofuŋ e jahac buuruc‐ticne qârâŋnea fokacte sifu ere meo fezepac.”

15 Eme irec Wofuŋzi mume Israe ŋic jaŋerao hucukic mimicnezi furictea fuarâ fohame juku dameŋ bakicne i maickewec. Ehame Daŋ mâreŋkonec raku Bere‐Seba haeo fisikac mâreŋ ŋondeŋ ira ŋic ŋokac 70 tauseŋzi hâmombiŋ. 16 Eme aŋelozi Jerusalem hae bâsiroweocte mene bâfeŋneme Wofuŋ e wiac hâhâwicne fuazo ewec irec maŋne risieme ŋic jaŋerao ima gie bahuc juwec aŋelo e ʒiŋuc âzâcnewec: “I sâcne, bâniniŋkec.” Eme Wofuŋte aŋelo e Jebusi ŋic Arauna ere padi qaqa toma heririŋnao domawec. 17 Ehame Dawidi e aŋelozi ŋic jopahuc juwec i honerâ Wofuŋ âzâcnerâ muwec, “Noni hâcne sâqocne bâfuapo, no wiac hehesicne epo, lama guru ʒi jaŋe ine wiac moc mi embiŋ. Irec no nahacne â wiacfâc‐nane nâŋe sawa bâtiŋ‐nâpozemec.”

18 Eme Gade e ʒoaŋ ijaha Dawidirao fisirâ ʒiŋuc âzâcnewec: “Go ferâ Jebusi ŋic Arauna ere padi qaqa toma fokac ira Wofuŋte alata moc bac.” 19 Iŋuc âzâcneme Dawidi e Wofuŋzi mutâcnewec irec sâc Gadere dâŋ reŋkerâ ferawec. 20 Ehame Arauna e ʒâŋe firâ ŋicwofuŋ â kiŋaŋ qaqafâcne eraopec rapie honec‐joparâ ra ŋicwofuŋ dapecnehuc maŋfuŋ‐ticnao ʒâŋe mai‐ticne mâreŋko hetutuckewec. 21 Ehuc muwec, “Ŋicwofuŋ‐nane, go wemocte kiŋaŋ qaqage norao warekomec?” E iŋuc mume Dawidizi dâŋ ʒiŋuc bâtikiecnewec: “No padi qaqa tomage ʒi furine bahuc Wofuŋte alata moc bapemurâ warekopac. Eme hucukic mimicne fuarâ ŋic ŋokac imac‐jopakac i omaezejec.” 22 Iŋuc mume Araunazi Dawidi ʒiŋuc âzâcnewec: “Ŋicwofuŋ‐nane, go wiac honetec sâckekac sâc i rorâ bâzi rikezemec. Bulimakao ŋicne ʒi qowi bâzire biŋe, jâczi qârândiŋ bakicne â bulimakao jaŋere kioŋ forakac ʒizi ine ʒoc ezejec. 23 O ŋicwofuŋ, wiac sasawa ʒi go qikiŋne‐garekopac.” Iŋuc murâ ʒiŋuc âzâcnewec: “Wofuŋ Anutugezi mana‐garezejec.” 24 E iŋuc mume ŋicwofuŋzi dâŋ ʒiŋuc bâtikiecnewec: “Aricne, no goraonec furine bapemu. No furi tâmiric Wofuŋ Anutu‐nane qowi bâzi mi rikecnepemu.” Iŋuc murâ Dawidi e padi qaqa toma â bulimakao i siliwa ŋemâc‐ticne 50 izi furine bawec. 25 Erâ ira Wofuŋte alata moc barâ qowi bâzi â wama bâzi rikewec. Iŋuc eme Wofuŋzi mâreŋ ira nunumu‐ticne manarâ mume Israe guruo hucukic mimicne fowec i omaewec.